Kum 2000 June ni 6 chawhma dar 10 vel a ni a, Shillong atanga KM90, Nongstoin district-a in sangkhat awmna khua Mawkyrwat khuaa State bank kawngkharpui bula ding, bank guard Pu Lalsanga Pautu chuan pawn lam a thlir mek a. An awmna lam pana chak taka motor pathum rawn tlan chuan a ngaih a ti tha lo nghal hle mai. A bula ding mek Bank Manager pawh chuan chulam chu a thlir ve nghal thuai a, an bank rawk tum hel pawl an ni tih an hrethiam nghal mai a ni.
Pu Lalsanga Pautu chuan bank hnathawk leh midang te chu biru vek turin a hrilh nghal a, ralthuam keng Ambassador car pakhat leh Jeep pahnih chak taka an bank lam pana rawn tlan te lo hmachhawn tur chuan a inpuahchah ta a ni. A silai ulhbun phirah chuan silaimu a awm em tih a han en phawt a, chutih mek lai chuan bank rawk tum ho chuan bank kawt an rawn thleng chawpchilh nghal a, AK47 leh pistol an rawn lekchhuak nghal fur mai a, car atanga chhuk tuma kawngkhar an hawng chiah tihah Pu Lalsanga chuan a mupui chuan vawi hnih a lo kap nghal a, hel ho chu an te teng tung mai a, hliam an awm nghal nual tih a hre thei nghal a ni.
Pu Lalsanga hian silaimu panga chiah a nei a, pahnih a kap chhuak tawh a, pathum chiah a la nei. Hel ho zingah hian AK 47 keng mi 6 vel an awm a, a bak zawng chuan pistol an keng vek bawk a. A silaimu chu ren thiam taka a hman loh chuan hel ho mi 15 lai mai chu rei a dang thei dawn miah lo tih a hrechiang hle mai. Pawn lam atangin bank kawngkhar leh darthlalang te chu an rawn tlir nghal thawt thawt a.
Bank chhung lai taka concrete ban ding chu phenin a silaimu chu hmanhmawh takin a thun leh mawlh mawlh a, siren ti ri turin a au nghal tuar tuar bawk a. Chutih mek lai chuan hel mi pahnih chu bank chhungah an rawn zuang lut a, bank manager siren hmet mek chu a khel bawrah pakhat chuan a kap a, a rawn lehhawi leh chiah chuan Pu Lalsanga chuan a silaimu a lo thunfel hman chiah a, a dul bawrah a mupui chuan a han kap a, chupa chu a thlep hnawk mai a. A thianpa zawk chu baklengin pawn lamah a tlanchhuak nghal a. Duh selang chuan tlanchhe mek chu a kaphlum thei nameuh mai a, mahse silaimu pahnih chiah a nei tawh a, awmze nei a hman a ngai tlat. Kawngka puia rawn luh tum chu hlah miah lo turin ban phenin a ding a, a kahthlukpa pistol chu a chhar bawk a, silai pahnih a nei tawh a, rilru a thlamuang deuh sawt.
Heng hunlai hian helho an inluling em em mai a, a khat tawkin bank an rawk fo va, tuman an dang ngam ngai lova, awlsam takin an rawk mai thin. Ralthuam an nei tha em em a, mipui mimir leh police thlengin helhote hi an hlau em em vek mai a ni. Pu Lalsanga te bank atanga metre 100 vel leka hlaah Police station a awm a, siren tih rik a ni a, minute 20 vel an inkap tawh a, tumah an la rawn lang ngam lo. Bank guard Pu Lalsanga Pautu bakah hian Police silai keng pahnih bank chhungah hian an duty ve bawk a, hlau leh khurin an ni pahnih pawh hi an biru ve ringawt mai a, Pu Lalsanga'n kap ve tura a auh tuar tuar pawhin an silai an hmet puak ngam thlawt lo.
In chhung lamah an thianpa kahthlukin a awm tawh a, pawn lamah mi pali vel hliampui tuar an nei bawk a, inchhungah chuan an ngam loh val mi pakhat a awm tih an hrechiang hle mai a, an sinsaseng ta a ni.
Hel ho an insaseng fel ta tihah police te chuan hla fe atangin bank building chu an rawn veh phei a, inzar pharhin bank chu an hual a, inchhunga awm bank hnathawk te pawh an rawn ding chhuak tawh hlawm a, police pahnih duty ve te a han hmuh chuan Pu Lalsanga chuan an dulah a silai kaw hmawra nawr pahin "in silai kha kah tura siam a ni lovem ni" tiin a kamkhat a ni. Police ho lah chuan bank chu an la hual mek a, Pu Lalsanga bawk chuan " Hetah misual an awm tawh lo, hliam pali te nen an tlan chhia a, va um rawh u, in la um phak ang, bank hi hual a tul lo" tiin pawn lama police te chu a han au a, tumah hel ho um ngam an awm lo zuk nia.
Bank chhunga rawn zuang lut, Pu Lalsanga'n a kah thluk pa kha a thi nghal mai bik lova, a ril tla hnuang chungin tukvehah a vak liama, bank kawmchar piah lama hnimbuk zingah thih sualin a rum halh halh reng a. Chupawh chu an ngaihven ngam lo. Pu Lalsanga bawk chuan chu mi hliam pa chu a va pawt chhuak a, tual zawlah a mut a, a chatthla zui ta a. In ti huai takin a thi tawh hnu chu a luah te an pet vel a, Pu Lalsanga thinin a tuar lo, "A hun laiin engmah in ti ngam lova, mi thi tawh sawisak kha enge a sawtna, zah pawh in zak lo em ni" tiin a hau a.
Nongstoin district SP pawh a rawn thleng thuai a, Pu Lalsanga Pautu chu thil awmdan a zawtfiah nghal a, Pu Lalsannga chuan "Ka pu I police te silai hi check rawh, an silaimu a la kim vek ang" tiin thil awmdan chu kimchang takin a hrilh a, an SP pawh a zak hle awm e. SP chuan "Ulhbun silai pakhat leh a mu 5 chiah neiin chung helho chu i lo hmachhawn ngam tihna a ni a, i hlau miah lo emni" tiin a han zawt a, "Aw ka hlauh pawh ka hre lo, Mizo kan tlanchhe ve ngai lo" tiin a chhang a ni.
Vantlang mike in an au a, "misualin bank an rawk a, pakhat kahhlum a ni a, a duh tan en theih a ni e" an ti a, mipui tam tak an rawn pungkhawm a, bank rawk tum misual kah hlum a ni chu an lawm lutuk a, hmeichhe ho phei chu lawm avangin an tap hlawm a ni. Pu Lalsanga hi media lamin an bawr nasa hle mai a, saptawng chanchinbu leh Khasi tawng chanchinbuah te an tial nasa hle. Hemi hnua bank guard lak leh turah 'Mizoin an dil chuan midang tan dil buai a ngai lovang' an ti tawp mai zuk nia.
A tuk June ni 7, 2000 chhunah an AGM chuan Pu Lalsanga Pautu a rawn hmu a, an inkahna sulhnu te a en vek bawk a, Pu Lalsanga inphenna ban feet khat bial vel chu silaimu in a deng nasa ngang mai a, bank kawngkhar darthlalang a keh vek bakah kawngkhar bianga silaimu lut tlanglo tam tak, tang tettut a han hmuh te chuan a chek tlawk tlawk mai a, Pu Lalsanga Pautu chu enin "I silai uhbun nen chauh heng hi engtin nge i lo hmachhawn theih a" tiin a han zawt a, a ni chuan "Mizo kan tlanchhe ve ngai lo" a lo ti leh hmiah mai a ni.
An interviewed with
Lalsanga Pautu - By :
Post a Comment