Tluangpuia hilthang


Kum 2007 a lo her chhuah chuan American Idol tih dan ang deuh in Zonet Cable chuan Mizo Idol thlanna a buatsaih tan ve a. A hma kum hian LPS chuan Youth icon thlanna an lo buatsaih tawh bawk a, an thlan chhuah Zoramchhani aw danglam tak avang chuan mipui pawn an hlut viau in a hriat a.

LPS lam tih dan ang lo tak in Zonet lam chuan Judge te thut chhuah tir in an zai dan ah comment an pe nghal zel a. An in thlifim chho zel a a thazual pali chiah an awm ta. Mipa pathum leh hmeichhia pakhat la awm in an thiam dan lah chu a in ang tlang tawh em em mai a. Tunge pakhatna ni ang tih chu rin thiam har tak a ni.

An pali chauh an dam hnu zankhat chu hla pakhat hi an rawn sa ho ta tlat mai a. An rawn sak hma chuan a phuahtu leh sa hmasatu phone a an biakna an rawn ti chhuak bawk a. Chungte avang nge kan khaw hming a lan vang zawk chu hla chuan ka rilru a hneh hle mai a. Chu hla chu Pu Rosangliana (Zorock-a) phuah leh sak Zoram ngaih hla a ni a.

Idol top four ten an han sa zet chu Zoram ngaih hla chuan Zoram a fan hneh hle a. A phuahtu leh satu Pu Rosangliana biakna chuan rilru a hneh in Zoram hmangaihna rilru keimah ah pawh a tuh nasa hle a. Chungte avang pawh chuan Pu Rosangliana live ngei a han hmuh ka chakna a zual phah a.
Kum 2012 kum tawp lam atang in Shillong ah ka awm a, Ka rilru a lo lang hmasa ber chu ka awm chhung a Pu Rosangliana hmuh ve ngei chu a ni. An veng Umpling leh kan veng Nongrim kha a lo in hnaih lutuk lo a. Chutih rual chuan hun rem chang hmasa ber a hmuh hram chu ka tum fan a.
Upper Shillong lam a awm kan thianpa thlawhna sipai chuan min kal pui thei hlauh mai a. Zing chaw ei kham ah ka bike Hunk dum chuan kan han in phur chhuak ta a. An in kan va thleng chu Tura lam a a awm lai a lo ni a. Ka hmuh chak em em tlumte thlir a ka lo thlir pawh chu ka va hmu thei ta lo a. Ka thianpa hmel hriat te in ah leng kual in, an pear thei kan lo hawng ta teuh mai a. A leh lam ah chuan kan kan lawm haw ta phian tho a.
Kar khat vel an liam hnu chuan a lo haw tawh ring in ka va kal leh ta a. An in kan thleng chu kan lut nghal tawng mai a, Choka ah thingpui lo in a min lo chibai nghal a. Kar kal ta a hmuh tum a an in ka len tawh thu leh a awm loh avang kal nawn leh ka nih thu te kan hrilh a.
Kolasib khua ka nih thu leh Shillong a ka awm ve rih thute kan hrilh zel a. A ni pawh chuan Kolasib chu an nute awmna a nih thute min hrilh ve in, ka khua ve tho a lawm an ti a. Amah ka hmuh chak leh ngaih san thu te, a hla tha ka tih hlawm thu leh Kolasib khua a chawi lar avang a lawmthu te kan hrilh ve nual a. A hla te avang a ram hmangaihna thinlung zoram thalai leh keimah ngei pawn ka neih phah thute kan hrilh zui a.
An nu in theitui nge Green Tea in duh a rawn tih chuan Seventh Day an nih thu kan hre zui a. Green Tea Mizo tawng a thingpui sen ni tlat si chu kan han in a. Kan thlarau nun chu eng pawh lo ni se, Seventh day ho in ei leh in in sum lam an lo ngai pawimawh hi thil tha tak ni in ka hriat phah a.

Solfa leh Guitar pawh thiam lo kha, a hlaphuah thar te min en pui a. A nalh ang em tih min han zawh phei chuan ka music lam chanchin hre lo lutuk chu ka zak chem chem mai a. Ka hla ho ah chuan engnge i duh deuh hrim hrim an ti a. A tha deuh vek in ka hria Vanglaini leh Zoram ngaih hla hi ka duh zual deuh kan ti a.

Vanglaini hi a thu tha ka ti a, Zoram ngaih hla hian Zoram ngaihna min neih zual tir nasa thin kan ti a. Lo leng ziah rawh ke in lokal thin la Exer lak pah a ni mai a lawm, i thau lutuk dawn min han ti a. Nia ka lo tum thin ang ka ti a, a phone number te min han pe a. Khua a lo tlai chho ta bawk a kham lo tak chuan kan haw phei ta a.

A hnu ah vawikhat va leng leh in 2014 kum tir ah a pension tak avang in Mizoram lam ah an chhuak ta daih a. Whatsapp lam pawn kan han in be ve zauh zauh a, a Manipur zinna thlak hrang hrang te min rawn thawn thin a. Pa lungleng mi tak a nih ka rinna chu a zing tho Sava hmuh ringawt te hi lungkuai em em mai hian min rawn thawn thin a ni. 

Kan in be khat ve tial tial a ka phone kan ti bo zui a, a number facebook atang a han dil leh ka hreh bawk si a. Mizoram ka awm ve leh hnu pawn ka hmu leh ta miah lo a. Mahse amah Pu Rosangliana ( Zorock) live a kan hmu thei leh Shillong ka awm lai thla en zan lunglen apiang a.....

Zan in Shillong tlang chhawrhthla eng hnuai ah
Ka pianna Zoram hmangaih berte lenna Kolasib ngaih a zual
tih sak theih tur an lo phuah avang chuan ka lawm ta hle tho a.

Post a Comment

Powered by Blogger.