Anil Kumble chuan India cricket coach a nihna aṭanga a ban thu a puang. Indian legend hian a ban chhan chu captain Virat Kohli nen an thu a inhmuh loh vang a nih thu a sawi a, India captain chuan a coaching style-ah duhdan hranpa a nei niin a sawi.
Kum 46-a upa Kumble hi tun thlaah a contract a zo tawh hrim hrim a, thla hmasa khan Board of Control for Cricket in India (BCCI) chuan India coach hna a dil theih thu an lo pholang tawh. Hetihrual hian Kumble contract an pawtsei dawn lo tihna a nih kher loh thu an sawi bawk a ni.
Kumble sulhnu
India leg spinner ropui ṭhin Kumble hian June 2016 khan India cricket team enkawl hna hi a thawk ṭan a, India a enkawl ṭan hma hian coaching lamah tawnhriat a la nei lo. Mahse, coaching lama tawnhriat nei lo chung pawhin Kumble hian India a chet ṭhat pui hle.
Player a nih laia test match 132 leh ODI match 271 kheltu hian test match 17-ah India a kaihruai hman a, vawi 12 hnehna chanpuiin vawi khat chiah an tlawm a, ODI series-ah England leh New Zealand an hneh bawk. England-a Champions Trophy khelh zawh takah India chu final a hruai thlang a, Pakistan hneh loin an mualpho thung.
Kumble kam chhuak
India tan test cricket-a wicket 619 laa wicket la hnem ber ni mek Kumble chuan, "BCCI hnuaia Cricket Advisory Committee-in coach nihna chhunzawm zel tura min sawm khan ka lawm hle a, kum khat chhunga kan hnathawh ropui tak kha captain, team pumpui leh coaching staff te thawhrim rah a ni. Mahse, he inbiakna neih a nih hnuah hian a vawi khat nan BCCI chuan ka coaching style-ah team captain-in ngaihdan a neih thu min hrilh a. Kan inkar siamṭhat tumin BCCI hian hma la nghal mah se kei chuan ka kal mai hi ṭha berin ka hria a ni," tiin a ban chhan a sawi.
Kumble chuan sawi chhunzawmin, "Tih tak takna, nungchang, inpekna, rinawmna, thiamna leh ngaihdan thawhkhawmte hi kei chuan ka tuipui ber a ni. Coach hna hi darthlalanga ngun taka in en a, dik lo laite kan siam ṭha ṭhin nen hian keichuan ka tehkhin ṭhin. Mahse, BCCI hnen aṭanga ka thu dawn avang hian kei chuan CAC leh BCCI-in an duh ang tak coach an hmuh theih nan kal hi ka duh zawk a ni," a ti.
Kumble ban chhan
Champions Trophy khelh a nih hma daih tawh khan Kumble leh captain Kohli inhmuhthiam loh thu a thang tawh a, he thu thang hi Kohli chuan a pha thung. Mahse, tun hnaia Kumble ban chhan an sawi pakhat chu player tam tak a chungah an lungawi loh vang niin an sawi. Champions Trophy final-a India-in Pakistan an hneh loh khan Kumble hian player-te chu a mal malin a bia a, a bik takin bowler ho chu an vawm chhiat avanga hauin tun hmaa Indian bowler-te an tluk loh thu a hrilh.
Player-ten hei hi hrethiam loin captain Kohli hnenah an thlen a, Kumble nena inhmuthiam lo sa Indian batsman hian BCCI-ah a thlen chhawng leh. Thawhṭanni zan khan Kumble leh Kohli hian BCCI secretary Amitabh Chowdhury, CEO Rahul Johri leh general manager (cricket operations) MV Sridhar-te an titi pui a, Kumble hian Zirtawpni aṭanga West Indies nena ODI series khel tur India hi a zui ve ta lo a ni.
BCCI thu chhuak
Anil Kumble a bang a, India rama cricket thuneitu sang ber BCCI chuan thuchhuah an siam ve nghal bawk, "Anil Kumble chuan coach a nihna aṭangin banna a thehlut ta. Cricket Advisory Committee chuan Anil Kumble hi contract thar ziak ngei turin duh mah se a hna chhunzawm loh hi a thlang zawk a ni," an ti.
BCCI ami, a hming tarlan loh chuan, "Kumble leh Kohli inkara khi awm hi zawm hleihtheih a ni lo. An pahnihin ngaihdan an nei ve ve a, an inmil lo a ni ber mai. A tawpah chuan Kumble hian engmah chinfel a ni dawn lo tih a hria a, ban mai a thlang ta a ni," a ti a, Kumble leh Kohli hi Champions Trophy khelh chhung zawng khan BCCI hotute chuan an dawr reng nia sawi a ni bawk.
Coach thar tur?
CAC-in India coach thar tur an ruat dawn a, he committee-ah hian Indian legend Sachin Tendulkar, Sourav Ganguly leh VVS Laxman-ten an awm a, anni hian India coach tur chu an thlang ang. India coach hmun ruak hi mi pangain an dil tawh a, anni panga aṭang hian CAC hian thutlukna a siam dawn.

India coach ni tura dil zingah Indian legend Virender Sehwag, World Cup 2007 final-a Sri Lanka hruai thlengtu Tom Moody, West Indies Cricket board-a director ni mek Richard Pybus, India U19 leh A team coach hlui Lalchand Rajpoot leh Goa coach hlui Dodda Ganesh-te an tel a, India coach thar tur hi hriat thuai beisei a ni.

#Vanglaini

Post a Comment

Powered by Blogger.