International news & politics:
NORTH KOREA-IN MISSILE A KAP CHHUAK LEH TA: SOUTH KOREA HOVIN “PRECISION STRIKE” AN NEI ZUI : AN INDO TAN DEUH TA MAI EM NI?
November 29, 2017(MSR): North Korea chuan thla 2 chhung a ngawih vang vang hnuin, niminah Inter-Continental Ballistic Missile (ICBM) a test leh ta. Tun tuma ICBM Hwasong-15 a test hi tun hnaia a test 3 zingah kap thui ber a ni a, a hmaa an test zawng zawng aiin a let 10 in van boruakah a thlawk sang zawk a ni.
South Korea’s Joint Chiefs of Staff chuan, “North Korea chuan Pyongsong, Pyongan province ICBM a test hi zing dar 3:17am a ni a. Lei atanga mel 2,800 dawn (4500km) boruaka sangah (International Space Station hmun aia let sawm a sangah) 54min chhung a thlawk chho vawn vawn a; mel 600 a hla Sea of Japan ah a tla” a ti.
US State Dept chuan “North Korea missile test thin leh nuclear program kal pui chu a muan awm zawnga chin fel dan America chuan a la zawng zel a ni” tiin thuchhuah a siam. Hetih lai hian South Korea Military te chu hetianga North Korea missile test hnu lawkah a tum tak kah fuh chat chatna (precision strike) turin, target an lo siamna hmunah military drill/ exercise an nei zui nghal a ni.
Japanese PM Shinzo Abe chuan, nasa zawka UN ah North Korea hrem dan tur ngaihtuah a ni ang, tiin a dem thu a sawi a. US President Donald Trump pawhin chin fel ngei (take-care) a tum tih sawiin, a tum dan kimchang erawh a sawi lo, “Ka president hun laiin North Korea hian ICBM a nei ngai lo vang” a ti.
US Defense Secy Gen. James Mattis chuan reporter te hnenah, “A hma zawng aiin a thlawk sang daih a ni, tlang taka sawi chuan. North Korea chuan khawvel khawi ram pawh kap pha missile siam hi a tum ngar ngar a ni” a ti.
2011 ah Kim Jung Un chuan thuneihna a chelh tan a, 2014 atangin missile test a ching tan a, tun tum ami nen vawi 77 an test na a ni tawh a ni. Sept 15 khan Hwasong-12 Intermediate Range missile a test tawh bawk. Nimina missile an test ve leh hian North Korea military te chu indo tur niawm takin an inbuatsaih (build-up) niin an sawi.
David Wright, Missile expert, Union of Concerned Scientist chuan, tuna North Korea missile enchhin hian 13,000km a kap phain a ring a, Washington leh US ram bung tam zawk leh Europe leh Australia te pawh a kap pha ang, a ti@C.T.Lalrinawma
Post a Comment