Election Commission of India thupek angin, September 15, Zirtawpni khan Mizorama district tinah district election officer (DEO) ṭheuhte'n an district-a electoral roll ennawnna tura draft electoral roll an tlangzarh.Electoral Rolls Special Summary Revision, 2018 neih turah hian September 15-a draft electoral roll tlangzarh a nih hnuah, draft roll tihchhuah aṭanga October 13 thlengin thun thar leh tihdanglam dilna duhte tan booth level officer (BLO)te hnenah dilna thehluh theih a ni dawn a; online hmangin www.nvsp.in aṭangin dilna a thehluh theih a ni bawk.
Dilna lutte chu October 14 aṭanga November 10 inkarah ERO/AERO-te'n an endik dawn a, endiknaah hian khua/veng tina LC/VC, NGO leh BLO-te tel tura beisei an ni. Final electoral roll chu January 2018-ah tihchhuah a ni ang. Electoral roll 2018-ah hian January 1, 2018-a kum 18 tlingte thun tur a ni.
Mamitah chuan additional DC H Lianzela'n DC conference hall-ah draft electoral roll a tlangzarh a; political party hrang hrang aiawh te, YMA leh MUP aiawhte leh thuthar thehdarhtute an tel. Mamit district-ah hian constituency pathum - Hachhek, Dampa leh mamit bialte a awm a; voter 62,676 awmin, mipa 31,876 leh hmeichhia 30,800 an ni a, Electoral Roll 2017 aiin voter 255 (0.40%)-in an pung.
Kolasib district-ah chuan Assembly bial pathumah polling station 78 a awm a; voter 55,729 awmin mipa 27,287 leh hmeichhia 28,431 an ni. Tuirial bialah voter 16,515, Kolasib bialah voter 21,027 leh Serlui bialah voter 18,187 an awm a; Tripura-a Bru transit camp hrang hrangah Kolasib district chhunga vote nei mi 1,038 an awm bawk. Draft roll-ah hian Electoral Roll 2017 aiin voter 653 (1.19%)-in an pung a ni.
Champhai DEO Vanlalngaihsaka'n DC conference hall-ah Champhai district draft electoral roll a tlangzarh a; political party hrang hrang aiawhte leh tlawmngai pawl hruaitute an tel. Champhai district-ah hian Assembly constituency panga - Lengteng, Tuichang, Champhai North, Champhai South leh East Tuipui bialah polling station 135 a awm a; voter 82,851 awmin, mipa 41,128 leh hmeichhia 41,723 an ni.
Aizawl district-ah chuan Assembly constituency 14 a awm a; voter 2,78,395 awmin, mipa 1,32,581 leh 1,45,814 an ni a, polling station 326 a awm. Voter tlemna ber polling station chu Upper Sakawrdai mniin, voter 86 an awm a, voter tamna ber Durtlang North polling station-ah 1,351 an awm. Aizawl district-a voter zawng zawngin electoral photo identity card (EPIC) an nei vek tawh.
Serchhip DEO Sangchhin Chinzah pawhin an district-a draft electoral roll a tlangzarh a; political party leh tlawmngai pawl aiawhte leh Election department mite an tel. Serchhip district-ah hian constituency pathum a awm a, service voter 476-te nen voter 48,175 an awm. Service voter tel loin voter 47,699 an awm a, mipa 23,352 leh hmeichhia 24,347 an ni.
Lunglei district-ah chuan draft electoral roll hi DC Lalzarmawii, DEO ni bawkin a tlangzarh a, tlangzarhna inkhawmah political party leh NGO hrang hrang aiawhte an tel. DC chuan draft roll chu political party tin aiawhte hnenah a hlan nghal. Lunglei district-ah hian Assembly constituency pasarih a awm a; voter 1,0,0721 awmin, mipa 50,259 leh hmeichhia 50,462 an ni.
Lawngtlai district draft electoral roll pawh DC Conference Hall-ah DEO Dr Arun T-in a tlangzarh. Lawngtlai district-ah hian Assembly constituency pathum a awm a; voter 77,724 awmin, mipa 38,740 leh hmeichhia 38,984 an ni. Tuichawng bialah voter 29,356, Lawngtlai West bialah voter 25,420 leh Lawngtlai East bialah voter 22,948 an awm.
Draft Electoral Roll 2018
DistrictMipaHmeichhiaTotal
Mamit31,87630,80062,676
Kolasib27,28728,43155,729
Champhai41,12841,72382,851
Aizawl1,32,5811,45,8142,78,395
Serchhip23,35224,34747,699
Lunglei50,25950,4621,00,721
Lawngtlai38,74038,98477,724
Siaha---
Post a Comment