Prime Minister Narendra Modi chuan khawvela dam lian ber dawttu, Sardar Sarovar Dam chu nimin khan Gujarat-ah a hawng. Sardar Sarovar Dam hawnna inkhawmah hian Gujarat Chief Minister Vijay Rupani, BJP president Amit Shah, union minister Nitin Gadkarri leh sakhaw hruaitu eng emaw zat an tel.
Dam siamna tur lungphum hi kum 1961, April 5 khan prime minister hmasa ber Jawaharlal Nehru chuan a lo phum tawh a, kum 56 hnuah zawh a ni thei ta chauh a ni.
Km 1.2-a thui, Sardar Sorovar Dam hi Gujarat-a ram hectare 18 chuanga zau a chawm thei dawn a, Gujarat bakah Rajasthan, Madhya Pradesh leh Maharashtra ten an chhawr thei dawn a ni.
PM chuan Sardar Sarovar Dam hawn ani thei ta chu lawmawm a tih thu sawiin, he project anga harsatna tawk nasa project dang hi khawvelah a awm lo tih sawiin, project tihtawp tuma beitu pawh mi tam tak an awm a ni, a ti. Mahse hlawhtlin ngei an tum avangin an puitlin thei ta niin a sawi.
Sardar Sarovar Dam siam hna thawh dawn hian a tirah World Bank chuan loan pek a remti a, mahse a hnuah environment kaihhnawih thil avangin a pe leh duh lo a, mahse World Bank loan telloin project ropui tak hi puitlin a ni tho a ni, tiin PM chuan a sawi. World Bank-in sum a pek duh loh laiin, project thawhna tur atan hian Gujarat-a temple-te chuan sum an pe thung a ni tiin, PM chuan Sardar Sarovar Dam chu ram tan a hlan tih a sawi bawk.
Dam a hawn hnu hian PM hi Naramada-a Sadhu Bet thliarkarah kalin, meter 182-a sang Sardar Vallabhbhai Patel-a lim a hawng a, he lim hi ‘Statue of Unity’ tia vuah a ni. Hemi hnu hian Narmada Mahotsav kharna inkhawm hmanpuiin, Dabhoi-ah thu a sawi bawk. He inkhawmah hian National Tribal Freedom Fighters’ Museum dinna tur lungphum a phum nghal bawk a ni.
visit
ReplyDelete