11th July, 2017 (MSR) : Ministry of Home Affairs-a Adviser North East (Bru) Pu M. K. Singla chuan Tripura Relief Camp a, Bru awm te Mizoram a an kir leh theih nana Mizoram sorkar Home Department hmalakna tha a tih thu a sawi.
Nimin khan Ministry of Home Affairs-a Adviser North East (Bru) Pu M. K. Singla chuan Chief Minister Pu Lal Thanhawla chu a chenna inah a hmu a, Tripura Refugee Camp a awm Bru chungchung a sawipui a ni. Pu M. K. Singla chuan Tripura Refugee Camp-a awm te Mizoram a an rawn kir leh theih nan theihtawp chhuaha hmalak mek a nih thu sawiin tun thlenga Mizoram Sawrkar, abik takin Home Department hmalakna te chu tha leh fakawm a tih thu te a sawi bawk.
Chief Minister Pu Lal Thanhawla chuan Mizoram atanga Bru an chhuah dan hrilhin he thila in tih hmingchhiatna leh puhna hrang hrang Sawrkar leh pawl ten an lo tawh thu te, a sawi a. Pu Singla chuan heng thu te hi a hriat thu sawiin "Bru zinga an hruaitu thenkhat ten an mipui an hruaisual a, an mahni hmasialna avangin re-patriation (Hruaikir hna) pawh, an ti thuanawp thin a, mahse he thil hi hun bituka chinfel a nih theih nan ruahmanna siam mek a ni" a ti. Pu M.K. Singla-in Bru chungchang thil-a Nodal Officer ruat tura Chief Minister a ngenna chu tih vat a nih tur thu Chief Minister hian a lo hrilh bawk.
Pu M. K. Singla chuan Bru ten tunhnaia thil thar an ngiat chu awm a tih loh thu sawiin "he thil hian tawp a neih a ngai a, hun ruahman a nih hnuah chumi hun chhung ngeia re-patriation hi zawhfel a nih theih nan tan lak a ni ang" a ti a. Ruahmanna siam hnuah pawh an lo kir duh loh chuan engtin nge Home Ministry in a tih zel ang tih Chief Minister-in a zawhna chu chhangin Pu Singla chuan "chutiang chu a thleng a nih chuan Refugee Camp te chu khar leh tanpuina an hmuh thin ang angte pawh tihtawp a nih theih nan hmalak mai tha a tih thu a mimal ngaihdan a sawi bawk.
Post a Comment