Deh loh sakei huai – Khaw khata mi neinung deuhte emaw an lal vanga rel ngam loh leh khawih ngam loh sawina.
eg: Ani hi zawng ‘Deh loh sakei huai’ an tih ang mai a ni a, tuman an rel ngam hlei nem.
Duh loh rai ang – Hmeichhiate hi insum zawh loh thilah an duh loh zawng tak lakah an lo chesual a, an lo rai tak si hian an lung hnurin an tau leh reng lawi si a. Chu chu tehkhinnaah hmangin, mi lungawi lo zet hmel pute sawi nan ‘Duh loh rai ang’ mai an ti thin.
Dawi chawi ang – Nih tura rin aia zang duai sawina.
eg: Ka thing put chu ‘Dawi chawi ang’ mai a ni, a zang duai mai.
Fahrah puan hlai – Hman lai fahrahte chu an rethei zual bik a, an puan neih chhun pawh tha mang lo, hlai satliah mai a ni. Thil tha mang lo hlai leh zau sawi nan an hmang.
eg: Kan lo chu a ‘Fahrah puan hlai’ ve ringawt a, buh tih tham pwh kan thar hlei nem.
Hnung lama mit nei ang – Mi fimkhur, thu hnu dawn thiam leh inveng thiam sawina.
eg: Tun lai khawvelah zawng ‘Hnung lama mit nei ang’ maia awm a tul ta.
Hnung lama sa barh ang – Rin loh leh beisei hauh lova mahni chunga thil lo thleng . Thil th lam sawi nana hman a ni.
eg: Zanin hun min pe hi ka tan chuan ‘Hnung lama sa barh ang’ mai a ni a, ka lawm hle mai.
Hnapkhawn pachang hmu – Mi, lawm vanga nui vun vun te sawina.
eg: ‘Hnapkhawn pachang hmu’ ang mai, i nui vun reng mai.
Hnara hlit phawi ang – Hnara hlit awm chu hrehawm tak a ni a, han pawh chhuah chuan a thawventhlak em em thin. Engpikna tak a lo kian hian ‘Hnara hlit phawi ang’ huai a ni an ti thin.
Hnara khawn ang – Let hlauh emaw, ngawi hlauh emaw sawi nan an hmang.
eg: ‘Hnara khawn ang’ mai a ni, a ngawi hlauh va, a let vang vang mai.
Khuang lova chai ang – Chainaah hian khuang a tel ngei thin. A awm loh chuan a ho va, a kim lo riau thin. Thil ho leh kim lo tehkhinna a ni.
eg: Thusawitu ber a lo kal si lo va, nizan kan inkhawm chu ‘Khuang lo va chai ang’ mai kan ni.
Khuangruang ang mai – Khuangruang hi bu emaw kua emaw pawh nei lova vak mai maia ngaih a ni. Chu chu tehkhinnaa hmangin mi thatchhia in leh lo din tha peih lo sawi nan an hmang a ni.
eg: Ani hi zwng ‘Khuangruang ang mai’ a ni a, a vak ve mai mai a nih hi.
Kelpui nau vei ang – Kelpui no nei tur hian na a ti ve em em a, a awmna a sawn ruai thin a, a be chuk chuk thin. Mi, na tuar van ruaite hi ‘Kelpui nau vei ang’ mai an ti thin.
Khawhring thawi ang – Eng na pawh, chwp-leh-chilh-a dam nghal hmiah sawina.
eg: A pumna chu ‘Khawhring thawi ang’ mai a ni, chawp-leh-chilhin a dam hmiah mai.
Kawi kawm thin ang – Thil ri rual thap thap emaw, inthurual/inlungrual sawina.
eg: Mipuite chu ‘Kawi kawm thin ang’-in an inthurual theih hlei nem.
Lal a bovin hleimualrang a lal – Lal emaw, hotu emaw leh mi dang an awm loh vanga chanvo pawimawh changtu sawina.
eg: Lal a bovin hleimualrang a lal’ tih ang deuhvin , mi awm loh a leiah hotu ka ni ve ta a nih hi.
Laiking pawnpui tah tur ang – Thil tih tuma, thulh leh thin hi.
eg: Ka pa T.V. lei tum ve chu ‘Laiking pawnpui tah tur ang’ lek a ni.
Mai par thlawn – Zawmtu dang engmah awm tawh lo va, thlawn fithla hlauh sawina.
eg: Ka hna atang chuan ka ‘Mai par thlawn’ tawp mai a ni.
Mawng vawm ba – Tih tur tul neih avanga mawng pawh hung hman lova phe sek.
eg: Vawiin chu ka tul khawp a, ‘Mawng vawm ba’ an sawi ang maiin kan phe sek mai a.
Mit mim lak ang – Vawi-leh-khata thawpikna emaw harsatna emaw kiang huai sawina.
eg: I raw hung i han thiat chu ka tan chuan ‘Mit mim lak ang’ huai a ni.
Mi kut chunga sahrang hmu lian – Mi chan emaw mi ta emaw apiang tha/tam zawka hmuh thu sawina.
eg: Ani hi zawng ‘Mi kuta sahrang hmu lian’ chi ve reng reng a ni.
Phung zinga piring vawrh ang – Engpawh, mi duhzawng tak, khek theih lova inchuh zo duak duak sawina.
eg: Naupang zinga chithlummum sem te chu ‘Phung zinga piring vawrh ang’ mai a nia a, an inchuh zo nghal zel mai a ni.
Phar vui hrai – Phar hian an thihin vuitu an hmu zo mang thin lova, tlawmngaih chhuah a vuitute chu an hrai nghek thin. Chu chu tehkhin nana hmangin mi tlemte-in hnianghnar taka ei nghek sawi nan an hmang.
eg: Vawiin chu kan hotupain min ‘phar vui hrai’ nghek mai a, kan tlai ngei mai.
Puallenga thlangtla – Engpawh, a chanchin a chhia emaw a tha emaw hriat lehna awm hauh lova pil hlen ta vang vang sawi nan hman a ni.
eg: A chanchin engmah kan hre zui lo, ‘Puallenga thlangtla’ ang vang vang mai a ni.
Phung velh ang mai – Pung tulh tulh sawi nana hman a ni.
eg: ‘Phung velh ang mai’ an ni a, an pung tulh tulh mai.
Ralte vahai no la ang – Bengchheng, chiau le lu sawi nana hman a ni.
eg: Vawiin kan picnic hlimzia mai chu ‘Ralte vahai no la ang’ mai kan ni a, kan chiau le lu mai.
Rih ar tui phur ang – Kal sawt thei lo leh kal chak thei lo sawi nana hman a ni.
eg: ‘Rih ar tui phur ang’ mai i ni, awmhmun ah i su i su mai.
Rotekawla sepa ang – Mi dang kawp duh lo va, ho hran neih tum hrim hrim mi sawina.
eg: Ani saw zwng ‘Rotekawla sepa ang’ mai a ni a, mahnia ho hran neih tum ngat mi a ni a, rem a har khawp mai.
Riakmaw va ang – Hnawng hnawng mi leh mi chanhaite sawina.
eg: Kei zawng ‘Riakmaw va ang’ maiin ka vakvai ta a ni ber.
Ram zawn suk ang – Thil zawm zuih, mawi lo tak sawina a ni.
eg: I kechawn lah hi ‘Ram zawn suk ang’ mai a ni a, a zuih zut mai a.
Sahuai ni do ang – Mi en duh lo va, kimki tlat mai sawina.
eg: Kan thianpa zurui hi chu ‘Sahuai ni do ang’ mai a ni a, a kimki tlat mai a ni.
Sa seh kawr ang – Sain mi a sehin n kawr chu a ham thler emaw, a seh thler emaw-in a hniar sung thin. Chu chu tehkhin nan kawr tet hrep hrupte hi ‘Sa seh kawr ang’ mai an ti thin.
Sakhuain a ngek hlawh tih ang mai – Sakhaw biak nana ran an talh hian a sa tak kha engmah pek leh lak a awm chuang lo va. An talh dawna a ngek chauh chu a hlawh a nihzia sawiin thawm chuah hlawh, a tak hmuh tur awm si lo emaw, a sawi chauh, a taka tih awm si lo sawi nana hman a ni.
eg: Anni thil min tiam vete chu ‘Sakhuain ngek a hlawh’ tih ang maiin, a takah hmuh tur a awm ngai hlei nem.
Sailo ni chuang kal – Hman laiin Sailo lalte chu an inti lal bawk a, an zin pawhin zing taka kal lovin zawi muang nghalhin an kal thin. Zin, muangchanga kal hi ‘Sailo ni chuang kal’ an ti thin.
Satel mau la ang – Satel mau la tur hi khuarah a tla hlauh va, chhuak hlei thei lovin a rikna ngaiah a ri a ri mai a.Thil tih tur ti lawk thei lova rik na ngaia ri reng hi ‘Satel mau la ang’ mai an ti thin.
Saum dil din – Thenawmte ina han chuan kai a, kal leh mai tur ni awm tka din reng hi a ni.
eg: I ‘Saum dil din’ reng mai a, thu muang ve ta che.
Se bo hnua se kawngkhar ang – A sawt tawh loh hnua thil tih sawina.
eg: Exam zawh zana lehkha ha zir lehte chu ‘se bo hnua se kawngkhar ang’ lek a ni.
Sial rangin sial rang a hring , Sakawlin sakawl a hring – Fate hian mahni hringtute an chhun zel tihna a ni.
eg: ‘Sial rangin sial rng a hring, sakawlin sakawl a hring’ tih ang maiin ani pawh hian a nu a chhun a, a taima teh asin.
Tho thil ang – Thil inang tlang, hmel leh pian hmang inang sawi nan hman a ni.
eg: An fate inanzia chu ‘Tho thil ang’ mai an ni.
Tumbu ar ang – Tumbu ar chu sava lian vak lo, hmui zum din den , harh tak a ni. Chuvangin, mi harh vang takte sawi nan hman a ni.
eg: A harhzia hi ‘Tumbu ar’ an sawi ang mai a ni.
Thlawh loh bapui ang – Thil mum lam si, ther hiang huang sawi nan hman a ni. Lu khuih loh hram be bu angte hi.
eg: I lu lah chu ‘Thlawh loh bapui ang’ mai, a ther huang reng mai.
Themtleng te zawk ang mai – Thil han tih nikhuaa lo tel ve chhen emaw lo inrawlh ve sekte sawi nan hman a ni.
eg: Nang lah hi, ‘Themtleng te zawk ang mai’ i lo inrawlh ve sek thin a.
Thusawi chhawn leh ar pan chuk – Ar-in pan khir a chuk thla a, a lo pun ang deuh hian, thil, a tir aia lo nasa zual leh belhchhah tan tual tual sawi nan hman a ni .
eg: Kan thu hla lah chu ‘Thusawi chhawn leh ar pan chuk’ an tih ang maiin a pung ta tulh tulh a.
Thing zik bula zawng dan ang – Tan leh chuan na tur awm lova dang chep emaw, dang tawngkhawng emaw sawina.
eg: Tunah zet chuan, Thing zik bula zawng dan ang’ mai a ni ta.
Thlasik anga khel lo – Lo thleng ngei ngei thin, lo la thleng ngei tur tihna.
eg: Thlasik anga khel lovin’ rorelna ni chu a lo la thleng dawn si a.
Tang ang mai – A tak hmuh tur awm si lo va, a thawm chauh hriat sawina .
eg: Anite chu ‘Tang ang mai’ a ni a, a tawm chauh hi kan hre thin a, amah kan hmu ngei hlei nem.
Tahngai lungpui sa vuan ang – Thiltih laklawh sut leh hleih theih tawh si loh, hrehawm tih hmel taka nur no chunga ti zel sawina.
eg: I hritlang hahchhiau tur hmel neu no chu, ‘Tahngai lungpui sa vuan’ an sawi ang mai alawm maw le.
Uipui tui lian thlir -Thil , a tihngaihna tak hre si lo va, pawng thlir ve mai mai hi.
eg: Kan mistiri-ho hnathawh chu han puih ngaihna ka hre mang si lo va,ka ‘Uipui tui lian thlir’ ve mai mai a ni.
Vana rah ang – Thil vang leh hmuh harsa tak sawina.
eg: Kan tan chuan sum leh paite chu ‘Vana rah ang’ mai a ni.