Nimin Sept ni 15 chawhnu dar 1 khan ZNP, MPC leh ZEM tangrual pawl ten an din Zoram Peoples` Movement chuan Aizawl Press Club ah Press Conference an nei a, he hun hi Zoram Peoples` Movement Val Upa Council Chairman Pu Lalfakzuala IAS(Rtd) chuan kaihruaiin “Zoram Peoples` Movement, Tangrual Pawl hi Mizo hnam himna pe thei Sorkar Kalphung Thar tundin duhtute thawhhona atan, August ni 15 khan din a ni. Kum 2018 Assembly Election-a Sorkar siam hi kan tum lian ber a ni mai lo a, bul tanna tur chauh a ni. Pathian leh Mizoram mipuite zarah sorkar siam ngeia bul tan erawh kan tum a ni” a ti.
He hunah hian ZNP President Pu Lalduhoma pawhin thu sawiin “Kum 2018 inthlan lo awm turah hian, Congress hi chu mipui mimir hian thlak a hun kan ti tawh niin a lang a, a thlaktu tur lamah kan la buai rih mai a ni. Mipuite hi kal ngaihna hre lovin kawng peng thuamah kan ding hmur mai niin a lang. Ui ang maiin kan luak hnu kan ei leh dawn nge dawn lo tih hi tuna Zoram Agenda chu a ni” a ti a.
“Sorkar dinglai paih a, kan hnawl tawh hnu bawk kan sorkartir tawh loh nan, sorkar thlakna tlak ni turin Zoram Peoples’ Movement hi kan din ta a ni. Party mal sorkar ni tawh lovin, mipui sorkar, kalphung thara rorel tur din turin, thingtang tawn khawm angin kan intel khawm ta a ni” tiin “Mizote hi Val Upate kaihhruaina hnuaia awm thin kan ni a. Val Upate thu chu thutawp a ni a, appeal-na a awm tawh lo. Lal leh upate pawhin an thu chu an zah thin. Chutiang bawk chuan ZPM sorkar chu Val Upa Council uapna hnuaiah awmin, kan hnam nun tuai thar leh kan tum a ni. Inthlannaa kan rilru sukthlek dan (Voting behaviour) leh kan thil ngaihhlut zawng (Value system) siam that kan tum a ni” a ti.
A sawizelnaah Pu Duhoma chuan “Sorkar paihthla theitu leh sorkar thar siam theitu chu mipuite kan ni a. Buh chi thehtu chuan thahnemngai takin theh mahse, pialtlep lei pan emaw, hnim hlingnei zingah emaw a tlak chuan a puitling thei lo. Tuna kan ram dinhmunah hi chuan, buh chi thehtu (hruaitute) aiin a tlakna leilung (mipuite) kutah kan ram hi a awm a ni. Mipuite tawiawmna pawh tih tak zetin kan ngen nghal a ni” a ti bawk.
ZNP President bakah hian MPC Sr.Vice President Pu Vanlalhlana pawhin thu a sawi a, ZPM Gen. Secretary Pu K.Sapdanga’n Media zawhna hrang hrang a chhang bawk.
VAL UPA COUNCIL : Mizo khawtlang nunah inrelbawl dan mawi leh zahawm tak kan nei thin, chu chu khaw tinin val Upa kan nei kha a ni. Val Upaten ban an vai a, rawl an chhuah tawh chuan, tumahin an hnial ngai lo. ZPM sorkar thar chuan sorkar uaptu Val Upa rual a nei dawn a, Val Upa Council tih a ni ang. Val Upa Council chuan sorkar chu a vil ang, sorkar chhungah fuih ngai a fuih ang a, zilh ngai a zilh bawk ang. Val Upa Council hi sorkar cheimawina a ni satliah lo a, sorkarin dik tak leh chak taka mipui rawng a bawl theihna tura venpuitu tur a ni. Val Upa Council member-te hian sorkarah chanvo emaw, hamthatna dinhmun emaw an chelh dawn lo a, huaisen takin sorkar an uap dawn a ni, Chutiang atana inpumpekte chu an ni. Tunah hian Val Upa Council siam a ni tawh a, sorkar thar a pian hma pawhin, Tangrual Pawl chhungah siam rem ngai apiang siamremtu, thutawp siamtu tur a ni. VUC member-te chu hengte hi an ni.
Chairman : Pu Lalfakzuala
Vice Chairman : Pu F. Lalremsiama
Secretary : Prof. Thangchungnunga
Member-te : Pu K.L. Lianchia
Pu C. Laithanga
Dr B. Thangdailova
# ZPM Tangrual Pawl thlung kawmtu atan Steering Committee siam a ni tawh a, hruaitute siam fel a ni tawh bawk. Tangrual Pawl tan ngawrh takin hna an thawk tan mek a, Common programme te, action plan te an siam ang.
# Sterring Committe hi District level-ah te, block, group leh unit level-ah te din vek tum a ni a, din dan kalphung atan chuan, a theihna apiangah Hqrs. kalphung zui ni se tih a ni. Steering Committee din thei apiangin lo din turin an ngen.
# ZPM hian Tangrual Pawl hawnna leh Hruaitu tharte hlanna inkhawm Oct. ni 3 chhun dar 12-ah hian Chanmari YMA Hall-ah a buatsaih dawn a, mipui sorkar din duhtu zawng zawng lo tel turin thinlung takin an sawm.
# Mizoramah sorkar kalphung thar, Mizo hnam himna mipui sorkar a pian theih nan, he Tangrual Pawl hi thlawp turin mi zawng zawng an sawm.
Post a Comment