2nd Elite Men's National Boxing Championship, Visakhapatnam-a neih mekah Mizo boxer pathum NT Lalbiakkima, Laldinmawia leh Johnkenty Vanlalhlimpuia ten semifinal an lut a, nizan khan final luh inchuhna neih niin result kan hre hman lo.

Mizoram aiawh turin Mizoram Boxing Association (MIZBA) chuan boxer pariat NT Lalbiakkima (49 kg, Siaha), Laldinmawia (52 kg, Tuipui), Zonuntluanga (56 kg, Dinthar), Vanlalhriatkima (60 kg, Chaltlang), Vanlalawmpuia (64 kg, Khuangthing), Anthony Lalduhawma (69 kg, Govt. Complex), John Kenty Vanlalhlimpuia (75kg, Tuipui) leh H. Lalrinhlua (81 kg, Hnahthial) te a tir a. Mizoram team hi AIBA Star 1 leh NIS coach pahnih C. Vanlalchhuanga leh R. Lalchhuanawma (Sete-a) bakah SYS coach Vulṭhavunga ten an hruai a ni.

Mizo boxer pathum Zonuntluanga, Vanlalhriatkima leh H. Lalrinhlua te chu quarterfinal-ah an chak lo a. Rinhlua hian Rajasthan boxer Shubham chu first round-ah a lu hmangin a mit ko a tauh kak sak palh a, hei vang hian disqualify a ni. MIZBA chuan referee thutlukna a dik tawk loah ngaiin an zualko a, a hlawhtlin leh tlin loh erawh kan hre hman lo.

Semifinal-ah hian light fly-ah Biakkima hian J&K boxer Pardee Sharma a hmachhawn a, Dinmawia hian fly (52 kg)-ah Assam boxer Chandan Das a hmachhawn a, middle (75 kg)-ah Johnkenty Vanlalhlimpuia'n Meghalaya boxer Anup Chhetri nen an inhnek dawn. A hranpaa pathumna inchuhna a awm loh avangin a chak lo zawk hian bronze medal an dawng ang.

Post a Comment

Powered by Blogger.