-Enga Ralte-
Tlangchhip-a Khua awm chu enge ni ang kan ti maithei. Tlangchhip-a Khua chu nang leh kei hi kan ni. Engvanga Thuhruk theih loh nge kan nih?
Ringtu nun hi thiltih tel lo chuan kan Bible-ah thi a ti si a, ringtu Lal Isua neitu i nih leh nih loh chu i nitin nunah i thenawm khawvengte leh i hnathawhpuiten an thlir che tih hria la, Bible-in ringtute nundan tur leh awmdan turte leh nitin i bula awm thinten Pathian thu nen i nundan kha a inrem em tiin an thlir reng che. I eng chu mite mit hmuhah eng rawh se, “Miin Khawnvar a halin a hrai hnuaiah a dah ngai emni?” Chuvangin, Krista Pathian nung betute hian, kan nundan leh cheziaahahte hian fimkhur ava ngai nasa em ! Miin keimahniah hmuh tur beiseiin min thlir min chhiar reng e.
Kohhran huanga ringtu kan nihna chu, Biakbuk pawnah a taka kan lanchhuahtir hi ringtute mawhphurhna a va ni em! Chuvangin inthawina aia thuawihna duhtu kan Biak Pathian hi a va ropui em. Inthawina/Thilpek avanga vanram hi thlen tur ni ta se chuan, Nang leh Kei a tan chuan Krista chu a thlawnin a thi a ni dawn si a. He Khawvel mihausa, Pathian ngaihsak lo tute tan, vanram a ni mai dawn si a. Mahse, nang leh kei a tan a ni Lalpan kawngzau tak a lo hawn ni. Tangkain lei dawn ila, Leia miliante ta a ni dawn si a. Nang leh Kei kan thlen ve theihnan ama duh anga awm turin min sawm zawk a ni.
Chuvangin, unau duhtakte u, kan rinna chu Krista chanchintha nen inmawi zelin, tihtakzetin hrehawmah pawh nuamah pawh kan Lal Isua chakna ringin nitin lanchhuahtirin, ring chunga beiseina nen i bei zel ang u. Tlanchung pawha mite chhiar theih turin keimahniah Lal Isua Krista hmel an hmuh theihnan chhel takin tiamchin lam panin i tlan ngat ngat ang u. Thih thlengin rinawmin lo awm rawh, chutichuan nunna Lallukhum ka pe ang che. Thutiamtuin thu min tiam hi a va ropui em.
Khawvel buh sengkhawmpuitu atan, ka thian duhtak Isua chuan kan vaiin min sawm reng a sin.
I Chhandamtu tawk turin kut ruakin i tawk ngam dawn emni?
Post a Comment