- Tv. Lalthakima
“Hlauva awm leh turin bawih nihna thlarau in hmu a ni si lo va; fa nihna thlarau in hmu a ni zawk e, chu thlarau avang chuan “Abba!(Ka pa!)” tiin kan au thin hi. Thlarau ngei chuan keimahni thlarau nen Pathian fate kan ni tih min hriattir thin; tin, fate kan nih chuan roluahtute kan ni a; Pathian roluahtu, Krista luahpuitute kan ni.” (Rom 8: 15-17 ) Mi pakhat chuan ‘Fa nih inhriatna’ hi a nei nasa lutuk a, chu chuan a inthlahdahtirin a chapotir nge ni a thatpui lo a ni ngei ang, “Lalpa, fa nih inhriatna hi min lak kiansak rawh tiin a tawngtai e,” an ti. Chuti ang deuh chuan fa nih inhriatna hi thenkhat tan chuan hman sual ve theih tak; fapa tlan bo anga pa rilru tihnatna a ni ve thei reng mai. Engpawh ni se tun tumah erawh chuan ‘Fa nih pawimawhzia’ lam zawk Pentikost-ni pualin i lo ngaihtuah ho teh ang.
Pathian thu-ah hian thil pawimawh tam tak awm zingah Thlaraua Krista’n min luahna tak tak ram hi thil pawimawh hmasa ber a va ni em. Chu chu miin a tawn loh chuan Pathian thute hi duha buaipuiin, han tlan ve chiam mahse Thlarau lam thilte hi a hrethiam tak tak lo a, a thlamuanpui tak tak lo a, a hlimpui ve thei tak tak lo a ni. Chuvangin ringtu chuan Krista Isua’n Thlarauva a thinlung a luahna dik tak dinhmun hi a chang ngei ngei tur a ni.
Fa nih pawimawhna…
Mi hausa thenkhat chuan ‘awmpui’ an nei thin a, chu’ng an awmpuite chuan an hna tul hrang hrangte an thawk thin a. Zing ni chhuah atanga a tlak leh thlengin chaw ei lai tih chauh lohah chuan an mawng pawh an hung hman lo a ni ber mai. An awmnate’n tihtur an sawi reng reng chu i he lovin an ti vek a, hnial en ah en pawh an en ngai lo a ni.
Chutih lai chuan chu’ng mite chuan fate pawh an nei ve bawk thin a. An fate chu an awmpuite ang lo takin zingah pawh tlai takah an tho tlangpui a, siamsa an ei a, an chhungkuaa hotu an nu leh pate’n an tirh nikhuaah pawh ‘Thiante nen chumi khami chu kan ti dawn, ka hman lo; ka inkhel dawn, chutah khatah chuan kan kal dawn, etc.,’ tiin an nu leh pate pawh an hnial fo thin.
A chungah khian mi chi hnih inang lo tak - thu inawih hleih tak, tihtur pawh intih tam hleih tak kan hmu a. Khi chhungkuaa pa ber khi lo boral dawn se khawi khian nge pa ro chu luah zawk ang le. Awmpui hma taka tho thin nge tlai taka tho thin fapa; awmpui tirh awi lo ngai lo nge tirhna pawh hnial chang nei fo thin fapa; awmpui in chhung chet engkim ti thintuin nge ro khawm ang a, inchhung chetna tur hrang hrangah tih sawi tur a lawi pawh nei lo zawk fapa khian. A chhanna chu kan hre theuh awm e. Mihring thlir dan atanga han thlira fel zawk anga lang leh phu zawk nia lang khian ro a luah hauh lovang le.
Awle, kan Bible chang han tarlan tak ang khian leh a chunga kan han sawi tak ang khian kan Kristian nunah pawh hian ‘Fa nihna thlarau/Roluahtu nihna thlarau’ hi ava pawimawh tehlul em. Tihtur tam tak tiin Lalpa rawngte pawh bawl inti viau mah ila; ‘bawihnu fa chuan bawih lonu fa chu ro a luahpui dawn si lo’ tih hi Pathian Lehkha Thuin tlang takin a sawi tlat a ni(Gal. 4:30). Chuvangin Lalpa duhzawng kan tih hrang hrangte hi ‘fa nihna ram’ atanga kan tih a va pawimawh em. Awmpui nihna ram a\anga thil tam tak tih ai chuan, Fa nihna ram a\anga thil tlem te tih hi a pawimawh zawk a, tin, chhiahhlawh thil tam tak tih aiin fate thil tlem te tih hian pa thinlung a tilawm zawk bawk thin.
Awmpui/ bawih nihna ram atanga Pathian thu sawi te, ramhuai hnawhchhuah te, thil mak tam takte tih ai chuan fa nihna ram (fa nihna nei chunga) atanga han inkhawm mai te, tapte han tahpui (mitthi in leh khawhar in kal, etc.) mai te, han hnatlang maite hian kori a lo tu zawk daih nia. Tirhkohte 19:2-a kan hmuh angin ringtu zawng zawngte hian kan rin veleh Thlarau Thianghlim kan chang nghal vek kher lo mai ni lovin Thlarau Thianghlim a awm tih pawh hre lovin ringtu a lo nih theih reng mai a! Chuvangin ‘Thlarau Thianghlim hian min luhchhuah tak meuh em’ tih hi Kohhran mimal tinte kan inzawh theuh a va pawimawh em. Paula phei chuan tlang takin, “Tupawh Krista Thlarau nei lo chu amaha mi a ni lo(Rom 8:9),” a lo tih hial kha a ni a, he Thlarau hian kan thinlung a la fan ve lo a nih chuan ‘Aw, Lal Isu tunah hian ka thinlung fan ve la’ tiin sawmtute hnar ngai lo Lal Isua hi sawm ngawih ngawih tur kan ni ang.
Kan Bible-a kan hmuh angin Pentikost ni khan khawvelah hian Thlarau Thianghlim chu tuihal apiangte in turin a lo thleng tawh a; mahse chu chu a la tawk mai lo, kan thinlung a thlen leh kher kher hi a la ngai a ni. Tuizema tui awmin kan tuihal a tireh lo va, kan pum chhunga a awm chauhvin kan tuihal a reh phah ang deuh hian a tangkai tur ang taka hmang tangkaitu/ chhawrtu/ ringtu kan nih theih nan, ‘Anmahniah ka awm ang, anmahniah ka leng bawk ang’ titu Pathian hian kan thinlung chhung thlarauvin rawn luah theuh rawh se.
Post a Comment