MNF vice president Dr R Lalthangliana chuan, MNF an sorkar chuan Man-Power directorate din an tum thu leh SEDP atan kum khatnaah cheng vbc. 1,500 aia tlem lo dah an inbeisei thu a sawi a; zu zawrh tihtawp nghal an tum thu a sawi bawk. 
MNF party chuan nimin khan IPR directorate conference hall-ah thuthar thehdarhtute pualin an policy thar, Socio-Economic Development Policy (SEDP) zirhona an buatsaih a, MNF Programme and Policy chairman Dr R Lalthangliana'n kaihruaiin, thu a sawi a ni.
Dr R Lalthangliana chuan, MNF sorkar hmasak lai, kum 2003-a Mizoram Youth Commission (MYC) an din chuan sorkarna a inthlak vangin a nih tur ang a ni pha lo hle a, a huam zím bawk niin a sawi a, "Man-power Directorate kan din dawn. Channel mumal tak siamin, sorkar department dangte angin budget leh fund allocation pawh dah a ni ang," a ti.
R Lalthangliana sawi danin, Man-power directorate hnuaiah infiamna nursing, designing and fashion technology, music, fine arts, hospitality & tourism manage­ment, eco-tourism & adventure-tourism management leh skill development lamah hmalak an tum a ni.
MNF Vice President chuan, vantlang himna leh lungmuanna atan Relief, Rehabilitation and Welfare Scheme siam an tum tih sawiin, "Khawtlanga sualna leh pawikhawihna tihtlem, ‘Eradication of Social Evils and Rehabilitation’ lamah nasa takin hma kan la dawn a. Zu hi khawtlang harsatna leh buaina thlentu bulpui a nih vangin sorkarna kan chan hunah zu zawrh tihtawp tum a ni," a ti.
Ṭhalai lehkhathiam, hna hmu nghal mai lote tan Unemployment Allowance siam an tum tih sawiin R Lalthangliana chuan, "Lehkhathiam, mahnia bul ṭanna tur nei lote tan pawh ‘Assistance for Educated Youth in Bussiness/Enterpreneurship’ ngaih­tuahsak a ni dawn," a ti. Zawhna chhangin, unemployment allowance-in a huam chin bithliah dan tur an duan tawh thu a sawi.
Corruption dona atan state sorkarin a thunun theih loh State Vigilance Commission an din dawn tih sawiin, Lok Ayukta pawh rintlak tak din tura hmalak a nih tur thu a sawi a; MNF leh India sorkar inremnaa tel, High Court pawh Mizoramin a  hrana a neih theih nan hmalak an tum thu a sawi bawk. 
MNF SEDP-a hlawm lian pangate
1.Ei leh bara intodelh (Green Revolution)
2.Thil siamna (industrial development) leh siam sa hralhna (trade & commerce)
3.Mihring theihna tihpun (man-power) leh technology lama kal chak
4.Mipui dâwm kân (social development) leh khawtlang nun nuam (social security)
5.Hmasawnna ruhrel siam leh ram páwn mithiamte koh luh
Note: Hlawm lian panga hnuaiah thil chi hrang hrang an dah
MNF Vice President sawi dangte
  1. Sorkar rintlak leh rorelna ṭha din ngei kan tum.
  2. Thuneihna sem zâi a, VC leh LC-te thuneihna sâng zawk leh hamṭhatna siamsak. District headquarters tinah municipal body din.
  3. E-Governance/e-Office uar zawka hman.
  4. Fiscal reform-ah mirethei zawkte harsatna siam lo zawngin chhiah lak a ni ang. Sorkar sum dik lo taka kal ral tur ven nan Tax Deduction at Source kan hmang ang.
  5. Hnam rilru puiin economic-a hmasawnna (economic nationalism) kalpui a ni ang.
  6. SEDP aṭanga ṭanpuina chu hlawhtlinpui tham a ni dawn a, NLUP anga a thlawna pawisa sem a ni lo ang.
  7. Chaw, buh leh bâla intodelh, thlai thlan bik chîn uar, tlangram lo neitute dâwm kân, argiculture link road leh tui lakna siam, thlai leh thei sawngbawlna din, sawhthing hralhna ngaihtuahsak.
  8. Rua leh mau hmanga Mizoram economy siamṭhat hi kan tum a ni.
  9. Kawngpui tam zawk sial kan tum. Mizoram chhim lamah airport siam tum a ni ang.
  10. Aizawla Assam Rifles-te Zokhawsanga an awm hunah an awmna vantlang hmun atan kan chei ang a, mimal tan ram inchi khat pawh kan pe lo ang.
  11. Kum 2030-ah kawlphethaa intodelhtîr kan tum.
  12. National standard education nei pha turin New Education Policy (NEP) siam a ni ang a, New Education Commission din a ni ang. Sikul kai hun ennawn a ni ang.
  13. Health Care Scheme ṭha zawk ruahman a ni ang a, a thlawna inenkawlna ‘Free Medical Treatment’ ruahman tum a ni. Doctor-in phaia a refer reng reng senso a tam emaw, tlem emaw, free medical treatment pek an ni ang.
  14. Thihna vanga rahbi tleute chhawmdawlna pek an ni ang.
  15. Infiamna ruhrel lian tham din kan tum a, National Games lian tham emaw thleng thei turin Sports City ang chi hmun remchangah din tum a ni ang.
  16. Journalist-te tan hamṭhatna hrang hrang siam tum a ni. Special assistance, insuarance leh retirement scheme-te siamsak dan tur ruahmanna kan nei.


#Vanglaini

Post a Comment

Powered by Blogger.