Siama Chk VL
Bung 4
Darkhuang tlangval tuai tirh Hluna chu luzuar ngam leh thihngam sak ani tih hre ngat phei chuan Dairep khaw chhuanvawr ngêng zet mai pawh chu a in hnuk dawk duh ngei ang le mahse, tunah zawng tawlh let chi zia zang ani talo anih tur ang ang chu ani zo ta si, Val upa pakhat chuan "Thingnawi kha han vur belh ula, hmun kha han kian zau teh u khai eng tiang taka Mihuaisar nge an nih Dairep mikawlhsen te chu i han fiah ang hmiang tuna i bitum tur hi rawlthar te mah nise i hnuk a ti ulh mawlh ang Vala" ahan ti bauh bauh ta mai. Chu veleh An khaw rawn run tu te duh thusam ti puitling tur in thingnawi chu an han vur belh sauh sauh a. Tichuan kawtlai chu zau tak maiin an hual ta luih luih mai a thih na rapthlak a thleng ngei dawn ani tih atu amah chuan an hai billo. Thingnawi chu an in beihna lai turah chuan an vur alh ta hluah hluah maile!! chutah Dairep Khaw Pasaltha ve tak leh mi ngéng zet mai chuan "naupang mai mai maw ka bitum dawna 'alu ka hmuam tir anga' in vai khan amal te te in ka mal beih ang che u ala ti lang lang mai. Thimthamah chuan luzuar ve ve tih hriat tak maite pahnih chu an in thlur bing ta ngar mai le. Dairep Pasalțha te zing a in buan chak leh mikawlh ber mai leh Darkhuang tlangval naupang Zawlbuk pawh la chuang phalo Hluna tunhnai lawka an chhuanvawr te pahnih chu ding chang zawk nih tum ve ve chuan Mei alh hluah hluah karah chuan an in veh ta cher cher maile!!! Mikhualpa ngeng zet mai chu arawn ding chhuak vut a. "Khawi ngê mi dawizep khaw daingul mirin naupang luzuar ngam chu" tih pah chuan mikhualpa chuan Hluna chu a man ta chat mai a. Nghet tak ve ve a inmanin Mikhualpa chuan, Hluna chu han keuh thluk thuai mai chu atum hle a, Mahse, a theihtawp a chhuah chung pawhin Hluna chu a che laih laih rigawt a, chu tah Hluna chuan Mikhualpa bekah tak chuan ahnek ta chawrh maile, mikhualpa pawh chu a kang awrha leiah chuan a in vaw thum chawrh nghe nghe a. Rang takin Mikhualpa chuan a hman thiam em em a 'milulak chem' hriam zet mai chu a phawrh ta zal zal a, "kha le i tawp na" tih pah chuan mikhualpa chuan a milulak chem hriam zet mai chu ahan vai ta thuak a, Hluna lah lo duai bik lo thingfak meiling èng sar mai chu chhar nghal pah leh bum pah chuan mikhualpa chu ahan hlap ta pawp pawp mai a, alu ruh ri chawrh chawrh khawp deuh thaw in ahlap bawka mikhualpa pawh chu ding leh tur awm lo chuan a thu sawp ta nawka....
Mikhualpa pawh chuan cho enah en tawh lo chuan a thut ngai ngaia thu chung chuan "ka tlawm e." a rawn ti chhuak ta phawnga, Lal Dailova chuan min rawn runna chhan kha han sawi tawh rawh le ahan tia, mikhualpa pawh chuan zep buai duh tawh lovin an khaw thenawm lal Sairawna thupek na hnuaia rawn thawk chhuak an nih thu in ahan chhang a, lal chuan "eng vang a rawn tir chhuak che u nge a nih a! a eng pawi nge kan sawi ahan ti leh a, Mikhualpa chuan " ni e ka lalpa in khua hian hmun tin kiltin ah hming that na nemen lo in dawnga! i ngil neih zia leh lal belhfak awm i nih zia te chu lal Sairawna chuan a awt che a! in khua kan run darh theih phawt chuan lal Sairawna chuan Darkul leh sial eng ilo min pek a intima chu vanga rawn thawk chhuak ta chu kan ni lalpa min ngaidam hram hram rawh tun hnuah chuan in khua rawn bei tur leh chelek tur zawng in kan lo kal ngai tawh lo vang." ahan ti chuai raih maia... Lal ngil nei tak tih takah alo ngaidam leh maia " tun a tang in hre rawh u kan khaw dodal zawnga in rawn pen chhuak leh ngai anih chuan kei ngei hian in lu chu kan inbul thing zarah ka tar vek tawh ang che u! khawngaihna sang ber in ka ngaidam a che u, in thiante ruang kha hlawm khawm nghal ula zan riah buhfai tur kan pe bawk che u anga tun zan law law hian khua hi min chhuah san nghal tur ani, in thenawm lal Sairawna an tih chu in khua in thlen hun hunah tu emaw khan lo va hrilh rawh u a rulh letna hmachhawn tur in lo in peih tur in in va hrilh dawn nia" ahan ti bauh bauha, ti chuan lal Dailova thupek ang chuan Dairep khaw val rual paw'n zawm in a zan a zan chuan an in hlawm haw ta a...
Hun leh ni aliam ve hret hret zela lal chuan amakpa alu sunna chu na tiin a tuar dam thei mawlh lo. Lal Rawna an tih mai chu run a chak tawh tak zet ani. Lal tunu Rinzuali chu apa thih naa mawh phurtu Lal Rawna an tih chu athi lai hmuh a chak vet vet ve hle mai. Kar mawlh a liam leh hnu chuan an pasaltha te thihna a lusun chhung tinte pawh chuan dam lam pan ve tawh in an hna ngai tul tul te chu an thawk leh thei tawha mahse, an khaw rawn runtu Lal Sairawna chu an run hun tur chu an nghakhlelh ve hle ani...
Zankhat chu Hluna leh a thianpa kawm ngeih em em mai eng tik lai maha thu tak thei ngai lo Tlanmawia nen chuan lal tunu Rinzuali rim tur chuan an in zui chhuak ve a. Thut hmun te an siam tha sauh sauh a. Tlanmawia chuan "hei ka thianpa Hluna hian Rinzual a hmu chak lutuk che a mahse, amah in alo leng ngam si lova ka lo kal pui ve tawp anih hi leng na tur ka nei a sin le aw zanin kher kher chu Lengi puan deh tur ka nei sin le" ahan tia. In leng dang an lo awm ve nual avang chuan Tlanmawia thu sawi lai chu an nuih ta ham ham mai!! Hluna ngaihdan erawh a ni mawlh lo mahse, tih theih anei miau silo ale. Tlanmawia vek chuan "Thisûk neiin an sawi si che a" a lo ti leh a. Hluna chu a têr nghal at mai. "Khawi lam thisûk mah ka nei lo ve. Tuin nge ti a? Ka va hmu châk ve.." Hluna chuan thu tak zet hian ahan ti deuh tan tan a. Thenkhat lah chu hmuh hlau tih hriat tak hian an nui ru char char hlawm a. Pakhat chuan khawi lam atanga i hriat nge ni Mawia "Lengi bân kak pawh a en ngam lo an ti zawk lawm mi kha?" a lo ti zauh a. Hluna chuan,"Tu Lengi maw?" a ti hû a, "Ka hriat theih tirh ata vawi khatmah thisen chhuak hlauhna ka la nei lo" a tih zawma a nui ta ver ver mai. Diktak chuan (Thlanmawia hi Mawia kan ti tawh ang) Mawia fiamthu duh leh lutuk hian a mah kap zawng hlira perh thin ani bawk nen a thin arim thin hle a mahse, lehlamah chuan nuam ati letling zawk thin anih kha...
BUNG 5
Zing takah Rinzuali chu thoin tuium nen tuikhur lam pan a rual nghal a. (Hetih lai hian tui chawi nana an hman hi Rawtha lian leh châng hawlh pawp ani thin)Khua ala ên chian loh avang chuan arsi pawh ala lang pheuh pheuh a, tuikhur ral atang chuan thil êng deuh riai riai, tui chhung lung intung pakhat atang chuan rawn êng chhuak hi ava hmu a. Rinzuali chuan tuikhur lungpui kar atanga rawn êng chhuak phût phût a hmuhin mak a ti hle a, lunghlu a nih ngei ringin chu lam chu a pan hnai vat a. Rinzuali chuan lungpui rawn eng riai riai mai chu hmuhnawm thlir in a thlir a ni ber, harh thut niawm tak hian Rinzuali chuan lungpui lam chu pan hnai in a va zen da da a mahse; a kutzunga cheptu an awm tak thut avang chuan a phu ve chiang hle. Chakai anih pawh a ring thiam mai a, a en chian poh leh chakai atanga êng rawn chhuak bak lung êng dang hmuh tur a awm silo, chu chakai lian zet leh hrawl tak chuan lunghlu a pai a nih ngei pawh a ring ta bur a. A tawp a tawpah chuan harsa e tilo chuan a man ta ngei a, pawnah a han la chhuak a, chakai chu a ên ngai ngai in a la êng a. Chakai chu phel hnihah chuan a han phel phawk a chutah le! Chakai pum chhungah chuan lung Fanghmir ai lian deuh sen sâr mai hi a lo awm a. Chu lung chu han belhchian poh leh a mawiin a nalh kher mai. Tuite thalin in lam a pan ta nghal a. Rinzuali nu chu rawn tho chhuak țham țhamin, "Mambawih i va tho hma ve le âw, zanlam te i mu tui maw "? a han ti a. Rinzuali pawh chuan, " Ka nu min ngaihtuah thin lutuk suh, 'mutpuar mawlhin' ka mutui khawp a sin thawh ka hai lo chauh anih hi kanu," hlim sang hian a han ti let a...
Rinzuali nu chuan a fanu kuta hriat loh êng de re re a hmuhin hriat chak hmel zet hian a fanu Rinzuali chu a han pan hnaia. "Mambawih, kha eng thil nge ni i ken a êng te a nei ani maw, vanneihna te a ni mial em" ? a han ti a. "Nia ka nu a mawi khawp mai tiraw, ka tui chawina bul te tui kamah êng siar siar ka hmu a, ka han belhchian chuan Chakai âwm atanga eng lo chhuak ka hmu fuh a thil hlu tak a nih beiseiin tui chhung lung lian vak lo pakhat, êng lo chhuahna Chakai lo biru chu kava man a. Chakai chu țhet in he lung sen êng mawi tak Fanghmir ai tlem lian hret hi ka chhar ta a ni ka nu a mawi tiraw" ? a han tia. Chu tih lai chuan Rinzuali pu lal Dailova pawh a rawn tho chhuak ve țham țham a. Lalpa chuan a fanu leh atunu te inbiakna chuan a lu a tihai ngang ni tur a ni, hriat ve chakin a puan a han ven țha sauh sauha. Lal pa chuan, "E heu, Mambawihi hian vanneihna tukin zing kar kar ah a rawn pai lut a ni maw! Eng thil nge ni"? tiin a han zawt nghal a. A fanu Lawmi chuan a bawihtei tui chawina lama a lunghlu chhar chungchang chu tawi fel takin a han hrilh a. Lalpa chu a lawm ngei mai. Han belchiang ve teh ang tih leh lungte Fanghmir aia tlem lian hret chu a tunu Rinzuali kut atangin dimte in a laksak a. Lalpa chuan lungte chu a han thlek vang vang a lungmawi chu lawm tih hriat tak mai hian lal pa chuan lunghlu anih hi a han ti chuai raih a. Chutih lai tak chuan lal pa ina rawn chuang kai tur a khawnbawl minte hmel pawh hmuh a rual ta nghal a. Khawnbawl min Pu Kaplawra chuan lal pa te chhungkua hmel a danglam zia a hmuh in thil eng emaw tak a awm a nih a ring thiam mai a. Khawnbawl min Pu Kaplawra chu Mawnga hmawlhte nena vit tur vut vut ang maia hriat chak hmel tak hian Lal pa chu ka hau hian a han en a. Lal pa chuan hrethiam in a tunu ina ar khuan hma zing tui alo chawi peih diam mai chu mak an tih thu sawi in a lo chhang ta daih a...
Tukțhuan ei hun a lo nih chuan Khawnbawl min pu Hlimpuia fapa mal neih chhun Hluna pawh chuan thing ni thum ngawt tla tur hi alo ek khawl hman ta der mai. Pu Hlimpuia chuan a fapa hnenah chuan chaw ei ahun tawh thu leh a thing eh lai duhtawk turin a han hrilh a, Hluna lah chuan "ka zo țep" tiin ngaihsak loh hmel tak hian a la eh chhun zawm zel a, a duh tawk thing a eh zawh chuan chaw ei turin choka lam a pan ta bauh bauh a. A nu chuan a chaw ei tur te lo khawrh sakin kut sil tur chuan a nu in a lo ti a, Hluna ngaihdan ni ta lo chuan a nu chu ti hian a han vin deuh tuar a. "Ka nu! ka len ve tawh hi kut sil tur ten tukthuan ei dawn apiang hian min ti ziah a! thenawmte hriatah pawh a zahthlak deuh a nia" a han ti lang lang a engmah sawi zui lo chuan a nu ina a chaw khawrhsak buh chang rum leh nghate rep den nen tui takin a inhnawh puar a. Kut sil tuma tuium lam a pan lai tak chuan eng tik lai pawha mi tak theilo Mawia chuan a lo au phei luah luah a. Mawia'n a thianpa Hlunate in a va thlen chuan sava veh tur in sawm a tum thu a hrilh ta nghal a, thil dang eng eng emaw ti tel nghal turin a thianpa Hluna hnenah chuan a sawm ta bawrh bawrh a. Dik tak chuan Hluna hian a tawng khalh hman meuh lo, " aw " a tih mai loh chuan nilo puia a nu a hrilh a hlau bawk si a, a lo aw e liam sak ta vel mai mai a; Hluna ngaihdan tak chu a phur teh chiam lo mi uang nena khawi ilo chhuah chu mahse, chu mi ni kher kher chuan tih tur mumal a awm takloh avang chuan kal chu an rawt dun ta tho a...
Hlunate thian dun chuan Kawmthlang lam an pan ta vang vang a kar loah ngaw chhung an lut ta thuai a. Ngaw chhung an luh tak siah chuan Vamaitai leh Vavu te chu Bilkung lerah tam tham ve tak chu bil rah tlan in an lo in fuan khawm hi a lo nia. Mawia chuan a zopa Sairawkherh a fan khauh zet nen chuan Vavu zawk chu Phul kar atanga biruk a veh cher cher pah hian a han sai ta vang vang a, a phan a thlah dul rual rual chuan Vavu thau ve tak pawh chu a tawpna tih hriat tak hian a hlawm thla ta nghal nawk a, lei a tlak rual chuan an zuk chhar rang kher mai. Reilo teah chuan an thian dun chuan an ipte khat ve ve an veh thla der mai. Remchangah tiin thingtuai pu khat ve ve an an sat leh a. Thing an put zawh tawk an sah zawh chuan khawthim hma in khawchhung luh hman ngei tum in an in buatsaih leh taa. An hlawhtling dun bawk a in thlen vat vat an nghakhlel tawh khawp mai. A tira an lo sial sa kawng chhuk chho zet mai zawh chho nghauh nghauh in an thing put rit tham tak leh an sava veh tlak ipte puar pang nen kawng chho bumboh chhe zet mai, an lo chhuah tan tirha an kawng sial chawp chu an zawh chho leh ta a...
Ni pawh a tlang sang tawh khawp mai, chhun chawfak an han rawt a. Mawia chuan a thianpa ipte ami Vavu thau ve tak pakhat chu rawh turin a han phut pek a, "i ui deuh a nih chuan ka pawi ti miah lo a nia, ka ipteah pawh hian va hrawl zet zet mai a tam a nia, 'marawh chu Vavu pakhat mah ka sai tla velo tih chauh a nia, a han ti charh charh a, Hluna chuan a phal lo a ni hauh lova, mahse ama ah lai kher kher chhun chawhmeh atan a awt tlat mai bakah ui țun turah a dah nghal ringawt kha a ngaihdan a pel tep a. Mahse engtik lai pawha mi tak lo tih a hriat chian miau si avang chuan phur hmel zet hian, "mauthei lova sat rawh, ka lo puah ang," a han ti sak mai a. Mawia ngaihdan a la ni chuang lo , "mauthei ka sah hlanin a nilo zawk lo puah i tum chiang mai, khawi maw," tih pahin Vavu chu a han lek kang nghal a, hnial buai chi a nilo tih hria in Hluna chuan an mamawh tur Mauthei châng sei tak pakhat leh tumbu anchiri thel hlo eng ilo chu an chawlhna lam pan chuan a pu bawr phei ruih maia..
Mawia chuan sava pakhat mai a lo rawh awzawng lo pathum ngawt mai hi a hmin sa diam hian changel hnahah chuan alo dah ta ran hi a lo nia. Hlunan a han belchiang a a kah zinga mi a ang lo tlat, pakhat zawk chu a ni ngei mai, mahse a dang pahnih chu a ni lo, Mawia chanpawl ngei a nih pawh a hrethiam ta mai a, a thianpa chet dan maksak tak chu mak a tiin a ngei kher mai. Chhun chaw an han bar bawrh bawrh a, chaw an bar mawlh mawlh lai chuan an chhak tlang dung mual sei tak ruam lai chu thli thaw niawm deuh hian a ri deuh seng seng mai a, a chang leh mau sah rik thawm in a chhawn deuh reng bawk a, Tlanmawia mak ti chuan, "kan khaw daingul pasaltha ten zan lamah an lengi tenen an laikhum a nghing na deuh a ni maw, mau te lai lai sah a ngaih tak ni" tih pah in anui ta hawk hawk a...
Chawte an han eikham chuan titi melh melh pah chuan an hlim ngei mai, an chawlhna lai ruam hi Thingrai kung tamna lai a ni a, reilo teah chuan thil kang rim hmui rum rum in an chawlhna ruam chu a uap khat ta. Mawia chuan "Hluna, chu rim zet chu thingrai rawh rim a va ang deuh ve, kan chheh velah hian thingrai kung kit a rawh chhin an awm a va ang ve aw" a han ti bauh bauh a. Hluna ngaihdan a lo ni ve a ni ang e, alu alo bu nghauh nghauh a. "Mawia, ka ngaihdan chuan mihrang an nih ka ring ta lo tawp!" a ti ve charh charh a. Tuna chuan Mawia pawh hian thil awmzia man thiam ve tawhin khua a thim hma ngeia khua an luh hman ngei a ngai a ni a ti rilru ve ta a tho nghal phatin " hawh teh, tiang lai hi awm reng na tlak pawh a nilo tawp, i han chhuah san vat teh ang, tia a phun bul bul rual chuan a thing sah chu pu kang nghalin, a kal ta nghal nal nal a. Hluna pawh chuan zo takin a thing phuar khawmsa chu a han pu nawlh mai a, a thianpa Mawia chu a zui ve ta nghal a...
Ni pawh chu a nem tan ta tih chuan Mawiate thiandun inkar chiahah chuan an chhak koa Thingrai upa tak 'hreipui bah rual' vel nitur en reng reng pawha kum za tam nghet taka ding thei tur anga ngaih theih chu, Hluna te inkarah tak chuan a awp rup maia, an thing put lai ve ve chu thing chuan a vuak tlak sak ve ve a tlemah tlemah an ni zawk pawh chu a deng hlum lo chauh nghe nghe ani. Hluna dar chu a thing tuai put hmawr chuan a tai tel palh hlauh maia, a thi hnuang mai a. Mawia chuan ram hmul damdawi 'japanhlo' leh 'Sumbul' fukung anpui tam tham tak lain a nuai tuia, a nuai tui tha tawk tawh a ni tih chuan Hluna ban thi hnuang lai chu a han hnawih saka; mawia zawk chu avan neia ani chu thing in a rawn awp hma thing in atum ram ala thleng lo tih vel chiah chiah khan adar atang a thing put lai kha abin hman chiah chiah lo niin nilo seng chuan hliam natak tuar tur zawk ani, Mawia damdawi hnawih sak khan Hluna ban kak tuar mai kha a ngeih ani ngei tur ani a dai sawng sawng thei hial in a hria a. An thing tuai put lai chu ngaihsak peih tawh lovin mak titak chung in chulai atang chuan muangchangin hel na kawng tha zawk zawng pah chuan an in hnung chawn leh ta ngauh ngauh a...
Thui pawh an la kal lo tih chuan an thlang lawk sih zau vak lo atang chuan Savawm hrawl zet mai hian tui hi a lo dawt kawlh kawlh a, an thian dun chuan sih an kan ngei ngei a ngai ta si chulo kal khan tha a awm bawk silo an buai ta der mai. Savawm kal kian hun han nghah ngawt dawn pawn khua lah a thim lam tulh tulh ta si, kah mai loh kha chu an tan kawng dang a awm ta lo. Tunah chuan Mawi'an atih tur dik niawma a hriat avang in a funki atang silai zen suah hnih vel suakin a panghemah chuan a han sawh muk sawk sawk a. Mi awm hle hle lai han kah ngawt chu awmlo an ti hle naa, kawng dang kal khan a awm ta miau si loh avang chuan Mawia Silai kaw hmawr chu a khu ta chiai chiai mai le. Mawia ngen mu dawk chhuak zawk chuan Vawmliana Sahuatah kap palh hlauhin a biling a balangin hmatiam in an tlan ta chiam a...
Vawmliana lah chuan Mawiate tlan nalam panin rim zet hian phuba lak tumin a kal ta tham tham mai le! a kal muang hlauha mihlau tlan chiam chu Vawmliana tan pawn um phak rual anilo mahse nidangah midang tan a hlauhawm ve thung dawn ani. Hluna chuan sahliam hlauh vanga han tlan teh chiam mai chu a tlawm la tlat pek a. Mawia tlan lai chu a banah man ding chatin Vawmliana lo hmachhawn tur chuan a han berawn a. Mawia lah khur dar dar chung hian rawn tawng chhuak vein, "Mawla i lu i zuar duh a nih loh chuan tlan mai ang" atih sak hmiah maia. Hluna ngaihdan alo nilo pek a thianpa hnenah chuan tha tak in thil kalphung a han sawi a," Mawia, tihian Vawmliana kan chhaih kawlh ta rau rau, keini lo him pawh ni ila, midang ram vak ve te tan a him lo ani, chuvang in mipa takin kan lo hmachhawn mai tur a ni, i duh chuan i hma tiam khan tlan leh ta la, kei chu Vawmliana hi ka lo hmuak dawn ani, " a tih san ta nang nang mai le. Mawia chuan a thianpa chu tlan tur in duh hle mahse, a tlan duh tawh dawn lo tih chu hre chiang tu ber ani lawi si, "eng pawh tawk dawn ila ruam khatah kan thih leh kan thi anga kan dam leh kan dam ang" ti rilru in a thianpa chu a thurual pui ta zawk a...
Hmun zawl rem lai deuhah chuan Hluna te thiandun chuan Vawmliana lo thlen hun chu an nghak ta tawp a. Silai chelek lehna hman a awm tawh si lo, Vawmliana pawh chawpchilhin a rawn lang ta hlawl mai; a rawn rum chho ngur ngur a, a kal zawng ringawt pawn thing ban tia lek lek chu a nêk chhum hmawk hmawk thei hial a. Mawia pawh chuan a thianpa chu a bânah hliam a neih avangin ngaih tha lo tak chuan Vawmliana hmachhawm turin a chem nen chuan a lo ding kak ve țiau mai a.. Tunah chuan Vawmliana nen an in hlat zawng hi in dung chen vel lek ani tawh a. Vawmliana lah chawlh tih zai reng reng rel thei lovin a taksa hliamtu chu pawh sawm vek a tum tih hriat ngawih ngawih hian hmalam panin a rawn bu phei nghut nghut mai a...

Post a Comment

Powered by Blogger.