 |
| Lalduhoma |
Han sawi ve ka duh chu - Zoram Peoples’ Movement kan din chhan hi a ni a. Chumi tifiahtu atan chuan, inthlan laia mipuite rilru sukthlek dan (Voting Behaviour) han sawi phawt ila.
1998 inthlanah khan, Sorkarna Term 2 hmang mek Congress Party chu hneh taka paihthlak a ni a, “Enga” hmang zing atang phei chuan Saitual Bial atangin Pu Lalzirliana chauh a tling a nih kha.
MNF chuan Term 2 an han hman hnu chuan kan kham thawkhat hle a ni ang, 2008 inthlanah chuan MLA 3 chauh neiin kan paihthla ve leh ta a. “Uiin a luak hnu a ei leh” tih ang maiin, MNF thlak nan chuan kan paih tawh hnu Congress bawk chu kan chhar leh ta a, tunah a term 2-na an hmang mek a ni.
Mipuiten sorkar thlak an duh hun a lo thlen tawh hi chuan, sorkar dinglai, sum leh mipui ngah ber pawh an inveng zo ngai lo, an tla tho tho thin. Sorkar paih chu kan thiam khawp mai.
Amaherawh chu, inthlan boruakin min han chim hian, sorkar atana kan duh ni lovin, sorkar tura kan rin lam hi kan pawng bawh huk zel a, enge kan vote chhuah dawn tih lam hi mipui tam ber ngaihtuahna hian a thleng pha lo thin a. Chuvangin, a ngai leh ngai kan lehburh ta reng mai a ni. Hruaitu ngaiten an kal dan ngaia kum 30 chuang min hruai tak avangin, kan ramah hian danglamna (Change) hi a thleng thei lo a ni.
Nakum 2018 inthlan lo awm turah hian, Congress hi chu mipui mimir hian thlak a hun kan ti tawh niin a lang a, a thlaktu tur lamah kan la buai rih mai a ni. Mipuite hi kal ngaihna hre lovin kawng peng thuamah kan ding hmur mai niin a lang. Ui ang maiin kan luak hnu kan ei leh dawn nge dawn lo tih hi tuna Zoram Agenda chu a ni.
Sorkar dinglai paih a, kan hnawl tawh hnu bawk kan sorkartir tawh loh nan, sorkar thlakna tlak ni turin Zoram Peoples’ Movement hi kan din ta a ni. Party mal sorkar ni tawh lovin, mipui sorkar, kalphung thara rorel tur din turin, thingtang tawn khawm angin kan intel khawm ta a ni.
Mizote hi Val Upate kaihhruaina hnuaia awm thin kan ni a. Val Upate thu chu thutawp a ni a, appeal-na a awm tawh lo. Lal leh upate pawhin an thu chu an zah thin. Chutiang bawk chuan ZPM sorkar chu Val Upa Council uapna hnuaiah awmin, kan hnam nun tuai thar leh kan tum a ni. Inthlannaa kan rilru sukthlek dan (Voting behaviour) leh kan thil ngaihhlut zawng (Value system) siam that kan tum a ni.
Sorkar paihthla theitu leh sorkar thar siam theitu chu mipuite kan ni a. Buh chi thehtu chuan thahnemngai takin theh mahse, pialtlep lei pan emaw, hnim hlingnei zingah emaw a tlak chuan a puitling thei lo. Tuna kan ram dinhmunah hi chuan, buh chi thehtu (hruaitute) aiin a tlakna leilung (mipuite) kutah kan ram hi a awm a ni. Mipuite tawiawmna pawh tih tak zetin kan ngen nghal a ni.
A tawp berah chuan, ZNP a kan thawhpui, kan Sub.Headquarters te, kan District te, kan Block leh Unit a hruaitute leh kan Member zawng zawngte hnenah lawmthu ka sawi a. “I chakna ni lovin, i thiltihtheihna ni hek lovin, Ka thlarau zawkin le” tiha innghat zui zelin, tun hun zela kan kawng zawh mek hi Pathian min hruaina leh kan tawngtai chhannaah pawm ngamin, he thawhhona hi a lo hlawhtlin a, kan ramah khua a lo var theih nan, phur taka hma lo la theuh turin ka ngen a che u.
*Ka lawm e.*
Post a Comment