BigDaddy Hmahmatea
THUHMA: Hei ka chanchin h ziak the hi min ti ve fo mai a, mahse K
A HRINGNGUN ZINKAWNG tih leh KUM RUK LAI A LIAM VE TA tih ah khan ka sawi nual tawh avangin a hranpa vak a sawi ngai pawh ka ti tawh lemlova mahse post hran ve ve anih avang te, la chhiar lo te an awm nual avangin tlema siam rem a, a thenj paih a, a then belhin hei heti hian sei tawkin, kim lo tak siin ka rawn chhuah ta a ni. Ka sual lai chanchin te leh keima chanchin hrim hrim hi kimchang deuh a ziak tur chuana thui lutuk dawn a, chuvangin heti hian , a pawimawh deuh lai leh a nuihzatthlak deuh thenkhat te phuailuai takin, inkalthelh nuaih in ka rawn lawrkhawm ve ani a, a chhiar dan min lo thiam sak ula. A chhiartuten a chhunga suahsualna chi hrang hrang lam nilova, a tha lai leh zir tlak lai awm ang ang te min hmuh thiam sak hram turin ka rawn ngen nghal che u ani e..
PAN LAI HUN: Pian leh mur na ah chuan Aizawl a piang a seilian ka ni a. Unau pianpui ka nei lo a. Chhungkaw lam ah chuan ka nu hi 1st class officer ani ve thin a, ka pa hi contractor ani a. Uangpui chang suh ila kan naupan, rawlthar chhuah vel chuan kan khawsak a harsa ngai bik lo. Ka than duh avangin Sikul hi kum hnih leh a chanve ka nih in ka lut tan a. Mizo ah chuan sikul lut hma pawl tak ka nih ka ring. Sikul ah hian zirtirtu te hian mut na hun bik hi min siamsak tawp zel ani.


Sikul ka kal tirh atang hian lehkha hi ka thiamthei a, zirtirtu te duhsak pawh ka hlawh a, ka sam hi a kir lutuk a, a khuih theih loh thin a, zirtirtu te hian a chang leh min chei vak a, a chang leh ka biang te hi an piai na vek zel. Lehkha ka zir tirh atangin ka vawikhat chhiar hi ka hre nghal zel a, ka lehkha zir hun chhung zawng khan note tihtlak ka nei ngai lo. Kumtir ah text bu vawikhat ka chhiar chhuak a chu chu kumtluan in class a an sawi nen hian ka ring tawp a, ka tichhe ngai lo.


HIGH SCHOOL CHIN: Tichuan, ka lo lian ve zel a, ka nu leh pa te hian min duat em em a, engkim ka duhzawng apiang min tih sak thin a, rual ka awh an hlau em em a, mahni phak tawk ang chu min tih sak zel thin. School lamah pawh model student hi ka ni ve tawp a, thil tihna engkim ah a hmatheh ah min hmang ve thin a. Tichuan, chutianga chho zel chuan 1984 kum khan ka nun khaw sawi danglam vek tu tur HIGH SCHOOL pawl 8 chu ka lo rap ve tan ta.
H/S hi St Pauls a luh tum ka ni a,mahse kan tlai deuh avangin seat kan chang lo a, JL H/S ah 84 kum khan ka lut ve ta a. Ka lian zuah na a, ka la naupang a, tin, ka thanduh avang hian vengchhungah pawh kei aia kum 5 - 6 a upa hlir hi ka kawm a, H/S kan kal hian la naupang viau mah ila ka inti tlangval ve tawh khawp mai a. Ka len avang hian mitthi in riah, thlan laih te pawh hi kum 14 ka nih chuan ka ti ve vek tawh ani.


RUIH HLO KHAWVEL CHU: JL a ka lut chu SUAL lam ka zir tan ve ta. JL ah hian ka classmate te chu an nula tlangval thuau tawh hlawm a. Kan school canteen ang deuha kan hman chu mimal in chhungkua a an luah hi ani a, eitur an siam a kan chawl ve mai thin a. Tuikual vel a zu tam vanglai kha a ni a, kan canteen te pawh chuan Zu leh Ganja hi an kawl tel a, chhun break lai hian kan thiante ho hian an in in an zu pah fo mai a, in lak pa engemaw nan tih ve chhin ka chak ta riau mai a. Vawikhat chu ka ti ve chhin ta a. Khami tum khan zu local no 2 leh ganja fawh 5 vel ka fawp a 1984 kum may thla a ni. Khatatang khan ka hawi kir leh tawh lo ka damchhung hun kum 20 chuang luah a, ka nun, chhungkua, zirna, eizawnna, nupui fanau, leh hriselna thleng a min ti chhia a mi hmuhsit leh nuihzat, reithei leh hrehawm a tun thleng a min siam tu ka tawn tan ni kha ka theihnghilh ngai tawh lo ang. Tichuan, zu leh ganja chu ka ti chu ani ta reng mai. Khami kumtluan khan ka ti ve ta a, pawl 8 chu ka passed a 9 St Pauls ah ka zawm ta. Hetih hun lai hian in awih lo mai thei a, ruihtheih thil tih kha ala zahthlak loh tunlai ang in. Intihtheih nan kan hmang zawk a, fashion/fads chikhat a ni a; tin, hmeichhia lakah pawh kan luck daih zawk. Ruih nachang pawh hrelo mawl lutuk an ti a ati ngailo kha chu an nuihzat zawk.
Tichuan 1985 ah St Pauls ah ka lut a no 4 leh damdawi lam pawh ka luhchilh ve ta nghal chu ani mai. Tichuan 1985 kum a lo inher chuah chhoh meuh chuan damdawi, pills lampang leh No4 ka khawih chho ve ta a. No4 hi Aizawlah chuan a ti hmasa ve pawl tak ka ni nghe nghe a, a ti pawh kan la tlem a , tin Aizawla a ti ho kha chu kan inhre deuh vek nghe nghe ani. Tin a lo luh tan dan te Mizorama a history hi chu ka hrechiang ve viau nghe nghe ani. Tin Proxyvon pawh hi Excise and Narcotics hovin Mizorama a inchiu tichhuak tu tih a an record kha kan thianpa tho ani a, khami in a tih hma kum khan kan lo inchiu daih tawh ani. Tin Proxyvon ka inchiu tannachhan tak pawh hi Aizawla 1988 kuma No4 leitur a van thut vang kha ani nghe nghe ani. Tichuan ruihtheihthil chu ka ti chho ve ta char char mai a, a tirah chuan nuam ka ti ve viau a, mahse hun a lo kal zel a, a nuam in a a daih seng talo. Taksa in a mamawh hun a lo thleng chho ta. Kei hi fapa mal, unau pianpui neilo ka nih avang hian ka nu leh pa hianmin duat em em a, pawisa pawh hi ka dil ang ang hi mi an pe mai thin a, chuvang chuan ruihtheih thil man tur velah hi chuan harsatna ka nei ngai lo. Chutiang chuan ka hun ka hmang cho ve zel a , taksa in a mamawh hunah ruihtheih thil bawk chu ka ti leh mai thin a. Mamawh a lo sang chho tial tial a, chhungte pawisa pek in a lo daih reng lo a, inchhung thil hralh ruk te, mi thil ruk te a ngaih hun a lo thleng chho ta a.
Hetih lai hian kei hi mi daihzai ve ngang hi ka ni a, a chang leh KTP lamah te , zaipawl ah te, rawngbawlna lamah te, adventure sports lamah te pawh ka inhmang chho pah reng bawk a, mahse ruihtheih thil ka ti tih hi chu mi chuan an hre vek tho bawk a. Reilo te te kan awm that hi chuan min lawmpui tu hi ka ngah ve thei em em thin ani. Ruihtheih thil ah hian duh loh leh tih loh vak ka nei lo a, No4 atanga ,a mum ei chi pills lampang leh khuhdamdawi liquid lam chi te tin zu te proxyvon te pawh tihloh ka nei lo a tin cocaine te, LSD te. Brownsugar te pawh hi ka ti kual ve duah tawh a ni. Hetian nun inchawhchawrawi kual vel hian jail ah te centre hrang hrangah te vawi tamtak min luh tir phah a mahse that lam ka pan ngai lo. Tih hreh ka nei lo a pawisak pawh ka nei hek lo, a zawrh te pawh hi ka zuar ve nasa in man pawh vawi tamtak ka tawk ve a ni. Mahse ka nun chu a beidawng ru tlat mai ani.
BEIDAWNNA KHUR ATANGA CHHUAH NA: Heng ruihtheihthil ka tih thin ho te, ka tih dan te lehka sual lai hun te ka thil tawn te chungchang hi hetah hi chuan rawn sawi ka tum ber a ni lo a. Ka rawn sawi tum ber zawk chu tun dinhmun a ka lo din chhoh dan hi a ni. Tichuan 2004 khan SRS vanglai chho vel khan NO4 vang bawk si to bawk si, man hlauhawm bawk si ti tur vang bawk si mahse taksa in a mamawh tho bawk si chu ka beidawng lutuk, kal ngaihna thlawt ka hre tawh lo leh ka nun dan chu ka nin em avang chuan keima thu in damdawin ah awmin engtin tin emaw ka nghei ve ta tawl mai a. Chutia ka nghei lai tak chuan Sihphir ah, Pu K.Lianthanga te bulah Sinner’s Friend ho Rescue Centre ah chuan ka lut chho ve leh ta rawih mai a. He hmunah hian ka vawithum luhna a ni nghe nghe a. Tichuan ka awm chho ta char char a, course pangngai thla 8 hun chhung chu a zawh hnu chuan volunteer angin reife ka awm chho leh a, pawn lama awm chu ka tan a hrisel vaklo a ka hriat avangin Worker ang in ka thawk zui chho ve ta a.
Tichuan theih ang ang chuan Sinner’s Friend team ah chuan rawngbawl hna chu ka thawk chho ve ta a. A nuam pawh ka ti in keimah ang a harsatna lo nei tawh thin te han puih vel chu ka tui hle mai a. Inlamah pawimawhna em em ka nei lemlo bawk a a theih chen chen chu awm reng mai ka tum a…MAHSE….
KE NAT TAN DAN: Chulai hmuna awm reng chu ka tana Pathian ruat a lo ni lo ani teh chek ani ang chu 2006 kum tawp lam chuan ka ke hi a rawn na ta tlat mai le. A tirah chuan ka ke dinglam kephah chung velah hian tel sa in a per a vun a kang durh pep pep ang hian hmun nga velah hian a rawn awm a, hetia a rawn awm tan hi zirtawpni zan ani a, nachhawkna te ka ei a, a na angreng viau mai a. A tuk inrinni chuan ka awm te a ti nuamlova, a durh pawh chu rawn awm belhin a rawn zauh belh zel bawk a, nachhawkna te min chiua mahse awmzia vak a awm theilo a. Sunday nileng chuan na ti takin ka tuar a, Sunday zan chuan a na lutuk awmngaihna ka hrelo chu in lam a ka pa te ka zuk phone ta ringawt mai a. Tichuan a tuk Thawhtanni zingkarah chuan ka pa leh ka fapa chuan min rawn hruai chhuak ta a, hei hi a nat tirh atanga a nithumna ang a nih chu. A durh chu kutphah beng dawn dawn a lian hi a ni tawh a. A nat dan chu ka tehkhin dan berah chuan tel chhuan so bawrh bawrh ah hian zuk chiah ila chutiang vel chu niin ka ring. Mipa inti pa ve tawk tak mai kan ni ve a mahse hemi tum zet hi chuan na ka ti ve tawk ani.
Hetih hun lai hian kan inah hian ka pa leh ka fapa upa zawk chiah an awm a, tichuan kei nen mipa pathum chauh kan awm a nih chu. Tichuan a ni li na ang thawlehni chuan a durh chu a rawn keh a, ka ke chu kan en chian chuan acid chak tak in a ei ang mai hian a lo tawih filh ta thuau mai a, nili chhung lek chuan ka kezungtang ruh te, ka ke tha te chu a lo lang ta vek mai..ka rilru na lutuk chu ka mitui hi a tla ve zawih zawih ani. Doctor kan veng ami kan ko nghal a, ani chuan a rang thei ang bera tan khalh anih loh chuan a tawih chho zel ang a ti ta mauh mai le. Kan ngaihtuah thin, kebul tan chawr leh ka hre ngai der si lo. Damchhung a ke lehlam bula awm ring awt chu ka zuam bawk si lo a, tichuan ngun taka ka in ngaihtuah hnu ah he thutlukna hi ka siam ta a, “ KAN TAN A THA TUR ZEL IN PATHIAN HIAN KAN CHUNGAH RO A REL THIN A,HE THIL KA CHUNGA THLENG MEK PAWH HI A NIHNA TAKAH CHUAN KA TUHRAH KA SENG A NI A. CHUVANGIN TAN LO ILA, PATHIAN IN TUL A TIH CHUAN A TI DAM ANG A, TUL A TILO ANIH LEH A TI DAMLO ANGA..ENGTIN PAWHIN AWM SE KA LUNGAWILO IN KA VUI NGAI LO ANG” tih chu ka thu tlukna a ni ta bur mai a. Kan chunga thil thleng avang a kan vui a, kan lungawiloh a, kan phun kan phun hian engmah awmzia a nei chuang lova, kan harsatna tawh khan a kian phah chuang bawk lo tih hi ka ngaihdan a ni tlat mai a ni.
IN ENKAWL CHHOH DAN: Tichuan theih ang ang in ka pa nen chuan inlamah kan inenkawl ta a, damdawiin a kal chuan tanan tum bawk si, ka duh bawk si lo. Tin min buaipuitur pawh kan chhungkuaah an awmlo hrim hrim bawk nen. Hetih nak alai hian thinlian, mit liam ka la nei zui leh nghal a, ka thi ve tep thin aninang kar hnih chung vel chu harh pawh ka harh chhuak manglo ani. Ka chet theihloh avangin ka pa hian a theih ang angin min dressing sak a, a rimchhe lutuk chu midang han khawih ve chi ani lo. Inchhungah pawh agarbati kan chhi reng ringawt mai a ni. Doctor in min chawh antibiotics injection ‘pancef’ chu vein ka neih tawh loh avangin keimahin ka mawngtamah ka inchiu thina, a na lutuk hi ka pump lut ngam lova ka pa hian min pump luh sak thin a ni.. Ka ke na hi a na ve bawk a, hetih lai hian ka chawnah khawihlipui pahnih a lo awm a, a awm tih pawh ka hrelo reng reng ani.
Tichuan ka pa nen chuan theih ang angin kan in enkawl chho ve ta zel a, ka ke pawh chu a tawih thla zualpui chu a chawl ve ta deuh a, mahni ke ruh leh tha vel lang thuau mai han hmuh chuan rilru hi a na ve vawng vawng thin a ni. Nachhawkna engmahin min chhawk loh avangin ka pa hi a nat zual chan chuan a tawngtai tawp thin a, ka pa tawngtai chuan ka mu tha ve thei thin ani. Nikhatah hian vawi4 vel dressing angai a lapua leh Gauge pawh a hek duh khawp mai, rizai pakhat siamna daih hi chu karkhat hmang pawh ani manglo a ni.
Chutiang chuan hun a lo kal chho ve zel a. kumkhat vel hnuah chuan zakdawh tiang nen ka in hawl chhuak ve thei ta a, a tisa te pawh chu a rawn thang khat chho ve leh ta hret hret a. Tlema a zia awm hnu deuh chuan Civil Hospital ah ka va entir leh a, a hliam lai pawh chu en miah lovin a vun bel tur min lo ti tawp mai a, min admit ta a. A vun bel tur an tih ni chuan operation theatre ah min nawr luta, hnimhlum te min pek vek hnuah a vun bel tur ti tu kan doctor senior tak chuan a tuamna an phelh chuam bel a lo la hun lo tih a hmu ve ta chauh mai a…tichuan an ziat fai a, karkhat damdawiin ah min dah a min chhuah leh ta tawl mai ani. Hemi hnu hian tiang hawlin tlema ka kal ve thei tak avangin NGO lamah ka thawk chho ve ta a, manse hetiang ang ka nih avang leh harsatna dang avangin ka chawlhsan leh ta a.
2008 kum khan Aizawl hospitalah a vun bel turin ka in admit leh a. Ka malpui pahnih a vun chu lain an bel a mahse a tha ta tlat lo mai a thlahnih chuang damdawin ah ka awm a, ka chhuah hnu lawkah hian a vun an bel chu a khawk leh ta vek ani. Hemi tum hian pawisa engmah kan neilova, ka nu a boral tawh avangin sawrkarah senso bill thei kan awm lova, Reliance Health Care an rawn tih tirh kha a ni a, chumi behchhan chuan pukchawp takmeuhin kan in enkawl a..nuaih tel kan seng ve a, mahse tunthleng hian kha healthcare scheme ah khan engmah kan la bill chuak thei ve talo ani. Tuna an health care ah hian tih leh kan tum a mahse keini ang natna hi a huam lo an ti a, a ti thei tu doctor ten natna dang anga min ziah sak theih tak siloh ah chuan tihian mahni tawrh tawrh in kan tuar ve ta tlawk talawk mai anih hi. Tunah hi chuan a vun in a tuam lo a ni deuh tawh mai a , a ruh leh tha te chu a lang tawh lova, tin rimchhia pawh a awm tawh lo a. Nitin dressing a la ngai a, nachhawkna hi nikhatah mum6 vel ei ziah ala ngai a, ala hek huam bawka, keimahin ka dressing ve mai a, zing dar 5 ah hian ka dressing vah tawh thin ani. Ka ke hi a na a zual vak loh lai chuan tiang hawl in tawi te te chu ka kal ve thei a, len te pawh ka leng chhuak ve zeuh zeuh a, mahse tunai chho hian a rawn zual leh riau mai a chuvangin inchhungdungah tiang pahnih hawlin ka kal thei tawk tawk a ni mai.
Heng hi ka rawn sawi duah nachhan chu ka rawn in sawi khawngaihthlak lam nilovin, mi thenkhat ten ka ke nat chhan te, ka awm dan te min zawt fo thin a, min duhsaktu leh min khawngaihtu, pawisa leh eitur te min pe a min lo tawngtai sak ve reng thin tu te tamtak in awm a, chung chuan chiangkuang tak a in lo hriat theih nan heti hian kimlo takin ka rawn sawi ve a ni e. Tin ka sawi tak ang khan ka thil tawnah hian ka vui lova, ka phunnawi lova, ka lungawi lo lova, tun dinhmuna ka ding hi ka tana tha tura Pathianin a ruat ah ka rilru tak tak in ka pawm bawk tih hi min lo hriat sak atan ka duh ve a. He ka thil tawnah hian vui vui in lungawilo in phunnawi mah ila, engmah a dan phah dawn chuang lo tih hi ka hrechiang ve tawk ani. Tin ka rilru hi a down phah ngailo a,,he ka thil tawrh hian min ti chak a, keimah pawh nasa takin hma min saw tir zawk ani..CHU CHU ANI KA TANA THA TURA PATHIAN REMRUAT CHU LO NI..
SUAL LAI NUN: Ka sawi tawh ang khan fapa mal duat, duh duh nei ve thei kha ka ni ve a, pawisa ka dil anga piang min pe a, kha tih hun lai khan Aizawl ah no 4 ti an la awm mang lo. A ti hmasa pawl kan ni ve a tin pills lampang ka ti tel bawk, ruih theih thil hrim hrim duhloh ka nei lo a ka duh vek, nuam pawh ka ti thei ta vek mai. St Pauls ah zet chuan ka nawi ta nak mai le! A chang in thla khat thla hnih, karkhat tih te school ka kal ve an phal lo ta fo mai a. St Pauls ka luh lai a ka fak tawp theih loh chu kan head brother Abrahama kha a ni. Vawi tamtak min hnawt chhuak a, min la lut leh a, ka rui kal theilo te hi min kuah haw a, school ah ka sual thei si. Vawikhat pawh kan break lai in tlangnuam tlang ka hal a, a khaw pum in an thelh a school kan chawlh phah. Ka thianpa pakhat an la puh zui. Vawikhat pawh kan biology miss rul nung chung in ka vawm a, biology subject ah St Pauls ka luh chhung in ka pass tawh ngai lo.


Tichuan, St Pauls ah chuan a ngaihna a awm ta thlawt lo a 1987 ah Bungkawn H/S ah ka insawn ta. Hetah zet hi chuan school ah pawh inchiuna tur nen ka pai thlap tawh. St Pauls ka luh lai khan Rory Chhakchhuak nen hian kan inkawm nasa a. Kan riak dun a, chuti reng chuan kan in zui a, mahse duh inang lo chu a lo inkawm tak tak theih loh a; hei tun thleng in kan kawngzawh a inang ta lo a ni.(Ani zawng a Pastor luah tawh mai)


Bungkawn H/S ah hian kum hnih ka lut a, ka rui kan Sir pakhat in min report a min hnawt chhuak a, tlaiah kan thian ho in kan sawisa hrep; ticuan, engtin tin emaw private in matric ka pass ve hram. Matric kan exam hi 1988 a ni a, bike 2nd hand Hero Honda hi ka nei a, a tha vak lo a, athar lei ka dil ah min lei duh lo a, pawisa ka ru a Rs. 60,000 vel keng in ka thianpa ka hruaia Shillong ah rawl pah in bike thar kan lei a, kan rawn haw chho a police kut thlak vang in a zan ah min man nghal a( he police pa hian vawi hnih pistolin min kah a tum nghe nghe a mahse a puak theilo hlauh). Hemi tuk hian chhungten min rawn la chhuaka, chumi tuk chuan matric ka exam ve nghal a, pass ve leh ta tho ani.


KA ZAI VE THIN LAI: Han let leh lawk ila 1985 chho vel ah hian gospel band 'The Celebrants' chu kan din a, a zai pawl ami ka nia. Ruihtheih thil aruk deuh in ka ti reng tho a, biakin ah te kan zai ve a, 1986 kha ni in ka hria Champhai KTP conference ah te kan han zai ve a TNT hotupa te in ah hian kan thleng nghe nghe. Veng hrang hrang biakinah te kan zai ve a, hmanraw tha, soundtrack tih vel la awm hek lo kan in pu bawr thei ve khawp mai. Heta band kan din lai hian vawikhat chu veng pakhat biakina kan zai dawn in kan amplifier in radio a man thut mai a, zai tura mipui hma a kan ding thap tawh chu,"Atha val mawi aw ka lungdi..." biakin ah ring tawkin an ti mai chu hnar a lian duh khawp mai.


COLLEGE LIFE: Tichuan ka nun chu ruihtheih thil nen, nulat tlangval na nen, kohhran lam a in hman nen, zir na nen a inchawhpawlh chho ta nuaih mai. Chanchin bawn tak tak pawh sawi tur a tam mai, mahse chulam chu ka sawi tum ber pawh ani chiah lo. Tichuan, 1989 chuan college ka rap ve ta. Ka chhung ten ka ruihtheih thil ti nasa avang chuan phaiah i duhna ber ah zir rawh min ti a, phaia college tha a zir ai chuan Aizawl a ruih kual mai mai ka thlang ta a, Hrangbana college ah 1989 khan morning ah PU 1st year chu ka kal ve ta. (ava mawl theih tak).


Hrangbana kan kal zet chu class ah hian kan awm khat khawp a, kan thian ho hian bike hi kan nei vek a, leather jacket a ban tan hi kan ha vek a, a hnungah luruhro leh chem inkawkalh hi kan ha a, class lak lai ten ganja te class chhungah kan zu a, tuman engtinmah min ti ngam si lo a, kan duh duh class ah kan awm ve mai mai a, chutiang teh nuaih chuan pass ve leh hram a. Tichuan, PU 2nd yr chu Aizawl college ah night ah a nawm zawk ring in ka insawn leh ta, a zualzapui vaihlenhlo tih ang vel ani ta. 1990 kum atangin Aizawl College ah ka kal a, zan ah ania kan thian ho kan tam si a kan che bawraw em em a, class lak lai ten class chhungah bike ten kan tlan lut a, an darh chum chum zel. Ahuho in kan duh duh hunah class ah kan awm tawp zel a, atlangpui in kum khat ah period 5 te class pangngai ah chuan ka awm ve; ka kal tlai deuh chuan ka luh ve an phal lo a chhunglam ah min kalh hnan daih zel. Vawikhat pawh kan lecturer chawpin pawnlam ah ka kalh hnan ve hmiah a, an buai khawp mai. Engtin tin emaw BA final chu ka thleng ve ta mai a, final kan exam lai hian ka rui lutuk a, English kan tih dawn ni in chawhnu lam emaw ka ti a, chawhma lam a tih tur a lo nia, ka thlen chuan an lo zo deuh vek tawh a, luh ka dil a, 15 minute ciah min pe ula ka pass na khawp chu ka ziak hman ang ka ti a an phal lo a, ka thinrim chuan, “Lo ngai reng rawh u, BA pass lo hian ei ka hmu awm em mai,” ka ti a, ka tawp san ta ani.


NUN CHAWHCHAWRAWI: Tichuan, ruihtheih thil nen ka che bawraw tial tial a, Centre hrang hrang ah hian vawi 2 vel theuh chu awm loh na ka nei tawh lo a, tin, ruihtheih thil bakah thil sual hrang hrang ka tih tel avang hian jail ah pawh vawi tam tak ka tan phah a, IPC case lian fe fe pawh hi ka lo awrh ve nual tawh a ni. Tichuan, NUPUI kan nei ve chawm mai a, taxi te min lei a ka khalh a, ahnu ah furniture workshop te ka siam a, eizawnna hrang hrang pawh ka ti nasa a, sawrkar hna pawh vawi 2 chu ka hmu a mahse engmah hi ruihtheih thil nen chuan a lo tih kawp tak tak theihloh a, ka tawp san zel a, kan nu nen pawh 1998 khan fapa 3 nei in kum 8 vel zet kan inneih hnu ah kan inthen ani.


Tuna Armed veng mawng a district jail khu 1990 kum khan DRC atan an hmang a, a awm hmasa ber kan ni. Ticuan central jail a ka tan thin lai leh centre a ka awm thin lai hian lehkhabu hi ka chhiar nasa em em a, library a lehkhabu awm zawng zawng hi chu eng bu pawh ka chhiar zo vek zel a, ruihtheih thil te ti nasa mah ila ka thil chhiar hi chu ka theihnglh lo ve tlat a, chung a ka chhiar chu ani tuna in lo chhiar ve tam zawk hi chu. Tin, jail a ka tan lai hian handicraft lam te ka zir a, tun thlenga eizawn nana ka hman tak chu. Ka thil siam thlalak thenkhat pawh mobile uploads ka pic ah khan a awm kha lo en ve chhin rawh u. Tin ka sawi duh pakhat chu centre leh jail vela awm hi sual zir na an ti thin a, kei chu a mihring a zir ani ka ti ve tlat. Ka tana tangkai tur ka zir hnem em mai.
Jail a ka tan lai hian jail chhung khohhran upa pawh vawikhat chu ka ni tawh a, ward displine incharge ah te ka awm thin. Sermon nasa thei ania aw. Tin team councellor te depeuty speaker te pawh ka lo ni ve tawh thin, hawl kim ve deuh mai ka ni. Tin adventure sport lam ah hian ka tui a, Mizoram hmun hrang hrangah treking te, caving te leh expedition te in kan kal thin a. White water rafting te, adventure course te ka training zo ve a. Rock climbing te para sailing te pawh ka ti in Mizoram pawn ah te pawh ka lo kal ve tawh, ka inrawlh chikim ve lutuk hi a ni tawp. Football club te pawh ka din ve tawh


CHE THING MAI MAI: Vawikhat chu inkhawm lai in biakin ah bike in ka tlan lut a, tu emawni inkhawm lai ring tawkinka au a, ahnu ah a zahthlak duh phian. Voikhat rui chungin kohhran zai pawl ah ka tel a, ka lo muthlu a min din san vek a, ka harh in ka ding ve hluai a, an zai zo nghal daih, biakin chhungah ka la luak nghek zui. Vawikhat leh pawh kan veng kohhran indan hlim hian biakin an la sa lova, kan in hi a ruak a awm a chumi chu inkhawmnan an hmang thin a, mi awmloh laiinbiakin sound system ah chuan ka tape recordatangin ka zawm a, inkhawm laiin Iron Maiden hla ‘ The Number of the Beast’ tih kha ring tawkin kan play mai chuh, an buai ve khawp mai. Biakin inkhawm hi vawithum chu inkhawm zui theilo khawpin ka ti buai ve tawh, thing thei khawp mai. Biakin chhungah meuh pawh hian ka inchiu ve zak zak thin ani, tih na tur hmun dang awm hek lo le. Vawikhat chu kan veng YMA hruaitu pakhat YMA notice board ah a chona ka tar a, ka ti fuh lo khawp mai. College kan kal lai in kan thian ho kan attendance a chhe lutuk a tuman scho kan la thei lo a,kan thianpa pakhat in a pa pistol a zuk la a, cashier chu kan vau a,kan vai in a full in kan la vek. Khatianga scho la kha an awm tawh ang em le.
CHE FUH VE TLAT: Vawikhat chu pawisa tam tham deuh ka mamawh a,neih mai ngaihna ka hre si lo a,press ah a ba in lucky ticket ka chhut tir ve ta tawp mai a. De-addiction centre hawn thar tur tanpui nan ka ti a. 1st price scooter. 2nd TV, 3rd fridge, ka ti a; hmun hrang hrang ah ka zawrh tir ta nghek mai a; bukhat kha 500 man zel ania 400 zel ka hauh a. YMA, KTP leh pawl anga in zawrh hlawh pawh an tam mai. A vawr hunah hralh loh ber ami pathum kha amantu no ah chancinbu ah ka chhuah ve hmiah. Hemi tum hian Rs. 9,000/- vel ka seng a Rs. 9,000/- vel sen na ah khan Rs.1,20,000/- vel ka hlep; a hlawk ve phian.
THI VE TEUH THIN: Vawikhat chu ka thiante nen damdawi DIZEPAM hi kan in ei hnem siak pek a, mum 120 ka ei lai vel kha chu ka la hre ruai ruai thei. Kar thum chhung ang vel chu ka biak tlak meuh loh chu ani e. Proxyvon ka tih thin lai hian vawikhatah hian mum6 te inchiu nan ka hmang thina. Vawikhat chu proxyvon mum8 chu achawhna tui atan Fortwin(nachhawkna chak tak inchiuna, ruih theih) ampule2 kahmanga , chumi chuan ka inchiu zo chiah chu chutiang bawk chuan ka ti nawn lehnghala. Khaw hmuh a thim ta vek mai, ka kawng kal lai chu ka lum ta a, 300ft chuang ka luma, ka banruh hi hmun hnihah a tliak a, ka kawng ruh ka zawh khi bawk a. Hemi tum hian ka thi teuh viau aniang ka taksa a lum nawk nawk a, kawra a tla thla hnawk lai chu keimah leh keimah hi a piah deuh lei atanga sang vak lo, boruak atang chuan ka inhmu reng mai ani.
KAWNG DIK LAM CHU: Ka sual em avang hian ka nu hi a rilru a hah thei lutuk a, a hrisel loh phah a, 2001 khan min boral san ta a. Ka nu tih lai meuh pawn ka rui reng ani. Rilru hahdam a vawikhat tal ka siam lo kha ka la inchhir ber mai. IPC a case lian ho hi rape leh murder tihloh chu ka awrh kim ve vek tawh bawk. Ruitheih thil tih reng chuan pawisa in a daih thei lo; inchhung bungraw tha zawng zawng ka hralh zo vek a, engmah hi anuam ka ti tawh lo, ruihtheih thil pawh nuam ka ti tawh lo, ka nun hi a beidawng a; tin, ka ning ngawih ngawih bawk a. Chutih lai erawh chuan Pathian thu ah erawh ka tui hal thei lo. Hei hian chhan a nei a, chu chu OCCULT lam a ka lo inhman nasat lutuk vang ani, aien, kutze en etc te hi thalo tak ani nun a ti tuihal thei lo ka hre ciang. Ka nun ka ning ka bei dawng lutuk, insiam that ka tum in ka hlawhchham zel bawk si a, chhungte leh thenrual tha te, khawtlangin siamthat en ah min en tawh lo. Ka beidawng ngawih ngawih a, chutah ka thiantha pahnih min hmangaiha min duhsak em em tu, FACEBOOK ah pawh hian tunah an awm ve chumi te fuihna leh support na avang chuan vawikhat chiah chu sim leh chu try ka tum ta a. Tichuan, ka rilru ka siam a chhungte tuman min ngaihsak duh tawh si lo a, inah ka inkhung a ka mu ta tawp mai a. KUM 24 chhung vel no4 leh damdawi chihrang hrang ina taksa a chiah tawh han dry thut mai suffer nat zia chu na tak ani tawp mi.


MIN FUH TU TE: Rosy K Remsangpui hming hi ka sawi ri lo thei lo. “nang chu mi pangngai ni leh tur chuan mi aia nasa a i pen a EXTRA MILE i kal angai alawm,” min ti thin a, chu chuan min challenge em em a, mi aia nasa pen chu ka tum ruh ta tlat a. Tin, englai maha min phatsan ngai lo tu, ka chhiat ber lai pawh a min hawisan lo tu Vte Lizzy hian min fuih reng bawk a, thla thum tal tap kawngka pui pel miahlo in ka inkhung ta a, ka lak na thin leh ruihtheih thil lam a ka contact zawng zawng an no ka delete vek bawk a, min rawn biak pawn ka hnar hmak hmak a tichuan tun hun hi ka thleng ta ani.


KHA NUN HLUI LEH KA FANU: Ka hun hlui kha ka hnuchhawn ve ta a, ka ngai lo ve khawp mai. Ka sawi duh chu tum phawt chuan sim theihloh hi a awm lo tih hi a ni. Thu nawi sawi tur ka la nei nual: Ka nu thih hnu lawk hian nupui ka ru a, ka chhungten an duh lo a, a chhungten min duhlo bawk a, kan indang a, zu te, no4 te kan zuar a, hemi lai hian robbery, hijack, kidnap leh attemp to murder case a rual in ka awrh ta mai a; ka tan hlan hian kan nu thla 3 mi nau pai mek cu a chhung ten an hruai haw a, 2003 kum kha ani. Tichuan, kan fa chu jail a ka tan hlan in a piang a, ka chhuah hnu ah kan innei leh ta lo. Fanu duhawm tak kan nei ve a, anu chuan pasal a nei leh tawh a, tun thleng hian ka fanu chu vawi4 chiah ka la hmu ani.


BEIDAWNG NGAI LO NU LEH PA: Ka nu leh pa hi kohhran bel tlat mi an ni a, ka pa phei chu a hmingin upa ani ve a, ka tette atangin Pathian hnen ah min hlan a, zan tin ka tan an tawngtai thin a; tin, ka sual ber lai pawn min an mahni leh kohhran leh mi thahnem ngai ten min tawngtai pui nasa a, tun thlenga ka la dam te tun dinhmun ka thleng thei hi tawngtaina ka dawn nasat vang ani ka ti lo thei lo ani. Tin, ka fak tawp theih loh chu ka pa hi ani. Ka lakah hian a beidawng ve ngai lo. Kanu kha chu a beidawng deuh thin; ka pa hi chuan "A tana kan tawngtai na hi Pathianin a chhang dawn tih ka hria, kan damlai in a chhan na hmu lo mah ila kan thih hnu ah tal chuan min chhang ang ati thin." Hetiang rilru hi fa sual nei nu leh pa hian pu vek thei se ka ti khawp mai. Tun thleng hian a dam that phawt chuan zan dar11 vel ah zantin biakin ah ka tan ala tawngtai ziah thin.


KA NU lam ve thungah chuan ka sawi duh chu ka nu kha mi ti kher kher tak mai ani. Ka tet lai cuan awmpui hi pathum te kan nei a, engmah incung ah tih ve angai lo. Mahse ka nu khan mipa in ni a engkim thiam tur a ti a, inchhung chet, rawngbawl, thing phurh, buh thlei thleng in min tih tir vek a. Tin, first aid atanga puanthui thleng in min thiam tir a, tin, dar5 aia tlaia thawh a phal ngai lo. Khang zawng zawng kha tun thleng in ka la chhawr tangkai vek. Tunah pawh hian dar5 ah chuan ka tho ngei ngei ani. Khatiang nu kha an tam lo ang. Hetia ka chanchin ka han sawi vak nachhan hi in vawrh lar ka tum na lam ni lo in tu emaw tal in zir tur engemaw tal chhar chhuak se ka duh vang ani.


KA DUHTHUSAM: Ruihtheih thil hian ni e min thing let nasa a, tin, ka chakna hi ala rehlo hrim hrim bawk, mahse tih hi ka tum tawh lo a, ka chak viau lai chuan thil dang ka ti lui daih zel. Tin, ka ngaihtuah duhlo lui ve hrim hrim bawk. Hypnotism ka zir na lam ah hian taksa leh rilru thunun dan te ka zir tel a, ka hmang tangkai khawp mai. Kal zel ka tum dan leh ka duhthusam ah chuan hei keimah anga harsatna nei te hi tanpui theih ka duh ber a. Mizoram a ruihhlo ngai te kan enkawl dan hi a diklo ka ti a. An mahniah sim duhna tak tak awm silovin tihluihna in chhung te leh YMA ten emaw camp ah an han dah lui a, an rawn chhuak a, an awm zel dan tur an ngaihtuah leh tak tak si lo a, an nun ruak luah khat tu tur kha an mamawh ka ti a. Pathian thu ah a tui surh reng theih loh a, tin, eizawnna te nitin mamawh te ngaihtuah ve tho an ngai si a, chuvangin thei ila chu recovering addicts te tan hian eizawnna mahni ke a an din ve theih na tur atana an chhawr tur: handicrafts, computer lam, puanthui leh beautician lam te an training na hmun hi siam ka duh ber a, Society ang deuh a din te ka duh a, mahse pawisa a awm loh chuan engmah a tih theih si loh a, hmanni deuh atang khan ka buaipui ve a, pawisa hmuh na kawng a ping lutuk a, chuvangin tunah hian mahni in chumi atana in tuak nan chuan thil te zawi zawi in ka siam ve mek ani inlam ah. Mahse hei pawh hi mahni in enkawl nan ham a lo tul ve leh bawk si a, a buaithlak angreng khawp mai.


BIG DADDY: Big Daddy tih hi 1993 chho vel furniture workshop ka siam lai hian kan veng tleirawl rual ho hi 20 vel bawr ka kawi khawm thina workshop ah ka chhawr a, ruih theih thil kan ti ho bawk a, jeans jacket banbul hnungah RedIndian Chief lu lem bel, chuan camouflage kekawr nen a inang vek in kan in thuam thina, hotu ber ena min en avang hian Big Daddy min ti thin a. Kei hi Mizoramin Social networking kan hriat tirh atanga hrat ve tak mai, Frenzo, Orkut, Nimbuzz, Waplog, Yahoo Messenger tih vel leh a dang neuh neuh a lut kual nasa hi ka ni a. Heng ka luh na hoah hian Big Daddy tih hi ka hmang ta zel ani.
Tichuan kei chu pathian lam te thlarau lam te ti vak mi ka ni lem lo mahse ka nun a thil 4 ka pawm ngheh tlat chu.
1.Mi in i chunga an tih a i duh tur ang bawkin mi chungah pawh ti ve rawh….
2.Kan tana tha tur zel in kan chungah Pathianin a thlen tir thin.
3.Vui leh phunnawi te rilruhah te hian engmah kan nun ah a siam tha lo..ka lungawi zel ang.
4.Kan thil hmu leh hriat leh tawn atanga inzir thiam apiang mi pangngai an ni mai tih hi..heng hi ka nun innghah na an ni e.
THU HNUHNUNG: A tawp dan han tih ah ala tawp hranpa vak chuang lo a, achhan chu hringnun hi ka lahmachhawn chho in ka la fight chho mek zel tlat ani. Tunah pawh hian ka ke lehlam hi tan tura an tih ani, mahse hei thu chiangkuang kan la ti thlu thei rih chiah lo ani. Tin, "Tichuan Pathian ah ka lo lawm ta em em a," han tih hluai te in beisei deuh anih chuan chu lam chu engmah a awm lo. Mihring takin ka fight chhuak ve tawp a, abul chu Pathian chu ani tehmeuh mai. Mahse engkim mai a Pathian tih tuah hum rik ngawt a nun a hmuh tur awm si lo tih vel hi ka ngaihdan ani lemlo a, ka rawn sawi ri lo mai ani e. Engthil pawh ka sim thei lo, ka nghei theilo kan ti anih chuan sim a nghei hi kan la duh tak tak tawk lova, kan la tum tak tak tak lo a, chu thil chuan kan nun a la ti beidawng tak tak tawk lo ni in ka ngai ve thin. Kha lehchen damdawi ruihtheihthil ka lo tih chhung khan tuman ka sim theih hi an ring ngai lova, mahse nun a beidawna, kal ngaihna hriat tawhloh tak tak chinah chuan sim duhna hian min lo nawr nawk nawk mai a lo ni. Tin kan nunah hian engang harsatna pawh tawk thin ila, keini ai a harsa, rethei, natuar, hrehawm , rilruna hi tamtak khawvelah hian an lo awm ve tih hi hre reng ila. Kan vui, kan lungngaih rilrunat hian engmah a siamtha chuang lo tih hi hrereng ila, chantawka lungawi thiam apiang hi mi awhawm chu an ni mai tih hi i hre reng ang u. Thil eng pawh kan chunga thleng apiang hi kan tana tha tura Pathian ruat a lo ni zawk.. KA LAWM E.
He ka thu ziak tlawmte hi ka nu Rosepari 2001 February ni 14 a min boral san ta pualin ka hlan a, tin, dawhthei taka min lo chhiarchhuah sak tu te chungah lawmthu ka sawi bawka, tu emaw talin engemaw kawng zazwnga hlawkna leh tangkaipuina an lo neih theihnan Pathian hnenah mal sawmna ka dil nghal e…

Post a Comment

Powered by Blogger.