- Tv. Lalthakima  

    Krismas lo thlen apianga 'Krismas dik tak chu thinlunga a lo pianna hi a ni.' kan tih thin hi a lo dik ngawt mai. China rama Sap nula Pathian hman tak mai Missionary Jackie Pullinger-i'n, "Kristian zawng zawngte hian Krista nena intawhna fel tak kan nei theuh tur a ni a; mahni ngeiin kan tawk ve lo a nih chuan kan hrethiam tak tak ngai lo ang," a lo tih ang deuhin, Lal Isua pawh hi kan thinlunga a pian loh miau chuan enge a nih chiah hi a hriatthiam theih tak tak loh.(Mat. 11:27) 

    Chaw pawh hi 'puarna min petu a ni' tih te, 'chakna min petu a ni' tih te hi ring hle mah ila, kan pum chhung a thlen miau loh chuan puar nan te, chaknantea ringin a hman tangkai theih tak tak loh. Thlalera tuihal dangchara tlu hlum thinte pawh hian 'tui hi tuihal rehna a ni' tih hi thinlung takin an ring a, an pawm; mahse tuihal reh nana ring thei tur chuan an rin tui khan an pum chhung a thlen leh kher kher a ngai a; mahse an pum a thlen tawh loh avangin tuihalin an lo thi thin ang deuh hian; Lal Isua pawh hi a nihdan tur ang taka ringa hmang thei tur chuan, "Anmahniah ka awm ang a, anmahniah ka leng bawk ang(II Kor. 6:16) &, "Tupawh mi ring chu Pathian Lehkha sawi angin tuinung luite a pumah a lo luang chhuak ang(Joh.7:38)," tih ziak ang khan; kan thinlunga a lo thlen a, a lo pianna hi a pawimawh tak meuh meuh a ni. Chutiang ram chu Kohhran mimal tinte thinlung chhunga a lo thlen theuh theihna turin leh, a thlen tawhnate thinlung chhungah pawh Sipaihote Lalpa thahnemngaihna avang chauha tihzauha a awm zel theihnan, Krismas urlawktu mi pathumte urlawk dan ilo thlir dawn teh ang. 

    1. Zakaia: Ani hian 'Jeriko khua Lal Isua'n A chhun pelh dawn' tih a hria a. Zute ruiin leh hlimna dang zawnga chu Krista lokal tur chu lo urlawk mai lovin, Lal Isua hmuh ngei tumin Theipui kungah a lo lawn a, a tifuh khawp mai. Thatnaa par chhuahpui tham khawp lawmna chuan a thinlung chu fan chhuakin, "Ngai teh, Lalpa, ka sum zahve pachhiate hnenah ka pe ang a; tin, tu lakah pawh thil engpawh lo hlep ru ila, a leh liin ka rul leh ang," tiin a hnena Krismas  thleng chuan a nun a tidanglam ta vek mai. 

    Theipui kungah nuam tak ni lem lovin Krista lo kal tur chu lo urlawk mahse, thlamuanna reh tawh ngai lo tur chuan Zakaia thinlung chhung chu a fan chhuak ta! Kan ngaihhlut em em tangka sumte pawh chu ngaihlu thei tawh lovin; Krista hriatna ropui bik a chan chuan thil engkim channaah a ruattir a, chung thilte chu hnawmhne lekah a ngaihtir ta!

    2. Bartimaia: Lal Isua'n thil mak tam takte ti a damlote tidam leh ramhuai mante pawh a hnawhchhuah lai khan, a phaw vuaka lo tal chiam chiam engemawzah an awm ngei ang. Bartimaia erawh chuan chuti anga a hun hman liam ve mai mai chu a tum hauh lo. A kiang lawka Krismas thleng mek chu a mamawhzia hriain, dam phah ngei a tum a, mite tihdan bakin, "Isu, Davida fapa min khawngaih rawh," tiin a au ta chiam chiam mai a, khapbeh theih pawh a ni lo. Han khap mahse a au ring zual zel a, a dampui ta nge nge a nih kha; kan chhiar zel phei chuan Lal Isua a zui ve ta hial a ni. 

    Urlawk zan hi mi tam zawkte chuan an duh duhdanin an hmang a ni thei e, keini erawh chuan Krista beiseina nen i urlawk ang u. Kan rilru a na in kan khuate a har thar a ni thei, taksa nate kan nei a ni thei, thlarau lamah chaklohna riau kan nei pawh a ni thei; tidamtu leh min hmangaihtu inpuanna thar i beisei tlat ang u.

    3. Hmeichhia, kum 12 thi put: Ani hi a inngaitlawm satliah lo a, mipui zi hut hut karah chuan a kianga Krismas thleng mek chu dampui ngei tumin Amah beiseina nen a zui fan fan a ni. Lal Isua chanchin chu a lo ralkhat hriat a,"A puan hmawr chauh pawh dek ila tihdamin ka awm ang," tiin an khuaa Krismas thleng mek chu tihtakzetna rilru nen a lo urlawk a ni. A tum ang ngei chuan a ti ta a, daktawr tam tak laka lo beidawng tawh leh intihdam a tumna lama a pawisa neih zawng zawngte pawh lo seng ral tawhtu chuan damna kim a chang ta! "Ka fanu, i rinna hi i dampui a ni e, thlamuang takin kal la, i natna ata chu lo dam hlen tawh ang che..."

    Zakaia te, Bartimaia te, Hmeichhia kum 12 lai thiputte angin leh, Pu Thandangate'n, "Aw Lal Isu, tunah hian ka thinlung fan ve la; chutin ka fakna hla ve chuan rimtui a chhuah ve nan," an lo ti vawng vawng ang khan, Kohhran mipui zawng zawngte hian kan mamawhna zawn theuhah Lal Isua hi dampui leh hlawkpui a, hmasawnpui theuh turin Krista inpuanna thar beiseina nen he Krismas hi i urlawk ang u.

Post a Comment

  1. A va han ngaih nawm dap dapin ka chhan loh khanah min urlawk tir e. Tualchhung Kohhran chanchinbu Pathianni Dt.22.12.2019 issue-ah ka lo chhuah chhuang ve thuai a ni e. Ph no. 9612209743

    ReplyDelete
  2. Min hau lo hram rawh aw....

    ReplyDelete

Powered by Blogger.