The Aizawl Post
.
Mithiam ten zirchianna an neih tharah curcumin chuan cancer cell thang tur a titawp thei niin lab test an neihah an hmuchhuak a, curcumin chu aieng (turmeric) tiengtu ber hi a ni.
.
Lab test-ah hian curcumin chu silymarin nena an chawhpawlh phei chuan hna a thawk chak lehzual tihhmuchhuak bawk. Silymarin chu hnim chikhat milk thistle-ah a tam hle.
.
He research chungchang hi Journal of Cancer-ah tihchhuah a ni.
.
Zirchianna neitute chuan cancer cell chu curcumin hmangin an enkawl a, chutah curcumin leh silymarin chawhpawlhin an enkawl leh bawk a, hetianga an tih hian cancer cell thang tur a titawp thei tih an hmuchhuak ta a ni.
.
Zirchiannaa an hotu Saint Louis University a biomedical laboratory science-a associate professor Dr Uthayashanker Ezekiel chuan, "curcumin hian cancer cell thang tur leh taidarh tur a veng thei a, silymarin nena chawhpawlh a nihin a thawk chak lehzual a ni," a ti.
.
Dr Ezekiel chuan tunah chuan cancer, a bik takin colon cancer enkawlna damdawi atan an thil hmuhchhuah hi a hman theih tak tak dawn em tih chu zirchianna la neih deuh a ngai niin a sawi a, "Curcumin leh silymarin hi taksaah a tam lutuk chuan mihring tan a tha lo ve leh thei tho a, chuvangin zir tur a la tam. Tunah chuan aieng chu a hlanga tam tak ei vak vak aiin kan chawhmehah telh mai hi a him ber rih a ni," a ti.
Post a Comment