Mizoram Governor-in I-Day thuchah a tichhuak : Mizoram Guv I-Day speech

Independence Day pual hian Governor Lt.Gen. Nirbhay Sharma chuan thuchah a tichhuak a; India ram zalenna champhaah hian ram tana ṭan la thar tura mipui sáwmin, "He ram a lo ropui zel theihna turin mahni ṭheuh insiam thar leh ang ila, tun aia ram hmasawn leh chak ni turin rual takin ke i pên ang u," a ti.

Larsap chuan, India mipuite'n zalenna atana kum tam tak chhung an lo tawrh tawhte ang chu mi dangte chunga ti ve lo tura mipui chahin, "Kan ramin zalenna a neih theih nana zalenna sualtute inpekna kha theihnghilh lo a, mipui rorelna, sakhaw thlei bik nei lo sorkar leh mipui­te inunaunate vawn nun reng i tum ang u," a ti a; zalenna aṭanga kum 70 liam hnuah pawh zalenna sualtute inpekna mipuiin an la chhawr zel thu leh, tunah chuan India chu khawvela economy lian ram pathumna a nih thu a sawi.

Kum hnih chhung Mizorama a awm tawh chhungin Mizo mipui zingah mi fing leh thiam thil ṭha tak tak nei a tawn thu sawiin Larsap chuan, "Mizote hian kan theihna tak tak hi kan la hai chhuak thiam lo tih ka hmu a, hnam dangte aṭanga zir tur kan neihte zir kan huam a, kan inhawn a ngai. Kan in­khung bing chuan kan hmasawnna tur kan tikhaihlak mai mai niin a lang a, kan inhawn zau phawt chuan Mizoram hi chhuahka pui tak, Asia chhim­chhak ramte leh ram dangte tana kawng hawngtu kan ni ang," a ti.

Mizoram mipuiin nun dan hrisel zawk an neih theihna tura hmalak chu a ngaih pawimawh ber zinga mi a ni tih sawiin Nirbhay Sharma chuan, "India ramah cancer tamna ber leh vaihlo leh a kaihhnawih vanga harsatna tâwk nasa ber kan ni hi a pawi a. Hriselna atana nun dan zirna tura beihpui thlakna, Healthy Mizoram Campaign-ah mi zawng zawng tel turin ka sawm nawn leh a che u," a ti a; Mizoram hmasawn nan a chhunga chengte an hrisel a pawimawh thu a sawi.

Governor chuan, India ram chu khawvela ram hausa leh thil ti thei zing­ah a inhlangkai tawh tih sawiin, "PM Narendra Modi kaihhruaina hnuaiah chak lehzualin hma kan sawn mek. Heng hmalaknaahte hian mipuiin tih ve tur kan nei vek a ni," a ti a; hmasawnna atana sorkar hmalaknate ṭawiawm turin mipui a sawm a ni.