(KA TESTIMONY)
Ben Lalrinmawia Mizo
Salvation Army officer senior berte zing a mi fapa ka ni a. Ka naupan tet atanga Biak In bula seilian ka ni. Kristian inzirtirna pangngai leh kalphung hi chu ka hre bel hle mai a. Puithiam fapa ka nih takah chuan ka mihring pui te paw'n ka chungah beiseina sang tak an nei thin. Chutih rualin, khawvel lamah mi hriat vaklohin zu te ka in ru a, a lanchhuahlohna tur hmun ni a ka hriat ah chuan ka che pawr ve thei viau.
Ka lo puitling a, sorkar hna tha pangngai tak ka nei a. Nupui hmeltha tak ka duh em em ka nei a, fapa duhawm tak ka nei leh bawk. Hei lo aliam lawmna a awm chuang dawn emaw ni? Ka tlangval lai ata tawh kohhran rawngbawlna kawng hrang hrang ah, tihdan phung a neiin ka inhmang chho ve thin. Kum 2010 khan Pathian hmangaihna a siamthar in ka awm a. Kraws a min hnehsakna chu chiang takin Pathian in ka nunah fiah takin min puansak tawh. A ropui hi ka ti khawp mai, Pathian hmangaihna hi. Mahse, piangthar dik tak ni a ka inhriat lai reng hian kimlo a lo la awm a ni chek a ni ang chu!!
Zaipawl conductor, Bial zaipawl (Songsters kan ti thin S.A. ah chuan) ka ni a. Inkhawm ah music hmanga hla hruai hi ka kutah a awm rawt mai thin. Ti tha ka in ti, Pathian hmangaihna lo chang tawh bawk chu fel hi ka inti em em mai a. Mahse, rawngbawlna huang chhunga Setana rawn inrawlhna hian min tibuai hle mai a. Ka do zo lo em em ringawt zel mai a. Sawisel ka hua, ka thu ka duh. Committee na ah lah ka thu a tluk loh chuan ka na thei em em mai a. Mahse Piangthar diktak niin ka inhre tho.
Tum khat chu, kum 2016 tir lam atang khan kan rawngbawlna huangchhunga thlemna rawn lut leh chu ka tuarzo lo a, Biak In kal thawkleh khat ah ka tawpsan ta hmiah mai a! Ka tanchhan kha dik em em leh, awm hluah hluah a hriatna hian min man hneh khawp mai. Chutah, thla tam ka inkhawm loh hnu a thalai rawngbawlna lo tla hniam ta chu ka hmu a. Ka lawm phian zawk lehnghal a! Ka rilru chuan, "Kha kha a ni dawn reng asin. Min do awr awr a, tunah chuan a pawi zia an hre tawh khawp ang" tih hi ka ngaihtuah ruk leh ka thutlukna a ni hmiah mai. A va thlarau lo veng veng em!
Mi luhlul tak mai ka ni a. Tawngkam tha a min han sawm te hi chu ka han ngai nep mai mai khawp a. Engatanmah ka ngai lo a ni tawp mai. "Biak Inah ai khian ka In ah hian Pathian ka hnaih zawk fe" te ka ti thin!! Kan Local Officer (Kohhran Upa) te pawh an rawn leng zeuh zeuh a, Pathian thu ka lo sawipui hrep ringawt thei a. Awmzia a awm chuang eihlo. Luhlul tak hi ka ni ringawt. Fel ka in ti em a. Idea te hi nei tha ka inti a. Ka thlirdan te hi changkang leh dik bik hian ka pawm nghet bur mai a ni.Biak In lam kal chu a lang theilo. Ka kal dawn chuan ka thinrim tlat zel.
Amaherawh chu maw, Pathian hian ka mihringa rawngbawlna ka lo kalpui thui lutuk te. Kross a thi tawh ngei si, kross ka lo kalsan thui tawh lutuk te kha Kross ah bawk let leh turin min duh ta tlat mai.
Kum khat zen zawn ka inkhawm tak miahloh ah chuan kan Upa te pawh rawn leng ngam an awm tawh manglo. Zu ka in lo, ka nun a bawraw zawngin ka hmang chuanglo bawk a, fel ka la inti zel a nih chu. Chutia mahnia tha inti taka ka awm lai chuan, khawtlang lamah thil harsa ka tawng ta. Kan awmna khua YMA hian nungchate an humhalh avangin Airgun hman an khap a. Kei lah, ka tui berna thil a nih avangin Airgun ka lei hram a, a rukin ka sikul kalna lamah ka akthla thin. Nikum November thla khan YMA chuan ka sava veh lai min man ta nge nge a! Ka zak si. Khawtlangah mi chunglama leng ve si kha, chanchinbu ah leh Information mic ah min puang lauh lauh mai a. Ka hming an han tarlan dan te kha a ngeiawm kher kher thin bawk nen. Ka thinrim em em a. Ka khing dawn emaw ni aw tih te kha ka ngaihtuah rum rum a.
Chutihlai tak chuan, ka rilru ah hian kohna aw hi ka hre tlat, "LO HAW TAWH TA CHE...A REI TA E" tih hi. Mahse, min han tih vel dan ah khan ka lungawilo. Mikhual ka nih avanga hetia min han ti kher kher hi chu aw tihna rilru a lian hle a. Kohna aw hrereng chung si khan ka luhlul ka chhuah leh a. Biak In lam kal a Pathian rawngbawlna lam chu ka hawisan leh tlat. Ka nupui pawh ka bulah a ding a, ka lamah a tang a, min thinrimpui. Chu tak chuan, keimah ah inthiam chawpna a siam a. Tanchhan tur leh innghahna tur ka nupui ka la nei tlat. Pathian lam a rawn lang thei lo. A ngai te bawkin kohna chu ka chhang leh ta lo.
Pathian Kohna hnawl lui sak sak ka ni tih chu ka inhre ru ve kur tho. Pathian hmangaihna a chhinchhiah ka ni tawh tih ka hriat miau avang in.
PATHIAN PROGRAMME CHU
Ka rinchhan ber leh engkima ka bula ding thin ka nupui nena kan inkar ah chuan khi a awm tan ta. Inchhungah hlim ni hmel hmuh tur a vang ta sawt hle mai. Kan in tum chhawk hi a ni deuh ber tawh mai. Chutah le, ka nupui chuan ka fapa hruaiin, Aizawl lama an in ah min tlansan ta vang vang mai le! A tirah chuan ka thiamna leh, a thiam lohna hlir hian ka rilru ah hmun a chang a. Ka insum zo thin lo, ka thiamna hi ka rawlh leh chhen thin. Kan han ko ve deuh zauh zauh a. Ui puar koh kal tum ang vel hi kan ni. Chutah, hmanni lawk khan bungrua an rawn la ta hmiah mai. Theihpa tawpa dan kan tum pawn kan dang zo nganglo a ni e. Nau hnuchham te lainat a tuamhlawm thintu pawl puithiam tupa, ka fapa ngei mai fahrah dinhmuna a ding tur chuan min ti tliak hnawp mai a ni. Chutah tak chuan a ni ka kehsawm chian tak em em ni. Beisei tur dang leh innghahna tur dang ka nei tawhlo. Englai pawha min tan tlat thintu ka nupui ber khan min kalsan hmiah mai. Chu chu PATHIAN PROGRAMME a lo ni si.
Kan thenawm khawveng zawng zawng te dem rawn ka ni ta. Ka thiamna ai chuan ka sualna zawng zawng chu a kawtthler khah in a khat a. Puithiam fapa si, a nupui in sum a chhuahsan duh hial khawpa laktlak lo ka nih zia chu tlanghriat a lo ni ta. Mualphona rapthlak eltiang a ni.Mahse, ka Pathian bawk chuan min kohna a ni tih min rawn hriattir leh tan a. A chhinchhiah tawh mihring ka nih miau avangin. Min duh a, min mamawh tlat si a ni. Vanram a min luhtir ngei chu a tum ruh hle a niang.
Uire nu Lal Isua hmaa an va theh hlawm tawp ang kha ka dinhmun chu a ni ta. Hnunglam ka en chuan min denhlum duh tur hlir ka hmu a. Ka hawilet chuan min denghlum mai dawn a ni. Mahse ka hma a lo awm kha LAL ISUA a ni tlat mai. Amah lo chu en tur dang reng reng an awm tawh lo. Chu Damna Isua chuan damna min pe leh ta a, tisual leh thei ka ni lo tih pawh min lo hriattir nghal a nih chu. Amen.
2Samuela 12 : 15-23 thu hian ka damna tur min rawn hrilhfiah sak ta a. Lal Davida in Uria nupui a uire a, a neihsak Bathsebi nena an fapa Pathian in a khawisak thu khan. Lal Davida khan a fa dam lehna tur khan theihpa tawpa dilin a tawngtai a, chaw te a nghei a, zankhua in leiah a mu a nih kha. Ka nupui leh fapa ka neih let lehna tur khan ka thiam ang tawkin ka bei ve ngial a. Mahse, Pathian remruatna ah hian mihring te'n thu kan va nei velo tak em! A fapa chu a thi ta tho si. Chutah tak chuan Lal Davida anga awm turin min duh a ni. Lei ata tho a, insil fai a, hriak te inthih thar a, ka silhfen inbel thinte thlak a, Lalpa In ah kal a, Pathian chibai buk turin!! Pathian Programme a nih si chuan lawm takin kan pawm mai tur a ni. Chutah chuan ka tana nunna thar chu a lo awm reng zawk a ni. Halleluiah!
Ka inghahna zawng zawng min phehsak a. Rinchhan tur pakhat te mah min zuahsak tawh lo. Mihring ah chuan ka tawh hi na vawng vawng tak a ni. Ka mittui hi a tla zawih zawih mai a ni. Pathian Plan ah chuan choice pakhatmah ka neih lohna tur te, option dang ka neih miahlohna kha a programme tihhlawhtlinna tur chu a lo ni. A chhan chu maw, KA LUHLUL NGELH NGELH EM ALAWM! Tunah zawng Pathian lo chu ka tan engmah beisei tur a awm tawhlo a nih hi. Ka ruh chhungril a thling zawng zawng baw hawk khawpin min vaw ta a. A fa nihna chu a na thei ang berin min pe let leh ta a ni.
Ringtu pui duhtak, a na thei ang bera a kohlet hma che hian Pathian thatna hi lawm takin pawm la, a hma ah inngaitlawm takin kun ang che. Ka kaltlang ang kher kaltlanga Pathian hnena haw ve turin ka duh puilo che. Khawharna te, beidawn rum rum na te, mal ngawih ngawiha inhriatna te hi Pathian in a nasa thei ang bera a rawn thlentir chuan thochhuak tur i awmlo maithei a nia.
PATHIAN THATNA:
Khawlaia Sai ip puan chhunga khunga, kan khaw kawtthlera mualpho taka hnuh hrep ni hian ka inhria. Khawlaia ka chhuah te hian ka tukhum hi a mur chem chem thin asin. Ka hnunga thu lengvel hi ka lo hre ve pha ruai ruai thin si a. Pathian chuan min hnuk mualpho hrep mahse, a thatna chuai ngailo min hriattir chu hei hi a ni. Kei ang mi luhlul leh chapo hi chu hnuh mualpho ka ngai a, a tawpa min hnuhthlenna tur chu Pathian Biakna ah a ni, chu aia thui min hnuh thlenna tur chu VANRAM a ni tih pawh min hriattir tel nghal bawk.
Kan kohhran dan ah chuan kum 3 phuar tur ka ni. Pathian programme kaltluang ala tawp lo tlat. Thla leh June thla mai ah khian kan Y.P. Hall (Naupang Sunday school) chu hawn a ni dawn a. A lawmna ni pahfawmin kohhran chhunga Backslider roll a awm mek te (Phuar mek te) chu phelh an ni nghal dawn tih a lo ni leh ta daih nia. A va mak em ve aw... Pathian Programme hi chu. Uniform ka ha leh vat thei ang a. Kum thum lai phuar tur si khan. Ka Lalpa rawngbawlna ah ka tel leh nghal thei dawn a nih chu! A va han tha famkim tak em Ka LALPA ISUA KRISTA HI CHU.
Kan Pathian min chhinchiahna chu tatoo ang hi a ni a, tihreh i tum nasat poh leh a ser zual mai thin a ni.
A remruatna chu ka tan harsa thin mahse, A thutlukna chu ka tan Malsawmna a ni.
Lapa'n mal min sawm sak rawh se...AMEN
Post a Comment