RECAP: A hma lawk Buangpuii lungngaihna te leh a tahna te chu chawp leh chilhin namen lova hlimna leh lawmna ah a rawn inthlak thleng nghal a..Theih chang se zawng Keivawmhranga tangah chuan kumkhua atan thlamuang taka bei hlen vawng vawng hial mai chu a chakin a thlahlel a..Mahse chu zawng thil theih ani si lo….
Buangpuii chu rawn hawichhuak leh in,” Vawiin ni atang chuan U Hrang tiin ka ko thin tawh ang che…” nui sak chungin zawi te in a ti ta sap a….
”Engtiklai pawhin I tan ka lo invawng thianghlimin ka lo nghak reng thin ang che…Min han hre ve reng thin dawn nia..” a tih zawh hnu chuan Buangpuii chu mi te hmuh hlau tih hriat tak leh rang takin an khaw lam pan chuan a tlan let leh ta a..
A chhak kawng lang thei chin atanga chuan a tawp nan ti ni awm takin Keivawmhranga chu a mitmeng duhawm tak te chuan thlahlel em em in a rawn thlir leh hram a..Keivawmhranga pawn ngai em em chunga lo thlir let ve in an in mangtha thei ta hram a, hreh tak chung leh Buangpuii ngai tak chung si chuan mipa in rei tak kal a lo tum tawhna Zote khaw lam chu a pan ta a….

Bung – 64
Keivawmhranga chu Zote khaw lam pan chuan a kal zel a...Chawnchhim khaw lam a hip tu a tha in a na bawk a, nidang ang lo takin kal chak harsa chu a ti ve kher mai...A rilru te te chuan,” Buangpui, khuanu in dam takin lo huaihim zel che se la, ngalfimin lo dam zel ang che..Engtikni ah emaw chuan kan la inhmu leh ngei ang..” Buangpuii ngai tak chung chuan a han ti a...Zote khua hi Chawnchhim atang hian a hlat lutuk vak loh avangin rei tak kal a ngai hran lem lova...
Keivawmhranga a chheh vel ram te a han thlir chuan mawi a tiin hmuhnawm a ti em em a...Lawitlang hnam kaupeng hrang hrangte leh Zote hnam thlahtu ni a ansawi Chhura vuak zawl an lo tih mai phai leh hmun zawl lai te chu kal tlangin chung lai ram vel awm dan mawlh chuan a lung an len kher mai...A chheh vel ram mawi tak chu fan pah a duh avang leh a kalna tur a hlat lutuk loh bawk avanga hmanhmawh lem lo ani hrim hrim bawk a...Kal kawngah te chuan Far thinghmun mawi tak tak te leh mual thelh nawm hmel tak tak te a kal pel a, mawi a tiin han chawlh khaw muan a chak hial a; mahse rei tak erawh chawlh theih ni bik lovin a tum ram pan a a kal zel a ngai si...
Far hmun mawi tak tak te a pelh hnu chuan reilote ah tlang sang lutuk ni lem hran lo chu a va thleng phei ta a, chu tlang chu Chawnchhim a a awmlai a an lo hrilh lawk tawh angin Zote khaw thuthmun tlang chu a nih ngei a ring a... Hmanhmawh lutuk lem lo chuan Zote khaw lam pan chuan a chho ta a...
Hetih hunlai hian Zote khua chu tun a Zote khaw awmna pangngai ah hian la awm ngai lovin tun a khaw awmna chhak zawk, Zote khaw hmun hlui thin zawk a la awm ani a..Keivawmhranga chu Zote lam pan a a chho zel chu engemaw chen hnu ah chuan ral atanga hla tham fe ah chuan an khaw dawhlung ni awm tak te pawh chiang vak lova hmuh theih rei ruai ani ta a...Khaw tam tak ah zin in a paltlang tawh a, mahse a thlahtute khua ngei a han lut mai tur chu a dan a dangin suangtuahna khawvel lamah Keivawmhranga pawh chu a hruai lut nasa hle mai a..
Chutia eng eng emaw ngaihtuah neuh neuh pah a a kal zel lai chuan a chhak deuh lawk atanga hian mipa aw hian,” Kha..khawi lam kal tur nge i nih? Kan khua rawlral a rawn bei tur i ni lo maw? Hriamhrei i keng bawk si a, khualpang zin tur i ang lo riau mai ka ti..” a rawn ti ta chher chher mai le...
A suangtuahna khawvel atanga chuan Keivawmhranga chu rawn harh chhuak thutin aw rawn chhuahna lam a han hawi chhoh nak chuan a chhak lawk ah chuan tlangval tuaitir hmelchhe vak lo leh ngo vak mai, a hmel han en reng reng pawh a la naupang tih hriat tak; a mitmeng erawh a naupan hmel ang hu aia tumruhna a khat leh zamna nei miah lo tih hriat tak ni lawi si; a kut lehlam lehlam a chempui pahnih lo hum ran mai hi Keivawmhranga hmachhawn zawngin a lo ding a....
Keivawmhranga chuan a han en vang vang hnu chuan a zawhna chu chhangin,” Ni love thianpa, chutianga rawlral a rawn chet tum ka ni love..Zote khua ah hian min thlahtute dam an la awm mial takin tiin an sulhnu ka rawn chhui mai zawk ani e...Tunge ka nih min hriat chian loh vang mai mai anih zawk kha...” a han ti a.
A chhak a awm tlangval tuaitir chu a dinna atang chuan rawn zuangthla chhakin Keivawmhranga hmachhawn chiah chuan a rawn ding a...Chu tlangval chuan Keivawmhranga chu a lu chhip atanga a ke ler thleng a uluk tak a en in,” Tunge i nih tih te zawng a rin thiam ve theih mai e..I hmel leh i pianhmang en reng reng pawhin Pasaltha huaisen tak i nih a rinawm a, I hmai a sapui hamna ni awm tak ser te kha ka hmuhhmaih bik love..Kan khaw buanzawl a a huaisenzia leh chakzia chanchin an sawi ban loh, a sakhming an lam chamchi Vankal khaw Pasaltha Keivawmhranga ngei i nih ka ringhlel love...Ka mi ngaihsan em em leh hringfate zinga a tak a ka hmuh chak ber te zinga mi i ni ta ve ang !! Amaherawhchu, eng ang a Pasaltha huaisen leh chak pawh lo ni mah la, kan khaw bei tum a rawn kal i nih ngat chuan tha takin ka chhuah thei bik lo che ani...A tul anih leh ka nunna hial pawhin tuar mai rawh se !!...Mahse, vawiin ni a ka nunna ka chan a ngai dawn anih pawhin kan khaw rawlrala rawn bei tum tih ka hriat chian reng si chu him pialin ka chhuah thei bik tlat lo ani..” zamna leh hlauhna nei miah lo chuan a ti ve ta sak sak mai a...
Keivawmhranga chuan a hma a ding tlangval tuaitir mai chu a mitah tak a han en a, a mitah chuan engmah hlauhthawnna emaw zam rukna a awm miah lo tih chu a hmu ta a...Chutah zet chuan Keivawmhranga pawh rawn tawng chhuakin,” Vala, i hmel han en chuan tlangval tuaitir mai i la nih hmel si a...Tunge ka nih tih hre tho chung si a i thil tum ah i ding tlang lui tlat ngam hi i huaisen ka ti hle mai...I sawi ang a Pasaltha huaisen leh hmingthang ka lo ni tehreng anih chuan dawt thu mai sawi ching ka ni lovang tih pawh min rin sak ve la..Ka kawng dal a i ding lui tlat anih chuan thil duhawm lo leh tha lo zawk i chungah a thleng palh mai ang tih ka hlau a, i nunna hialin a tawrh palh hi ka hlau ani... Nangmah tihnat che emaw i chung a kutthlak hi ka thil tum leh duh ber ani hran lova, pawi sawi lo nunna ka lak sak ngai hek lo... A thu hrimin tunge i hming min hrilh ve thei em? “ a han ti a...
A hma a ding tlangval tuaitir pawh chuan pehhel kual vel lova tha tak a chhangin,” Zote khaw Pasaltha Tinhriama fapa Phuaisabaka ka ni ngai e...” a ti ta a...
Phuaisabaka pa Tinhriama hi Zote hnam peng Saihmang hnam niin, a vanglai chuan Zote khaw pasaltha ani ve thin a...A tlangval laiin Savawm lian tak a sat hlum a, a sa a ei bawk avangin a fapa hming pawh hi Phuaisabaka sa ani...
[ Zote tawng chuan “Ei” tih hi “Bak” ani a (Hmar tawng pangngai erawh chuan “fak” ani thung)...Mak ve deuh mai chu Mizo Pasaltha hmingthang ber te zinga mi Chawngzika Chawngthu, Sialhmur khua kha Nghatebaka ti a hriat lar ani tlat mai a... A hming hi han en chian chuan Duhlian tawngah chuan awmze mumal a nei tlat lo mai a; mahse Zote tawng chuan Nghate-eia tihna mai ani... Chawngbawla leh a pawl ten an khua an rawn run pawh khan Nghatebaka te ho kha sangha tlangvuakna ah an lo kal daih kha ani a; an khua a thlen hnu a, an khua miin an run ani tih a hriatchhuah pawh khan ,”Ka nghate bak hlan a ka khua an lo run vei ni..” a ti e an ti nghe nghe kha ani a...Han ngaihtuah reng reng pawhin “bak” chu “ei” tihna angin an lo hmang ve tih chu a rin zawn theih mai awm e.... Amaherawhchu, Nghatebaka hi Zote hnam ani ti zawng a kan chhuiluh tumna lam ani hran lova, Nghatebaka chu Chawngthu hnam daih ani a; kan sawi tum ber zawk erawh chu Zo hnahthlak hnam te hi kan serh leh sang, thawnthu hlui leh sakhaw hlui ah mai pawh nilovin kan tawng ah te pawh hian kan lo inhnaih em em a, tumah hi inti hrang thei emaw in en hrang thei kan awm lo tih zawk hi ani e...]

Bung - 65
Chutia Phuaisabaka’n Keivawmhranga tha tak a a chhan takah chuan Keivawmhranga pawh chuan chhang let ve in,” Kei hi Keivawmhranga ka ni a, in khua a cheng Pasaltha Ngulkâuva te hi ka laina hnai tak te anni a...Min thlahtute hi Zote khawchhuak anni e..” a han tih meuh chuan Phuaisabaka chuan mak ti em em maiin a hma a ding Pasaltha diktak mai chu a en chawt a...Vankal khaw tlangdung ah mai pawh ni lo, chulai a Hmar hnam khaw delh zawng zawng deuh thaw a khualkai Pasaltha hmingthang, a chakzia leh a huaisenzia lah mite’n hahip a an sawi chamchi chu a thlahtute an khaw mi an lo ni reng mai te chu awih mai harsa a ti hial zawk a..Mahse Pasaltha dik tak ka atang chuan dawt thu mai a chhuah chu a ring bawk si lo...
Keivawmhranga meuhin chutianga a han sawi takah chuan Phuaisabaka pawh chuan thil awmzia chu a hrethiam ve ta a..A hma a ding pasaltha chu rawlrala rawn che tur nilovin a thlahtute khua ah a rawn kal mai ani tih chu a ring ve ta a... Phuaisabaka chuan,” Pu Ngulkauva chu ka mi hriat zawng ani e..I sawi chu thudik anih ka ring ta e..” a ti ta a..
Chutia Phuaisabaka’n ral hlauhawm ani lo tih a pawm ve takah chuan Keivawmhranga chu rawn tawng chhuak lehin,” Ti teh Vala, Kalna tur dang i nei lem lo anih chuan in khaw lam pan chuan min hruai ta che..ka la kal ngai lohna niin tumah ka la hre bawk si lova..” a han ti a...Phuaisabaka erawh chuan,” Ka la haw hman tlat lo ani... Heng lai hmun vela ka thang kamte awh leh awh loh thli thlai tum a rawn kal ka ni a; nakin deuh ah chauh ka rawn haw ve hman ang... Kal zelin khua ah han lut rawih ta la, tupawh i hmuh apiang i kal duhna te chu han zawt ta la, tha takin an lo hrilh mai che ka ringhlel love..Khaw lian tak kan ni lem lova..” tha tak a a tih takah chuan Keivawmhranga leh Phuaisabaka chu an intha then ta a...
Phuaisabaka a kal hran hnu chuan Keivawmhranga chu nui sak chungin a rilru te te chuan,” Kha nau kha a naupan ngaihtuahin a huaisen in a tum a ruh hle mai ka ti...A mitah zamna chhe te mah hmuh tur a awm lo tlat mai..” a ti rauh rauh a.. Zote khaw lam pan chuan a kal leh ta zel a..A hnu deuh chuan ral atanga a hmuh Zote khaw dawhlung te pawh a va thleng phei ta a..Reilote han chawlin Zote khaw lam chu a han thlir vang vang a,” Hei hi maw lo ni ngai a rei tak ka hmuh chak leh ka thlakhlelh min thlahtute lo chenna khua chu !!...Ka chhung leh kua, ka laina hnai tur te dam la awm ve tak ang maw? La awm ni ta tehreng pawh ni se engtin tak min lo dawngsawng ang maw? Lawm takin min lo pawm ang nge thinrim leh lunghnurin min lo hnawl zawk ang?..” a rilru insual neuh neuh chungin a ngaihtuah a...
Rei tak a lo hmuh chak leh a thlahtute lo chenna khua a thlakhlelh em em mai a han lut mai tur chu phur viau e ti lo chuan engemaw zawng tak erawh chuan luh chu a huphurh ang reng viau lawi si a..Rilru mumal tak pawh a pu hlei thei meuh lo ani...
A han chawlh khawmuan deuh hnu chuan eng pawh ni se, khaw pawn a awm rengin awmzia a nei lova; a rilru a zawhna awm zawng zawng te chhan a an awm theihna tur chuan a khaw chhung a luh ve rawih a ngai ani tih hria in Zote khua chu luh zai a rel ta a...Zote khua hi khaw lian tak ani lem lova, in sawmruk bawr vel nufa khua chauh anni a...
Zote khua a han lut chiah chu naupang hnap tawlh par chunga an kut a chaw thing tlang keng te chuan Fei-ki-bar mawi tak nen a Pasaltha ni awm tak an khua a rawn lut chu hmuhnawm ti tak a lo thlirin an lo zui dul dul mai a...”Engtin nge ka han zawh chhuah ang aw..” a rilru te te chuan a ti vang vang a...A chhakah chuan kawngsir deuh ah hian mipa naupang pahnih hi an aia tlem a U deuh ten an lo inbuan tir a...Pakhat chuan “Sairal Buan Pasaltha” hming chhalin a pakhat zawk ve thung chuan “Sapui Chaih Pasaltha” hming a chhal lauh lauh ve thung a...
An inbuan mek lai chuan an pahnih inbuan tirtu an rual U zawk te chu naupang pahnihin an chhal Pasaltha hmingthang pahnihte chu a tu zawk nge chak zawk ang tih ringawt thupui a nei chuan an lo inhnial nasa mai a... Chu thu chu Keivawmhranga’n a han hriat phak chuan a khi suk ringawt a... Heng naupang leh rawltharte hian heng Pasaltha hming pahnihte hi mi pakhat an kohna vek ani tih reng an hre si lo !!...
A hnu deuh ah chuan kalkawng a a tawh nu pakhat chu Keivawmhranga chuan zah pawh dawn tawh lovin a han zawt thawr mai a,” Ka Pi, he khua ah hian Saithlunga pa Pasaltha Ngulkauva, Putar thawkhat tawh tak tur a la cheng mial em aw? Nge famkhua a lawi tawh zawk? Amah a dam tawh lo anih pawhin a vua leh vang te tal dam an la awm mial em le?” a han tih phawng takah chuan chu Nu pawh chu a hamhaih lek lek mai a...
Mahse reilote hnu a rawn chhang let in,” Pu Ngulkauva chu tar tak ni tawh mahse, a la dam ve tawk tawk alawm...Khi khilai inah khian a makpa te nen an cheng mek a... A fanu hming chu Thlovuli ani a, a pasal hming erawh Chiliaka ani thung..Pu Ngulkauva fanu pakhat zawk Selthluaii chu an pa nen veng chhak lamah khian an cheng thung a..Selthluaii pasal hming chu Liangdawma ani....Chungte chu Pu Ngulkauva vua leh vang la dam awm chhun ka hriat te chu anni...A fapa mal neih chhun Saithlunga erawh vanduaithlak takin kum tam tak liam ta khan a boral tawh a...” a han ti dap dap a..Keivawmhranga chuan chu nu chu thinlung tak a lawmthu hrilh chungin a kawhhmuhna pasaltha Ngulkauva chenna in lam pan chuan a kal chho chhak chhak a...
Pasaltha Ngulkauva chenna in ni awm a nu pakhat in a sawi a va thlen chuan Keivawmhranga pawh amah ang lo takin a zam ang reng hle a..Engtinnge a chanchin a va sawi tan ang? An lo awih lovin an lo pawm lo mai ang em? An ro neih ve chhun te chuh pui tur a rawn kal emaw an lo ti palh mai ang em? Engtin tak nge a chhungte chuan an lo dawngsawn ang? tih leh zawhna dang dangte chu amah leh amah a inzawt neuh neuh reng a... Nakin deuh chuan chutia in kawt a din reng ringawt chuan sawtna a nei lo tih hria in a aw han thian karh pah chuan,” In awm em? Ka rawn lut thei ang em?..” a han ti chhuak phawng mai a..
A tir chuan tumahin an rawn chhang lova..Mahse a zawhna ngai bawk vawi khat a aia ring zawk a a han zawh nawn leh takah chuan in chhung lam atang chuan ke pen thawm ri hi a rawn ri phei karh karh a, kawtkhar atang chuan Putar tawh tak, sam var vau tawh mai pakhat hi a rawn dak chhuak a,” Tunge i nih a, engnge i duh le?” a rawn ti a...Keivawmhranga ve thung chuan,” Ka hming chu Hranga ani a..Khualpang rawn zin satliah ve mai ka ni a, Vankal khua atanga rawn zin ka ni... Mikhual in thleng thei mial ang em tiin ka rawn dil tawp mai che u ani e..” a ti ta a..

Bung - 66
Ngulkauva chuan,” Eee Vala, keini ang in ang tehlul a i thleng duh te anih ngai chuan i rawn thleng ta poh aniang chu...Eng teh lua chu ni hran lo mah ila, mikhual chu kan hnar ngai bik em lo ania..nui hawk hawk chungin a han ti a..” Chutia a han tih takah chuan Keivawmhranga pawh lawm takin Ngulkauva te inchhungah chuan a lut ve ta a...
Keivawmhranga chu in chhunga a luh hnu chuan a han hawi kual vel a, Pasaltha chenna ani tih hriat theih tak maiin Ngulkauva thah ni awm tak Sa chi hrang hrang lu a lo intar ve thlih thliah a..Keivawmhranga chuan,” Ka pu, i vanglai chuan Pasaltha huaisen tak chu i ni ngei ang maw? Min lo hrethiam la ka han zawt phawng mai che ang a...Nangmah chauh in em ni hetah hian i chen? Khawnge i chen pui midangte hi ka va hmu ve lo ve?...” a han ti a..
Chutah chuan Ngulkauva chuan hreh tak leh a lungchhe lek lek tih hriat tak chunga rawn chhangin,” Zep thu a cheng lova, i awm rei chuan kan khaw mite kâ atangin i hre leh dawn tho a...Ka han hrilh law law mai teh ang che.. Keini ang kum rualah te hi chuan zah pawh a dawn zawh theih tawh meuh lo chu anih hi maw !!... Fapa ka nei tawh lova.. Ka fapa mal neih chhun Saithlunga’n zamualpui min liam san tak si ah chuan loh theih loh leh hreh tak chungin ka fanu naupang zawk leh ka makpa ka bel ta ringawt mai zawng anih hi..Hei ka vanglaia ka sa kah thenkhat lu te chu ka ui em avangin kan in hlui atangin ka rawn chhawm ve ta hram anih hi..Ka makpa hi pa tha tak ani a, ka dinhmun te hrethiam in a hringtu Pa ang chiahin min en thei ve a, ka chungah that a chhuah nasat avangin ka lawm hle ani...Amaherawhchu, ka chungah fel viau mah ni se, mahni makpa te in a han chen tak mai zawng nitin mai hian inthlahrun loh ni reng reng hi ka la nei ngai hauh chuang lo...Awww !!...Ka fapa kha chu la han dam se la chuan awww...heti ringawt hi chu ka ni bik lo tur...” lungchhe tak leh mittui parawl teuhin a ti vawng vawng mai a..
Chu thu a han hriat meuh chuan Pasaltha, engmah hlauh nei ngai lo leh mi zawng zawngin hlauhawm leh tihbaiawm el tianga an sawi a hmachhawn pawh a a thin phu ran belh eih ngai lo Keivawmhranga meuh pawh a thinlung a kehsawmin a hnuk a ulh lek lek mai a..A hming leh tunge anih engkim hrilh tlang nghal vek mai a, a Pu chu kuah vawng vawng mai a chak hial a...Mahse han insawi tan dan tak chu a thiam lovin a huphurh riau zawk tlat mai a; lo awih si lo se atan a hrilhhai thlak lutuk ang tih mawlh chu a hlauhthawn ani.. Hmanhmawh lova hun remchang zawk a zawi muanga la insawi chu a rel fel ta zawk a..
Theihpatawp a insum hram hram chung chuan,” Anih Ka pu, tunah i makpa te chu khawnge an awm?” a han ti a..Ngulkauva chuan chhangin,” An nupa in lovah an va feh lawk anih kha maw le..Vawiin phei chu an rawn haw hma tur thu an sawi tak asin maw le..An lo haw har vak tawk lem lovang... Tikhan lo thu thlandai rawh vala... Mahni in a awm ang chiahin i in ngai dawn ania...” a ti a...
Keivawmhranga lam chu rawn hawi phei leh in,” Anih Vala nang, eng ti turin nge kan khua angah te i rawn zin ve mial a?” ti a Keivawmhranga a han zawh chuan Keivawmhranga chuan,” Ka nuin kan vua leh vang leh chhungte hnaivai he khua ah hian an la awm e a ti a; rawn zawng chhuak tur a rawn zin ka ni e..” a ti ta a...
Pasaltha Ngulkauva chuan a mikhualpa chu chik tak a en in,” Eng hnam nge i nih ?” an ti thawr mai a..Keivawmhranga pawh chuan tha takin Zote hnam anih thu a hrilh ve mai bawk a..Mahse, Zote hnam zingah Tlangte chi peng anih thu erawh a hrilh duh hran lem lo...Ngulkauva chu thaw chhuak hawkin,” Anih tak chu maw le...Chu hnam khat kan lo ni reng zu nia...Khaw lian tak kan ni lem lo bawk a, i chhungte chu i zawn chhuak thuai theih mai ka ring e...Chumi hma zawng chu i duh phawt chuan kan inah hian i thleng dawn nia...Inthlahrung hauh lovin chhungkhat ang chiahin min en dawn nia..” inphal zau tak chuan a ti ta a..
Eng eng emaw chutia an sawi dun lai chuan Losul haw hun a lo pel ta der mai a...Reilote hnu chuan pawn lam atanga hmeichhe aw in,” Kan lo haw tawh e...I lo tha maw ka Pa ?” tih ri hi inchhung lama awm Keivawmhranga leh Ngulkauva te chuan an hre ta a...Tuma hrilh buai ngai lovin Keivawmhranga chuan a Ni Vuli aw ngei ani tih chu a hrethiam mai a... Thlovuli’n inchhung a rawn lut chiah Keivawmhranga a han hmu thut mai chu,” Awwiii Kareiii...” ti thawt pah a Keivawmhranga hmel chu en vawng vawngin a hlo thlawh chem chu a thlauh nghal thawt mai a...A hnung chiah a rawn lut a pasal Chiliaka’n ,”Engnge ni ta? Engnge ni ta..?” a han tih chuan Vuli chu harh chhuak zawkin,” Engmah ni love..Thlamah khan thil theihnghilh ka nei emaw ka ti alawm maw le..” a ti leh lawi si a... Keivawmhranga, Ngulkauva leh Chiliaka chuan Vuli awm dan chu mak ti takin an en reng ringawt a...
Ngulkauva chuan a fate nupa chu an mikhualpa hming chu Hranga anih thu te, khawthlang lam a awm Vankal khua atanga rawn zin anih thu te leh a thil tum te a lo hrilh mawlh mawlh hlawm a...Vuli Pasal Chiliaka chuan tha taka Keivawmhranga chu lo dawngsawngin a lo titi pui bawrh bawrh bawk a...Chiliaka hi Zote hnam Kaupeng Hrangate hnam ani...A chhungte hi Zote khua ah na na na chuan mi awm thei pawl tak ni ve in Chi liah tur tlachham ngai meuh lo tlemte te zinga mi anni ve a..Chu mi avang chuan inchhuang takin a Pa hian a fapa hmingah pawh Chiliaka a sa ve ngat kha ani reng a..
Vuli’n ei rawng bawl tan a han tum mek lai chuan Keivawmhranga chuan rawn pan hnaiin,” Ka pi, hei ka rawn zinna lamah Sakhi tlu sual ka hmu fuh hlauh mai a, tlem a zawng a rep chu ka la pai asin..Zanin chu kan hmeh dawn em ni ang? “ a han tih chuan Vuli pawh chuan lawm tak a pawmin a sakhi sarep chu dawlrep nen thak tui takin a bai ta a...
Zanriah an han kil ho chu Vuli chuan Keivawmhranga ngawi reng a chaw bar lai vel chu a uluk em em mai hian a en leh dauh dauh mai thin a..Chutia a en reng lai lo hmu tu a pasal Chiliaka phei chu a lungni lo lek lek tawh mai a.. Zanriah an han kil zawh meuh pawh chuan Vuli’n an mikhualpa chu a en leh zauh thin tih a hmuh chuan Chiliaka ngaih chu a tha tawh lovin a lung chu a awi mawlh tawh lo ani chek ang chu, a nupui chu eng vanga an mikhualpa chu en reng thin nge anih leh a awm dan chu hriatthiam har a tih thu a hrilh ta phawng mai a...
Chutah zet chuan zep thu awm tawh hek lo le, Vuli pawh chuan a pasal chu inthlahrung tak a chhangin,” Ngawi teh Pa-a, min hrethiam hram teh...Zep lovah chuan he tlangval hian ka nuta pa, kum tam tak liam ta a min boral san tawh ka U Saithlunga ngei kha a ang em mai a; amah ka ngaih em avangin ka insum thei mawlh lova, ka lo en leh vawng vawng mai thin ani..” a ti ta a...
Chutia a han tih takah chuan Ngulkauva pawh chu Keivawmhranga bulah chuan rawn kal hnaiin hnai takah chiang fahran hian an mikhualpa hmel chu uluk takin a han en a,” Ka mit a chak tawh loh em avang hian chiang takin ka lo hmu thei lem lova; i sawi takah chuan a ang tak anih hi maw le...Mahse ka fapa kha chu ani ai hian a hang zawkin a dung a tawi deuh hlek zawk a..Tin, a hmaiah hian ser a nei ve lem lo bawk..chu mi tih lovah chuan inanna chu an ngah hle mai..” a ti chhuak ve ta hlawl mai a..
Chutah meuh chuan Keivawmhranga pawh insum zo tawh lovin,” Saithlunga leh Lawikungi fapa Keivawmhranga ngei ka ni ngai e..” a ti ta hlawl mai a...Chutia a han tih meuh chuan Thlovuli chu rawn tap chhuak hawm hawm pah a Keivawmhranga chu rawn kuahin..” Awwiiii,...ka ring reng ani...Ka rilru a thil engemaw ni tur a ka rin tawh hi chu a thleng dik lo mawh viau ania...Ka vahpa tur lo ni reng che in !!! Ngatinge khang chen chen kha ka lakah i biruk bo ni? Khawnge i awm thin? i Pu leh i Ni te hi min ngai ve ngai miah lo em ni?...” a ti chul mai a...

Bung - 67
Lungchhe tak a tap hawm hawm in,” I pa i va han ang tak em !!....Awwiii vawiin ni hian ka va ngai lehzual tehreng em ve aw...U Kungi a dam maw? Khawi khua ah nge in pem tak? Anih Hliri engnge a an? Pasal a nei ve tawh em? In thi nge in la dam tih pawh kan hre tawh si lova....Hun leh ni te han kal chakzia hi !!...Hei tunah chuan tlangval i lo ni ta reng mai si a...” a tih mek lai chuan Ngulkauva pawh insum zo tawh lova rawn tap chhuakin a fapa Saithlunga a ngaih zual zia thu te, a nu Lawikungi a dam that leh that loh te, a U Chawnghliri chanchin te a rawn zawt ve chul mai bawk si nen; a tu ber nge tih leh a eng zawhna ber nge chhan hmasak ber tur tih pawh hre lovin Keivawmhranga pawh a hamhaih lek lek a...
Keivawmhranga chuan an zawhna te chu pakhat te te in a han chhang diat diat a...Chutia a chhan mek lai chuan Vuli chu rawn leh thutin,” Ee...nichin khan ka inhmelhriat tir theihnghilh daih mai che u a...hei hi kan pa anih hi...I Ranga tur anih hi....” tiin a pasal Chiliaka lam chu a han hawi a...Chiliaka pawh chuan lawm takin a lo dawngsawng ve bawk a..
[Zohnahthlak hnam tam zawk te hian Ni te Pasal kohna bik hi an nei a....Hmar chuan “Rang” an ti a; G-group hnam heng Thado,Paite,Gangte,Vaiphei,Simte,Zou, etc te erawh chuan “Gang” an ti thung...Lusei ah erawh hetiang in kohna bik hi a awm hran lem lo...]
An han inhmu chu an hlimin an lawm ngang bawk aniang, Keivawmhranga’n Zote khaw Buanzawl kai a tum thu pawh a theihnghilh hman hial a... A han hriatchhuah leh takah chuan a chhungte hnenah chuan Buanzawl kai a tum thu a han sawi a; mahse a pu Ngulkauva chuan,” Buanzawl te zawng zantin kaina tur a awm reng dawn alawm...Zanin chu eng eng emaw sawi ho a titi nan i hmang zawk teh ang u hmiang...Kan inhmuh lohna pawh a rei tawh em hi maw...Vengchhak lama i Ni Selthluaii te nupa pawh Vuli fate hian han ko se la a tha ang...an lawm ve dawn em mai..” a tih ve takah chuan Keivawmhranga pawh chuan awm a ti ve viau mai a...


Vengchhak lama a ni Selthluaii te chu Vuli fapa rawlthar tuaitir chu an han koh tir a; a Ni thluaii chu an pa Liangdawma nen an rawn chhuk thuai a...Liangdawma hi Zote hnam kaupeng Buanchhung hnam ani a..

Selthluaii pawh chu Keivawmhranga nen a an han inhmuh a, tunge a nih an han hrilh hriat chuan insum zo lovin a tap chhuak ve ta hawm hawm mai a...He mi zan zet hi zawng lunglenna vang leh lawmna vangin Ngulkauva te chhung hian luangthli an nul nasa ngei mai !! Thil hlui tam tak te sawi hovin Lawikungi te nufa an pem tak hnu a an khua a thil thleng tam tak Keivawmhranga chu an hrilh a...Ngulkauva chuan Selthluaii te nupa pawh chu a tlai thawkhat tawh avangin chumi zan chu haw tawh lova an in a riak ve nghal mai tura a han tih chuan Liangdawma pawh chuan a puzawn thusawi chu awm tiin riah zai chu an rel ve mai bawk a.. Chu zan chu rei tak titi hovin a chang leh mittui tla in a changin an han nui ho dar dar leh thung thin a..
Chutia a chhungte nen hlim tak a an titi ho lai te pawh chuan Keivawmhranga thinlungah chuan Buangpuii a cham reng mai si a...Thil dang daih han ngaihtuah tum eng ang mahse a theihnghilh hlei thei mawlh lo ani..”Tunah tak hian ka Buangpuii khan engnge a tih ve ang aw??..” a ti rauh rauh thin a..Chawnchhim khaw lamah pawh Buangpuii chuan Keivawmhranga bak a rilru ah a dah hlei thei reng reng lo mai a...A thil tih lai leh inchhung sekrek eng ilo a han khawih lai te pawh chuan a rilru chu Zote khaw lamah daih a lo leng leh thin a...
A khat tawkin a thiltih lai a a rilru pe turin a nu Tuahhniangi nen chuan fiamthu in an inhau deuh reng mai a...” Chutia i ngaih viau leh zu um zui mai la ti nia..” fiamthu a a han tih chang te hian zah lutuk vangin Buangpuii biang no leh mawi tak te chu a lo sen leh tawn tawn thin a...Zana mutmu tuah tura a han mut zalh chang te pawh hian,” U Hranga chuan kei tehlul hi min rawn hrechhuak ve thin ang em le ? Tawn leh ni engtik ah tak rawn inher chhuak leh ang maw? Khuanu hian zahngaiin tuah rem zai min rel ve tak ang maw?!! U Hranga tello chuan ka tlei zo mawlh tawh si lo...” mittui parawl par chuan a ti vawng vawng mai thin a..
Chumi zan chuan Keivawmhranga chu Zote khaw buanzawlah kai lo mahse, buanzawl chhungah erawh Keivawmhranga chungchang bak engmah titi dang reng a leng thei lova...A mi ngaihsan leh hmuh chak em em mai an khua a a rawn zin thu chu Tlangval tuaitir Phuaisabaka chuan ngawih bo pui harsa a ti ngang ni tur ani... Phuaisabaka thusawi chuan buanzawl tlangvalte chu a ti phawklek hneh hle mai a...Chu zan zet chu an Val Upa Leihânga ho hovin an ri chul mai a...Keivawmhranga’n an khaw buanzawl a rawn kai hlan an nghakhlel tawh takzet ani...
Amaherawhchu, chu zan a buanzawl a kai tlangvalte zingah chuan Phuaisabaka thusawi avanga hlim emaw phur nilova namen lova phawklek leh ralti hlauh zawk unau tlangval pahnih an awm tlat mai a...Phuaisabaka Keivawmhranga nen a an intawh dan a sawi lai te leh Pu Ngulkauva laina hnai tak ni anga a insawi thu a sawi lai te chuan Suakmuka leh Hriakluana te unau chu a rukin an in en hrek hrek mai a..Chu zan zet chu rei an tiin a tuk khua var vat vat tawh se, an thil hriat leh ngaihthlak te chu an hringtu Pa hnena thlen vat vat hlan an nghakhlel takzet tawh ani...
Zing khua a han var chiah chu hma takin Suakmuka leh Hriakluana te unau chu khawiah mah pehhel lovin an in lam an pan ding nghal char char a...An Pa Chhumbawha lo la muhil chu an kaitho chuk chuk a...Chhumbawha hi Zote hnam kaupeng Vaithang hnam ani a, Zote khaw khawnbawl upa ah hial a lo inhlang kai tawh ani...A fapa te thusawi a han hriat chuan Chhumbawha chu a ti phawklek em em mai a..Kum tam tak leh hun rei tak liam ta a thil kal tawh te kha han ngaihtuah letin a mitthla ah a rawn lang uar uar mai a..Khatih hunlai khan Lawikungi khan nau a pai ani tih a hrechhuak thut mai a...Vawilehkhata ding chhuak hluaiin engemaw hriatchhuah nei tih hriat tak mai hian a han thaw hawk a,” Phuba la turin a rawn kal ta ngei anih chu...” a ti chul mai a...
Chhumbawha chuan a fate lam chu hawiin,”Silai a nei em?” a rawn ti hlawl mai a...Suakmuka leh Hriakluana te chuan an hriat theih chinah chuan Keivawmhranga’n silai a hman ngai loh thu leh a neih awm pawh miten an sawi an hriat ngai loh thu in an chhang a...
Chhumbawha chu a hma aia a hmel rawn eng deuh tawh zawkin leh a tawng danah pawh a hma aia a rilru a zangkhai deuh tawh zawk tih hriat tak maiin a fate pahnih hnenah chuan,” Silai a neih loh chuan a that hlauh chu... He mikhual tlangval insawi hi tudang nilovin Saithlunga fapa bak anih ka ring lova..Ka chungah leh ka fate chunga phuba la tur a rawn kal ngei anih ka ringhlel mawlh love...A lak a chan tha zawk in chan theih nan, chet in lak hmasak vat a ngai anih chu... He mikhualpa hi in dah that vat loh chuan kan inrin loh laiin kan zavai hian pakhat te te in min phil duh mai ka ringhlel lo ania..” a han tih takah chuan Suakmuka leh Hriakluana te chu an Pa thusawi avanga chuan thinrim hle in, chet la hmasa zawk leh a that hmasa tu zawk nih chu an tum ruh hle mai a...

Bung - 68
Buanzawl atanga Val Upa Leihânga mahni in lama lawi tur pawh nidang ang lo takin a in a haw ta mai lo chuan Lal in lamah a peng kawi a... Lalpa Hrihlêra chu tlangaupa Burkhâwna nen an lo titi dun lai tak ani a...Zan lama Phuaisabaka thusawi Leihanga’n a han sawichhawn meuh chuan a thil hriat avanga namen lova phur tih hriat tak mai Lalpa Hrihlêra chu a thuthmun atang chuan a rawn ding chhuak hluai a..
A chhanna hriat vat vat chak tih hriat tak a Val Upa Leihânga en chung chuan,” Tak tak em ni Leihâng? Chutiang Khualkai Pasaltha hmingthang, a chakzia leh huaisenzia an sawi nin theih loh hial chu kan khaw tlawm takah hian a rawn chuangkai ve duh dawn em ni?..” a han ti phawng mai a...Val Upa Leihanga chuan,” Lalpa, kan khaw pa, Pu Ngulkauva laina hnai tak ani an ti lehnghal asin...” a han tih chuan Lalpa Hrihlêra chuan mak ti takin Leihanga chu a en ringawt mai a...
Lalpa Hrihlêra bawk chuan dilchhut takin,” Pasaltha Ngulkauva vua leh vang maw ni ngai a? engti zawngin nge an in chhun a? Tun hma in hemi chungchang hi midang ka atangin ka va la hre ngai si lo ve !!” ti a a han zawh chian chuan Leihânga bawk chuan chhangin,”Chu zawng ka hre bik hauh lo mai Lalpa...Rem i tih chuan zawt chiang turin amah Keivawmhranga chu nangmah rawn hmu tur che in kan koh chhoh tir dawn em ni ang?..” a han tih chuan Lalpa Hrihlera chuan rawn chhang leh vatin,” Ni lo, ni lo...Chutiang Pasaltha ropui lutuk hmu tur zet chuan a thlenna inah keimah ngei hian ka pan zawk dawn ani...Hei thlasik a hnai ta bawk a..Min rawn tanpui tur leh kan khaw chhan tur a khuanu remruat leh rawn tirh te pawh ani mai thei asin..Ti teh u, Pasaltha Ngulkauva in lam pan chuan i inzui chhuak ang u hmiang...” phur tak chung chuan a han ti a...
Lalpa Hrihlêra hi lal anih mah bakah a vanglai na na na chuan Pasaltha huaisen leh ropui tak ani ve a..Rengpa Zamthatvunga, Lawipa an tih bawk nen chuan thian tha tak niin ral beihna ah pawh an inkawp rawt thin ani.. Chutiang Pasaltha huaisen a lo nih ve thin avang chuan Pasaltha ropui leh hmingthangte hi a ngaisangin a dahsang hle thin a..Hei vang hian Pasaltha Keivawmhranga pawh chu a mit ngei a hmuh hlan mawlh chu a nghakhlel em em reng ani..
Lalpa Hrihlêra, Val Upa Leihânga leh Tlangaupa Burkhâwna te Ngulkauva in a an zu lut hlawl mai chu Ngulkauva, a makpa te pahnih leh Keivawmhranga te chuan mak ti tak a lo en he haw in an ngaih a tha lo lek lek hial zawk a...Ngulkauva chu rawn tawngchhuakin,” Lalpa, engtizia nge kan in angah te zingkar kar nang meuh a i rawn len luh ve tak mial a? Kei leh ka chhungte hian i lakah thil tihsual kan lo nei ta hial em ni?” tiin a han zawt phawng mai a...
Lalpa Hrihlera chuan,” Ni love...Chutiang lam engmah a awm hran love, thlamuang tak khan awm rawh u...Mikhual thar in nei tih ka lo hria a...Tak tak ani nge nilo keimah ngeiin a rawn chian ka duh vang zawk ani..” a tih zawh chuan Keivawmhranga chu a chhip atanga ke ler thleng uluk tak a han in,” Hun rei tak ata tawh ka mi ngaihsan leh ka mit a a tak ngei a ka hmuh chak em em mai chu vawiin ni hian ka hmu ta !! A hmai ser atang ringawt pawh hian hmaih rual ani lo...Vawiin ni zet chu kan nihlawh ngei mai !!” phur tak a han tiin Val Upa Leihanga ngaihdan zawt ni awm takin a lam chu a va hawi phei a...Leihânga pawh chuan Lalpa thusawi chu pawmpui tih hriat tak maiin a lu a lo bu ve nghut a..
Lalpa Hrihlêra chu Ngulkauva lam a hawi phei lehin,” Eng hnam nge anih a? Engtin chiah a inlaichin leh inchhung nge in nih le?” a han tih chuan Ngulkauva pawh chuan tha tak a chhangin,” Zote kaupeng Tlangte hnam ngei ani e...Lalpa, ani hi tudang nilovin ka tupa, Saithlunga fapa ngei ani e...Khawthlang lam khua Vankal atangin min rawn zawngchhuak anih hi..” a han tih chuan Lalpa Hrihlera lawm lutuk chu a au chhuak thelh ani...Lalpa Hrihlera chuan,” A va ropui em!! Chu tudang nilovin kan khaw chhuak tho lo zu ni reng a.. !! Se rângin se râng a hring an tih thin chu a lo dik ngei anih hi !! Pasaltha tupa chu Pasaltha huaisen bawk ni tur reng pawh ani ngai e...” a ti chul mai a...
Ngulkauva leh a makpa pahnihte chuan a thusawi chu a awmzia leh a ngaihna reng an hre lo tih Lalpa chuan an hmel atanga a han hmuh chuan nui chhuak hawk chungin,” In mikhualpa hi i tupa ani tih chu i hre na a, mahse tu chiah nge anih i hre reng reng lo ani maw?” a han tih chuan Ngulkauva chuan mak ti tak a chhangin,” Lalpa, min hrethiam la, mahse i sawi awmzia reng ka hre hauh lo mai nia...” ti a a han chhang takah chuan Lalpa chu nui hawk hawk chungin,” Tunge anih i tupa chuan a hrilh lo che u ani maw...Mahni chanchin sawi thin mi anih ka ring lem lo reng ani..Mi inngaitlawm leh chapo lo tak anih dawn hi...Anih ‘Sairal Buan Pasaltha’ an tih fo hi in lo hre ve tawh reng reng em?” ti a a han zawh pawh chuan Ngulkauva chuan a hre chuang der lo mai a..
Ngulkauva chuan Lalpa chu chhangin,” Min ngaidam la Lalpa, kei hi ka kum a lo tam deuh tawh bawk nen rual hi ka pawl em em lovin thil chinchang hi ka hre lo viau mai a...I sawi chu tunge anih ka hre der lo mai..” tia thupha a han chawi chuan Lalpa Hrihlêra bawk chu rawn tawngchhuak lehin,” Chutia nih chuan ‘Sapui Chaih Pasaltha’ emaw ‘Rengpa Chawilung Chawi Pasaltha’ an tih thin te tal chu i hre thin em ang chu maw? “ beidawng duh mai lova a han tih leh hram takah chuan chung pasaltha pahnih te chu miin an chanchin an sawi a lo hriat ve tawh thu in Ngulkauva chuan a chhang ta a..
Lalpa Hrihlêra chu nui var var chungin,” Chung ka sawi zawng zawng te chu mi hran hran nilovin kan bul a ding i tupa Keivawmhranga ngei an kohna hmingte anni e..” a ti ta mai a..
Chu thu an han hriat chuan Ngulkauva leh a makpa pahnihte mak ti lutuk chu an ka hau mai ringawt a...Khualkai Pasaltha hmingthang leh ropui em em, a chanchin hahip a khaw tin deuh thaw a an sawi thin chu Ngulkauva tupa leh Chiliaka leh Liangdawma tan chuan an nupui ve ve te vahpa a lo ni reng mai chu awih harsa an ti lek lek zawk mai a....Lalpa thusawi chu thudik ani reng em ti niawm tak a Keivawmhranga an va en chiah chuan Keivawmhranga’n Lalpa thusawi hnialna tawngka engmah a phuh chhuah tak lovah chuan Lalpa thusawi zawng zawng chu dawt ani lo tih chu tu hrilh hranpa ngai lovin an hrethiam ve nghal mai a...Chutiang khualkai Pasaltha hmingthang em em mai chu an chhungte ani tih an han hriat ringawt pawh chu an inchhuangin an hawi sang nghal vah mai a...

Bung - 69
Chutia an titi ho lai tak chuan pawn lam atang hian thinrim aw ki tih hriat tak mai hian,” Keivawmhrang..rawn chhuak rawh !! I thlenna inah khan biruk hlen i tum em ni?” rawn ti chhar chhar ri chu an hre ta a...Keivawmhranga pawn a a ralthuam famkim nen a va chhuah nak chuan hla deuh hlek a chengrang chawi a tlangval pahnih lo ding reng mai chu a va hmu ta a... Chung tlangval pahnih hnung deuh ah chuan fal deuh hlek a mahni chauh a lo ding, tlem a pa upa lam deuh tawh hi a va hmu bawk a..
Chung tlangvalte chuan Keivawmhranga hming hre viau mahse Keivawmhranga erawh chuan chung tlangval pahnih, an kut a silai pakhat ve ve keng te chu a pian a hnu lamah vawikhat mah a la hmu ngai hauh lo thung.. “Engnge in duh? Tanpuina theihna che u ka nei mial em?” a han tih chuan za lo fe a nui lui pah chuan chung mite pahnih zinga upa zawk ni awm tak leh han en dun reng reng pawh a tlem a phanchang zawk ani tih hriat theih mai chu rawn tawngchhuakin,” I phuba rawn lak tumna ber Chhumbawha fate kan ni ngai e..” thinrim hmel tak hian a rawn ti a...
Hriakluana silai ken zawk hi a hma chuan Keivawmhranga Pu, Pasaltha Ngulkauva ta thin ani a...Amaherawhchu, a fapa Saithlunga thih hnu ah an chhungkaw dinhmun tlachhia in Zote khua leh a chhehvela tam a tlak laiin loh theih lovin Buhfai thahnem tawk tak nen an khua a mi awm thei leh Khawnbawl upa ni bawk Chhumbawha nen hreh tak leh ui tak chungin Ngulkauva chuan a inthleng pui ta ringawt mai kha ani a...Chhumbawha te in chhungah silai pahnih a awm phah ta ani..
Keivawmhranga chu muang ban chap a rawn tawngchhuakin,” Ngawi teh u thiante u, in thil sawi awmzia chu ka hre lo tawp mai.. He khua ah hian ka vua leh vang te rawn tlawhchhuak tur a rawn kal ka ni a...Phuba lak tum a rawn kal ka ni lo...Thil hlui hun te leh kum tam takin mual a liam pui tawh hnu chu hriat reng a ngaiin ka hre tawh lem lova; thar thawh leh kher hi a tul ka ti tawh hek lo...” a han tih pawh chuan Chhumbawha leh a fate chu an lung a la awi chuang lo tih chu an hmel put hmang atang chuan chiang takin a lang thei a...
Suakmuka bawk chu nui sawi bai chunga rawn tawng lehin,” Dinhmun tha zawk a ding kan nih vang leh, silai pahnih hum tu zawk kan nih avangin kan Pasaltha hmingthang chu a zam deuh em ni? Kan inrinloh lai takin a ruk in min phil i tum tih te chu kan hre vek alawm..Min hmachhawn ngam lo anih chuan tha takin ngaihdam min dil la, him damin kan chhuah tir phal mahna che...” hmusit leh elsen takin a han ti a..
Chulai tak chuan in chhung lam atanga an inbiakna lo ngaithla ve reng tu Ngulkauva te chhung leh an inleng te chu an rawn chhuak ve a...A fapa pahnihte hnunga fal deuh hlek a ding Chhumbawha’n Lalpa Hrihlera a han hmuh chuan a tim ang reng hle a... Lalpa Hrihlera chuan thuneih hmel tak aw tih hriat takin,” Chhumbawh, i fate hian mi tha tak a awm mai mai lai engatinge an rawn tihbuai ngawt mai le? I khap dai tur ani lawm ni? ” a han ti a..
Chhumbawha erawh chuan,” Lalpa, nasa tak a khapdaih ka tum a... Patling an ni ve tawh a, an thil tum chu eng ang pawhin sawi mah ila sawhsawn an tum tlat si lo ani..” fing vervek taka a han tih chuan a thusawi chu amah Chhumbawha mai pawh nilovin chulai hmun a awm zawngte chuan tumahin an awih hlawl lova... Suakmuka te unau chet lak dan chu Chhumbawha ruahmanna vek ani tih lah an hai bawk hek lo...
Lalpa Hrihlera chuan ning thawkhat tawh tih hriat tak a thawk la hrawk pah a rawn tawngchhuak lehin,” In duh dan dan chuan awm rawh u...I fapate nunna hial in a tuar anih pawhin engmah mawhphurhna ka nei lovang..He mi chungthu ah hian ka kut ka sil e..” a tih takah chuan Chhumbawha chu a rukin a nui ver ver tawh mai a...Lalpa meuhin sawiselna em em aneih loh chuan Keivawmhranga chu a faten that pawh ni se a hnu ah Ngulkauva te chhung tan thubuai hlabuai siam a rem tawh dawn lo tih chu a hrechiang ani..
Thil awm dan lo thlir ve reng tu Val Upa Leihânga chu rawn tawngchhuak ve in,” A thu hrimin in inbei dawn pawh lo ni tehreng se...Silai nei lo mi pakhat bei turin tlangval pahnih ngawt mai silai keng ve ve inrawn thawkchhuak ani a; zah pawh a zahthlak deuh lo maw...Inbeih in duh leh hmanraw inang kengin inbei ula ti nia..” a han tih chuan Chhumbawha chu thinrim tak a rawn tawngchhuakin,” Leihang...Ani kha Silai hmang lo turin kan ti reng reng em ni? Kan hmanraw neih ang kan rawn keng ani ve mai a, ani pawh khan a hmanraw neih ang chu hmang mai se enge a pawi viau na?” a rawn ti chhar chhar a...
Chutah zet chuan Keivawmhranga pawh chuan ning thawkhat tawhin,” Tun chiah hi inlamletna hun ka pe ang che u...In rawn kalna lama in haw leh lo anih ngat chuan nungdamin in chhuak mawlh lovang...Ka pa that tu fate lakah hian ngilneihna leh ngaihdamna lantir reng hi ka bat ani bik lo ania..” ti siah siah chungin a dinna thlang hmun zawl lai deuh ah chuan tanhmun rem zawk siam tum chuan a pen thla ta thauh thauh mai a..
Chutia Keivawmhranga’n a han sawi takah chuan Hriakluana thinrim lutuk tawh chu naupang zawk a nihna lai rawn tilang zeuh in, sawi leh sawi loh tur pawh thliarhrang thei tawh lo chuan,” E e eee, chutia min han tih khanglan chu le..I pa Saithlunga pawh kan that tawh a, i pa ang bawkin nang pawh pialral ah kan tir liam leh nghal ngei ang che..” a ti ta mai a...Chutah chiah chuan thil awm dan engkim chu tuma sawi belh ngai hauh tawh lovin a chiang ta !! Lalpa Hrihlêra chuan thil awm dan dik tak chu hrechiang tawhin a thinrim lutuk chu a inseh ruh teuh tawh mai a...Val Upa Leihânga leh Tlangaupa Burkhâwna te chu mak ti lutukin an in en ringawt thung a...
Hriakluana chuan chu thu a sawi zo chiah chu tumah inrin lawkna hun pek tum lo tih hriat tak mai chuan vawilehkhatah Keivawmhranga dinna lam hawi zawng chuan a silai chu a han hmet puak dur mai tehreng a...Mahse an hma a ding, engtiklai pawh a rilru fim tak pu a awm reng thin Keivawmhranga chu eng ang Pasaltha chiah nge anih an la hrechiang lo tlat ani !! Pasaltha diktak tan chuan inrinloh lai hun neih tam phal ani tlat lo!! A silai a Hriakluana’n a rawn tin rual chiah chuan Keivawmhranga chu rang lutukin a per zawk hman a, Hriakluana silai atanga chuan ngenmu pawh chu Keivawmhranga awm sirah a thawi fua mai !!

Bung - 70
Silai puak ri an hriat chiah chuan Zote khaw tlangval ho chu rang takin chulai hmun pan chuan an rawn tlan khawm hlawm a...Tlangval tuaitir Phuaisabaka mai bakah Zote Pasaltha pahnih Kàwlrûna, Zote kaupeng Chuankhup hnam leh Bualngûka, Zote kaupeng Chawnghau hnam te chu tlangval dang rawn tlan khawm te zingah an tel ve a...Thil chinchang zawh fiah an han tum hma hauh chuan Lalpa Hrihlêra chuan kut zaizirin an awmna pangngai theuh ah chuan chechang tawh lova ding turin leh tumah rawn inrawlh ve lo turin a han ti a..
Chutah zet chuan Keivawmhranga pawh thinrimna namen lovin a tlakbuak tawh a...A mitmeng ngaihno bei tawh lo takzet leh tihbaiawm tak mai chu chulai a awm tumah chuan an hmuhhmaih tawh hauh lo...A chempui leh Fei-ki-bar nen chuan chak tak maiin Suakmuka te unau dinna lam pan chuan a tlan phei a...Mahse ngil tak a tlan phei ta lo chuan dinglam leh veilam a a khat tawk a kawi tawn zak zakin amah rawn beitute lam chu a pan ta thung a..Hetianga a tihna chhan chu a mi beih te hian silai an nei tih a hriat vang ani a; Pasaltha dik tak te hian an beihpuite hi an pawngpaw bawh ngawt ngai chuang bik lova, rilru fim tak pu in fimkhur takin an hmachhawn thin...
Hriakluana silai mu thun tha leh tur chiah chu Keivawmhranga chuan a fei-ki-bar hriam tak mai chuan na lutuk tak maiin an khawh zawk mai tehreng a...A fei-ki-bar chu Hriakluana hrawk ah tak lut zawkin a thal chiang kher mai !! A ka leh hnar atanga thisen luang chhuak zawih zawihin ka pawh chhawn lovin mitthi khua a pan chu a ni nghal der mai..!!! A nau ka atanga thisen nasa tak chhuak a han hmuh chuan Suakmuka chuan a silai a han hmet puak ve leh dur mai a; mahse ding leh vei a tlankual Keivawmhranga taksa erawh a fuh ta lem lo thung....
Rang tak mai a va nangchingin Keivawmhranga chuan Suakmuka chu a banah tak mai na mangkhengin a va sat ta chawrh mai a...A chempui leh Suakmuka ruh intawng chu a ri no chawk mai a...Suakmuka na ti lutuk chu a silai thlauh nghal thawtin a chempui nen chuan thinrim lutukin Keivawmhranga chu a va zuan a...Mahse mi hrat khawkheng Keivawmhranga tan erawh hlauhawm tham a tling tawk lo tlat...Rang tak a lo bumin a nak nemah tak mai chuan a chempui hriam tak mai chuan a lo sat thler duai mai a...Suakmuka pawh a na ti lutuk chu chechang hlei thei tawh lovin a thingthi hnawk mai a...Keivawmhranga chuan va panhnaiin dimna tel miah lovin a chhip sam a kekin a lu a tan sak ta a...
Zote khaw mipuite chuan an mit ngei a an thil hmuh chu rapthlak an tiin an en tlawk tlawk ringawt mai a..Tumah han tawng emaw han chechang ngam eih an awm lo...”Hei ngei hi a lo ni maw ‘Sapui Chaih Pasaltha’ an lo tih thin chu ni !! Hahip a a chanchin khaw tin a lo sep rawtui thin awm reng pawh a lo ni e !! Pasaltha chungchuang leh rothap tak zawng a lo ni ngei mai !!” tih chu chulaia kalkhawm te rilru a rawn lang rual nghal thawt chu ani... Tlangval tuaitir Phuaisabaka, Pasaltha Kàwlrûna leh Pasaltha Bualngûka pawh chuan an hma a pasaltha ding chu ngaisang leh ropui ti takin an en tlawk tlawk ringawt mai a...Kam khat te mah chhakchhuah tur eih pawh an hre hlawl lo ani...
Chhumbawha’n a fapate pahnih ruang a hma lawk a let reng mai te chu beidawng tak a en rengin a chek tlawk tlawk mai a..An ruangte chu pawmin a tap tlawk tlawk mai a..Keivawmhranga erawh chutia Chhumbawha fate pahnih a thah hnu chuan vawilehkhatah leh hawi thutin a pu Ngulkauva te in kawt a Lalpa Hrihlêra leh a chhungte ngawi reng a lo ding reng lam chu a hawi ta hlauh thung a...Chhumbawha khawih zui a tum lem lo...
A mithmuh ngei a thil thleng mit tla lek lova lo thlirtu Lalpa Hrihlera chu vawilehkhatah harh chhuak thutin a aw a han thian a,” Sairal Buan Pasaltha, Lal mah ni ila vawiin ni hian i mi ngaihdamna ka dil e..Lawikungi’n a pasal kha Chhumbawha thah anih thu min hrilh khan hmeichhe thu mai mai tiin thu tling tawk lovah ka lo ngaihsak mai mai a...Ka thiam loh hulhual ani e... Kha mi tenawm leh tualthat tupa kha a fate rual khan mitthi khua ah thawn liam ve nghal rawh..” thinrim takin a ti ta chher chher mai a..
Chhumbawha pawh a fate ruang kuah pah a rawn tawngchhuakin,” Ni e Pasaltha..,Ka fapate min thah sak takah chuan he khawvelah hian dam chhan dang reng ka nei tawh chuang lova...I pa nunna ka lak sak avanga I phuba lak chu han puitlin law law ta che..Ka lu chu i chempui khan rawn la rawh le...” a ti chuai raih a.
Keivawmhranga chu Chhumbawha lam rawn hawiin,” Thisen kan inchhuah hnem lutuk tawh e...Lalpa, ani hi khawngaihin ngaidam hram ang che...A fapate pahnih a chan tawh a, a phu tawk hremna a tling tawh ani...Ti hian a damchhung chu a fapate ngaiin a hun leh ni te hmang zo ve rawh se...” a han tih chuan Lalpa Hrihlera chuan a hma a ding Pasaltha huaisen leh rothap chu ngaisang takin a thlir dauh dauh mai a...
Lalpa Hrihlera chu rawn tawngchhuak leh hluaiin,” Hei zet hi ani Pasaltha dik tak chu !! Rengpa Chawilung Chawi Pasaltha ngei chu a lo ni ngai e !!” a han ti te te a....Chhumbawha lam chu hawi phei lehin,” A chunga thil sual i tih a berin a ngaihdam tawh si che chuan kei pawhin ka ngaidam ang che..Mahse, in chhunkaw pahnih buaina hi vawikhat mah rawn thar thawh leh ngai tawh lo la, pu Ngulkauva te chhungkaw chungah hian vawikhat mah rilru chhia rawn pu leh tawh ngai hek suh ang che...Chuti lo zawng in Lalpa ka nihna angin ka thuneihna ngeiin ka tlangvalte i nunna lak sak tur che in thu ka pe tawh ang tih ka tiam e..” namen lova lungawi lo tih hriat tak chuan a ti ta a...
Chhumbawha erawh kum tam tak liam daih tawh a tenawm leh vervek tak a tual a lo thah thu an khaw mipuiten an hriat vek tawh avang chuan a zak lutuk chu a kun tlawk tlawk thung a..
He mi tum a Zote khua a thil thleng avang hian tlang tin mual tin mai ah te chuan Keivawmhranga chanchin chu nasa tak a sawi chhawn a lo ni leh ta a...Hemi ni atang hian Keivawmhranga chempui hriam tak chu “Thisen Ngai Chempui” an lo tih phah ta bawk ani...

Read Next Chapter>>>>

Post a Comment

Powered by Blogger.