KRISMAS THUCHAH

-Pastor R. Lalremruata-   

     Tun hunah hian Krismas thuchah tawite-in kan ngaihtuah ho dawn a ni a, hmun a tlem vangin,tawite,  kan ngaihtuah zui turin kan in hnutchhiah dawn a ni. Heng mi chi - 4 te hmang hian kan ngaihtuah ho dawn nia - Berampute, Mifingte, Heroda leh Khualbuk vengtute:

    Berampute :
    Mihausaten an hmu hniam hle niin a lang. Beram vengtu mai an ni. Mahse khawvel chhandamtu lo piang hre hmasatute an ni. Engkim an kalsan a, Lal thar chibai buk turin an kal.
    Kei ni chuan kalsan neih kan hreh tlat fo thin. Kan bial nu, kan bial pa ten Krismas/Kohhran Programme emaw-ah kal lo mai tur a min sawm na-te kan 'Aw' leh mai thin. Kalsan neih a ngai. Lal Isua telve na tlak loh in Programme kan lo duang fo thin. Beramputen engkim an kalsan a, Lal thar chibai an buk ang hian, kal san tulte chu Lal Isua hmingin i kalsan ve ang u.
    Mifingte :
    Fing hle mahse, an finna chuan Lal thar an rawn zawng fuh lo hlauh mai. KHB 98:3-a kan hmuh ang hian, kei ni chuan kan pian ni a lawmtu tha pui pui kan neih laiin, Lal Isua - Ran inah a lo piang si.
Danglam taka Lal Isua zawngtuten an zawng thelh fo thin. A pianna tlawm hle mahse, lei leh van Lalber a ni si. Kan en tawn atan erawh chuan Mifingten ui neilovin Lal thar lo piang chibai an buk ang hian, ui lovin, chibai buk nan kan sum leh pai te hlan tur kan ni. Midang tan, Harsa zawkte tan he Krismas-ah hian inhmang ang u.
    Heroda :
    Isua lo piang chu a lo huphurh hle ni tur a ni. Fin vervek a chhuah, mahse, a hlawhchham. Nausen erawh a rawt chiam mai a ni kha.
Tun hunah hian fin vervek chhuahin, nausen r^wtna turin Krismas Programme kan lo siam ang tih ava hlauhawm teh lul em!! Sual lakah mai ni lovin, sual anga lang lakah pawh inthiarfihlim turin inbuatsaih ang u. Thianghlim tak leh Pathian lawmtlakin Programme i siam ang u.

    Khualbuk Vengtu :
    Bethlehemah mipui an tam vangin khualbuk vengtuin Isua a lo hnar hlauh mai. Luh dil mahse, a hnar tlat. Thawnthu-ah chuan Khualbuk Vengtu hian Isua tan hian hmun lo zuat mahse, Isua hi a hai a, a lo hnawl.
Zan khat chu thli tleh vuk vuk karah hian, sava pakhat Riakmawva an tih hian riahna tur zawngin a thlawk kual a. Thing hrang hrang-ah lo  kal in a dil zel a. riahna a hmuzolo. A tawpah Thingthiang hian riahna hmun a lo siamsak thei hram an ti. Lal Isua'n a hmangaihte zingah luh duh in, riah a rawn dil fo, mahse, Khualbuk Vengtu ang mai hian Sualin min bawm a, kan hnar fo thin. Kumin Krismas ah erawh chuan 'Isu, Vawiin-ah hian kan thinlung bawnginah lo piang thar leh rawh' ti turin in buatsaih zawk ang u. Hnawng tawh suhse, Khawvel Chhandamtu chu, A vahvaih nan Judai ram kha tawk tawh rawhse ti tur kan ni dawn lawm ni.

    Krismas tukkhat chu New York khawpui kawt thler a naupang khuangvawtu tawp ve tak hian, miin naupiang chibai an buk sup sup karah hian, Ran in lem leh Isua piang lem bulah mittui tla zawih zawih chung in, 'Isu, thilpek hlu pek tur che ka nei ve lo, ka neih chhun hei hi ka hlan a che' tiin a khuang chu a vua a. A hmutu leh ngaithlatu mittui tlalo an awmlo an ti. He Krismas hunah hian thinlung hawn ila, Ro thildang a ngai tawhlo.

    He hunpui kan hmachhawn mekah hian, Van mipui-ten thuchah ropui an rawn keng ang hian, Thuchah i keng ve ang u. Remna lengse, Inremloten Inrem nan i hmang ang u.
    Milem betu kan tih, Vai (Hindu)-ho chuan an hunpui, an Puja tur atan inbuatsaihin, an thil zawrh zawng zawng-ah Offer siamin, an ti tlawm thin. Keini, Mizo Kristiante hian, kan hunpui, Krismas atan hian kan thil zawrh kan tito zawk thin niin a lang. A rethei ber pawhin, he hunpui atan hian kan neih zawng zawng bak thleng thlengin kan inseng thin a ni si a. Chuvangin, he Krismas hi Midang tan hmangin,  Malsawmna kan nih ve theih nan, kan thil zawrh-te i ti tlawm zawk ang u.
    Malsawmna kan dawn nan a ni chuan a Van Ropuina zawng zawng hlip thla in, lei hmun tlawm ber a rawn thlang a ni si a.