Ailawng MHIP in nula tlawmngai an chawimawi.
(DRDM)
Thla hnih vel kal ta khan "Nl. Lalrinpuii, D/o Biakthansanga, Ailawng" chu Reiek Sumo- ah chuangin Aizawl a kal a, lehlânga kal tum a ni a, chuang an tam lem loh avangin tluang takin an kal a.
Tlawng chhak Forest check gate bulah chuan an chuanna motor chu mi țhenkhatin an lo phar ding a, Electric current man tlangval pakhat, Dulte khua ami Tv. Pc. Lalhriltluanga, thichhawnga let reng tawh chu damdawiin thleng phur turin an lo ngen a. Sumo-ah chuan an hlang ta a, He tlangval vanduai hi Aizawla lehkha zir, an chawlh remchan nia inhlawhfaa hnathawka liam a ni a, a hnathawhpui tlangval pakhat chuan a zui chho bawk a.
Damdawiin hnai ber Aizawl Hospital panpui a ni a. Casualty-ah zawn lutin, passenger dang te chuan anmahni hna țul avangin an tlansan/kalsan lo thei ta lova. Nl. Lalrinpuii pawh hian kalsan mai a han tum ûk nain, thichhawnga let reng, buaipuitu leh bawihsawmtu nei lo han kalsan mai chu thei lovin a țhiante hnenah chuan, "Kal ula, in hna țul te buaipui ula, kei zawng damlo hi kalsan harsa ka ti em mai, theih ang angin ka lo buaipui ang e", a ti a. Damdawite leiin, a țul ang ang a buaipui zui ta a ni.
Chutiang chuan reilote an bawihsawm hman chauh tihah Doctor te chuan Tv. Lalhriltluanga (17) chu a thih thu an puang ta a ni.
Lalhriltluanga țhianpa, amah zui ve tu khan Tluanga phone hi a lo ak hlauh a, mse, a hamhaih vang te pawh a ni ang, chet lak ngaihna hre lovin a uipui tuilian thlir ngawt ngawt mai a, a rilru a khawih êm vang leh thihnain a barakhaih êm vang te pawh a ni ang. A êk cheh țhutpui tlawk tlawk a ni ber mai.
Ailawng nula Rinpuii chuan phone chu lain a'n check kual zung zung a, pattern a lo dah avangin phone siamnaah te kalin phelhtir a tum a, an phelh theih loh avangin Nl. Rinpuii chuan sim card phawrhin ama phone ah a vuah a, Tluanga nu ramkal mêk chu thiam taka hrilhin, "Ka pi, In fapa a accident palh hlauh mai a, lo ațang khan haw vang vang la, i inbualfai hnuah min rawn phone dawn nia. Aizawl lokal turin rilru pu nghal bawk ula, hei kan awmpui mêk a, rilru hahdam takin awm phawt ang che u, in lo thlen hma chu ka lo awmpui reng ang," tiin a hrilh ta a ni. Hetih lai hian ruang dai, "Ka ui, ka ar" titu neilo chu Nl. Lalrinpuii hian a țhutpui ran a.
Damdawiin ah damlo dang an rawn hruai avangin Casualty khuma muttir reng a rem lova, hmelhriat ngailoh chhingkhual val fam chang tawh hnu chu mitthi dahna ina dah a nih hnu pawhin kan nula chhuanvawr hian a kalsan thei lo. Puana khuhin a hmelhriat leh laina hnai ang maiin a țhutpui tlat a ni.
Nilengin a awmpui a, Dulte ațanga Tluanga chhungte lo thlen thleng țhakin a lo awmpui tlat a,
A tlawmngaihna avang liau liau in he tlangval hian dawmhlumtu a tawng hi a ropui a, hmelhriat ngailoh laka zonun ze mawi tak lantira, tha leh zung, sum leh pai senga, lainatna a lantir hi a ropui takzet a ni.
Chuvangin Ailawng MHIP Branch chuan chawimawi phu a ti a. MHIP Day zan (6.7.2017) zan dar 7:00 hian Khuangchera Hall, Ailawngah "Chawimawina thuchei (Citation) leh Pangparțhi" an hlan ta a ni.
Mi tam takin kan tih duh loh leh tih peih hauh loh tur thil nula hnahkhat ngatin amaha a sutlang hi a fakawm takzet.
Nl. Lalrinpuii, kan chhuang a che. Dam rei ang che. Duhsakna kan hlan a che.
UPDATE on 8.7.2017 @ 8:00 am: Forest Check gate ațanga zui chho ve tu a țhianpa a țhu ngawi reng hi engtizia nge tiin mi tam takin rilruin zawhna kan zawt a, kan țawngkam hman te pawh khi pai a lo nawm loh palh takin tiin amah Nl. Rinpuii ngei hi hmaichhanah ka be nawn leh a.
"A țhianpa hi electric current hian a man ve tho a, a kutphah tawn tawnin a kang var duai a, a ke lam a kang tel bawk a, che vel thei a ni lo hrim hrim a, chutianga hliam tuar ve tho a nih avang chuan treatment laktir ve ngei ka duh si a, mitthi ruang chu kalsanin doctor ten an enkawl ngei theih nan ka hruai ta a. Hnathawhna hmun ațanga kal mai an nih avangin engmah neih an nei bik si lova. Hausak deuh ka chak ber ni a ni awm e, ka neih chhun ka hmang fai deuh vek tawh si a." tiin a sawi.
A mawilo zawnga lantir duh reng vang ni lovin, a tirah kan lo zawtfiah chiangkuang lo atin a ni e. Mi chapo lo tak, mahni thiltih țhat sawi puat puat duh lo mi a nih avangin, mitthi țhianpa hliam tuar ve tho a puih dan hi a lo sawi țha duh lo mai zawk a ni e.
Hetiang hi a lo nih lehzel avangin, harsatna hmaa hnungtawlh lova huaisen taka tawn tlangtu Nl. Lalrinpuii hi Ailawng Branch YMA Executive committee Member ni lai hi, Ni 19 July, 2017 an branch din champha vawi 71na lawmnaah hian Tawlhlohpuan bahtir an tum ta a ni.
He thil hi âwm kan tih tlan țheuh pawh ka ring e.
Pic: Kawr dum ha hi amah chu a ni e.
Post a Comment