Sanglianthanga hi Pu Thanchungnunga leh Pi Chawntuahchhungi te inkarah, kum 1954, May ni 15 khan Tlangnuam, Aizawlah a piang a. An unau hi 2 chauh an ni. Amah hi zai lama mi tak, mite nun khawih ngut thei khawpa zai tak leh ril a ni a, hla phuah a thiam bawk a, a hla phuahte hi a thukin a ril em em a, thil tak pai riau a nei hian a hriat a ni.Naupan tet atanga tingtang kuah chawt chi a ni a. St.Paul’s School atangin lehkha zir chhuak a, a sikul ban veleh hian tingtang bawk a kuah leh thin. Zawi zawia intuak chhoin hmanrua eng eng emaw a nei chho hret hret a. A thianteho nen Group an indin a, kum 1976-ah Gospel Band - ‘CRUSADERS FOR CHRIST’ tiin an invuah a. Zoram hmun tinah mite hriat an hlawh hial a ni. Gospel Band-ah chuan a ding hmasa ber a ni a, Kohhran lam leh hruaitute lam chuan an ngai thiam lo hle.
Zaia rawngbawlin hmun hrang hrangah a zin kual thin a. Evangelist Lalchungnunga, Missions for Christ hovin rawngbawlna an nei thin a, an thupui ber pawh, Rilru, Taksa leh Thlarau damna tih hi a ni.
Crusaders hi an vanglai kha chuan lar vet vet tak an ni. An vanglai chhova mi pangngai, hawiher zau deuh chin chuan an hre duh vek ti ila kan sawi sual lo vang. Kum 1976- 1980 vel hi an vanglai vel kha a ni a. An hla hlui zingah chuan - Aw Kraws tih te, Van Khua leh Tui tih te, Rinnain tih te leh Van Indona tih te kha an vawrh chhuah pui deuh deuh te a ni a, mite rilru a hnehin, zoram pum hi a dengchhuak chuai chuai a ni ber.Mizote hla lama kan ngaih dan inang lo, insual awm fo thin chu he thil hian a rawn sat chim rum rum a tih theih awm e. Rock Music tih te leh Sap rawngkai zaina lam kha tunhma kan ringtu hmasate’n an duh loh, an malmak a ni a. Crusader an lo lar chhoh tak erawh hi chuan loh theih lohin mite rilru a hneh si. A thluk leh hmanrua-ah khawvel zai thluk lek lek, a music hmanrua pawh Rock music lam chi, mahse a thu chu Pathan hla tha lutuk a ni bawk si. Chuta tang chuan Gospel Rock Group te pawh a lo pian belh phah ta zel niin a lang.
Amah hi Tlangnuam-a awm ni mahse, Mission Veng Bial chhunga an awm lai a ni a. Musical Instrument te chu Biak ina la lut hmasa ber a ni. Chutianga a chet avang chuan Kohhran lamin an ngai thei vak lo va, kohhran atangin an hnawt chhuak hial a. Kum 1980-1990 chhung chu Salvation-ah an awm ta hrih a. Kum 1990 ah chuan Presbyterian-ah let lehin, kum 2005 ah chuan Kohhran upa atan thlan a ni ta a ni.
Crusaders an darh hnu hian Sanglianthanga’n amahin Studio a siam a, a theih ang angin Music tract te a siam belh zel a. Hla thar a phuah belh zel a, chung a hla phuah tharte chu amahin a record a, tun thlenga lar zui ta zel te chu- Jakoba Pathian, Mupui ang Kohhran, Zirtirtu tha tih te a ni a, heng hlate leh a hla tam tak, Radio-a a record te hi hla thlan hun luah tam ber a la ni zel a ni.
Sanglianthanga hian Gospel Country Music lam a ngaina em em a, hla hi 100 chuang zet a phuah tawh a, tin, Radio (AIR) ah hian hla 50 chuang zet a thun tawh a, Audio Album 10 lai a siam tawh bawk, a album siam te chu-
1. Indona - Crusaders (1983)
2. Mupui ang Kohhran (1990)
3. Jakoba Pathian (1990)
4. Krista vanga tuar ngam (1992)
5. Lota nupui (1993)
6. Pathian ralthuam (1994)
7. Sum leh paiin ro a rel (1997)
8. Crusaders (1979)
9. The Best Of Sanglianthanga (2001)
10. Kei Leh Ka Chhungte (2004)
A hla sakte hi mi hriat hlawh lo leh lar lo pawh a awm lo, sawi zui vak a chakawm hle mai. Speaker-ah tangin hmun hrang hrangah thusawi leh zaiin rawngbawlna a nei kual reng thin.
Post a Comment