- Tv. Lalthakima-
Lal Isua rorel tura A lo kal lehna tur hi thil pawimawh tawpkhawk; hmangaihtu leh hmangaihte pawh kan inthen hun tur, sumdawngtu'n a sum zawng zawng a kalsan hun tur, lo neitu pawhin a thawhrimna a chawlhsan hun tawh tur; mi zawng zawng kan nih tur ang ang kan nih hun tur leh kan pan tur lam lam kan pan hun tur a nih tawh dawn avangin Amah pawh khan A ngai pawimawh hle a, kan inrinlawk theuh theih nan A lo kal dawn hnaiha thil thleng tur tam tak min hrilh lawk a nih kha. Tin, Thuthlung Hlui lamah Amosa leh zawlnei dangte hnenah leh, Thuthlung Thar lamah pawh mihringte hnena sawithian lohte nen lama A hriattir Paula hnenah te pawh A lo sawi bawk a. Tun tumah hian chu'ng hun tawp dawn hnaiha thil thleng turte chu i'n bih chiang teh ang. 1. A hmasa berah chuan Lal Isua ngeiin A sawite kha kan hriat angin tunah hian kan tawng chho mek zel tih kan hria a; "Chung zawng zawng chu in hmuh hun chuan Amah chu A lo hnai tawh a, 'Kawngka bul ngeiah A awm' tih hria ang che u," ti mah se heng kan thil tawn mekte hian Lal Isua lo kal lehna tur hi min ngaihtuah chhuahtir zo mang lovin News Item pakhat ve lek-ah kan ngai tawh em aw… a tih theih. Indo thuthang te, hri len thu te han hria ila, 'Kan Khawvel hi chu a va'n chhe tawh tak em' te kan tilek fang tawh niin a lang, hei hi eng nge a chhan ni ang?
A chhan ni thei awmte : Pathian duhdan pawh ngaihtuah hauh lovin naktuk maia thil thleng tur pawh hre hauh lote hian rual pawl loh hlau reng rengin thil tam tak ruahman leh tum kan ngah lutuk a, hengte hian Lal Isua lo kal lehna hi min ngaihtuahtir thei lo a ni angem? Tin, kan banphak lek leka tawrh tur leh chan tur awmte hi kan sitin kan palzam anga, chuti anga Krista tana hrehawm leh tawrh nei lo na na na chuan 'Lal Isua lo kal leh hun tur te hi min nghahhlelhtir thei lo a ni angem' tihte pawh ngaihtuah theih tak a ni. Kan pawh(nel) lohte ai chuan kan pawh takte chu an bula awm pawh a nuam kan tiin kan thlahlel thin. Chuti ang deuh chuan Lal Isua kan thlahlel lo lutuk te hi kan inpawh tha tawk lote pawh a ni thei angem. Eng pawh nise mahni theuh infiah ila; thenkhatin, "A hmun ropui a mawina zawng aiin, Hmangaihtu Lal Krista hmel duhawm chu," tia an thlakhlelhzia an au chhuahpui lai a, A lo kal hun tur nghahhlelhna kan nei miah lo a nih chuan kan inenfiah a ngai ngei ang.
2. Tluksanna(II Thes. 2:3): "Tluksanna chu a lo thlen hmasak zeta Dan Bawhchhepa, boral fapa chu a lo lan hmasak zet loh zawng chumi Ni chu a lo thleng dawn si lo va..." Hei hi Lal Isua lo kal dawn hnaiha thil thleng turah chuan thil pawi tak a ni. Paula sawi ang ngei hian he Tluksanna hian min chiah nasa tawh hle a; a pawina em em chu mi nupui kan then thei lo a, kan nupuite chauh kan then thei ang deuh hian Muslim te, Hindu te, Buddhist-
hote'n Lal Isua an tluksan thei lo a, Kristiante ngeiina Krista kan tluksan tur hi a ni.
Tunah hian khawvel hmun hrang hranga Kristiante nundan hi han thlir ila; Pathian lam ngaihsak lohna te, Pathian Thlarau lam thil ninna leh ngaihtuah peih lohnate a leng nasa tawh hle! Tin, thlarau lam thil ngai pawimawh lo leh ning ta na na na chuan rawngbawltute ngaihsanna leh ngaihhlutnate pawh kan nei tawh mang lo a. Kan hriat angin khawthlang lamah phei chuan hetia'ng laia kan ngaihsak loh piahlamah hian sakhaw danga inlet te, biak inte thlenga han hralh ta mai te pawh an tam hle a ni.
3. Pathian Thua Tam(Famine): "Lalpa PATHIAN thu chhuak chuan, 'Ngai teh u, nite chu a lo thleng mek a ni; chung niahte chuan ramah chuan tam ka tir ang a, chaw tamna ni lovin, LALPA thu hriatna tamna zawk chu. Tin, tuifinriat atangin tuifinriatah leh hmar atangin chhakah pawh an vakvai ang a; Lalpa thu chu zawng turin kil tinah an tlan ang a, an hmu lovang. Chumi niah chuan nula leh tlangvalte meuh pawh tuihalin an thi dang ang (Amosa 8:11-13)." Pianthar duh deuh, Camp-te pawh lut ve fo, piangthar hleithei lote i tawng tawh em? That duh deuh, Pathian duh ang taka lang; mahse an duh ang hmu zo si lote i tawng ve tawh em? He Pathian thu hriatna tamah hian kan lut mek a ni lo maw...
Lota-te aiin vantirhkohte an hmanhmawh zawk ang khan Pathian thu lo thleng tur hriaa a him tur tur hi an hmanhmawh a, a him lo tur tur hian an ngaihsak lovin an hmanhmawh lo emaw tih mai tur a ni. Rei lo te achinah Ani chu rorel turin A lo kal tawh dawn si a, rei A rial tawh lovang. Chuvangin hun lawmawmah min ngaihthlak lai leh chhandamna nia min tanpui mek lai hian; kan felna, kan thatna, kan thianghlimna awmchhun Lal Isua Krista tan kan thinlung i hawn theuh ang u.
Post a Comment