R Zonuna RL @Kawrkam Cabin
.
A TIR
Thingtlang High School atanga Matric han pass chhuah nalh chu thei ka inti ngei mai. Mite pawn thei min ti. Aizawl khawpuiah ka pa nen College admission leh in luah tur kan zawng a; ka pa’n a huphurh teh reng nen kan hmu rang kher mai.
.
In luah tur chu Aizawl chhuah lam veng pakhatah awlsam takin kan hmu a. Assam type a ni. A neitupa chu che economic ve tak mai hi a ni a. In chu a lai takah plywood hmanga pin phel phawk a ni. Lehlam chu ka luah a, lehlam erawh a ruak a ni..
EK IN MAKSAK
Ekin chu chu a sorry ve khawp mai. Bang pakhat chauh a nei!! Chhak lamah chiah bang a nei a, a hma lam chu a kawngka a ni a, buara zar mai kha a ni a. A hnung lamah leh thlang lamah bang a nei lo hrim hrim. Mahse a mak ve tlat...nileng pawn daikal ila nilengin tuman min hmu lo a ni mai.
.
A chhuatah chuan Thingril kawi zet zet panga an mu kual rum mai a, ek awng atana tha zet zet kaw 5 vel a awm. Chutia bang mumal awm lo leh chhuat awng nasa a nih avang chuan a khur chhung chu tlang chhipa khaw awm ang hi a ni mai.
.
PA MAWIA TE CHHUNGKUA
Chu inah chuan thla khat chauh ka awm hman tihin a lehlam chu Pa Mawiate chhungkuain an rawn luah ta a. Pa Mawia hi kum 30 mi vel, Dept pakhata IV Grade a ni. Nupui pakhat, fa sikul la kai rual lo pahnih leh a nupui nau nula college kal lai pakhat a rawn luhpui a. An vaiin sa tha tawi len lawn, chang zing tak vek an ni. Bazarah pawh va zuar ila miten, “Ka duh aiin a sei lo,” an tih zel tur ang chhungkua hi an ni ve a. An nula chu Sangi a ni a, a hmelchhia ka ti.
.
An chhungkua hi an hmela en chi an ni lova, fel tak, nelawm tak leh fiamthu duh tak vek an ni. Karkhat plywood bang dan chauha kan khawsak hnu chuan kan innel nghal vek mai. An nula sangi nen kan inkawmngaih em em a, hmelchhia kan inti tawn viau bawk. An rawn awm lovang tih ka hlau thin.
.
Kan ek in intawm, an tukverh bul maia a awm erawh chuan min tibuai khawp mai. Chhun en laia ka daikal a chhuah loh nan ka tawngtai lo chauh a ni. Tum khat phei chu an tukverh bula ka thut laiin an nu a inthiar a. Buara zar chu an nautein a lo pawt tla tawp maia...thenawmnu thil dum vel ka hmu a, keimah ka zak zawk a.
.
PLYWOOD HI A PAN LUTUK
Lehlamte nena min daidangtu Plywood chu 6ft chauha sang a ni a; kei, sa pan leh chang khat tan chuan tlem han kan zeuhin an inchhung zawng zawng ka hmu thei vek. Mahse ka en ngai miah lo. Ka khum hunna zawn chiahah Sangi an muttir a, perek leng lek hian a kaw lehnghal a. Zanah hian Pa Mawiate nupa chuan tih-sa-loh-loh an ti ta thin a, ka che ngam ngai lo. Zun chhuak pawh ka ip char char zel. Zan mut theih loh ka hrat si a, anni an peih phian bawk sia ka ning lek lek thin. Chhuna an tih chang phei chuan ka chhuak daih zel. Tun hnu hian ka lo enthla thin lo kha ka inchhir deuh thin.
.
Zanah hian kan mu rual ziah hlawm a. Zatin hian kan indaidanna kaw tereuhte a hmui chuktuahin, “In Radio” ka va ti thin a; Sangi chuan, “I hmelchhia,” a rawn ti let ziah bawk a. Pa Mawia nupui chu a lo nui vak vak thin. Englaimah hian thuruk hi a awm thei lo. Chhungkaw ti ti thlengin kan in hriatsak vek zel a ni. Plywood hi chuan sound a lo proof lo khawp mai.
.
ALL-in-ONE RADIO
Pa Mawia te chuan Radio hmingthang leh nuihzatthlak tak mai hi an nei a. Han en mai chuan Radio pawh a ang chiah lova, a an sawi a har khawp. Chhangthawp la ur loh duhdah taka siam a ang lek lek mai. Rim nei vet vet hmel te pawh a pu a, eng rim mah lah a nam lem hlei lova. Han belh chian deuh chuan a ziak alang kim tawh lo naa MURPHY a ni tih a hriat thei a. A thar lai chuan a dum a nih ka ring deuh. Tunah chuan a paw var uk deuh, rawng lai tak mai a ni tawh a. A khaina te pawh a awm thin a nih hmel, a kilhna kua a awm. 2 band a ni a, a meter erawh a zatve bak a herh kal theih tawh loh.
.
Mombati stand atana an hman thin avangin a chung chu Mombati khawn hlir a ni a, a pang pawh a tui luanna khir hlir a ni. Tin, chhunah chuan naupang toys a ni leh mai. An naute chuan tukverhah a thlak fova, a zai thei reng tho bawk a! A buaithak lai erawh chu rizai sin tir a ngai thin kha a ni. A chhan chu han on chiah khan a ring em em ringawt mai a ni. A on tu khan a on veleh khumah a dah a, rizaiin a khuh nghal vat thin. Chutia tih chuan a ngaihthlak nuam tawk chiah a ni. A volume kha a down ve theih tawh tlat lovah.
.
Chu Radio chu a hlu em em a ni. Zingah Thlirvelna, zanah news, hla thlan zawng zawng, fiamthu hun, thadun, ka hla duh zawng leh thildang tam tak kan hlah ngai lo. Pa Mawia lah khaaa....Primary pawh pass tawp lo khan zan tin BBC News zuk ngaithla ziah a!!! Chuti taka hmanna a tam avang chuan All-in-One Radio tiin a hming ka vuah sak a, chuti hlir chuan ka lam bawk a. A hming ka sawi zin em avang chuan an chhungkua pawh chuan a te ber thlengin All-in-One Radio ti hlirin an sawi ve ta a.
.
ENGINEER
Nikhat chu Pa Mawia chuan engnge nih ka tum min zawt a, kei chuan Engineer ka ti a.
.
“Chuti chu Radio chhia te paw hi i siam thiam sa lo maw?”
.
“Thiam e,” ka confi hmel khawp mai.
.
Tichuan an All-in-One Radio ring lutuk chu ka siam dawn ta a. Tulthirin Screw Driver ka siam chawp a, radio chu ka hawng ta rup mai le. Radio chhung hrim hrim ka vawikhat hmuhna a ni a, ka rin aiin a lo kawrawng. Sangi nen chuan a herh theih theih ka han herh ve ta ngawt a; a bawk te te, pir vi ve te chu a then kan han nam thlu nawk nawk bawk a. kan chhin leh ta. Kan han on mai chu leh !!! karei..!! A ngaihna a awm lo !! On chiah khan a volume a full tawh!! A hma khan a lo la full lo mai mai a lo ni. Rang lutukin ka off leh nghal a. Ka han ti leh chhin a, a ring rapthlak lutuk chu rizaiin ka khuh nghal; a la ring lutuk chu rizai dangin ka khuh nawn leh a, a ziaawm ta. Chu Radio chu rizai sin thuahtir ngai a lo ni ta!! Pa Mawia chu a meng rum pawng al mai a.
.
Pa Mawia thin tirim em em tu dang kan tawng leh ta.. A meter chu kan han herh kual chhin a. A vaiin Aizawl chauh a man tawh!! A band thlak pawn awmzia a nei lo. “Khatin engtinnge BBC ka ngaihthlak theih tawh ang,” a ti vin hlar mai a, min beng lo chauh a ni. Hlau leh khur chungin ka’n hawng leh a, tihdanglam theih ka nei tawh lo. Pa Mawia thinrim chu a rum ngal ngal mai a. Mahse, a nupui chuan min rawn chhan ta. “Nang khaa...an sawi pawh pakhatmah i hriat loh kha; Aizawl a man chuan a tawk. A ring lutuk pawh kha a pawi lo, rizai pahnihin kan khuh ziah anga ni mai; rizai lah kan ngah em em a,” a rawn ti ta a, ka thaw huai mai.
.
CELEBRITY
Pa Mawia fate chu luruh ring tak ve ve an ni a, au vak vak an hrat ve hle a. Tukverah an dak a, All-in-One Radio tih chu an duh dan danin an thluk a; thudang tel miah lovin an sa vak vak thin a. Reiloteah kawmthlanga kan inluah neitute beng a verh ta a niang. Inrinni vawi khat chu an nula a rawn chho hlawl mai a(in neitute nen hian kan inhmu khat khawp mai). Tawnzau leh kekawrbul chhing zet a rawn ha teu teu mai a. A tuai no nguak nguak ngang reng lah tak a. Chu nula Pa Mawian a thlir lai chu tun thleng hian ka mitthlaah ala cham reng. Ka hmu leh chak takzet a, Mizo zawng zawng hmuhah pawh ka it khawp mai. Hmuhnawm dauh dauh tak a ni.
.
Chu nula chuan All-in-One Radio chungchang chu a rawn zawt fiah a. Sangi lah chuan kimchang em emin a lo hrilh mai si a. Vengchhungah chuan a darh ta hluai mai a! Sunday tlaiah te hian All-in-One Radio en tur an lo kal ta zut zut reng ta mai a, an nui tlawrh tlawrh zel bawk a. Milar kan lo ni ta!! Upa bial fang pawn, “khawnge in All-in-One Radio chu.” a rawn ti hmasa ber a.
.
Kei chu All-in-One-a min tih phah ta mai a. Ka hming hre hlei lo pawn college thleng thlengin All-in-One-a ka ni tih chu an hre ta vek mai a, ka zak deuh thin. Kan Lecturer pakhat, kan khuaa mitthi rala kal pawn All-in-One-a te in a lo zawng a, mahse a hmu lo. Kan khuaah All-in-One-a an awm tlat lovah. Min melh no tu an awm lova, min nuih tlawrh tlawrh tu vek an ni. Ngai awh leh tur chuan awmna veng leh College thlak a ngaih tih ka chiang ngei mai.
.
SANGI TE MAI MAI
A hnu deuh chuan Sangi chuan hmeltha min ti tawh a ni chek ang chu, min ngaizawng ta mai a. Sarep leh lehkha them thu thlum pai hi sarang chhunga khungin ka thosilen chungah a rawn tlaktir leh nalh thin a. Mahse Sangi chu ka duh ve lova; ka rilru a na e te chu ala ti ve leh ta nghal a. Sangi te ang chawn tawi tim tem, ung thi the, biang puar pip pep te chu kan khuaah pawh Vai-pa-den siam thiam deuh deuh an tam mai.
Post a Comment