ZNP Ṭhalai chuan, chief minister Lal Thanhawla chu kum 2013-a Assembly inthlan dawna Election Commission of India (ECI)-a affidavit a thehluhah Kolkata-a a in hmun a ziah tel loh thu tarlangin, CM Lal Thanhawla chu báng turin an phût.
ZNP Ṭhalai hruaitute chuan Inrinni khan Aizawl Press Club-ah thuthar thehdarhtute an kâwm a; an president Lalmuanpuia Punte chuan, CM Lal Thanhawla'n Kolkata-ah in hmun a neih thu sawiin, "Chief Minister ram hi Land Records-a a lan dan chuan, Plot no. AI-178, sq.feet 3,228 a ni. August 30, 2013 khan Lal Thanhawla s/o Late H.P. Sailo, Zarkawt, Aizawl tia register a ni," a ti.
Lalmuanpuia Punte chuan, Lal Thahawla'n ram neih dan leh building sakna sum a neih dan chu an buaipui lo tih sawiin, "Kum 2013 MLA election dawna Pu Lal Thanhawla'n Serchhip bial candidate ni tura ECI hmaa chhechham meuha affidavit a thehluhah Kolkata-a a ram/inhmun hi a ziak tel lo tlat tih hriat chhuah a ni hi mak kan ti hle a ni," a ti a; mahni thil neih thehluh kim loh chu dan kal a nih thu a sawi.
 |
| Lalmuanpuia Punte |
Lal Thanzara'n ECI-in MLA a nihna aṭanga a bàntir hlauhthawnna avangin MLA a nihna aṭangin a lo bân khalh tawh tih sawiin Lalmuanpuia chuan, "Pu Lal Thanhawla'n Kolkata-a a in hmun August 30, 2013-a register si, November 2013-a nomination a file-naa a ziak tel lo pawh ECI hnenah report ngei a tum nia hriat a ni. Chuvangin, Pu Lal Thanhawla hi ECI-in báng tura a tih hma ngeia MLA a nihna aṭanga báng thuai turin kan phût tlat a ni," a ti.
MNF chungchang sawiin ZNP Ṭhalai President chuan, "MNF sorkar lai khan Aizawl khawpuia motor tam lutuk, kawngpui a zîm si vanga traffic tâwt tihziaawmna tur niawm takin ZIDCO aṭangin parking loan tam tham tak mi pathum hnenah Rs. 2,77,00,000 an pe chhuak a, policy mumal awm lo ta chu, parking loan latu zinga pakhat parking lodge siam tura a insawina in hmun a hralh daih a ni," a ti a; parking loan latu dang pakhat pawhin a siam lo a, loan pawisa chu an hman zawh dan hriat a ni loh thu a sawi.
ZNP Ṭhalai hruaitute chuan, MNF-in kum 10 an sorkar chhungin Mizo nationalism an ngawihbopui tih sawiin, "Opposition-a an awm lai chauha Mizo nationalism sawi ṭhintu an ni. Tunah hian MNF hotu lawk palite hian kum 2018 election-a an dinna tur an la hre mumal lo vek a, chuti chung chuan 'Kum 10 danah sorkarna inthlak ṭhin' tih thu puarpawléng chu innghah nana hmangin an party mipui an hrai rûi mek a, 2018 election-ah sorkarna chang tur angin an insawi reng a ni," an ti.
ZNP Ṭhalai hruaitute chuan, thil kal vel dan enin, Mizo hnama dintu Pathianin hmangaihna tel hauh lo leh dimdawina nei hauh loa Mizoram suasam ṭhintu party-te chu a senghawi mek a, Mizoram hmangaihtu dik tak, Zoram Peoples Movement (ZPM) kutah rorelna dah a tum nia an hriat thu an sawi a; ZPM thâ tichak zawnga pên chhuak turin mipui an sáwm a ni. -Vanglaini
Post a Comment