R Zonuna RL @Kawrkam Cabin
(Vawksa Street)
.
Tun tum chu ka mumang leh a kaihhnawih ka'n sawi leh mai mai teh ang. A ho viau naa ka sawi chak leh tlat.
.
HETI HI A NI A
{ Chhunah kumin Puitling Sunde Sikula kan zilai a nih avangin Thupuan ka chhiar ve khanglang a. Ka rilruah thildang a lut hleithei lo, Patmos thliarkara Johana khawsa vel tur hlir ka suangtuah kual a. Nawm hmel riau te khan ka hre vel a.
.
Zan kan mu chu kan nu hnenah, "Nu-i, i mang chhe lutuk hi sim teh. Mang chhe rual pawh i ni tawh lo. Nizanah pawh ka khabeah te i rawn tlawh a. I ke tin a sei si a, min la hliam nghe nghe ang," ka ti a. Kan nu chuan, "Ka hre miau lo a lawm, insum te chu ka tum ve lutuk," a ti a. Kan ngawi zui vang vang a, rei vak lovah kan muhil ta a. Mumang ka nei nghal mai a nih ka ring..
Ka mumangah chuan : }
.
"MIN MAN A KA TANG
Kan chhungkuain chaw kan lo kil thap a. Chutih lai tak chuan Hitlera leh a sipaite an rawn lut thut mai a, silaiin min rawn tin nghal a. Kan chhungkua chuan ban kan phar thap mai a. Hitlera chuan a silai dawta min rawn hawlh pah chuan, "Nang hi kristian i ni tiraw?" a ti a.
Kei chuan, "Aw, ni e," ka ti a.
"A nih chuan kan lal Nero-a thupek angin kristian i nih vangin man i ni."
"Kei chauh kristian ka ni hleinem. Hei, ka nupui fanaute pawh hi kristian vek an nia."
.
Chutah kan nu chuan, "Kristian kan ni ve reng reng lo, amah chauh kha kan chhungkuaah kristian a ni," a rawn ti ta mai a. Mak ti em emin chhan ka tum a, ka an zuau lai chuan sipai ho chuan min rawn nawr nawk nawk a, "Kal mai rawh, Patmos thliarkarah i tang dawn khawp," an ti a. Min hruai ta daih a.
.
Helicopter-in min phur ta vang vang a. Rei tawk kan thlawh hnu chuan thliarkar pakhatah min min tumpui a. Sipai pakhat chuan min tlawh thla tawp a, "Hei hi Patmos thliarkar chu a nih hi. Hetah hian damchhung i tang dawn. A tang hmasa ber i ni a, midang pawh kan rawn dah zel dawn," a ti a. Min thlawh chhuahsan leh daih a.
.
PATMOS ISLAND CHU
Chu thliarkar chu zau vak hian a lang lo. Min tlawh thlakna piah lawkah chuan luite tui fim em em hi a luang del del a. A kam chu phul hring dup hmun a ni a, tupuisuthlah buk a awm pheuh pheuh a. Luiah chuan sangha an leng del del a, mawi ka ti em em a ni.
.
Lui kam lehlam hla lo te atang chuan ngaw a lo intan mai a. Ngaw hnuai chu a thelh nuam em em a, sava chi hrang hrang an chiar nuaih nuaih a. Tum thing a tam hle bawk. Ral hla angreng takah chuan thingzarah hian Savawm lianpui awm nual nual chu ka hmu a, ka hlau khawp mai a.
.
Chenna tur buaipui a ngai tih ka hre nghal a. Luite atanga hnaiteah hian lungpui lianpui pui pahnih a awm a. Chumi inkarah chuan chenna tur ka buatsaih ta a. A chungte ka zar a, kawngkhar te ka siam chawp a.
.
Hmun nuam ni mah se 'tang' nih chu a thawpikthlak ngei mai. Ka nupui dawt sawi ringawt te ka ngaihtuah a, ka thin a rim a. Ka fate ka ngaihtuah a, ka khua a har leh em em mai thin. Ni a rei duh ngei mai.
.
BATHSEBI
Nikhat chu Helicopter a rawn tum leh ta. Ka lo en reng a. Nula hmeltha zet pakhat hi an rawn man chhuak nawk nawk a, an thlawh kansan leh daih a.
.
Chu nula hmeltha chu ka lo en reng a. Nalh taka incheiin suitcase lian vak lo, changkang deuh hi a khai a. Min rawn hmu ve ta chu lawm hmel em em hian min rawn pan a. Ka hnen a rawn thlen chuan,
"Mami, tunge i nih?" ka lo ti a.
"Ka hming chu Bethsebi a nia,"
"Bible-a Bathsebi, Uria nupui kha maw?"
"Aw, ni e. Ka pasal Uria ral ram kal hlanin Osama Bin Laden leh a hoten min man a, kristian ka nih vang a nia."
.
A suitcase chu ka khaisak a, ka bukah chuan ka hruai a. A tawng duh phian lenghal a.
.
"Nang tunge i nih ve?"
"Kei chu... Ih.. Mizo ka nia."
"I va hmelchhe reuh si ve."
"Nia... Hmelthat hi ka harsatna lam a nia."
"Mizo kan ni kan hmel a tha... tih hla te kha ka lo hre ve a."
"A, hmeltha an tam a lawm."
"I hmel tha lo naa i dek-light reuh ka ti."
"Enge, deklight chu a awmzia."
"Ka hre lo nang. He hmun pawh hi a deklight ka ti, tirawh fang kual mai mai ila," a ti a.
.
Luite kam vel chu ka fanpuia nuam a ti ngang mai a, a tlan kual a, a nui awr awr a. Luikamah chuan kan thu a.
"In in chungah khan saruakin i inbual tih ka lo hria a?"
"Nia. Hmun ualauah lo chuan ka inbual ngai lo."
"Anih, Thuthlung hlui a mi daih i ni si a, i va la nula si ve?"
"Tun ai hian ka upa tawh dawn lo. Ka deklight reng dawn."
"Deklight tih pawh chu i uar ka ti."
"Ka uar vang hi a lawm ka deklight reng, Deklight-pa," a ti a, a nui vak vak a.
.
BATHSEBI NEN CHAUH
Patmos thliarkarah chuan Bathsebi nen chauh chuan kan khawsa ta a. Ani chu nitin luiah chuan saruakin a inbual ziah a, kei lahin hnimbuk phen atangin ka enthla ziah bawk a. A rei deuh hnu phei chuan ka enthlakna hmun chu a bel tul tawh. Mahse a hnu chuan ani paw'n ka inbual lai chuta tang chuan min enthla ve thin tho tih ka hre chhuak a. Kan indraw. Hmun rem laiah hnahte pahin nilum kan ai thin bawk a.
.
Zankhat chu meilum ai pahin a titi siam siam a. "Kan velah hian Chepa an tam hle si a, man dan ngaihtuah teh. Kei chu chepa sa hi engtia siam pawhin tui ka ti. Uria chuan engmah a thiam lo, indo leh insual tih chauh lo chu. Chepa sa ka ei lohna chin pawh ka hre lo. Chepa sa hi chu a deklight tlat," a ti a.
'Naktukah thang kan kam dawn nia, deklight deuhin," ka ti a. A nui vak vak a.
.
A tukah chuan Thangchep panga ka siam a, kan kam dun ta a. Nuam a tiin a hlim em em mai. A titi reng bawk a. Kan kam zawh chuan, "Tirawh, i haw phawt ang. Tlaiah kan en dawn nia, a lo awk tawh hrim hrim ang," ka ti a.
.
KA SEH
Tlai chu a nghakhlel em em mai a, thangchep en hun a nghakhlel a ni. Tichuan tlai a lo ni ta a. Thang en tur chuan kan inzui chhuak a.
.
Thangchepah chuan chepa pathum kan awk a, Bathsebi chu a va han hlim tak em! A nui khek rawih rawih a. Luite kamah te chuan a tlan kual leh vel a. Hlim em emin, "Ka'rawh tah hian thu ang," a ti a. Ka thu chu min si deuh thaw hian a rawn thu a. Patmos-a kan in hnaih ber tum a ni.
.
Min nuih sen sen a, a mit meng chuan min cho a. Chuti taka min han cho chu min tidanglam ve deuh a. Ka huaisen chhuahin, a kut chu ka la a, ka zut heuh heuh a. A mamin a no nalh em em mai si a. Ani lahin min hnar der si lo.
.
A kut zungtangte chu ka seh ner ner a. Ka ha a va han tiziau tak em! "I kutzungtang hi seh vak ka chak, ka ha a ziau lutuk," ka ti a. Ani chuan, "Seh vak la ti nia. Ka ui hleinem, i tan chuan," a nui ver ver a.
"Anih, ka seh vak ang aw..,"
"Umm."
.
Ka han seh deuh a, na a ti ang tih ka hlau si. Ani chuan ka rilru a hria a ni ngei ang.
.
"Na deuhin seh rawh, na ka ti lovang. Na hi ka hre vak tawh lova."
"Anih ka theihtawpin ka seh ang aw."
"Aw.. I theihpatawpin seh rawh, Lal-deklight."
.
Chutah ka theihtawpin ka han seh mai chuh... Ka seh rual rual chuan mipakhat hian ka hmaiah a rawn tlawh zawt zawt mai a. Min tlawh zawng chuan a rak tuarh tuarh bawk a, hmeichhe aw a ni. Chutah, ka hnarah a rawn tlawh leh sawk a.... "
.
{ Ka harh chiang ngei mai. Ka thu hlawl mai a. Ka mumang a lo ni.
.
Ka bula mu ka nupui chuan a ke a lo dawm a. "Awi.. A na lutuk, a na lutuk. Ka kezungpui i seh bung dawn a lawm, hmela. Enge i hriat?"
.
Hrilh hai takin ka va dawm pui a."Nui, i ke ka seh maw? Pawi ka ti lutuk, ka mumangah thil ka lo seh a," ka ti a. Ka mumang chu ka hrilh ngam thung lo.
.
Kan nu chu a thinrim ngang mai. "Engvanginnge min seh ngawt. Awi.. Hei ka nail polish pawh i seh rang nian nuan mai. Ka kezungpui tin hi a tla hrim hrim ang. Awi... A nat dan hi." a ti a, a si hlarh hlarh a. Kei lahin tihngaihna ka hre der lo. Sana ka en ringawt a, zanlai a lo ni a.
.
"A thu hrimah bawihi, i ke i rawn dah foul leh deuh a ni lo maw?" ka han ti dek dek a.
.
Vin em em hian, "Chu pawh nise lo seh kher a ngai a mi?" a ti bak hlar a.
.
Bai saih saih chungin a tho a, ka zui a. A ke chu tui vawtah kan chiah a. A nail polish hnawih chu rang viau mahse a tin duk leh duk loh a hriat theih chuang loh a, a hnuai lamah erawh ka ha thla a lang kulh a, a sen tuak mai. Zia lo tak a ni. A tlawn nan angreng thingpui te ka lum vel a. Nachhawkna ka eitir bawk a.
.
Darkar khat hnu ah chuan a ziaawm ta. Kan mu leh chu, "Ka hlau tawh che a nia, inhlat deuhin mu tawh ang," a ti a. Rizai hran sinin kan mu a. Ka mumang chu ka ngaihtuah neuh neuh a.
.
Bathsebi leh Patmos chu ka ngai ru deuh riau a, ka inthiam lo deuh bawk. Ka muhil leh chu mumang ka lo nei leh nghal mai a. Ka mangah chuan : }
.
"SAKHI LUNGHLU PAI
Kan buk bul lungpui chungah chuan Bathsebi nen kan thu a, kan titi mai mai a. Chutih lai chuan luite kam lehlam maiah chuan Sakhi hian hmin a pet mawlh mawlh a. Bathsebi chuan, "Awi, saw sakhi saw ka hmu fo mai, a chek ka hawp chak ngei mai. Tirawh a thang kam rawh. Kan awh hlauh chuan a chek a tui dawn em a sin, deklight dawn lutuk," a ti a.
.
Sakhi thang tur chu ka buatsaih ta chuk chuk a. Kan va kam ta a. Bathsebi chuan nitin a va en thin a, beidawng taka rawn hawin, "A awk lo," a rawn ti thin. Ka khawngaih thei thin.
.
Zankhat chu kan mut laiin kan thang kamnaah chuan sakhi a huk ta tuar tuar mai a. Kan thu chhuak dun hlawl a. "Kan thangah sakhi a awk ta ngei a nih chu, naktuk khaw en hunah kan va en dawn nia," ka ti a. Khawvar hun nghakhlel em emin Bathsebi chuan mut mu pawh a tuah thei tawh lo. "Awi, deklight dawn lutuk!" a ti deuh chhen a. Deklight tih chu engpawh, a duh duh sawi nan a hmang ni berin ka hria.
.
Zing ni chhuah rualin kan va en ta a. Sakhi pachal lian zet mai a lo awk a. A lo thi tawh a, a lei a lo vei seh tat a. Ka pu nawlh a, buk lam kan pan a. Ka hnungah ani chuan min rawn zui a, hlim em emin a titi bawrh bawrh a.
.
Buk kan thleng tep tawh tih chuan Bathsebi chuan, "Hey, LalDeklight, sakhi mawng a khi engemawni a awm, a eng phet phet mai. Awi, a nalh lutukk..," a ti a, a rak chek chul a. Ka sakhi put chu ka nghat a, ka en ve ta a.
.
Sakhi mawngah chuan lunghlu nalh em em mai hi a lo inphum reng mai a. "Lal Davida, lunghlu nen a inang lutuk, a tha mi a nih khi. Kher chhuak ang," a ti a. Kawm chhuah mai ka tum a, sakhi chu a ip a, a tlum zel mai a. A mei chu a hnawk deuh avangin chung lamah ka kuai chho vak a. A kutzungtang te zawk Bathsebi chu lak chhuahtir ka tuma, a ni paw'n a thei der lo.
.
Hmawlhte ka la a, ka han kher ngial thin a, a tlum lut leh thin a. Hnai tawkah kan bih dun a, kan bei nasa mai a. Sakhi chu a ip leh thin a. Sakhi chu a thi tawh si a, a ip leh thin chu mak kan ti khawp mai a. Kan bih hnaih lai tak chuan a rawn vawih thaw sawt a, a uih em em lehnghal a.
.
Bathsebi chuan, "Awi, thi tawh vawihah chuan a la uih ber awm e, deklight lutuk!" a ti a, kan nui vak vak a.
.
Lunghlu kan kawm chhuak thei lo chu ka beidawng tawh a. Ani chuan, "I kutzungchal kha a sei zawk a, theihtawpin va kawm thut la i kawm chhuah theih ka ring tlat, a lang reng tho si," a ti a.
.
"A nih aw," ka ti a.
.
Ka han kawm vak mai a. Ka la chhuak tep tih chuan mipakhat hian ka hnungah te, ka nakah te, ka dulah te, ka bekah te min rawn chum zawt zawt mai a."
.
{ Ka harh chiang leh ngei mai. Ka mumang a lo ni leh pek. Ka han meng chu ka nupui chuan min la tin ar chung hian, "I va han tenawm tak em!! Eng vanga ka mawng rawn kawm vak vak nge i nih? I va han lerh em em ve. Awii... I zah theih loh zia hi, ka ten che a nia. I la nui uar uar zui lehnghal," a ti tawn tawn a, a thin a rim tak meuh a ni.
.
Keia hamhaih chuan, "Ih... Ih... Sakhi mawng... I mawngah lunghlu deklight a awm lo mi? " ka'n ti bah nuaih ngawt a.
.
"Enge sakhi..? Ka mawngah lunghlu ka dah ngai a mi? Lunghlu pawh kan neih ngawt a mi? I lerh herh lutuk vang a nih kha. I zahpuiawm leh lutuk. Ka mawng pawh a thip zo vek tawh."
"Nui, lerh vang pawh a ni chiah lo.... Ih..."
.
"A ni, a ni. Awi, hei ka kekawrte mawng pawh i pawt san chhe vek a nih hi. Khumah pawh mu ve tawh suh. Sitting room thutthlengah va mu rawh, ka rap che a nia," a ti tawn tawn a.
.
Kei, thiamthu sawi tur nei lo chu ka rizai nen ngawi rengin ka phei ta hnu hnu a. Bedroom atang chuan min lan rawn au zui a, "Deklight i tih ngawt te kha tawnghriat loh a mi? I khawlo em em ringawt mai... I a dawn a niang," a la rawn ti a.
.
KA SIM
Sitting room thutthlenga mu chung chuan ka ngaihtuah ta neuh neuh a. Patmos nawmzia leh Bathsebi bula khawsak hahdamthlakzia te, tang mah ni ila thianghlim taka kan hlim phian thin zia te. Mahse heng zawng zawng ai chuan kan nu chungchang chu pawi ka ti em em a ni.
.
Rizai hran kan sin si a, a mak hle mai, kan nu mangchhiat lutuk vang a niang. Sakhi mawng khera ka nupui mawng ka lo kher vel chu ka nuih chu a za deuh a. A mei ka lo kuai vak te kha a kekawrte a ni ngei ang. Sakhi thi tawh mawng ip thin pawh dam reng kan nu mawng lo ni lekin. Hnai tawka ka bih laiin min lo vawihkhum vel. Pachangin tih tak zeta nupui te muhil lai mawng lo kawm vak vak chu... Pawi tak a ni. A zia hian a daih ngang lo a ni e.
.
Heta tang hian mumanga Patmos thliarkara Bathsebi nena lo tan dun chu ka sim chiang ngei mai. Sim lo ila kan nu hian min deklight duh hial awm si a. }
Post a Comment