THE KENTUCKY MYSTERY
***********************
 { Eng thil tak ni ta ang maw..??? }

Kan sawi fo thawh ang khan khawvelah hian thil mak tamtak hi a awm a. A then te chu scientific tak pawh a sawi fiah theih mai te an nih laiin a then te hi chu engang pawh a han chhui zui pawh a sawifiah ngaihna awm miah lo te pawh a awm ve teuh mai bawk a ni.

1973 khum khan Kentucky USA ah chuan thil mak deuh mai a thleng a; he thil theng hi a ni tun thleng a “The Kentucky Mystery” ti a khawvelin a lo hriat lar tak chu. Zinglam dar 1 vel a ni tawh a, Betty Walappa leh a bialpa Fedric-a chu an zang leng haw Kentucky khaw dai a Car chung hawn chi ‘convertible’ an tih ang chi a kawng sira an din lai chuan eng mum mak deuh mai hi an mahni lam pan chuan a rawn thlawk phei a. He thil eng rawn thlawk hi in chung chen vela sang a thlawk a ni in, a eng sen leh serthlum rawng in a phe zoh zoh mai bawk a. Betty te thiandun chuan mak ti tak a an en reng lai chuan an bul chu a rawn thleng phei ta mai a.

He thil thlwk hi Meialh hlawm ang deuh a ni na a, an bul hnai a rawn thlen pawhin engmah satna reng reng a neih loh bakah thawm ri engmah a nei lo bawk a. Chutia an bul hnai a rawn thleng chuan thil eng hring deuh nghelh nghulh hi a rawn kap chhuak ta a; Betty te thiandun hlau chuan an Car chu tihnun a tlanchhiat an han tum a, mahse an Car chu a nung thei ta hauh lo mai. Tichuan, ke in an pahnih chuan an Car atang chuan chhuakin tlanchhiat an han tum leh chhin a, mahse pen khat pawh an pen thei ta hauh lo mai le. Kawnglaiah chuan an ding khawng ta reng mai a ni. Hetihlai tak hian an vanneih asiamin kan ti dawn nge Highway Patrolman Jake Robinson-a chu an lam pan chuan a rawn tlan ve ta hlauh mai a. Chu thil eng thlawk boruaka ding eng vu mai leh thil eng hring deuh Betty te thiandun lam a kapchhuak phut mai chu a rawn hmu chiang ve kher mai le. Betty te thiandun lah chu che theiloin kawnglaiah chuan an ding khawng reng mai bawk si. Jake Robinson-a chuan a service Revolver chu phawrhin chu thil englamah chuan vawi ruk lai mai a hmet puak ta a. Hetih lai hian Betty te thiandun chuan an lo hmu reng a, mahse an che sawn thei tlat lo. Tichuan, thawklehkhatah chu thil thlawk atang chuan thil eng mak deuh mai hi Policeman Jake-a lamah chuan a rawn in kapchhuak a Jake-a chu a bo ta daih mai a; chutih rual chuan chu thil eng thlawk pawh chu thawkleh khatah a bo ve ta nghal a ni.

Hethil a thlawhbo rual hian Betty te thiandun pawh hi an chesawn ve leh thei ta nghal a, rei vaklo chu an hamhaih ve deuh ningei tur hi a ni, mahse an han harhfim hnu chuan Jake-a Patrol Car a Police ho inbiakpawhna atang chuan tanpuitu an ko ta a. Reivaklo hnuah chuan Police dang te chu an rawn thleng a. Betty te thiandunin thil awmdan an han sawi chu an awihlo nasa ta mai le. An pahnih chuan Police that a a ruang paihbo a puhin an man ta hmak mai a ni. Betty te thiandun hian an thilhmuh hi tumah hmuhpui tu an neihloh avangin an tan chuan tanchhan tur a tam lemlo khawp mai. Ukil tan pawh han tih vak ngaihna a vang khawp mai a, chutih rualin an puhna lam pawh a Police Jake-a ruang ber hmuh tur a awm miau lohavangin evidence tha engmah an nei chuang lo bawk a. Tichuan, he case hi kum 7 zet an chai hnuah finfiahna engmah a awmloh avangin Chief judge chuan a ti tawp ta tawp mai a ni.

He thil hi tun thleng hian enge anih hi an hre chhuak zo ta lo a; tin, Policeman Jake Robinson-a ruang pawh hi hmuh tur a awm ta chuang lo a ni. Thenkhat chuan Betty te thiandun hian an that anga engtin emaw a ruang hi an paih bo a nih ring an awm laiin thenkat chuan UFO lam pangin an ru bo anih ring an awm bawk a ni. He thil thleng hi a ni khawvelin ‘THE KENTUCKY MYSTERY’ tih a a lo hriat lar tak chu .

 UFO HNATHAWH  ANI THEI ANG EM ?
********************************
Italy rama thil thleng mak tak mai chu...
ITALY RAMA THIL THLENG CHU: Kum 1976 thlasik lai ani a, Italy  rama Florence khua pawh khaw vawt in a hmetve tan viau tawh a, vur te pawh khawilai hmun hmunah te emaw chuan a lo sur ve tan tawh a ni.  Hetih hun lai hi chuan tlai lam tawh ah hi chuan pawn chhuak peih pawh an awm tawh meuh thin lo a ni. Tlai khat chu Florence khaw tlangval pahnih Fernandes-a leh a thianpa Miguel-a te chu an car a chung hawn theih ang chi chuan beer in pahin khaw dai vel kawngpuiah chuan an tlan kual dun mai mai a. Chutia khaw dai mai kawng reh lai a an tlan dun lai chuan an hmah chuan thlil mak deuh mai a rawn awm ta tlat mai...

Chutia lungmuang taka an tlan dun lai chuan an hmaah chuan thawnga-lei-vir ang tak hi a rawn awm ta thut mai a. Mak deuh mai chu he thawngaleivir hi van lama ding chho lovin a kawng dung zui zawng chuan a awm thlat mai a. Fernandez-a te thiandun chuan mak an ti nasa mai. An ngaih pawh a tha chiah lova, mahse  finfiah lova tawngtaw tlanchhiatsan ngawt chu an tum hauh lo mai le. Tichuan Fernandez-a te thiandun chu chu thawngaleivir lianpui mai chhungah chuan an car chuan an tlan lut dun ta a.

A chhunga an han lut chiah chu an hma lamah chuan eng mak tak mai chhimbal rawng ang deuh hi a lo eng phut mai a, kawngpui pawh chu a hmaa an hriat thin an khaw dai a kawngpui zal nuam tak kha ani ta hauh lo mai. Chu eng mak tak lamah chuan kawngpui hi a eng phei ruih mai a. An ni pahnih hlauthawng chuan an car chu tih din a tlan let leh an han tum na a, an car chawp chuan chu eng mak deuh mai chuan a hip ta tlat mai a, a brake an han rah ngial a, an car engine an off pawhin chu eng mak tak mai lamah chuan a hip kal zel ta mai si a. Tichuan an mangang chuan an car chu an zuanchhuah san ta tawp mai a. Chutia an han zuanchhuah takah chuan kawngpuiah chuan an tla hlawm dun ta tawl mai a ni.

Chutia an mahni kawngpia an tlak thlak takah chuan chu thawngaleivir mak tak mai pawh chu a ral ve ta tial tial a a bo zui ve ta nghal mai a ni. An car erawhchu an hmuzo talo a ni. He thil thleng hi mi tamtak chuan an ber rui in thil an hmusual emaw ah an ngai a, mahse an car chu hmuh tur reng reng a awm tawh si lo. An mahni chu mithiam rualin an han endik a, indawimut hmang te leh ‘lie detector’ an tih mai polygraph hmang te in an han enchhin ngial pawhin an thusawi chu a pangngai reng tlat mai a ni. Tin an thisen vel an han endik chuan radiation nasa tak kaltlang ang mai in hnuhma a lo awm bawk a ni.

Fernandez-a te thiandun thil tawn hi mi tamtak chuan UFO lampangah ngaiin UFO lam miin an mahni chu ruk bo an tum ah an ngai a, thenkhat erawh chuan khatia thawngaleivir mak takmai rawn awm thut kha engemaw avanga hun dang hmun dang a kalna ‘ Time Door’ rawn inhawngah an ngai thung bawk ani. Mak deuh mai chu Fernandez-a leh Miguel-a te hi he thil an tawn hnu thlakhat lekah an natna enge anih chiah hriat lohvin an thi ve ve a ni.

THE MYSTERIOUS DISAPPEARING RIVER OF COLORADO:
**************************************************

He lui mak tak mai hi engatinge mi thenkhat in an hmuh theih a, thenkhat in an hmuh theih si loh?

1869 kum khan American settler pakhat Jonathan Brown chu Colorado a ramngaw hnuaiah sazuk vel kah tur zawngin a ramchhuak a. Zan tam fe a riah hnu chuan sazuk bakah sa dang eng engemaw a kap nual tawh a. Heng a sa kah te hi an vun te lip in an sa te a rep tha zel a. Zankhat chu luite kangchat tawh khoro tawh Colorado lui lian fin tu pakhat sirah chuan riahbuk a sual a. Zanah chuan a sarep te meipui a hem a meilum ai pahin lungpui chungah a thu mai mai a. Chutih lai tak chuan a riahna bula lui khoro tak atang chuan thil ri hum hum thawm a lo awm ta a. Jonathan-a chuan an ngaihthlak chian chuan lui tui luang ri hum hum ngei ni a a hriat avangin mak a ti kher mai. Meichher te a'n siam a; tichuan, ava enfiah ta a.

Chu lui khawro kangchat tawh awmna lai ava thlen chuan, ahma chhuna tui pakhatmah awm lohnaah chuan tui hi a lo luang hum hum mai a, mak a ti kher mai le! Chutianga lui tui lo luang hum hum ta ringawt mai chu enge a chhan tih hriat tumin chu luite hnar lam chu thui fe a zawh chho a, mahse eng teh ual a hmuhchhuah belh lo. Lui hnar lam a ruah sur in tui a chu a rawn siam anih ringin a riahbuk lamah a kir san leh ta a.

A tuk khua a lo var chuan chu lui chu ava en leh ngat a, mahse a hma zana tui luanna hnuhma awmang reng reng a hmu ta hauh lo mai a. A tuk leh zanah pawh chuan chutiang tho chuan a rawn awm leh ta! Hetatang hian he lui mak tak mai chanchin hi khawvelin a lo hriat lar phah ta a ni.

Hemi hnu lam hian he lui hi ramvak mi te leh rangkachak zawng ho te pawh in an hmu ta zeuh zeuh a. A tak a thil thleng bakah hian thawnthu neuh neuh a sawi belh te nen a awm chho ta zel a. An hmuh sawi awm hnuhnung ber chu 2001 kum a zirlai rual khat ram chinchang ve zir tur a riak chhuak ten an hmuh chu a ni. Hemi tum hian a thla te pawh an la nghe nghe a ni.

He lui hi lui lian ani lova; tin, zantin tui hi a rawn luang chuang lova engemaw chang chang chauh in hetianga tui luang lai hi an hmu thin a ni. Mithiam te ngaihdan chuan he luite hnar lamah hian lei chhungril atanga hunbi nei a tui rawn inphuh chhuak ‘Geyser’ an tih ang chi hi a awm anih an ring deuh ber a ni.

Hman deuh a ‘KHAWTHLANG THILMAK’ tih bu ah khan Mamit bul Luangpawl ramah thianho ramriak in a chunga kan sawi tak ang khi an hmu ve tlat mai. An riahbuk bula lui kangchat tawh chu zan lamah chuan ruahsur si lovin tui a rawn luang hum hum a; atuka an va en chuan tui luanna hnuhma awm reng reng awm loin alo ro vek si. Mak ve tak chu a ni.

Heng thil thleng thin te hi thilmak ‘Supernaturals’ thil, ramhuai leh eng engemaw hnathawh leh thiltih lam ai mahin leilung thilmak, ‘Natural earth mysteries’ an tih ang chi hi a nih hmel mah mah zawk a ni.


THE FAIRIE'S GOWN:
 *******************
{ Lasi ho kawr fual...}

THU HMA: Thilmak tak tak te kan sawi thina, thenkhat tan chuan awihawmloh tak tak te pawh a ni thei, mahse keima mimal bikah chuan heng thilmak hrang hrang ka rawn sawi thin te hi Google lam ai mah a lehkhabu hlui tak tak atanga ka rawn lakchhuah thin te an ni hlawm a...Heng thilmak te hi ka tuina ber an ni hauh lova. Ka tuina zawk chu literature lam te, philosophy lam te leh psychology lam te, pseudoscience leh occult lam te an ni daih a. Mahse heng ka tuina ringawt te hi ziak ta ila mi tamtak tan chuan a ngaihnawm hauh dawn lova. Chuvang chuan heng thilmak te hi chhiartute ngaihnawm tih zawng anih beiseiin ka rawn ziak thin a ni e.

LASI TE HI AN AWM TAK TAK EM? He zawhna hi khawvel hnamtin ten kan inzawh thin a ni hial awme. Khawvelah hian lasi thawnthu neilo hnam hi kan awm kher awm love. Keini Mizote hi chuan hmanlai thawnthu ang deuh in kan nei a, chutihrualin tunhnai deuha lasi zawl te pawh sawi tur an awm tho mai. Keini Mizote hi chuan lasi te hi an awm tak tak em tih finfiahna, a 'material proof' hi kan nei vak lova, mahse hnamdang ho hi keini ai chuan an lo fing deuh nge mawni lasi ho hnen atanga an lak eng engemaw hi sawi tur leh hmuh tur an nei nual zel mai. 'Luck of Edenhall' tih no te pawh kha lasi hnen atanga an ruk niin a chanchin pawh ka rawn sawi nual tawh kha. Tuntum chu lasi ho hnen atanga kawrfual an ruk sak chanchin sawi ve thung teh ang.

LASI KAWR FUAL CHU: Sap ho te ai hian Irish ho khuan lasi chanchin hi sawi tur an ngah mah zawk a, tun tuma ka rawn sawi tur pawh hi kum zabi 18na tir lam a Ireland thingtlang khaw pakhata thil thleng a ni.

Albert Goldwin-a chu lo neitu rethei ve tak mai hi ani a. Vawikhat chu a bawng bo a zawnna lamah ramhnuaia puk pakhat hi a hmufuh nawlh mai a. Chu puk chhungah chuan a lut a, a rinai taka a lo thuk avang chuan a lut ta zel a. Thui fe a luh hnu chuan puk kaw-kel pakhat hi ava hmu a, chu puk kaw-kel ah chuan kawngkhar lian deuh mai thinga siam hi a lo awm a. Na vak lova an nam chhin chuan a inhawng ta mai a. A chhunga ava dah luh chuan nula tlangval rual hian ruai an lo theh mup mup mai a. Albert-a chuan mak ti taka a en lai chuan an zinga nula pakhat hmeltha tak mai chuan a rawn sawm lut ve ta a. Tichuan Alberta chu a hruailut a, an eitur leh intur te chu an lo pe ve a. Alberta hruaitu chuan a hming chu Hildika a nih thu leh lasi an nih thu te a hrilh nual a, tichuan Alberta chu pindanah a hruai lut a a kawrfual hak 'evening gown' pawl chu a phelh a, ruak in Alberta hmaah chuan a awm ta teu mai le. Alberta pawh mihhring pangngai a ni ve tho bawka a thisen a lum ve ta pap mai, mahse chu lasi nula hmeltha Hildika-i ke lam an en chuan mihring ke ang nilovin kel ke ang deuh hi a lo ni tlat mai, pa thisen han lum reng na chi ni hek lo le a tlanchhiat san ta a. A tlanchhiat pah chuan Hildika-i kawrfual, evening gown chu a la a puk kawngka lamah chuan tlanchhuakin thilo-aruang in an in a thleng ta hram ani. A tlanchhuah dawn a kawrfual a lak hian lasi nula chuan ' kha kawr fual kha a ha apiang te chu an thlah te chhuan 12na thlengin an chungah anchhia a thleng ang' tiin a au zui a. Tichuan chu lasi kawr chu tuma hak ngamlohvin a awm ta reng a, tichuan kum zabi 18na tawp lam khan St Patrick's Church Ireland ah an dah ta a ni.

He gown (hmeichhe kawrfual) hi silk tha mi 'Japanese silk' an tih ang chi atanga siam, a pawl (blue) dal deuh ani a. St Patrick's church ah hian darthlalang bawm chhungah an dah thin a, mahse vanduaithlak tak maiin kum zabi 19na tawp lam khan misualin an ru bo ta daih mai a, tun thleng hian a awmna chin an hre zo ta lo ani. A ru tute hian vanneih pui tak ang maw???


THE LAST OF THE HORNED PEOPLE:
******************************
 Mihring piangsual nge an nih ramhuai thlah

Khawvelah hian mihring piang danglam deuh deuh hi an awm fo mai a. Inthlahchhawnna atanga piangsual chi hrim hrim, genetic disorder an thisen a awm tel tlat te pawh an awm thin avangin kan pi leh pu te pawh kha nupui pasal chungchangah an lo fimkhur viau thin a. An thlahtute ah piangsual an awm em tih te thleng in an lo in chhui ve thin a ni. Tin pianphung diklo hi nu in nau a pai lai a, nu pumchhunga nau insiam diklo avang te pawhin piansualna hi a awm thei tho bawk a ni. Tunlaiah pawh hian chanchinbu ah te leh TV ah te nau piang mak tak tak lu inzawm te, lu pahnih nei te leh ke paruk nei te pawh doctor in an zai thu te kan hmu thin a, mahse tuna kan rawn sawi tur hi chu heng ang chi hi an ni ve em aw tih ngaihtuah vang vang tham an ni tlat mai. A chhan pawh hemi te chhung thlah hian an lu ah ki pahnih an neih mai bakah thiltihtheihna engemaw nei a sawi an ni tlat mai le.

AD 800 chho vel khan Italy ramah khuan chhungkaw mak deuh mai Gianchi family an tih chu an awm a. He mi te chhungkua hi engtik lai atanga Italy rama rawn awm nge hriat ani chiah lova, mahse kum 300 chuang chu an lo khawsa ve tawh a ngaih ani a. Tumah an tlawhpawh lova, thingtlang hmun fal takah an chhungkaw ho chuan an cheng ve tawp mai a. Mak deuh mai chu an chhungkaw ho hian kel ki ang tak pahnih hi an lu ah hian ki an nei tlat mai a ni. Gianchi chhungkaw chanchhin hi hrechiang vak an tam lo hle mai a. An mahni hian tumah an tlawhpawh bawk si lova. Mak deuh mai chu leilet te an nei ve lova, thlai huan pawh an nei hek lova, engmah hna an thawh tuman an hre lova; tin, an in atang chuan meikhu a khu chhuak hmuh tur a awm ngai reng reng lo bawk. An chhungkaw member hi engzat chiah nge an nih hriat a ni lova an hriat danah chuan naupang pahnih hmeichhia leh mipa leh puitling nupa ni awm tak leh pitar pakhat niin an hria a. Tuman an tlawhpawh ngam loh avangin leh anmahni pawhin tumah an tlawhpawh loh avangin an chanchin hi hriat an hlawh lo em em a ni.

An chhungkaw chanchin hi an hriatna ber chu an naupang pahnih te hian thian kawmngeih deuh mai pakhat mipa naupang Francesco-a hnen atangin a ni. Francesco-a sawi dan chuan Gianchi chungkaw inah hian eitur pakhatmah a awm ngai lova; tin, amah an biak pawh in tawngka a be lovin rilru (telepathy?) in an inbe thin niin a sawi ani. Tin hetih hun lai hian Italy thingtlang khua ah chuan ran vulh an uar em em a, chhung tinin ui, kel, bawng leh ar te an vulh a, Gianchi chhungkua erawh hi chuan zawhte dum pakhat chiah an vulh a ni.

Francesco hnenah chuan an chhungkua chu tihhlum an nih tur thu te, an ruang chu halral an tum anga mahse 'Wall-nut' thing lo chuan an hal theihloh tur thu te; tin, anmahni tihlum tura thu pe tu ber chu an chhungkua tihhlum an nih atanga kum nga na ah a thih ve tur thu te kum 2000 a ral hnu a he khawvel a an rawn kir leh tur thu te an lo hrilhlawk vek a. He an hrilhlawk ang chiah hian a thleng chho ta a ni.

AD850 khan Pope Leo lV chuan Gianchi chhungkua chu dawithiam leh ramhuai nena inzawmna nei ni a puh in a sipai te a tih hlum tir ta a. An ruang hi halral vek turin thu a pe bawk a mahse an han hal dawn thin a, thing ro tamtak an hman a a thing a kan ral vek pawhin an ruang hi a kang ve thei hauh lo mai a. Tichuan, Francesco chuan a thianten an thu lo hrilh kha a sawi chhuak ta a, walnut thing (khawkherh) hmang chuan an hal ral thei ta hram a ni.

Thil mak leh deuh mai chu an ruang an hal hian an halna khu hi van lamah khu chho lovin chhum leivak kan tih ang hian chulai vel ramah chuan a khu chu a zam kual chiam mai a. Chu meikhu in a tuam phak chin khuaah chuan a hnuah hri mak tak mai a leng vak mai a, mi tamtak an thih phah nghe nge ani. Tin an lo sawi lawk ang ngeiin a hnu kum nga AD855 ah chuan Pope Leo lV chu a thi ve ta a ni.


Kum 2000 hnuah chuan lo kir leh tak ang maw? An rawn kir leh dawn anih chuan kum 2850 ah Gianchi familly hmel kan hmuh leh ngei hmel a ni.

 PASALTHA BO DAN MAK
**********************
 Rambuai lai a ni a, hetih lai hian Zoram chhungah Vai sipai an in lulingin nunphung a khaihlak nasa em em mai a. Lo neih that hleihtheih anihloh avangin leh cerfew, khaw mipui koh khawm thut thut a tam avangin tumah ram hna thawk tha hman reng an awm lova, ei leh bar a harsa em em mai bawk a. Khaw thenkhatah phei chuan ram hnah nem leh bahra te a rem rem an ei a, an pasaltha te pawh ramvak a an chhuah hleihtheih loh avangin in lamah an tawm deuh chawt mai thin a ni.

Tukkhat chu Vai sipai thawm te a reh rei ta deuh bawk a, an khua pawh a muan deuh avangin a nupui raipuar sa rawp ei tur zawn sak turin pasaltha Thangchhina chu a silai, 'Awlan' nen chuan Pangen ram lamah chuan sakhi sih tlan vel chang tur chuan a in pu liam ve ta a.

Pasaltha Thangchina hi pa taima tak mai leh ram hna pawh thawk nasa tak mai, ramvah peih em em mai leh sa kap thei tak mai a ni a. In lamah hian awm lai a nei ngai mang lo ani. Hetia ram an buai a, duh duha ram a chuah theih tak lohah chuan hrehawm hi a ti thei em em mai a. Tihtur dang vak awm hek lo, a nupui raipuar bulah chuan a awm chawt mai a, chutia ram vahna hun remchang a rawn in her chhuak chu a lawm em em mai a ni.

Thangchina ramvah tumna ram, Pangen ram an tih hi tunhma atanga lo atan pawh a an theh ngam loh, ram chang tha tak mai a ni a. A ngaw a tha in sa pawh a la awm nual a, tin, sih tha tak mai 'Bung sih' an tih mai, sakhi leh sa dang ten an tlan em em mai, 'Pangen bung huai' an tih bul lawkah chuan a awm bawk a. Pangen ram hi lo atan vawikhat hmanlai deuh in an lo nei tawh a, hemi ram lo atana nei apiang hi an chhungkhat pa per nat lawkna hranpa nei lovin an thi zel mai a, hei vanga 'Pangen ram' tih a ni a, tin sih bulah hian ' Pangen bung huai' an tih mai, bung kung lian em em mai hi a awm a, he bung kung hi huai nei niin an sawi thina, he 'Bung sih' an tih tlan, sa chang ho pawh hian he bung atang hian thawm mak tak tak lo chhuak an hre fo thin a ni.

Chutia ramvak tura a phur taka a kal chu a nupui Chhingpuii chuan a ngaihtuah angreng hle mai a, mahse sa a rawp ve bawk si a, rilru nuamlo tak chuan a thlah liam ta a ni a. Thangchina hi tlaivara sa changa, a tuk zingkara haw leh mai tur a chhuak a ni a, a tuk khua a lo var a, tukthuan ei kham, fehrehsan hunah pawh a la rawn haw tak loh avangin an nu chu a ngaih a tha tawhlo hle mai a, chawhnu tlang herah pawh ala rawn haw tak loh avang chuan an nu mangang chuan an laina hnai te chu a hrilh ta ringawt mai a. Thenawm khawveng te tihbuai an hreh avangin chhungkhat laina hnai te chu a zawng turin an chhuak ta a. Pangen ram hi khua atanga hla lutuk a ni lo bawka, khaw en laiin 'Bung sih' chu an zuk thleng hman a. Sih bula hnahkiah kungah chuan Thangchina chuan 'thang-te' hi a lo dawh a, iptepui pawh chu a lo in bang a, mahse ama hmel reng reng hmuhtur a lo awm hauh lo mai a, a silai pawh a lo awm tawh hek lo. Helai hmun hi sih awmna hmun, ramhnuai hmun dam deuh anih avangin hnuhma te pawh a lang awlsam viau a. Thangchina zawngtu an laina hnai te chuan an han au vel a, thawm engmah a awm siloh avangin a hnu chu an chhui ta a. Thanchina hnuhma chu 'Bung huai' an tih bung kung lian tawk lamah chuan a kal thla zel a, tichuan chu bung kung lianpui mai bulah chuan a hnu chu a tawp ta chat mai a...han chhui zui leh tur reng reng a awm ta lo. A hnu chhui tute chuan mak an ti kher mai. Chulai hmun vel chu an han en kual ngial thin, a hnuhma reng reng hmuh tur a awm ta si lo a, khua a thim tan tawh bawk si chu khawtlang pun turin an haw san ta ringawt mai a. chhui tute chuan mak an ti kher mai. Chulai hmun vel chu an han en kual ngial thin, a hnuhma reng reng hmuh tur a awm ta si lo a, khua a thim tan tawh bawk si chu khawtlang pun turin an haw san ta ringawt mai a.

Khawtlang hruaitute leh val upa ho te, chhungkhat laina te an han in rawnkhawm chuan zan khawthim a zawng chawpchilh rum rum lova, atuk khawvar huna khawtlanga zawn turin thu an ti tlu ta a. Atuk khua a lo var chuan tukthuan eikhamah nula tlangval, a thei thei chu an khaw pasaltha bo zawng tur chuan an thawk chuak ta a. Pasaltha Thangchina bo dan chu a mak bawka, a khaw pum a deng chhuak nghal a, mi sawi pawh a hlawh hle mai a. Tichuan a zawng tur te chu a pawl pawla inthenin Pangen ram pumpui chu an tuam ta a, mahse nilenga an zawn pawh in hnuhma dang reng reng an hmuh belh ta hauh lo mai a. A hnuhma bung kung bula tawp bak chu han chhui zui tur reng reng a awm ta lo. Chutiang chuan kan Mizo dana ni 7 an zawn hnu chuan an beidawng ta a, bung kung bulah chuan a thlahna te neiin an zawn chu an tawpsan ta a, inlamah a vuina hun te a hranpain an hmang ve leh a, tichuan an khaw pasaltha, sakap thei leh pa taima, pa tlawmngai Thangchina chu an thlah liam ta a ni.

Pasaltha Thangchina vuina an neih zan hian a nupui Chhingpuii chuan mumang mak deuh mai hi a nei tlat mai a. A mumangah chuan an pa chu a lo hmu a, an pa chuan, " Khatia sa ka chang kha, ka thlang lam atang hian hmeichhe aw, min rawn ko hi ka hria a, ka'n en chuan hmeichhe hmeltha deuh mai pahnih leh mipa pakhat hi ka thlang lawkah chuan an lo awm reng mai a, an mahni chu zui ve turin min sawm a, engmah ngaihthatlohna pawh neilo chuan ka zui ve ta mai a..ka ipte pui chu ka kalsan a, ka silai erawh ka keng a." " Chutia ka zui ta chu bung huai kung lamah chuan min kalpui ta a. Bung kung kan thlen chuan khua ala thim chiah lova, bungkungah chuan thil eng phut mai, kawngkhar ang tak hi a lo awm a, chutah chuan min luh pui ta a, tichuan boruakah chuan kan kang ta nel nel mai a. Ka hnuaia ngaw te pawh chu ka hmu vek a, ka silai chu ken zel an phalloh avangin Pangen ram mawng lam kurung zawn kan thlen lai khan min paih sak ani. Tunah hian he khawvel ang thoah hian kan khawsa a, mahse engemaw hunbi te ah lo chuan a in kalpawh theih loh ani awme. Ka awmna ah hian ka hrehawm lova, min rawn ngaihtuah suh ang che u...ka silai chu in lo zuk zawng dawn nia...." tiin thu a lo chah a. A nupui chuan a suangtuahna vel a mumangah a hmu mai mai anih ringin a sawi chhuak duh lawk lo a, mahse chutiang chuan vawi thum lai a mumanga a hmuh tak avang chuan an pa thianpa chu a hrilh ru ta a. Tichuan Thangchina thianpa chuan a fiah nan reng reng tiin Pangen ram mawnga kurung lamah chuan a zuk kal ve leh chhin ta ngat mai a. Mak deuh mai chu kurung sangtak mai chhawrdawh, ram hrui vela uai thlak loh chuan kal ngaihna pawh awmlo ah chuan a thianpa Thangchina silai chu tha takin a lo intung zan mai a ni...

THE  WIZZARD OF ENGLAND
************************
{ Dawithiam nge ni Lasi zawl...??? }

Dark Age an tih hunlai kha khawvelin a hun tawn tawhah chuan a hrawm hunlai ber a ni awm e . Retheihna, inthahna, natna, tam tla te leh inrahbehna ten khawvel, abik takiin khawthlang lam ram te a tuam  nasa em em mai a ni a. Khang hunlai khan chanchin mak tak tak mai sawi tur a ni teuh mai a, thawnthu mak tak tak lah a piang chhuak hnem bawk a ni. Dawi lampang thawnthu phei chu tamtak a piang chhuak nghe nghe ani. Hetih hunlai chho hian ani England rama mi maksak lutuk mai William F. Hugo chu a lo pian chhuah tak chu.

William-a hi chhungkaw rethei tak mai atanga rawn seilian niin, a nu  leh pa te hi lo neih leh ran vulh a ei zawng an ni a. Naupangte anih lai atangin a nu leh pa te chu puiin hna a thawk nasa thin hle a ni. Kum 17 mi a nih chuan a awmna chin hriat lovin  a bo ta daih mai a. Kum 15  chhung zet chu a bo ta vang vang mai a. An khaw mi ho leh a chhungte ho pawhin a thi ta ah an ngai hman tawh a, mahse kum 15 hnuah chuan an khua ah chuan hausa tawkin, chhiahhlawh tam tak nen a rawn kir leh ta hlawl mai a. Mi te mak tih a hlawh hle mai a ni. In lian tawk a lei a, nuamsa takin a khawsa chho ta a. Mi ten a bona chin leh a hausakna chhan an zawh chuan lasi hovin an ru bova, thil tamtak an zirtir a, tin hausakna tamtak an pe bawk a, tin lasi te pawh nupuiah a nei tih a sawi bawk a ni.

Hemi hnu atang hian mi te chuan an damloh ten an rawn thin a, hnim damdawi te alo chawh a, an dampui zel bawk a, an khua ah chuan mi  hriat a lo hlawh ta viau mai a, pantu pawh an tam ang reng phian a, mahse hetih lai hian an khua ah chuan thil mak deuh deuh a thleng chho tan ta tlat mai. Naupang kum 10 hnuai lam  an bo ta zeuh zeuh mai a. A tirah chuan amah chu rinhlelh nachang reng reng an hre lova, hnuhma leh sulhnu engmah a awm ngai bawk si lo. Tin amah hi zan lamah hian hmuh tur a awm ngai miah lo mai a. Chutiang chuan chanchin mak tak tak in a hual velin khang hunlai phei kha chuan thil engemaw hlek hi an sawi punlun hma in hlauh a pui hi an ngah em em mai bawk si a. Vawikhat chu le chutianga naupang bo pakhat chu William-a ina a lut tur lai chu hmu an lo awm hlauh mai le. An hmuh hnuhnunna ber William-a in chu a nih miau a vangin amahchu rinhlelh a kai chho tan ta a. Mipui vantlang inpun khawm chuan amahchu leh a chhiahhlawh te chu man in a in chu an dap ta chiam mai a, a inchhung chhawnghnuai pindan ah chuan naupang bo te thawmhnaw chu an hmu ta teuh mai a ni.

Hemi hnu hian amahchu an dawp ta a, ama sawi dan ah chuan chung naupang te chu mipakhat a tih dam zel ah khan an damna thleng nan a zawl lasi ho te hnenah a pe thin niin a sawi. Tichuan a chungthu an rel ta a, hal hlum tur a tih a ni ta a.  aAchhiahhlawh pa nga te nen dawithiam a puh niin an hal hlum ta a. An hal hlum hian thilmak deuh mai a thleng pek a, a chhiahhlawh te chu an kang hlum vek tawh tih in amah hi a thawmhnaw pawh ala kang chhin eih lova, meialh chuan a hliau ve thei lo a ni ber mai a, an hal hlumna mei tuah tur pawh an dahbelh nasa a mahse a kang hlum thei chuang lova, an mangang chuan thal kap mi te ruaiin, hal hlum tura an phuar beh chu an kah rawn ta chiam mai a, hemi hnu hian a taksa chu a kang ve thei ta chauh a ni. William-a hi dawithiam nge ni ta ang a insawi anga Lasi zawl hi???????? A kan hlum ve mai theihloh nachhan hi a Lasi zawl ten an veng him em ni ang ???  Khawi atangin nge a hausakna leh a thil tihtheihna chu a chharchhuah tih hi tun thleng hian hriat a ni ta lo a ni.

Post a Comment

Powered by Blogger.