Vawiin hi India ram in zalenna a hmuh champha Independence Day vawi 71-na a ni a; Lunglei District-ah ropui taka lawm niin a lawmna pui ber chu Thuamluaia Mual Lunglei-ah School Education Minister Pu H. Rohluna hovin urhsun taka hman a ni. Khuallian Pu H. Rohluna chuan Hnam Puanzar pawtparhin, Parade Contingent 25-te Hnam Puanzar chibai bukna a chhang let a; Independence Day thuchah a sawi hnuah Parade intihsiakna a tithate, Rashtrapati Award dawngtute leh Independence Day puala Sports Association-te intihsiakna hrang hranga tithate hnenah lawmpuina a hlan bawk.
Pu H. Rohluna chuan India ram zalenna atana nunna leh theihna hlutak hlan tu te inpekna leh inhlanna avangin India chu tunah khawvel sawrkar ropui berte zing a mi a lo ni ta a ni, a ti a. Vantlang himna leh muanna boruak vawng him tura dan leh thupek kenkawh chu Sawrkarin a ngaih pawimawh thu sawiin dan kengkawhtute leh mipuite thawhhona tha avangin Mizoram chu rampum a State muanawm berte zing a mi a ni tiin muanna leh remna boruak vawng him zel turin mipui kalhawmte a sawm a.
Khuallian chuan Sawrkar hmalakna hrang hrang tarlangin Mizoram Sawrkar Flagship Programme NLUP chuan eizawnna ngelnghet leh rintlak zawk chhungkaw tam tak a siam sak bakah tlangram loneih tlahniamin buh thar chu za zela 31.54% -in a pung a, United Nations Agency-te nena thawhhona tluang takin a kal thu a sawi a. Sawrkarin NLUP kalpui zel a tum thu sawiin tun dinhmunah Lunglei District chhungah chhungkaw 22,189-in NLUP tanpuina an dawn tawh bakah chhungkaw 254 dawngtura thlan an la awm thu a sawi.
Mizoram sawrkar Flagship Programme thar New Economic Development Policy (NEDP) chu thar chhuah tihpun, mipui mamawh siamsak, mipui sum dinhmun chawikan leh sumdawnna boruak tha siam nan a ruahman a nih thu Minister chuan kalkhawmte a hrilh a. Kumin chhunga NEDP-a hman tur cheng vaibelchhe 750 dah niin heng te hi Chief Minister’s Rural Housing Scheme, Link Road, kawnpui, tui leh kawlphetha supply, Referral Hospital leh District Hospital tihchangtlunna tura hman mek a nih thu a sawi a. Agriculture lama hmalakna te tarlangin Lunglei District-ah Rainfed Area Development RAD Project hnuaiah loneitu chhungkua 153 tanpui tawh niin NEDP hnuaiah Link Road thar km 68 laih mek a nih bakah thlai tiak quality tha tak siamchhuahna hmun tur leh loneitute training-na tura ruahman Cheng Nuai 900 senna tur Centre of Excellence for Fruits, Lunglei chu zawh thuai a nih tur thu Minister chuan mipui kalkhawmte a hrilh a.
Mipui vantlang hriselna sawrkarin a ngaih pawimawh thu sawiin Minister chuan AYUSH Hopital, Thenzawl leh Drug Testing Laboratory, Zemabawk-te din an nih bakah Mizoram Cancer Institute, Zemabawk ti changtlun tura hma lak mek anih thu leh State Referral Hospital, Falkawn chu Medical College atana buatsaih zel a nih thu a tarlang a. Mipui mamawh tui thianghlim pe turin Lunglei District chhungah New Belkhai (Tuikawi), Chhuahthum, Tlabung (Pumping), Nukuksora leh Tuisen Bolia WSS-te chak taka hmalak mek a nih thu a sawi bawk.
Zirna tih hmasawn kawnga sawrkar hmalakna tarlangin school building sak leh thawmthat nan NEDP hnuaiah kum 2016-2017 Cheng nuai 490 leh 2017-2018 atan Cheng nuai 1000 ruahman niin NABARD atangin cheng vaibelchhia 25 hmuh a nih thu a sawi. Lunglei District chhunga Education lama hmalakna langsar zualte zingah Cheng nuai 20 senga Teacher’s Training cum Guest House sak mek, Kendriya Vidyalaya School sak that mek leh DIET B.Ed Course zirna hawn tum te Minister chuan a tarlang.Commerce and Industries Department hnuaiah thil siam chhuah tam zawk leh hralhna mumal zawka kalpui tura hmalak mek a nih thu sawiin Cheng Nuai 987.98 senga Electric Veng, Lungleia Agri-Marketing & Training Infrastructure leh Cheng Nuai 243 senga Skill Development Training Centre-te kalpui mek a nih bakah Lunglei Sabji Bazar chu NEDP hnuaiah Cheng Nuai 150 senga sak that a nih tur thu kalkhawmte a hrilh a. Lunglei District tana hmasawnna tam tak thlentu tur Bangladesh nena insumdawn tawnna hmunpui Integrated Check Post (ICP) chu Kawrpuichhuah, Tlabung bula din turin hmalak chhoh zel a nih bakah Handloom Cluster Development leh Handloom Export Facilitation Hub, Thenzawl pawh chak taka kalpui mek a nih thu Minister chuan a tarlang.
Kumin ruahtui tam chuan hmasawnna hnathawh hrang hrang ti buai thin mahse sawrkarin theihtawp chhuahin hmasawnna ruhrel siam hna a kalpui zel a, Lunglei to Tlabung kawng leh Chhumkhum to Chawngte kawng siamthat hna thawh mek a nih bakah Tawipui North to Mualcheng South kawng siam zawh tawh a nih thu leh Chhimtuipui Darzokai-a Lei dawh chu tangkai taka hman mek a nih thu Minister chuan a sawi a. Bunghmun, Zobawk, Haulawng, Thingsai leh Cherhlun-ah te Primary Health Centre Building sak mek a ni a, Zobawk-a State Sports Complex hnathawh pawh chak taka kalpui mek a ni, a ti . Electric Power lama Mizoram Sawrkar hmalakna pawh sawiin Tuirial HEP, Tuival HEP , NEDP hnuaia Mega Solar Park, Vankal-a din tur, Rural Electricity Backbone Sub-Station tihchangtlun hna kal mek te a tarlang a.
“Vawiin India ram zalenna ni ah hian ram mipuite hian ram tan enge ka tih theih tih ngaihtuahin hmalam huntha nei turin theihtawp I chhuah zel ang u,” tiin Minister Pu H. Rohluna chuan Independence Day lawm tura mipui leh official kalkhawmte chu a fuih bawk. Vawiin Independence Day parade-a contingent 25 zingah hian Armed Contingent pathum, Unarmed Contingent pasarih, School Contingent sawmpahnih leh Band Parties pathum te an tel a, Pu Zonun Thara, MPS, SDPO Lunglei chu Parade Commander niin SI Rodingliana Sailo chu 2nd Parade Commander a ni. Kumin Independence Day pual hian Tennis, Table Tennis, Snooker&Pool, Badminton, Shooting leh football-ah te inelna buaitsaih a ni a. Heng intihsiakna a tithate hnenah khuallian chuan lawmpuina a hlan bawk a ni.
Thuamluaia Mual-a Independence Day lawmna inkhawm neih a nih zawh hian khuallian Pu H. Rohluna hovin mi sawm bikte tan Convention Center, Venglai-ah DC’s At Home function hman zui a ni bawk.
WRITTEN BY C. LALREMRUATI, MIS, DIPRO LUNGLEI
Post a Comment