Chanmari West FC-in Mizoram Premier League Season 6-a an vawi khat chakna ni turin Ningani zan khan Ramhlun North FC chu 2-1 in an hneh.
West Warrior tan Jacob Lalrawngbawla'n freekick aṭangin a khung a, Ramhlun North tan Lalremruata'n a sut. Lammuala zan inkhel hmuhnawm takah chak zawk awm lo tura ngaih a nih hnuah Lalromawia'n minute 86-naah Chanmari West chakna goal a khung.
Chanmari West-in MPL ṭan hmain MPL5 best defender H. Lalhlimpuia leh Shillong Lajong midfielder hlui Lalramhluaha an lalut nachungin Bethlehem Vengthlang FC leh Chhinga Veng lakah an chak lo. Coach HC Zarzoliana'n chak ngei ngei an mamawh thu a sawi a, khelh dan hmang a thlak hret bawk.
Match fitness nei ṭha tawk lo Ramluaha bench-ah dahin MFA Super Cup final an luh theihna chhan Romawia'n MPL-ah a vawi khat nan inkhel bul a ṭan. Samlukhai tlangval Romawia hi midfield-ah a thawkrim a, minute li chiah a awm tawh tihin box chhungah ball per chang fuhin goal kilah kawh zetin a pet lut.
Coach Samson Ramengmawia kaihhruai Ramhlun North an vannei tawk lo a, first half-ah C. Ramdinmawia'n penalty a hlah. Hun tawp hma thlengin an beidawng lo, foreign midfielder Harry Delona Morris Jr. ball pet kawh zet chu Chanmari West keeper Vanlalhriata'n a dang a, Zara hote an him hram. 
Chanmari West mipuiin Lammualah thawm an nei leh ta a, K. Kawla Stand leh tlang lamah zai rual tham an awm. Coach Zara hoten September 18 tlaiah Aizawl FC an hmachhawn ang a, September 19 zanah Ramhlun North-in Chanmari FC an hmachhawn thung ang.

Post a Comment

Powered by Blogger.