CHANCHINTHAR MIZO
Mizoram News Service (MNS). Aizawl, Oct.13 : Congress Legislature Party (CLP) treasurer leh UD&PA Minister nibawk Pu Zodintluanga chuan ni 13.Oct.2017 (Zirtawpni) khan Congress bhavan ah thusawi in, Sorkar in Aizawl khawpui kawng pengthuam te chu siamthat leh ti zauh hna a thawk zel dawn a, hei hi kan zavai atana tha zawk tur leh chhawr tur a ni a, hemi hnathawh kawngah hian mipuiten sorkar kan tawiawm tlat a pawimawhin a tul a ni a ti.
Pu Zodintluanga chuan Sorkar hmalak tawhna leh hmachhawpte a sawi a. Vaivakawn ah kawng pengthuam rawt hniam leh tih zauh a ni tawh a, chutiang chiahin Republic Venga Pi Pangi peng an tih mai, kawng pengthuam siamthat a ni tawh bawk, siamthat hma leh siamthat hnu dinhmun chu a inthlau hle a ni. Tunah hian Bawngkawn pengthuam siamthat leh tizau turin hmalak mek a ni tiin Pu Zodintluanga chuan a sawi.
Tunlaia sawihlawh em em Bawngkawn pengthuam siamthat leh tizau tura Sorkar in harsatna a tawhte sawiin UD&PA Minister Pu Zodintluanga chuan he thil hi sawirik chhen nuamlo a tih thu leh zahthlak a tih thu a sawi a. Sorkar hian pawl emaw mimal emaw tih hmingchhiat a duh ngailoh thu sawiin, loh theihloh vanga sawichhuah ngai a awm thute hun kal tawha miin a ruka thil an lo tih mipuite hnena hrilhriat ngai a lo awm ta hi a vanduaithlak hle ani a ti bawk.
Bawngkawn pengthuam siamthat leh tih zauhna turin kum 2005 vel khan mimalin an ram an surrender a, a surrender tute hi Sorkar in PMGSY kawnglaih hna cheng nuai 297 chuang man a pe a. Nimahsela chu ram, kawng pengthuam zauhna tur chu sorkar kut thleng lovin khatih laia roreltu party te khan an party president hmingin land lease an siam ta daih a, chung chu tun hnu ah hriatchhuah a ni a, kha an thil tih kha thil zahthlak tawp a ni. Chumai a la nilo cheu, Land lease hi special case vanga sorkar in a phalsak chauh lo chu hralh emaw pek emaw, midang kuta hlanchhawn hi phal miahloh anih bakah dan bawhchhiatna a ni a. Chutiang hrereng chunga hmanni lawka dan bawhchhetu te khan nakum inthlana Chief Minister nih an la tum zui ngam hi a vanduaithlak in a zahtheihloh thlak hle a ni. Sorkar chuan Bawngkawn pengthuam hi siamthat leh tih zauh ngei ngei a pawimawh tih hria in tih tlang a tum tlat a, ram leitute nen inbiak kal reng a ni, tiin a sawi bawk.
Pic : Tuna Bawngkawn pengthuam awmdan leh siamthat/tih zauh anih hnu a a awmfan tur. Tuna ram awmdana a sen chin hi mimalin pengthuam zauhna tura ram an pek chin chu a ni e.
Post a Comment