Ngurthangvela hi kum 1955, May ni 25 khan, Phuaibuang khuaah, Pu Dara (Telela) leh Pi Thankimi te inkarah a lo piang a. An unau hi 8 niin, mipa 4 leh hmeichhia 4 an ni a. Amah hi an fa tlum ber a ni a, an zinga 3 chuan thlarau chawlhna ram an pan tawh a ni. A pa hi Aizawl atanga a zin haw lam, Khawruhlianah a tlu sual a, chuta tanga vanduaina chu tawkin, kum 1960, December ni 12 khan a boral ta a. Chuvangin Ngurthangvela chu a nuin a hmeithai chhoh pui ta a ni.A pain a boralsan hnu hian a pa u, Lalhmingliana, Manipur, hnen lam chu, kum 1962 chuan a nu nen chuan an pan ta a. Leilet te enkawlin rim takin hna an thawk a. Kum 1965-ah Churachandpur, Manipur atangin, Khawlekah a pu, a nu pa te hnen lamah an chhuk leh ta a. Tuivawl kaiah te sumdawngin an buai thei hle a. Kum 1966-ah rambuai rapthlak takin a rawn nangching a. Kum 1968 ah a u, Aizawl Bethlehem Venga pasal neia awm hnen lam chu a pan thla leh ta a. Chuta tangin Churachandpur lamah lut chho lehin, chumi hnu leh ah Darlawna a ute hnen lamah te a khawsa leh ta a ni.
Ngurthangvela chanchin hi chipchiar tak leh ngaihnawm taka sawi tur a tam hle a. Hringnun engkim mai, hrehawmna leh lungngaihna, harsatna leh vanduaina kilkhawr ber hi a thleng a, kut hnathawh engmah hreh nei lovin, thil hi a tawng(ecperienced) thawkhat hle a ni. Mahse kan sawi vek seng lovang.
Kum 1982-ah chuan tuna a nupui nen hian UPC Kohhranah an innei a. Nupa inkawp rem tak niin, tunah hian Bethlehem Veng, Aizawl-ah an chhungkua in an cheng a ni.
Rimawi khawvel lamah a inlar nasa hle a, amah hi a lar ve hrim hrim a. A vanglai hun hi chuan, naupang te ber thlengin amah hre lo hi an awm awm lo ve. A zai nasa hle a. Radio bakah, Local T.V. ah te hla a thun nasa hle. Chumai chu ni lovin, hla hi a phuah tam em em mai a. Hla 150 chuang a phuah tawh a, hemi kan ziah lai pawh hian a la phuah belh zel ni a hriat a ni. A hla thenkhatte hi Radio ah leh TV ahte zai thiam thenkhatte’n an sa lar nual bawk.
Audio Album a siam tawh te:
1. Dam takin Mangtha - 1978
2. Ka Di ka hmangaih che - 1985
3. Ka fak tawp thei lo che - 1990
4. A thisen hlu a pe - November, 1990
5. Sodom leh Gomorra kan iang zo ta - 1993
6. 666 - 1995
7. Setan, ‘Get out’ - December, 1999
8. Ka ngai zual thin - 1986
9. Ngurthangvela Collection Hits - AD 2000 (Indo-Anglian)
Heng a album siamte leh a hla sak thinte hi a lar lo pawh a awm lo. Vawi khat a sak chhuah tawh chu mi tin mai hian an sa thiam thup vek mai a, chu chuan mipui a hneh theihzia a tilang thin.
Post a Comment