Mizo ṭawngah 'ṭ' kan neih avangin internet leh technology ṭhang zelah buaina kan tawk ṭhin. A bikin website leh smartphone-ah 'ṭ' hman theih a nih loh avangin a buaithlak hle. Mahse tunah chuan Swiftkey Beta version-ah Mizo ṭawng telh a ni ta a, 'ṭ' a hman theih tawh. Mizoram University-a Mizo Department-a assistant professor Lalzarzova chuan microsoft forum-ah 'ṭ' belh tur hian ngenna a thlen a, Mizoten alphabet-ah 'ṭ' kan neih thu leh harsatna kan tawh nasat thu a sawi. 'Ṭ' hi unicode hran nei a ni a, latin lamah a awm tho avangin an keyboard-ah lo belh ve turin ngenna hi a siam a ni. Windows phone-ah pawh 'ṭ' hi an keyboard-ah telh a lo ni tawh a, chuvangin microsoft hnenah pawh hian ngenna hi a thlen ta a ni.
Company engineer Julien chuan word mal pakhat an belh theih loh thu leh, a Mizo ṭawng anga language belh theih a nih thu a sawi avangin Zara hian Pu Buanga Dictionary online-a chhiar theih awm chu a link a thawn nghal a. November 10, 2017 khan company lam chuan Swiftkey Beta version-ah Mizo ṭawng chu an telh thar thu an rawn sawi ta a ni. Hei hi Mizote tan chuan thil lawmawm tak a ni a, buiana awm miah loin i duh hun hunah 'ṭ' i hmang thei tawh dawn a ni.
Swiftkey beta version hi Playstore aṭanga download mai theih a ni a, mahni phone-ah keyboard-a Swiftkey beta select-a, swiftkey beta setting aṭanga language-ah 'Mizo ṭawng' tih chu thlan mai tur a ni. Company lam chuan tun thla ni 23 hian Swiftkey full version an tlangzarh tur thu an sawi. Hei bakah hian update zel an tum a, tun aia changtlung zawka tih theih zel pawh a beiseiawm a ni.
Swiftkey Keyboard hi android platform-a keyboard lar tak a ni a, microsoft-in an lei tawh a ni. -Vanglaini
Post a Comment