Vanglaini,18.09.2017: India rama infiamna pawl lian ber leh hausa lawr lak Board of Control for Cricket in India (BCCI) chuan, Cricket Association of Mizoram (CAM) chu an hnuaia full member ni turin a ziak lut ve dawn ta. Mizoram rual hian North East state dang panga - Meghalaya, Manipur, Sikkim, Nagaland leh Arunachal Pradesh-te pawh full member-a pawm an ni dawn.Tun hnai khan Supreme Court-in a ruat Committee of Administrators (COA) leh north east aiawha telte hi New Delhi-ah an inhmukhawm a, CAM aiawh hian generalsecretary Mamon Majumdar a tel a ni. Mizoram team hian kumin aṭangin BCCI hnuaia age level tournament under 16 leh under 23 an khel thei ang a, kum thar aṭangin India rama state cricket inelna sang ber leh ngaihhlut ber Ranji Trophy an khel ve thei tawh dawn a ni.
BCCI hnuaiah hian India hi zone hrang hrang panga - North Zone, South Zone, Central Zone, East Zone leh West Zone-ah te ṭhen hran a ni ṭhin a, COA hoa inhmuhkhawm aṭang hian zone thar pian belhin North East Zone dah thar a ni a, Mizoram pawh he zone thar hnuaiah hian a awm tawh ang.
Eng nge a lawmawmna?
BCCI hnuaia full member-te chuan inelna sang ber Ranji Trophy thlengin an khel thei a, hemi hnuaiah hian associate member awmin anni hi chuan age level tournament bak an khel pha ngai lo. Mizoram hi tun hmain BCCI hnuaiah associate member pawh a ni pha ngai lo a, state chhungah cricket khel tawk awm mahse state pawna inpho chhuahna hun ṭha hmuh ngaihna a awm ngai lo. Tunah chuan associate member hi bawh kanin full member nihna an chang dawn a, India rama cricket inelna level sang ber thlengin Mizo ṭhalaiten an tem ve thei tawh dawn tihna a ni.
Heng bakah hian Mizo cricketer-te tan India team thlenga tel theihna leh India rama ngaihhlut em em Indian Premier League (IPL) thlenga inlan theihna hun ṭha a inhawng ve tawh dawn tihna a ni.
Hlawkna a awm em?
Ranji Trophy leh Under 23 inelnaah hian state aiawha khel player-te hian match fee Rs.40,000 inkhelh apiangin BCCI aṭangin an dawng ziah a, Ranji Trophy bikah hian season khatah a khel tlem ber team-in match 6 tal chu an khel ziahah a ngai a, match 6 chiah chhungin tla fel ta se October - December chhungin match 6 hi an khel kim vek hman zel a ni.
Under 16 leh 19 state inelnaah hian nikum season thleng khan player tinin match khatah Rs.12,000 an dawng ziah bawk. BCCI hian an revenue hmuh aṭanga 26% hi season tinin player-te hlawh atan an dah ṭhin a, tun hnaiah Star Sports nen vaibelchhe 16,300 man inremna thar an siam leh avangin kum thar aṭang phei chuan player-te hlawh hi a let chuanga pung chho tura ngaih a ni.
International level-ah phei chuan player-te hlawh hi a sang hle a, Test match vawikhatah player-te hian nuai 15 an hlawh a, One day international-ah nuai ruk hlawhin T20-ah nuai thum an hlawh thung.
Player chauh em ni hlawk dawn?
BCCI hnuaia association-te hian nasa takin ṭanpuina season tin an dawng a, BCCI sum dinhmun a zirin an ṭanpuina dawn hi a inang lo. A tlangpuiin full member chin chuan an budget leh mamawh dana zirin season tinin vaibelchhe 50 chuangte an dawng ṭhin, hengte hi state chhunga cricket hmasawnna atana hmang ṭhin tura beisei an ni.
Domestic inkhelah hian Umpire (Emerging Panel) chinin ni khatah Rs. 20,000 an hlawh a, Umpire pangngaiin nikhatah Rs. 15,000 an hlawh thung a, Match Referee-in Rs 15,000 an hlawh bawk a ni.
Post a Comment