Vanlalawmpuii Chawngthu chu Mizoram sorkara minister of state atan nimin khan lak luh a ni a; Mizoram state-a hmeichhe minister pahnihna niin a hmasa ber chu Lalhlimpuii a ni a, 1987 khan MNF sorkarah minister of state a lo ni tawh a ni. 
Nimin khan Raj Bhavan Multipurpose Hall-ah Larsap, Lt. Gen. Nirbhay Sharma chuan rinawmna thu tiamtirin a la lut a; he mi hma hian minister of state atana ruatna lehkha chu Chief Secretary, Pu Lalmalsawma'n a chhiar chhuak. Lakluh inkhawmah hian  chief minister Lal Thanhawla, minister dangte, MLA leh mi pawimawh dangte an tel. 
Vanlalawmpuii hi MPCC General Secretary, C Chawngkunga fanu niin October 8, 1979  khan a piang a, zirna lamah chuan MA (Political Science) a ni. Kum 2014, April-a Assembly by-election-a Hrangturzo bial aṭanga Congress ticket-a thlan tlin a ni a, Mizoram State Commission for Women-ah chairman a nih bakah Mizoram Pradesh Youth Congress Committee-ah president a ni mek.
Tun hnaiah Mizoram sorkara minister of state pahnih -  Lalrinmawia Ralte leh Dr. BD Chakma - an ban hnuah minister of state pahnih lak luh an ni leh ta a; September 20 khan  KS Thanga chu minister of state atan lak luh a lo ni tawh.

Post a Comment

Powered by Blogger.