PRESS RELEASE NO 2 of Dt.3.10.2017
Vawiin (Dt.3.10.2017) Thawhlehni hian Zoram Peoples’ Movement (Tangrual Pawl) chuan hruaitu thar puanchhuahna leh hlanna inkhawm Chandmari YMA Hall, Aizawl-ah an nei.
He huna thusawitute zing a mi ZNP President Lalduhoma chuan, “Nakum inthlana mitinin kan vei rawn tur leh Issue lian ber tur chu sorkar kalphung thlakthleng hi a ni. Mizoramah pawh, vote zawnna leh eichawp lam hawi- “Sem Policy” hmangin Party pahnihin kum 30 chuang min lo enkawl ta a, kan Economy in a san phah lohzia leh kan rilru thlenga a tihpiansual takzia kan hmu mek a ni” a ti a.
“SEDP leh NEDP te hi an hruaituten an vei zawng leh an tuipui zawng an ni hran lo va. Anmahni ngeiin an sawi angin, a then hi ZNP Policy an copy a ni a, a then hi mi thiamten an duan sak mai a ni. An hun laia tihhlawhtlin an tum tak tak ngai loh te leh an lo hlawhchhampui tawh hnute tho kha an ni” tiin, ”Party pahnihte hian tun aia sorkar tha zawk a lo pian hi an hlau tlat a, “Anni pawh hi han sorkar se engmah an ni bik lovang” tiin kan thluak min suksak reng a. Chuti khawpa beidawnga min siamtute chu anmahni hi an ni reng si a. An tha lo tih kan hriat chian em em tawh hnu hruaitute leh, kan la enchhin ve reng reng loh hruaitute hi Patla khata khai tur an ni lo” a ti bawk.
Thusawitu dang Vanneihtluanga chuan thalai rual leh mi hmingtha pension kan nghah mek ten he tangrual pawl hi rawn zawm turin an insehmur tuau tuau mek a ni, a ti a. “He pawlah hian hruaitu tha kan nei dawn a ni” tiin, “Hemite kan rinngam tawh loh chuan tute nge rin tur awm chuang? He tangrual pawl hian vote khat a hmu a nih chuan ka vote a ni ang, Mizoram hi i tangrual ang u” tiin sawmna a siam bawk.
Val Upa Council Chairman Lalfakzuala chuan Zoramin a mawh chu kalphungthar nei sorkar a ni tiin, “ZPM in a tum chu kalphungthar nei, mipui sorkar a ni” a ti.
P.L.Liandinga pawhin thusawiin, “Mipui hnena pawisa sem hian development a thlen hi ka ring ve lo a, kan party lian pahnih sem policy an tawktarhah hian ka lungawi ve lo, hetah hi chuan ka tel ve lo ang, a hnuk peih a piangin an hnuh rual ka ni tawh lo, ka duhthlanna ka hmang ve tawh dawn a ni” a ti.
MPC President Lalhmangaih chuan, “Kan ram hi dinhmun hlauhawmah a ding mek a, hei hi party pahnih sorkarna inthlak thinte vang a ni” a ti a. Lalthanliana MLA pawhin thusawiin, “Tuna sorkar mek rorel danah hian an that leh that loh chu Zoram mipui hian kan hria, thutlukna an siam mek a ni” a ti bawk.
Val Upa Council chungchangah Pu Bualhranga chuan, “Mizoramah chuan party President leh CM nihna te kan chelhkawp a, tumah hlauh an nei lo a, vengtu an nei lo, kan hlauh tlawn a, an kal firfiak em em mai a ni. keini chuan kalsualna laka vengtu tur Val Upa Council kan nei a ni” a ti a. Val Upa Council Vice Chairman F.Lalremsiama pawhin thusawiin, “Pawl thenkhat chu an sorkar a pianga Chakma minister neih ngai tlatte an awm a ni” a ti bawk.
Zoram Peoples’ Movement (Tangrual Pawl) inkhawm hi Upa Lalliansawta chuan kaihhruaiin Pu R.Lallungmuana, Speaker, Hebron Revival Team chuan hunserh a hmang a. ZPM thuthlung puan leh Report K.Sapdanga, Gen. Secretary, Steering Committee, ZPM chuan a nei a, Rev. Dr.K.Thanzauva chuan hruaitute Pathian hnena hlanna hun hmangin Vanlalhlana, Vice President, MPC chuan thalai hruaitute thutiam a neihpui bawk.
(P.C.VANLALRUATA)
Secretary
Steering Committee
Zoram Peoples’ Movement (ZPM)
Post a Comment