"TAWNMANG LASI" Mizo Fiction by -BIG DADDY HMAHMATEA

Aw cham rih la zawlnu siali

I dungthul reng he lei chinah

Ka tawng lawng e kumtuang pawh in

Nghilh i har dawn ngei e.

"70s chho a Aizawl tlangval pakhat in a lasi zawl a sawichhuah avanga a nunna in a tawrh phah tak chu..."

Lasi zawl kan tih hi kan pi leh pu te hun lai atang tawh khan sawi tur hi kan nei fo mai a. Keini Mizo te chauh lo pawh hian sawi tur an lo nei ve nual tho mai a. Lasi zawl hi hmanlai hunah chauh khan emaw a thlen thin a, pasaltha te chauh khan emaw zawl thin kan tih chuan kan hre sual maithei. Tunhnu deuh ah pawh hian lasi zawl sawi tur an awm fo tlat mai le. Tun tuma lasi zawl ka rawn sawi tur hi 70s chho a thil thleng kha a ni a, a hming erawh phuahchawp ka rawn hmang thung ang a, tu chhungte emaw lo inngaihbel an awm anih chuan ngaihdam ka dil hmasa a ni e.

Rinsanga hi Aizawl veng pakhat a chhungkaw khawsak pangngai tak atanga lo chawr chhuak ni in unau pathum an ni a. Farnu pahnih nei inamah hi a naupang ber ni in an fapa mal neihchhun a ni a. Amah hi tlangval kum 23 mi vel, inkhaithli thlerh thlawrh, hmel chhelo tak mai, nungchang tha tak leh rilru tluangtlam tak mai, zirna lamah pawh rual pawl tawk a thiamthei ve tak mai, khawtlangah pawh mahni phak ang tawk a inhmang ve tak mai a ni a. A nu leh pa te leh a farnu ten an duat bawk a, amah a fel hrim hrim bakah an chhungkaw khawsak te a lo pangngai ve bawk nen a hun lai chuan nula lamah pawh a luck viau nghe nghe a ni. Luck viau e tilo chuan ngaihzawng ti a bulfuk taka han sawi tur erawh a nei lo thung a, mahse an veng ami tho nula fel leh hmeltha tak mai Maremi nen erawh an inkawmngeih hle thung a, an thiante phei chuan an dem fiam laih laih fo reng a ni.

Kum 1978 Krismas dawn chho December thla laihawl vel a ni tawh a, chhungtin mai chu an hma lawk a Krismas lo theng tur atan chuan an inpuahchah mup mup tawh mai a. Rinsanga te chhung pawh an bang bik lo, an in te rawng te hnawih tha in an buai ve nasa mai a. Rinsanga u te pahnih, nula siniar la, ve ve deuh tawh pawh chuan an inchhung te an chei a, an tang ve hle mai. An in chei velna ah chuan Christmas tree te dah an duh avangin nikhat chu Rinssnga te unau chu a thianpa pakhat nen Sakawrhmuituai tlang lamah eitur te keng in Christmas tree tur far la turin Rinsanga te Jeep chuan an kal ta a. 

A hmun an han thlen chuan far chu a lo tam bawk a a zar buk nalh tha deuh an han zawng kual a, tichuan pathum pali vel chu a zar an thlak a, chutia ab buai nak nak lai chuan Rinsanga chuan fiah tak mai a amah rawn ko ri, a u te aw ni si lo mahse hmeichhe aw ngei mai chu a hre ta tlat mai a. An ngaithla chiang a, mahse a reh leh ta daih mai bawk si a, a u te an zawh lah chuan chutiang engmah an hriat ve loh thu in an lo chhang ve mai bawk si a. A bengchhe ri mai mai ah ngai in ngaih pawh ngaihsak zui lemlo chuan an eitur ken te chun an ei a, an hlim tlang hle mai a. Thil te an ei zawh hnu chuan an far lak te chu motor ah chuan an thiar lut a tichuan in lam pan in an haw zui ta nghal a. Hemi tlai hian zanriah an kil laiin Rinsanga chuan amah ko tu aw a hriat thu chu a sawi chhuak a, a farnu te lah chuan 'lasi in an ko che aniang' fiamthu in an lo tih sak, 'an ngaizawng dawn che aniang' te an tih sak a an nuih liam vel ta mai mai a. Rinsanga pawh chu a ngawi zui ve mai a, mahse mak chu a ti rilru ve viau a ni. 

Hemi zan hian chhun lamah te an kalna lamah a chauh deuh avangin hma takah a mu a, reilote ah a lo muhil nghal mai a. Mumang hi a lo nei a,na mumangah chuan hmeichhe pakhat hmeltha deuh mai, sam sei hnap mai a hriat ngai miah loh hi a lo hmu a. Chu hmeichhia chuan, 'vawin kha i va induh ve, ka k oh che pawn i eih duh mang si lo' hi a lo ti a. Rinsanga chu a harh zawk mai a, mak a ti rilru hle mai a. Muthilh leh an tum a mahseba muhil thei ta reng reng lo mai a, a mumanga a hmeichhe hmuh ringawt mai chu a rilruah chuan a awm ta tlat mai a, mumanga hmuh leh chu a chak ta riau mai a, mahse a tuk khaw var thleng chuana muhil thei ta lova, a meng tlang ta ringawt mai a.

A tuk zing a han tho chu a rilruah chuan a mumang lam a a hmeichhe hmuh hmeltha tak mai chu a awm ta veng veng mai a, tuk danga hma tak a tho a a tul tul inchhungah pawh ti thin chu chumi tuk chuan a zia pawh a zawi deuh raih mai a, a nu phei chuan a nuamsam lo emaw ti in a chhan a zawt hial nghe nghe a, mahse Rinsanga chuan engmah a nih loh thu leh a hma ni a an kalna velah a chauh deuh vang mai mai a nih thu in a lo chhang mai a. Tukhuan an han ei pawh chuan a mumang mawlh chu a rilruah a awm a chaw pawh chu tam ei lovin a kham ta vat nghe a. Chhun lamah chuan a u te nen chuan an in vel chu an chei leh a, a hma ni a a thil tawn leh a mumang chu a ngaihtuah neuh neuh a, mak pawh a ti hle mai a, mahse sawichhuah kher pawh a tum hran lem lo thung a.

Hemi zan hian Rinsanga chu hma takah a mu leh a, a lo beisei ruk ang ngei chuan a mumangah chuan a hma zana a hmuh hmeichhia tho kha a lo hmu leh ta tlat mai le. Mumanga a hmuh dan hi a mak khawp mai a, mumang e tilo chuan a tak taka inkawm ang chiah in a hmu a, a mumang neih dan hi mumang kan neih a mak deuh deuh a lem deuh deuh te a rawn awm kual ang nilo hian harhfim kak a awm chunga thil hmu ang chiah hian a mumangah chuan a hmu tlat mai a ni. Tichuan chu hmeichhia chu tunge anih te a mumangah chuan a zawt ta a. Chu hmeichhia chuan a hming chu Pari a nih thu leh Lasi anih thu te, a hma ni a amah lo ko tu kha anih thu te leh mizoramah hian hman lai atang tawh a an awm thu te, mihring te zingah an inlar ve fo thu te leh amah chu hman atanga a lo hriat tawh thu leh tha a tih thu te chu a hrilh ta vek mai a. Rinsanga pawh chuan a mumangah chuan nel takin a lo kawm ve bawrh bawrh mai a, Rinsanga chuan zan chu a reilo a ti kher mai, mahse khua a lo var dawn ta der mai a Pari chuan a tuk leh zanah a rawn kal leh tur thu leh an inkawm thu hi tuma hnena hrilh lo tura a tih hnuah a hrilh chuan a tan a pawi ang tih a hrilh a, a kalsan ta a, Rinsanga pawh chu a thangharh ve zui nghal a. A mumang chu an ngaihtuah let a mak a ti tawlh tawlh mai a, tin Pari chu a ngai veng veng mai bawk a.