C. Lalrinmawia hi kum 1955 June ni 21 khan Durtlang Hospital-ah a piang a. Amah hi Chaltlang lal thin, Thangphunga tupa a ni. A pa chu Thanglianchhunga a ni a, a nu chu Lalthanchhungi a ni. An unau hi 6 an ni a. Kum 1984 October ni 22 khan Lalchhuanawmi nen an innei a, fa 2, mipa 1 leh hmeichhia 1 an nei. Tunah Chaltlang Mualvengah an chhungkuain an khawsa mek.
A vanglai hun hi zai nen a hmang tam hle a. Kum 1976 khan Radio-ah hla a record ve tan a. A lar chho ta nghal hle mai a. Pathian fakna lam hla erawh a sa tam lo hle. A hla sakte hi thalai lam duh chi a ni a. A hla pawhin thlan a hlawh hlawm hle. A hla sak lar deuhhote chu: Di chambawihpui tih te, Tawnmang Lasi tih te, Thinlaiah a thar leh thin, Nghilh loh |hahmingliani, Zantiang lunglen, Tlai tla eng mawi, Aw min hnem la, aw min awm rawh, Chawngtinleri, Ngaihzual nang nen, thal bawm romei, Dawn ve la, Tawn Sam thlah mawi, tih te leh Vanglai nun tihte an ni.A hla sak dan style chu mite’n an lawm hle a. A aw a mawi a, hmun hrang hrangah zai tura sawm a ni thin. Zai mite reng reng hian lar chhoh zual hun lai an nei deuh vek a, C. Lalrinmawia pawh hian a lar chhoh lai kha chuan a lar vut vut khawp mai. Tunah a lar lo kan tihna ni lovin, a lar vanglai kha chuan thingtlang hmun kilkhawr berah pawh, zan thla eng hnuaiah tlangval rualin tingtang ak chhuakin kawtlaiah C. Lalrinmawia hla an au thlerpui nasa hle a, naupang te ber thlengin an sa thiam hle.
Radio (AIR) ah hla 40 chuang a thun tawh a, Audio Album 3 a siam tawh a, chungte chu:
1. Tawnmang Lasi
2. ‘D’ Chambawihpui
3. Nunhlui
Tawnmang Lasi tih Album phei chu kum 1980’s chho vel khan a lar vet vet hle a. Hemi hnu lawkah hian ‘D’ Chambawihpui tih leh Nunhlui tih a siam leh a, heng pahnihte pawh hian Zoram a dengchhuak hneh hle.
Post a Comment