Trans. By
-Ben Lalrinmawia Mizo
 |
| [Afshin Javid] |
Iran chhim lam khawpui pakhat Abadan an tih ah ka piang a, muslim chhungkua atanga piang ka ni a. Shia muslim an tih chhungkua a mi ka ni. Ka pu chu Muslim hruaitu a ni a. Fa 19 lai a nei a. Chung a fate atang chuan tu 84 lai mai a nei a. Thil kalphung ah chuan, ama thachhang dawltu tur sakhua a inkaihhruaina lamah a tu chhuan lehzel te zingah a aiawh tur a thlan a ngai a. Mak deuh maiin ka chunga thil thleng- a thalo lam ah te, ka thihna ngei ngei turah te leh hlauhawm in min hnaihchilh hma hian ka hma ah hian mihring hlimthla ang deuh hi a ding tlat thin a, chumi avang chuan ka him leh mai thin a. Chutiang thil lo awm thin ka tawn chu ka zep lo a, ka pu pawh chuan lo hria in a thachhang dawltu atana chhinchhiahna ah a pawm a, Islam sakhaw hruaitute thlarau in min vohbikna ah a ngai a, min thlang ta ngei a.
Uluk takin min enkawl bik a. Tuna Islam chungchanga ka hriat zawng zawngte hi min zirtir a. Hezbollah ah ka tel ve ta a, hetah hian kum thum vel lai chu ka tang hman a. Quran nasa takin kan zir thin a. Ka pu chuan ka thinlungah chuan heng kristian, rinna a hruaibo takte hi hruaikirtur ka nihna chu chi angin nghet takin a tuh a. Chubakah kan chhungkua leh Iran pawn lamah thleng Islam zirtirna kengnungtu tur ka nihzia min hrilh nawn fo bawk thin a ni.
Malaysia ah ka kal ta a, chutah chuan Passport lem 30 chuang nen min man a. Lung in ah ka tang ta ran mai a. Jail chhungah chuan Islam rawngbawlna chu ka tan nghal a, min ngaithlatute chu eng nge Allah laka an mawhphurhna leh an tihturte chu ka zirtir thin a. Nitina tihdan phung ka insiam a, vawi nga a ngei ngeiin ka tawngtai thin a. Keini Shia muslim te tihdan ah chuan nikhat ah vawi 3 kan tawng tai a, chutah chuan rakah 17 chu kan telh mai thin a. Pathian nena inpawlna a tam thei ang ber ka duh avangin vawi 5 ka tawngtai thin ta zawk a. Khua alo tlaiin a a belchhah nan ka tawngtai leh ngat thin bawk a. Quran hi ni 10 dan apiangin a kawm leh a kawm inkar hi ka chhiar chhuak dap thin bawk a.
Chutah le, Islam atanga chhuak thlarau lama thiltihtheihna mak danglam tak chu ka dawng ta a. “jinnah” thlarau mi chu ka nei ta a, chung mite biak pawh chu Islam ah hian phalloh a nilo a. Prophet Muhammed a ngei pawh khan chung jinnah te chu a lo biakpawh tawhna chanchin pawh a awm a ni. Chung mite(jinnah) atang chuan thiltihtheihna ka nei ta a. Midangte chu ka tawngtaisak thin a, abik takin mi ten an chungah thil thalo an lo tih chuan, tawngtai sak turin min rawn ngen thin a. Ka thiltihtheihna(power) hmang chuan tawngtaina hmangin ka lo dil sak a, rang takin an chesual emaw an damlo emaw ve vat mai thin a ni. Ka maimitchhin a ka han ngawih vang vangte hian, room danga awm te hian eng nge an tih mek tih thleng te hian ka hre thei thin a. Chu ngei chuan thiltihtheihna chak lehzual neih chakna min neih tir huam huam ta mai a.
Quran thu te chu ka ngaihtuah bing leh nasa zual a. Zankhat chu Quran a châng pakhat ri nawn ut ut chi, awmzia tak nei bawk si lo, Quran thuruk a ni ber ang chu, chu châng ka lo ngaihtuah bing a ka lo chham lauh lauh lai tak chuan thlarau pakhat hi a rawn lut thut mai a. Ka theihna aia chak fe zawk leh ka khuahkhirh phak bak a ni tih ka hre nghal a. Hlauhna in ka khat ta nghal a. Chutichuan Islam in min zirtir anga thupek chu ka han tum ve ngial a, “Allah hmingin thu ka pe a che”, “Setan ka hau a che” tih hmang te chuan ka han ti ve ngial na in ka bei a dawng em em ringawt mai a. Chulai tak chuan thawchham ang hian ka awm ta a, rehhlum tur ang mai hian ka awm a. Ka thi tak tak mai dawnin ka hria a ni.
Van lamah chuan ka auchhuak a, “Pathian (farsi tawng chuan ‘Khuda’ a ni a) min tanpui rawh” tiin. Rang tak maiin aw ka hre ta a, vawiin ka aw in hriatfiah ang vela fiah hian a ni ang, ti hian a sawi a, “Isua hming hmang rawh” tiin. Chutah tak chuan second khat pawh hi ka ngaihtuah hmanlo reng reng. Mi tuitla amah chhanchhuah theihna tura hruizen an zuk vawm thlak, a nunna tura a vawn hma a ‘he hruizen hi eng rawng nge’ tih a ngaihtuah kual hmanlo ang vel hi ka niin ka hria, ka vuan tawp mai a ni. Ti hian ka ti ta a, “Isu, thudik i nih chuan min han hmuhtir teh” ka ti phawng mai a.
Tun hnua ka ngaihtuah let chang hian khami ni khan engati nge khati teh kher a ka lo tawngchhuah ni aw ka ti a, “Isu min tanpui rawh” te tih zawk awm tak a ni a; a mak ka ti thin. A chhan pawh ka hre biklo khatia ka sawichhuah kher na chhan kha, mahse khatiang kha a rawn rik chhuah dan chu a ni miau si a. Chu thu chu ka sawi zawh hma hma chuan thil engkim chuan ngai a awh fel leh ta thlap mai a. Chu chu ka rinna ka thlak danglamna ni a ni chuanglo, ka buaina intanna ni chiah a ni ta zawk a ni.
Engvangin nge Isua in Muslim a tanpui ngawt ang? A nihna takah chuan tunthleng hian keima theihna zawng zawng hian muslim tha ni turin engkim a tul ang chu ka ti vek a. Allah kawng min kawhhmuh a kal turin ka inpe vek tawh a. Allah tana martar hial tura inpe ka ni a. Chilpuah bomb awmna hmunah te ka kal a. Kan sorkar in Allah tana inpe te(fa-da-ih) chawimawina atana a pek thin Quran, sorkar stamp pawh chuang thlap ang chi thlenga nei thei hial ka ni a. Ringlo mite khaihlumna hialah ka inhnamhnawih tawh a, Allah mite hnena puandarh hna leh a duhzawng eng pawh nasa takin ka ti vek tawh a ni si a.
Thil dik chiahlo a awm a ni tih chu ka hria a, mahse Allah leh Islam sakhua hrim hrim ka rinhlelh vang phei chu a ni chuanglo. Ka thinlung zawng zawngin ka la ring vek tho a. Mahse kha thil thleng khan min tibuai tlat mai si a, theihnghilh luih deuh tawp te ka tum a. Mahse he zawhna “Evangin nge Isua hian muslim a chhanchhuah tak mai aw?” tih hi ka rilru ah chuan a ri nawn ut ut mai a. Muhammed-a Pathian zawlnei hnuhnung bera, sakhaw dik tawklo rawn ti famkimtu chu ka la ring tlat tho a. Mahse “Isua kha engvangin nge min tanpui tura a lo kal kher kher ni aw?” ka ti a ni.
Chutiang chuan kar hnih chhung chu ka rilru a buai em em mai a ni. Heti hian ka ti ta a, ka tawngtai ang a, chaw ka nghei bawk ang a, amah Pathian hi ka bula rawn inlan turin ka dil dawn a ni ka ti ta a. Chutih lai vek chuan Quran a thu awm, “Allah kawng te chu chi hrang tam tak a awm a; khawi hmun atang pawn tlang chu lawn tan la, a tawp ah chuan tlangchhip chu i thleng tho tho dawn a ni” tih te chu ka rilru in ka ngaihtuah a. Anih chuan hetiang deuh hi a ni tak ang a Pathian pawh theihna dan tur chu te ka ti a. A chang leh, ‘a ni theilo, Pathian duhdan chu a danglam a, ka tan hian kawngbik ruat a nei zawk ang a’ te ka ti bawk a. Chung ka zawhna zawng zawng chu amah ka zawh loh chuan a awmzia ka hre dawn chuanglo niin ka hria, pathian chu zawt ila ka ti tawp mai a ni.
Chutichuan chaw ngheiin ka tawngtai ta a, ka thinlung zawng zawng leh ka chakna zawng zawngin. “Aw Pathian, eng ti tur hian nge min duh le? Eng kawng hi nge zawh tura min duh le?” tiin ka zawt ta char char mai a.
Kar hnih chhung chu ka awmna ngaiah ka awm reng a, ka muthilh loh chhung darkar tam thei ang ber chu ka tawngtai ta tiah tiah mai a, chaw nghei chung zelin, ka muthilh zawh a ka harh leh veleh ka tawngtai chhunzawm leh nghal char char a, “Eng ti tur hian nge min duh Pathian” tiin ka tawngtai nawn ut ut mai a ni. Kar hnih chhung chutia Pathian hnena ka tawngtai hnu pawh chuan chhanna reng reng hi ka hmu lo! Beidawnna namenlo hian min tuam takzet zet a ni ber mai.
Chutih hun meuh chuan “Ngawi teh, Pathian, engahmah ngai tawh lo mai teh ang. He ka thil tih hi eng nge maw ni phiangsen le? Hrep tak chuan!! He ka zawhna chhanna hi hmuhtur a awmlo tawp a nih hi a! Pathian pawh hi a awm tak tak em tih pawh ka hre ta nek lo ve, ka nun leh hun zawng zawng te chu ka lo hmangral ve bawk a! Ka hriat theih chinah hlau reng rengin ka awm a, ka theihna zawng zawngin Allah tihlawmna turin tan ka la ve bawk a! Tunah lah chuan ka ngaihtuahna tibuai tu vel mai mai a ni.
Allah hi an sawi anga ropui leh mite thinlung ngaihtuahna hmu thei a nih si chuan, ka thinlung zawng zawng a ka hmangaihzia te hi hmuh vek awm tak,. Eng chungchang avang pawh a ka ko leh eng hming pawh a ka ko a nih pawhin ka thinlunga ka hmangaih leh duhzia hi chu a hre ngei ang a, a tana pawimawh ve deuh a nih te phei chuan hei kar hnih chhung zet ka tawngtai tawh a, mahse engmah chu a lo thleng lo chu a ni si a” ka ti a ni.
“Hetiang a nih chuan keima tan ka ti tawh ang a, keima duhna kawng ngei ah ka kal ve tawh dawn a ni, keiman ka hlimpui tur te ka ti ve tawh dawn a ni” ka ti a. Chiang tak maiin chutih hunlai tak chuan, Pathian thiltihtheihna chuan ka awmna room chu a rawn luahkhat ta huk mai le! Islam ah chuan Sual azawng nasa ber i tih theih leh ngaihdamna awm reng renglo chu, Amah Pathian(Allah) rinhleh a, a zirtirna rin loh te, a zawlnei te rinhleh te hi a ni a. Chu sual ngei chu ka ti chiah reng kha a ni a. Bakah, Islam ah chuan pathian(allah) in tu mihring mah hi a kan ngailo a, an hma ah a inlar ngailo tih hi kan inzirtir dan a ni a. Islam zirtirna dana ngaihdam awmlo sual ka ti ngei bawk si a. Ka room ah chuan Pathian ngei chu a lo kal bawk si.
A thianghlimna zawng zawng hma ah chuan chapcharin ka awm a, ka sualna zawng zawng phurrit chuan Pathian thianghlimna hma ah chuan min uai bet niin ka hria. Hei hi ka chiang, chiang tak ka ni, Amah a dik em em mai si avangleh kei lah ka sual tenawm em avangin mi tihlum ngei ngei dawn a ni, he khawvel hmai leh nunna ata min nuaibo turin a lokal ta a nih hi a suala khat ka nih avangin. Tah takte in ka tap a, thih ka duhlo in ka hreh em avang khan.
Mahse, pumpelhna hun tha ka neilo tih ka hre bawk si. A ni lah chu a thianghlim em em a, kei lah chu ka tenawm em em mai si a, ka room kilkhawr lam ah chuan ka phei rawk rawk mai a, ka kutin ka lu ka hliah a, “Pathian min ngaidam rawh. Pathian, min ngaidam rawh... min ngaidam rawh...” tiin ka tap chhuak vak vak tawp mai a. Chutia mangang taka ka tah a, ka au vak vak lai tak mai chua ka darah hian min rawn khawih tih ka hria a, “Ka ngaidam em em che asin” dam tak hian a rawn ti a. Chu thu a sawi rual chiah chiah chuan a hring a hran tak meuh meuh in ngaihdam ka ni tih ka hre thei nghal a ni.
Mahse, ka hrethiam thei thlawtlo a ni. “Ngawi lawk teh heti hian kan sawi kher thin, ‘Pathian zahngai thin leh khawngaihna a khat hmingin’, a chhan chu Rorelna ni a lo thlen hma loh chuan tu mihring hi nge ngaihdamna chang a, changlo tur tih kan sawilawk theilo tlat a ni. Chuvang tak chuan a ni Quran a khawi chang ah mah hian Muhammed a hian vanram a kai tih ziahlan a nih loh ni. Mihring dang zawng zawngte angin thawhlehna ni zawha Rorelna ni ah chuan mohammed-a vanram kai leh kailoh pawh chu rel a ni chauh dawn a ni.
Anih chuan, he Pathian hi tunge ni ta ang? “Ka ngaidam che” tiin ka hnena a sawi lai ngei ngei a ngaidamna ka chang a ni tih ka hriat theih nghal bawk hi le.
Ti hian ka zawt ta a, “Tunge i nih le? Ka ngaidam che min tih a, ngaihdamna ka chanzia ka hriat chian em em thei mai hi”. A ni chuan, “Kei hi KAWNG LEH THUTAK LEH NUNNA CHU KA NI” a ti a. Chu thu ka hriat rual chiah chuan awmze thuk tak leh pawimawhna ril tak nei a ni tih ka hrechiang em em a. Mahse a awmzia diktak erawh ka hrelo let der thung. Eng pathian nge a ni tih hi han ngaihruatna tur chhin eih pawh ka la hrethiam chuanglo. Ti hian ka zawt ta tawp mai a, “Tu nge i hming aw?” tiin, “ISUA KRISTA PATHIAN NUNG CHU” tiin min chhang ta a.
Chung thu a han sawi chiah mai chuan le... ka taksa a ruh awm zawng zawng te hi lakchhuah vek ang mai hian a ni ka awm, ka hmaiphum meuhin chhuat ah chuan ka let thla hnawk mai a, Pathian bulah chuan ka tap ngawih ngawih mai a. Kum 18 meuh a ral hnu pawh hian e, A hmangaihna te, a zahngaihna te hi ka theihnghilh theilo a, ka theihnghilh thei thlawtlo a ni khami ni a ka tana min tihsak kha. Min ngaidam tawp mai kha!! ngaihdam ka ni tih lah ka inhrechiang em em bawk si. Ka hmaiphumin ka tap tawp mai a ni. A chhan chu maw, kum tam tak chhung khan Pathian tihlawm ka lo tum nasa ve em em a. Mahse khang thil zawng zawng te kha Pathian lawm zawng reng reng a ni si lo. Pathian ropui chu eng thil mah ka tihsak reng reng lo kha a ni si a. Bumin ka lo va awm nasa tak em aw ka ti a, "Hei hi(Allah) pathian a ni a, Amah(Isua) saw chu a ni lo" tiin min hrilh thin a.
Allah kawng zawhna atan tual te min thah tir a. Mahse he Pathian hi chuan “Keima tihdan angin mite hmangaih ula, ngaidam rawh u” a ti si a. Hei ngei hi ka thinlungin a duh chu a ni em? Aw ni e... hei ngei hi a ni Pathian nihna diktak mai chu. Pathian chu e NGAIHDAMNA a ni a, Pathian chu HMANGAIHNA te a ni zawk a ni. Darkar hnih zet mai chu ka tap hawm hawm mai a.
Chutah a ke bulah chuan ka intungtho a, heti hian a ti a “Hei hi rawn en chho lawk teh” . Tv hmai(screen) ang deuh hi ni berin ka hria. Chutah chuan mihring, kum naupang atanga tleirawl, nula leh tlangval, nu leh pa leh tar te. Hnam hrang hrang ami te chu an nunhlui hman dan zawng zawng nen ka hmu a. Chung ka mi hmuh te chu a mal te te chuan an thiltih sual kim biai hian ka hmu tel nghal vek a. “Aw Pathian heng mi zawng zawng te zinga cheng hi ka ni a, ka hre chiang hle mai, sual nihna nei vek an nih hi mawle” ka ti a. Isua chuan “Afshin, engtianga awlsamin nge i sualte ka ngaihdam kha?” Keichuan, “Awlsam em em maiin” ka ti vat a. Farsi tawng ah chuan thil awlsam deuh sawi nan hian tehkhin thu, “Tui in anga awl” tih hi kan hmang thin a. “Chu mai pawh a nilo... tui in aia awlsam fe zawkin” tiin ka chhang nawn leh a. Lal Isua chuan “I sual te awlsam te a ka ngaihdam ang khan an ni pawh ka ngaidam thei asin. Tu in nge hrilh ta ang?” a ti a. “Min tir rawh keimah hi” ka ti a, “Kal rawh le” min ti ta a ni.
Khatiang kha kristian ka lo nih tak dan chu a ni a, chuan “Aw Pathian Bible min rawn pe teh" ka ti a, Jail chhunga section danga awm tu emaw ni hian min rawn pan ringawt mai a, “hei hi a nih hi i thil dil chu” a rawn ti a. Hindi leh urdu chu ka thiam nal ve viau a. Chutia min pek takah chuan Bible a ni tih chiang takin ka hre nghal a, lawmthu hrilhna chang pawh ka hre lo. “Pathian, nizanah Bible dilin ka tawngtai a, hei min rawn chhang nghal a. I va mak ropui tak em! Pathian thiltithei i ni e i lo sawi ang ngei khan, mamawh min pe rang e mai” tiin. Kha ngei kha a ni Pathian thu nung ngei chu.
Hei hi ka’n hrilh teh ang che, Ka testimony hi mi ten Pathian duhawm thiltithei an lo hriat theih nan ka sawichhuak a ni. Ka testimony avang hian tumah hi kristian ni turin ka beisei lo a, ka testimony hi chu keima tan chauha tangkai leh tha a ni. Mite hian thil pakhat hrethiam hram se ka duh a ni. He testimony hi Pathian chak em em chanchin a ni, engkim ti thei a chu. Tupawh, thinglunga amah zawngtute zawng thin tu chu. A chakna leh a thiltihtheihna zawng zawnga mihringte hmangaihtu chu.
Vawiina ka testimony hi mi tu emawin a lo hre fuh ve hlauh a nih chuan hetiang hian sawi ve chhin tawp se ka duh a ni, “Van te Pathian, engkim siamtu, hei hi a dik a nih chuan, ka duh ve asin” tiin dil la.
Chiang takin ka sawilawk sak ngam a che, Pathian engkimtithei ka bula lokal a min rawn khawihtu leh ka nun thlak danglam tu leh ka sual zawng zawng ngaidam fai vek tu, Vanrama ama bula cheng thei tur ka nihzia min hriatchian tir tu ngei khan chiang takin kha hriatchianna kha a lo pe ve thei a, ngaihdam ka chan ang chiah kha a lo chantir ve thei a ni. Khatiang hmangaihna chiah chiah khan a lo hmangaih dawn a ni. Chu chu a ni LAL ISUA KRISTA CHU. Ropuina chu nei rawh se vawiin ah leh chatuan thleng atan. AMEN
Post a Comment