Zirsangzela Hnamte hi December ni 1, 1952 khan Sialsuk khuaah a piang a. A pa chu Kawlkhuma a ni a, a nu chu Tlangruati a ni a, an unau hi 8 an ni. Amah hi hla phuah thiam, zai thiam bawk si a ni. Kum 1988 September ni 16 khan Lalhungchhungi Pachuau nen an innei.
Zai mi a nih mi hriat a hlawhna tak tak chu kum 15 vel a nih lai a ni. A tleirawl chhoh lai chuan Shillong lamah lehkhazirin a khawsa a, hmun hrang hrangah Concert leh rimawi lam beiin an zin kual thin.Zirsangzela hian hla 75 chuang zet a phuah a, a bu hrang pawhin a chhuah tawh hial a ni. A hla phuahte pawh mi hriat hlawh tak tak an ni hlawm. Ama hlate hi a sa lar zo viau mai a, zaia intihsiakna hrang hrangah pawh lawmman eng emaw zat a lo dawng tawh bawk. A hla phuah zingah Darthlalang, Zonunmawi, Sekibuhchhuak tih leh Luah loh run tih te chu chu School zirlaia hrang hrangah telh a ni tawh bawk. A hlate hi sak tur chi deuh vek an ni a, hla hril (Poem) kan tih ang chi hi chu pakhat chiah a phuah a. Chu chu I harh ang u tih Intodelhna lam hawia a phuah a ni a. Kum 1999 March ni 26-a AIR, Aizawlin Intodelh tih thupui hmanga Spring Concert, Vanapa Hall-a a buatsaih recitation atan a phuah a ni.
Hla phuah thiam vanga chawimawina lawmman pakhatna a lo dawn tawh te chu: Shillong |halfavang Kut 1977-a hla inphuahsiakah te, 1980-a Mizoram Beat & Musical Contest, IPR & T. Deptt in a buatsaihah te etc. a ni.
A zai thiam ai mahin a hla phuahthiamna hi a larpui mah mah emaw ni chu aw a tih theih. A ngaihtuahnain mihring nun a chhut thiam hle a. Mihring nun ril taka a ngaihtuah chhuahna atanga Darthlalang hmanga hla hlui thei lo a rawn siam chhuak thiam te hi mi ril a nihna a lang chiang hle.
A hla phuah zinga 40 zet chu Radio ah a record tawh a. Kum 1987 khan a vawikhatna atan Audio Album Zoremsiami tih a siam a, a hla phuah tha tak tak a thun tel.
A hla zinga mi hriat hlawh leh lar deuh thenkhatte chu: Darthlalang, Tah a tul leh thin, Zonunmawi, Luah loh run, Phengphe nunnem, Ka hmang ral leh thin tih leh Lawm zel ta’ng e tih te hi a ni. Zonunmawi tih hla, Mizo nun ze mawi tak mai tarlanna hla te, Luah loh run tih hla, hla lunglenthlak leh lungkuai tak te, Darthlalang tih hla, mihring nunze mak leh danglam tak, dik bawk si pholanna hla te hi a tha thlawt a ni. A phuahtuin a phuah dan rilru dik tak nena rilru zawng zawnga a han sa phei hi chu, ngaihthlak chian chuan a hluin, ngaihthl^k nin har tak a ni.
All India Radio, Aizawl-ah Asst. Director hna thawk reng thin a ni. Thu leh Hla-ah zofate min chawm zel ang chu kan tih mek laiin, kum 2002 October ni 15 khan Cancer natna vangin chatuan ramah min lo hawsan ta a, Mission Veng thlanmualah phum a ni ta.
Post a Comment