Governor Lt. Gen. Nirbhay Sharma chuan nimin khan Healthy Mizoram Campaign 2017 pualin thuchah a tichhuak a, Yoga chu hriselna atana thil ṭangkai a nih thu a tarlang. Nimin vek khan Central YMA chuan thuchhuah siamin, Yoga chu Kristianna nen inrem loa an ngaih thu an tarlang. Vawiin June 21 hi International Yoga Day a ni a, Assam Rifles chuan zing karah Lammualah Healthy Mizoram Campaign an huaihawt dawn a, a duh apiang tel turin Mizo mipui an sáwm.
June 7, 2017-a Assam Rifles hotute'n press meet an neih ṭuma Healthy Mizoram Campaign chu International Day of Yoga-ah kher huaihawt an tum chhan zawhna a chhànnaah AR 23 Sector DIG Brig. Mokha chuan, Yoga chuan sakhua leh hnam a thliar loh thu leh taksa insawizawina chi khat a nih thu a lo sawi tawh a, "Healthy lifestyle campaign a ni a, Yoga nen inkungkaihna a nei lo. Ni dangah pawh kan la ti zel dawn," a ti.
Assam Rifles-in Healthy Mizoram Campaign an buatsaih turah hian pawl hrang hrangte chu tel tura sawm an ni a; an sâwm zinga mi Central YMA chuan tel ve loh an rêl.
CYMA chuan thuchhuah siamin, "Yoga hi Mizo nunphung leh Kristianna nen a inrem lo nia a lan avangin Mizorama Yoga vawrh lâr hi CYMA chuan ṭha a ti lo a, Mizoram mipuite pawh fimkhur turin a ngen a ni," an ti.
Healthy Mizoram Campaign puala thuchhuah a siamah Governor chuan, kum 2015-a Yoga Day hman a nih aṭangin khawvelah mi maktaduai télin Yoga an chhawr ṭangkai nia sawiin, "Ram 192-ah Yoga hi kalpui a ni a, chu'ng zingah chuan Mosolman ram 44 lai an tel," a ti a; Yoga chu khawvel mihring vbc. 200 velin an hmang anga chhût theih a nih thu a sawi.
Larsap chuan, America ramah Yoga chu dollar maktaduai têla sumdawnna lian tak a ni tawh niin a sawi a, "Yoga hi kum 5,000 hma lam daih tawhah India ramah, sakhaw rin leh biak mumal bik awm hma aṭanga chîn ṭan a ni tawh hi a chhuanawm a, Yoga chungchanga thlir dan dik tâwk lo awm hi kan tihbo a ngai," a ti.
Mizoramah pawh Yoga chu sakhaw thila ngai a, sakhaw dang tana hlauhawm nia ngaihdan a awm tih sawiin Governor chuan, "Yoga hi sakhaw mal pakhat rin dan leh tih dan emaw, hnam bil pakhat chìn dan nena inthlun zawm a ni lo," a ti a; mihring chhungril nun siamṭhatna hmanruaa a ngaih niin a sawi.
Nirbhay Sharma chuan, Mizoram mipuiin mi dang zawng aiin Yoga an mamawh nia sawiin, "Khawtlang nun duhawm tak kan nei a, ziak leh chhiar thiam kawngah kan sang nalh a. Heti chunga cancer natna vei tam lamah te, ruihhlo ngai leh zu ngawlvei te, HIV pai tam tihahte hriat kan la hlawh a, kan rilru puthmang leh nunphung thlak a hun a ni," a ti.
Mizorama pawl hrang hrang leh khawtlang mipuite chu Mizoram hma lam hun thlirin Healthy Mizoram Campaign hlawhtlinna atan ṭhahnem ngai taka pên chhuak tura sáwmin Governor chuan, "Ni tin nuna Yoga seng lut turin ṭhalaite'n hma hruai se, upa zawkte pawhin ṭhalaite tan entawn turin hma la se," a ti a; AR-in Healthy Mizoram Campaign an buatsaih tur chu Mizoram hrilselna tur tharthawhna bul ṭanna niin a sawi.
Healthy Mizoram Campaign chu zirna-in zawng zawngah leh veng tin, khaw tinin tih tak takin kalpui se a duh thu sawiin Governor chuan, "District enkawl hna thawktute, autonomous district council leh sorkar department te pawhin hei hi an ngai pawimawh ngei ang tih ka ring," a ti.
#Vanglaini
Post a Comment