Posted by: R Lalmuansanga Amuana
Ka hming chu Lalhriatpuia a ni a, țhiante aiin ka lu a buk bik țhin nge ka hre lo, Hriat-lubuka tiin ka lar hle. Bike neih nalh vang lam ni lovin ban khur laih ka chak vang zawkin mi hriat ka hlawh phian a.Kan khaw nu leh paho pawh hian makpa ai chuan hlawhfaa lei lai atan min it zawk vekin ka hria. Ngaihzawng hi ka la nei ngai lo a, neih ve chhin ka chak hle.
Lehkha thiam thei tak ka nih loh avangin pawl sawmpahnih hi vanneih vang liau liau bakah tlem entawnin a chhe ber chi-ah ka pass ve hlauh a. Strick deuh se chu ka pass kher lo ang.
Min hmangaihtute chuan zir zel pawh ni ila BA meuh han pass chhuak tur chuan min ring ngang lo a ni ang, zir zawm tawh loin ka enkawl atan tiin vawk note 5 zet an la a. Naupan laia eng nge nih i tum tia zirtirtu ten min zawh changa Army officer tih paha awm ti tut deuh kher țhin kha VAWK PU ka lo ni ta a ni.
Hetih lai hian kan khaw High School-a rawn thawk thar nula fel deuh hian kan țhenawm chiahah in a rawn luah a. Amah nula fel leh lehkha thiam a ni bawk a, kan inah pawh a rawn tlangnel nghal mai a. A nau tleirawl high shool kal nen maia awm an ni bawk a, eng emaw hlekah, Hriat-lubuk ti miah loin "Hriata, hei hi min lo siam teh," a rawn ti ve fo a.
Kei lahin ka hmuh tirh ațanga ka vawk min enkawlpui tura ka duh em em, zan mut hmun thlenga ka ngaihtuahna luahtu han puih chu ka phur nasa mai si. Lawmthu sawi paha a nui sen sen te chu ka lawmna a tling a, ka bem dan tur suangtuah nuap nuap chungin a thingpui tui tak chu ka dawt ri leh khulh khulh țhin.
Tlai khat chu an electric bulb eng thei lo siam tumin stool-ah ka ding ur ur a. Anin chawhmeh a siam a; a nau chuan an practical record a ziak thung a.
Chutia mahni buai buaia kan buai lai chuan ka duh anga ka ban phak loh deuh vanga ka'n dingdihlip chu ka dinna a buk ta, ka tlu ngei dawn tih ka hriat rualin ka in vai vuat vuat a, electric wire chu ka man fuh, chu lah chua min dawl lo nasa si. Ka thawm hriain an unau chuan rang takin min rawn en thuai a, a nau-in "awi" a tih rual deuhthaw chuan a dawhkan chang takah chuan ka khabe kual lianpui mai chu ka zuk nghat bur a. A va na teh lul em.
An unaua mangang taka min buaipui lai chuan ka rilru chak tak chuan ngaihtuahna thar neiin, nikhaw hre lo awmin awm ila țha dawn riaua hriatna ka nei ta roh a. Min sawi nawk nawk paha ka bianga a nul thuak thuak laite chuan ka khabe chu na hle mah se, ka rilru erawh a lo nui vur vur a. Ka khabe ka sawh lai ber a han chul hauh hauh lai phei chuan tifuh hi ka in tiin man hla hi ka'n ti mai mai khawp a.
Rei lo te-ah ka nu leh pa an rawn lang a, ka nu pawh a rawn mangang ve khawpin ka hria. Ka pa meuh pawhin min ko ve dut dut a, han men chhin ka chak nen, a hun hrih mawlh si lo. Mi an rawn kal khawm zel a, "a thaw leh a mar chu a țha" mahse, a harh tlat lo tiin Damdawiinah min zawn chhoh an tum ta mai.
Tette ațanga tlangval sek pui ka nih thlenga hriau hlau ka nihzia chu rilruah a rawn lut nghal a. Hriau hlauhna rau chuan min rawn tuam thar leh hlup hlup a .Ka tet laia inchiu ka hlau lutuk, ka tlan bo daih țuma ka nu mangangzia te ka ngaihtuah chhuak a. Tunah erawh tlan bo thei ka ni tawh lo. Rilru a buai a ni, tunah zet chuan zirtirtunu duhawmna leh hmelțhatnain min thlamuan ta lo tawp mai.
Damdawiina min hruai chuan min chiu ngei ang le.Chu ringawt chu ka rilruah a rawn in thum rawn tlut tlut a. Men thut a,"ka tih der a," han tih leh hnuhnawh mai ka tum laiin, ka chhehvela awmten ka chanchin an tlangaupui dan tur ka ngaihtuah thleng leh nghal a. Mi lo pung khawm chu an thawmah pawh an tlem lo tih a hriat reng mai si. Chung zawng zawng chuan "Hriat-lubuka a thi der," tiin dawr te-ah nen, ni za inhlawhna hmunah leh Biak In kawt thlengin an sawi leh luai luai ang a. Tuna min khawngaihtute hi min nuih nasa sa an ni leh ngei dawn si. Ka pa phei chuan engtin nge min tih ang, ka ngaihtuah ngam lo. Chuvangin; enkawlna tlem tal dawng loa han harh leh ngawt chu thil tih chi a ni tawh lo.
Aw, zirtirtunu ka duh luat vanga ka buaina hi a va nasa ta em, min rawn koh lai khan, "Vawk chaw ka chan laklawh," lo ti ila heng buaina zawng zawng hi ka tawng lo tur.
------------------------------------------------------
Post a Comment