Shillong-a Mizo Kohhran biak-in, Bomfyle Road, Laitum­khrah-a mi hun rei tak lo inhman ṭâwm tawhtu, Presbyterian Kohhran leh Baptist Kohhrante'n September 5, 2017-a inremna thuthlung an siam chu October 14, Inrinni leh nimin khan Shillong-a Presbyterian Kohhran leh Baptist Kohhran mite'n an lawm a; Pathian hnena lawmthu sawina inkhawm an hmang.

Inremna lawmna inkhawm hi Inrinni chawhma leh chaw­hnuah neih a ni a; Shillong Mizo Kohhran biak-inah neih­ah hian kohhran pawl pahnih member-te chu a huhoin an inkhawm a, kohhran pahnih zaipawlte'n hla an rem a ni. Tlaiah biak-in hung chhungah inremna ruai an á¹­heh bawk.
 

Niminah pawh chawhma leh chawhnuah inremna thuthlung lawmna inkhawm hman leh a ni. Chawhma inkhawmah BCM executive secretary Rev.Dr K Lalrinthanga'n Pathian thuchah a sawi a, chawhnu inkhawmah Presbyterian Kohhran upa C Lalsangliana'n thuchah a sawi a; kohhran pahnih zaipawlte'n hla an rem ve ve a ni.

Shillong-a Mizo Kohhran hi Assam Phaitual Mizo Kohhran hnuaia a awm laia Shillong Raj Bhavan bulah kum 1965 bawr vela sak a ni a, Shillong Mizo Kohhran biak-in tia hriat niin, a hnuah Zoram Pawn Mizo Kohhran (ZPMK) hnuaiah a awm. Kum 43 vel kal ta khan Presbyterian Kohhran leh Baptist Kohhran mite inkarah inhriatthiam lohna a awm avangin biak-in hi an inchuh a, Court-ah thubuai a awm a ni.

Thubuai hi chinfel mai theih a nih loh hnuah, a chinfel dan ngaihtuahin August 6, 2016 khan Kohhran pahnihte hruaitute'n an sawiho a, á¹­ha zawnga boruak kal zel­in, Court-a thubuai pawh hnuhkir a ni a, inremna an siam thei ta a ni.

An inrem dan chuan, Shillong Fire Brigade-ah Baptist Kohhran biak-in hmun atan BCM Kohhran­in ram square ft. 7,660-a zau an lei a, ram lei nan hian Presbyterian Kohhran pawhin Rs. 3,00,00,000 an thawh. Baptist Kohhranin an hmun tharah biak-in an sak zawh hma chuan Mizo Kohhran biak-in hi an la hmang zui ang.

Source: Vanglaini

Post a Comment

Powered by Blogger.