CM bangla thlangah MNF-te'n CM Hawla chhuak tur an dang

MNF party mite chuan nimin chawhma lam khan chief minister Lal Thanhawla, Assembly session-a tel tura a kal tur chu CM bangla thlang, High School Field bulah an lo dang a; MNF-te chu police-te nen innawr deuh mah se, police buaina lian tham chhuak loin, police puihnain Chief Minister chu a kal tlang thei.

MNF party mite hi chawhma dar 10 rik hma deuh aṭangin High School Fileld bulah an kalkhawm a, Assembly session-a tel tura CM Lal Thanhawla chhuak tur chu an lo dang a ni. MNF mite hi police-te'n hnawh darh an tum a, minute 10 vel an innawr hnuah Chief Minister chu a kal tlang thei a ni.

MNF party chuan nimin khan thuchhuah siamin, CM Lal Thanhawla chu kum 2013-a Assem­bly inthlan dawnah Election Commission of India (ECI)-ah affidavit dik lo a thehlut niin an tarlang a, "Affidavit dik lo hmangtu CM Pu Lal Thanhawla hi House-a ṭhu tlakah kan ngai lo," an ti.

MNF chuan, danin MLA atana candidate-te chu an thil neih zawng zawng tarlang tura a phût laiin, CM Lal Thanhawla chuan affidavit-ah August 30, 2013-a a hminga a lei fel tawh, Kolkata-a a ram chu a ziak lang tel lo tih an sawi a, "November 8, 2013-ah chhechham meuhin affidavit-ah ziak lut tel loin a zêp ru tih hmuh chhuah a ni," an ti a; Mizo mipui leh ECI dâwt a hrilh avanga Lal Thanhawla MLA-a thlan tlin a ni chu an dem thu an tarlang.

Kolkata-a a ram neih a zêp avangin Lal Thanhawla chu MLA ni tlaka an ngaih loh thu sawiin MNF chuan, "Assembly session-a a kal tur chu November 14 hian High School Field bulah MNF 

ṭhalai hmalaknain lo dan tum a ni a, an inchai fê hnuah police an tam avangin police tha chakna hmangin a kaltlang lui ta a ni," an ti a; CM a kaltlang luih avangin MNF ṭhalaite chu an thil tumah an tláwm lo a, a 

ṭul ang zela hmalak a nih dawn thu an sawi.

MNF tarlan danin, MLA can­didate ni tura nomination paper thehluhnaa affidavit-ah thil neih thehluh kim loh emaw, a dik loa ziah (false affidavit) chu danin a sawi angin hrem theih a ni a; CM Lal Thanhawla pawhin mipui leh sorkar a bum avangin ECI-in MLA a nihna aṭangin a bântir theih bakah, MLA chuh nawn thei lo thlengin a hrem thei a ni. 

-Vanglaini