By: Isaac Zote
Bung - 30
Keivawmhranga’n Sapui sum sarih zet a thah chu ropui taka Faihriam khua a zawn lutin Lal mual lam an pan ding pui nghal vang vang a. Chutiang bawkin Sapui hnungah chuan Mualkil mitha pa vawkpui sum ruk zet pawh chu hnung lamah chuan an rawn zawn ve mek a. Mipui lah chuan hmuhnawm ti lutuk in an zui dul dul mai bawk a. Keivawmhranga thah sapui len zia leh ngho var leh len that zia, a tin sei leh hriam zia ringawt te chu an lo in sep raw tui siak a..Lal mual a ri a rawn awm hlut takah chuan Rengpa in chhung atang pawn rawn hre pha in, tlangvalte an rawn haw tawh ngei anih dawn chu ti rilru in Rengpa leh a in a thleng khaw dang Lal zawng zawng leh, Rengpa in a leng lut khawnbawl upa dang dangte pawh chu an rawn chhuak ve hluai hlawm a. An hma a hlang a Sapui sum sarih lo mu zuar mai an han hmuh chuan ropui leh rapthlak an ti lutuk a, an ka hau hlawm mai a..
Rei tak a khua leh tui te lo tibuai tawh tu leh an ranvulhte la a, a umzuitu tlangvalte hial pawh seh hlum tawh tu an han that ta mai chu lawm lutukin Rengpa Tuchhinga chuan, “Tu that nge ni? Tu thah nge ni?” phur leh lawm fahran tih hriat tak hian a ti chul tawh mai a..
“Nangmah em ni Nghovar?” a han tih chuan Nghovara chu a hawi pawh rawn hawi chhuak lovin hnuailam a bih ngar ngar a..
“Bawpthlera leh Hmulbuka te kha, nangni pahnih zinga pakhat zawk zawk kha em ni?” tiin Faihriam khaw pasaltha pahnih te chu an zawt leh a, anni pawh an ngawi reng a..
“Nge ni khualkai pasaltha Sihliaka emaw Siaktaia te kha? Pasaltha Rumvunga leh Ralhleia te kutthlak hnu em ni zawk?” beidawng duh mai lo chuan an ti leh kher a.. Chutah chuan Vankal Val Upa Kaibuaia chuan chhuang tak chung a sawi ani tih hriat tak hian, “ Ni lo ve Rengpa, Pasaltha tuaitir Keivawmhranga’n i fei pek hmanga a chhun hlum ngei ani e..” a ti ta a.
Chu thu a han hriat chuan Rengpa Tuchhinga chu a lawm ta em em mai a. Chulaia pungkhawm mipui zawng zawngte hma ah chuan Keivawmhranga chu chin tawk awm lovin nasa takin a fakin a chawimawi nawn leh a. Amah duhsaktu te an lawm viau rualin a er tu leh itsiktu te erawh an chek tlawk tlawk thung a..
Rengpa Tuchhinga rawn tawng chhuak lehin, “ He sapui lian tak lu hian Keivawmhranga banglai a mawi ngei tur ani..” a han ti a. Chutah erawh Keivawmhranga chu rawn tawngchhuak ve in,” Ni love Rengpa, he sapui hian i khua a cheng te hi rei tawk fang a lo tibuai tawh a, he sapui hian Rengpa run in ropui mawi zawk rawh se; keini ang michhe banglai mawi tur chuan a pam lua e..” a tih ve tlat tak ah chuan Rengpa Tuchhinga pawn lawm takin a pawm ve ta a...
“Naktukah awm ni kham a ropui taka aih tur ani a, Ran lu kimin keimah ngeiin ka ai dawn ani. Tumah mahni lo lamah feh chhuah loh tur ani e..” Rengpa chuan a han ti dap dap a..
Sa a zawngah sapui hi chu zah leh hlauh anih avang hian a aih pawh hi an ulukin an la urhsun viau a. A tlangpuiin Lalin ai ran lukimin a ai tlangpui a. Sapui aih hi “Sapui Vui” an ti thin bawk. Awm ni khamin an ai thin a, Sapui aih ni a lo lama feh lui te chu sapuiin a seh duh an tih thin avangin hmanlai kan pi leh pute khan an serh hle thin a. Tin, a kap hlumtu emaw a that tu tan sapui aih dawn zanin muthilh a thian loh avangin Keivawmhranga pawh he mi zan hian a tlaivar a ngai ta reng a..
A tuk ah chuan Rengpa Tuchhinga chuan hmasang a ta Mizote ranvulh thin, Sial,vawk,kel,ui leh ar in ran lukim in sapui chu ropui takin a ai a. He mi ni zet hi chuan sa ah an hnianghnar in dal kil kar a michhe fa leh hmeithai fa te pawn dul vun puar vek khawpin chaw an bar ve thei in an tlai hle ani..
Vankal khaw tlangvalte pawh a tuk chiah a an khaw lam pan an lalpa ho a haw tum tawh anni a. An hun hman dan te ah an lawm hle a. Faihriam khua a an cham chhung zawngin engmah harsatna leh buaina lian tham awm lovin an hun te an hmang zo thei dawn a an inhriat mai bakah an khaw tlangval zinga mi pakhat lah intihsiakna engkim mai a hmingchher ber leh hriat hlawh ber an ni ta mai te chu an lawm in an inchhuang rilru hle bawk a.
Ropui tak a Sapui an aih hnu chuan khua a lo thim leh ta a, Tlangval ho pawn lengi run in lam an kai sap sap a. Vankal khaw tlangvalte pawn Faihriam khua a an awm tawp zan tur ber ani tawh bawk a tiin am leh induh thawh tak chuan an hmel duh theuh te chu an rim ve bawk a. An hlim thei dar dar hle in hun hi kal chak an ti thei hle a..
Amaherawhchu, chutianga hlim tak a Faihriam khaw in tin mai a nula leh tlangvalte hlim taka an inkawm mek lai chuan Vengthlang lam a valrual te kaina lengi run pakhatah chuan thil duhawm lem lo tak a thleng ta tlat mai ! Faihriam vengthlang lam deuh a nula tuaitir run in pakhatah chuan Vankal tlangval tuaitir pathum hi an leng lut ve a. A mi ngainat zawng an lo ni te pawh ani ve chek ang chu, an nula rim pawh chuan a bengkhawn tha ang reng ve viau a. Amaherawhchu, chutia hlim tak a an inkawm ho dar dar lai tak chuan Kangbur khaw tlangval pali, zu rim nam deuh thur thur hian an rawn lut ve ta tlat mai le..
Bung - 31
Kangbur tlangvalte chu rei vak lo an han thut hnu chuan an nula rim chuan a bengkhawn lovin an thian za ho chu a be tha peih vak lo ani tih an hrethiam nghal mai a. Dik tak chuan an nula rim hian a biak that vak lohna chhan pawh eng dang vang nilovin Zu an ruih em avang leh kut thawh a fiam an chin vang chu ani..An nula rim in Vankal tlangvalte a be tha zawk tih an han hmuh chuan an thik in a rukin an thinrim em em mai a. Tin, an thik leh an thinrim chhan hi zanin a thil thleng vang chauh pawh nilovin Rengpa Tuchhinga ram awp huam chhunga Khualkai Pasaltha hmingthang ber ni thin, Kangbur hovin an chhuan em em leh nidang a insawitheih nan tak a an lo hman thin an khaw Pasaltha Nghovara thingluang zawh a inbeihna a Vankal khaw pasaltha tuaitir ve mai Keivawmhranga’n a hneh tak mai vang kha ani ve bawk pakhat a .
Nakin deuh ah chuan Kangbur khaw tlangval zinga hotu chan chang deuh ber Sumngêna chu insum zo tawh lo tih hriat tak hian a rawn ding chhuak hluai a, “ Vankal tlangval ho kha in va zak thei lo em em ve maw le..Eng vanga ka nula lo rim ve ngawt nge in nih? Rengpa Tuchhinga awp ram huam chhunga Lalte zinga thiltithei leh ropui ber Lal Kawlhkhama khua leh khualkai Pasaltha hmingthang Nghovara tualchaina Kangbur khaw tlangvalte kan nih hi in hre lo em ni? Kei, Sumngena, Kangbur Mualkil Mitha fapa neihchhun hi ka rawn luh tawh chuan michhe fa te kha chu lo inthiar fihlim nachang hre thin rawh u..” tiin chapo tak mai chuan an ang ta phiarh phiarh mai a..
Chutah zet chuan Vankal tlangvalte pawh ngaihdan ni tawh lovin, “ Tunge i nih kan hre lo che a, Vankal Lal Hmangliana bak lal dang hriat kan nei hek lo bawk a; in khaw pasaltha Nghovara in chhuan em em pawh Rengpa Chawilung chawi pasaltha in hnehsawh tak a a tuk dawl hnu ani ngai e..” a ti ve ta siah siah mai a... Sumngena thinrim lutuk tawng chhuak leh tur chiah chu an inbiakna zawng zawng lo ngaithla ve reng tu, an nula rim Pa chuan lawm lo tih hriat tak hian rawn tawng khalhin,” Ka run in chhung hi khaw pahnih te tualthu tih chhiat nan ka remti love..Chu mai piah lamah, kha Kangbur tlangvalte phei kha chu in hmel leh tawng dan atang ringawt pawhin in rui viau tih a hriat lehnghal a, thil a kal thui hma in, in thlen in theuh lamah min lo va tin san zawk rawh u..” a rawn tih hmiah takah chuan thinrim tak chungin ,”In la hre dawn khawp alawm..” tiin insehruh teuh chungin an chhuak ta a..
Rei mawi tawk an len hnu chuan Vankal tlangvalte pawh chuan tin zai rel a Faihriam buanzawl lama riah luh tum in an pan chho ve leh ta a. Chutia an kal mek lai chuan thin tham atangin nichin lawk a aw an hriat zo chiah aw chapo tak mai khan,” Vankal tlangval ho kha in chempui te nen khan lo inring rawh u, nangni zawng in khaw lama haw tur in awm ve tawh dawn love..” tih leh Sumngena ho chuan Kangbur tlangval pali te chuan rawn sah chu an rual ta mai a..
Faihriam khua a chhiah chawina a an kal hian khaw dang dang tlangvalte pawh an kal ve dawn tih an hriat avangin engtiklai pawhin thil eng pawh thleng thut thei ani tih hria in a theih chin chin ah an hriam hrei te hi khawi hmunah pawh tu te pawn an keng deuh reng mai thin a. Chutia Kangbur khaw tlangval hovin an nula rim haw an lo lambun thut takah chuan Vankal tlangval ho pawh chuan an hma zawn a awm an theih theih chu an sat ve hmiah hmiah bawk a...
An inbeih hun hi leng haw ar khuan hunlai chauh ala nih bakah Khawchhung kawngpui zau lai ani bawk a, an ri hria in a bul hnai a in te atang chuan mi engemaw zah an rawn tlanchhuak thuai a, an insual pawh chu an rawn thelh thei ta hram a..Mahse patling leh patling chempui nen a inbei anni bawk a, an in sat hliam hman tho mai a..Hliam na zual zingah Vankal tlangval pakhat a malpui sah thler ani a; chutiang Sumngena chu a dar sat thler sak ani bawk a...Amaherawhcu, nunna hial chan derthawng khawp a hliam erawh tumah an awm hran lem lo...
Chutianga khaw pahnih tlangvalte insual buai thelh a han nih takah chuan an Val Upa ve ve te koh anni a. Vankal Val Upa Kaibuaia chuan tlangval insual buai satliah mai mai ah a ngaih laiin Kangbur Val Upa Aingûka erawhin a rilru in an khaw lal hnen a thlen hlan mawlh a nghakhlel thung a.
Thil chinchang a hriatin Kangbur pasaltha Nghovara pawh rang takin a rawn thleng thuai a. Sumngêna’n Pasaltha Nghovara an hmu chiah chu thiam takin a lo zualko mawlh mawlh a. Sumngena lah a dar sah thler ani bawk si nen Pasaltha Nghovara thin chu a tirim ta em em mai a...Vankal khua chu engtin emaw tak a thungrulh dan a ngaihtuah ta a...An lal Kawlhkhama hnen thlen hlan ngawt nghakhlel in rang takin Lal mual lam an pan ta vang vang a...
Chhun lam a Faihriam khaw rei tak chhung lo tibuai tawh tu Sapui ropui tak a an aih zawh hnu chuan zan lamah chuan Rengpa Tuchhinga chuan a thla thum zu tui tling thlum tak mai chu a han phawrh tir a, a nopui chuan khat tawk tak a han thalin,” Khawnge, zanin zet chu Sapui chaih pasaltha tuallena Vankal Lalpa Hmangliana hi ka nopui hi ka han tawk teh ang...Ani zar chauh a he sapui ropui hi ai thei kan ni si a..” a han ti a.
A thusawi chu pawmpui tih hriat takin Lal dang dang te leh anmahni zui tu an khawnbawl upa te leh kaihza vengtu te ho pawh chu an lo bu ve nghut nghut a. Amaherawhchu kil khat a lo thu Kangbur Lalpa Kawlhkhama erawh a ngawi reng thung a. Tum dangah chuan Rengpa hian amah Kawlhkhama hi a tawk hmasa ber thin kha ani a; tum tum a amah tawk lova Lal Hmangliana zawk a tawk ta mai hi a ngaithiam lo lek lek a, mahse engmah sawisel ngamna chi ani lo tih hre lo tur khawp a lal a erawh ani bik lo..
Ropui tak a sapui an aih tak that tu Keivawmhranga pawh Rengpa chuan a bik tak a sawm lut ve in, Lal te ho nopui in tawk vel thlir ve reng chuan Lalpa Hmangliana hnungah ngawi rengin a chempui leh fei neih thar nen chuan a lo thu ve bawk a..
Engemaw chen chhung Rengpa thla thum zu thlum tak mai chu an han dawn tak hnu chuan an lu lamah a lo thawk deuh ta nge maw ni dawn ni, Lal Kawlhkhama kam nam chuan,” I pasaltha tuaitir kha i chhuang viau na a, ka khualkai pasaltha hmingthang Nghovara sa kah zat pawh a la kap awm tawp si lova..” an tih kher takah chuan Lalpa Hmangliana pawh insum zo bik lovin,” Chutia ni maw, mahse chuti ni si thingluang chungah khan ka pasaltha tuaitir mai khan i khualkai pasaltha kha a va sat thla chiang em em si ve!” an tih let ve deuh sak takah chuan boruak duhawm lo a thleng palh thei tih hria in Rengpa Tuchhinga chuan a aw an thian kharh a. Rengpa Tuchhinga’n duhtawk a hun e a ti ani tih hrethiamin Lal pahnih te pawh chu insum in ngawih an chuh leh ta zawk a..Khawnbawl upa te leh Lal dang dang zuitu Rengpa Tuchhinga in a awm ve te pawh an ngawi leh ta thiap mai..
Bung - 32
Chutia khuavang kal lai ang mai a an ngawih thiap lai tak chuan pawnlam atang chuan ri a rawn awm hlut a, Rengpa Tuchhinga run in ropui tak chhunga luh pawh dil buai tawh lovin thi hnuangin Sumngena chu a rawn tlan lut rawk rawk a, Kangbur Lalpa bula thu a mualkil mitha, a pa hnenah chuan hmanhmawh tak a tlan pheiin thiam tak maiin a va zualko a...A thil hmuh chuan Lalpa Kawlhkhama pawh a ti thinrim hle a.. Sumngena hnung chiah ah chuan khaw pahnih Val Upa te leh Nghovara pawh chuan rawn in zui lut ve nghalin Lalpa Hmangliana pawh chuan thil chin chang te chu a val upa Kaibuaia chu an zawt ve zung zung a..
Chutia Val Upa Kaibuaia’n a tobul atanga thil awmzia a sawi lai mek chuan Lal Kawlhkhama chu rawn au chhuak tuarhin,”Hmanglian... Ka mualkil mitha Teknghawra fapa kut in tlangvalten an thlak hi engtinnge thupha i chawi dawn? Sawi vat rawh..” vin tak mai hian a han ti a...Hmangliana lah pek chuan,” Ka Val Upa min hrilh dan chuan ka tlangvalte’n tha tak a nula an rim lai, zu rui chungin buaina an zu siam a, a in neitupa pawn a in atangin a hnawtchhuak nghe nghe anih kha...A thu hrimah, ka tlangval pakhat pawh a malpui a thler ve duai tho thu min hrilh ve bawk a; kan in ngaidam tawn thei mai lawm ni?” a han ti a..
Lal Kawlhkhama chuan,” Ani michhe fa phiangsen nen khan ka Mualkil mitha fapa hi tehkhin suh! An inthlau lutuk.” a han tih takah chuan Lalpa Hmangliana pawh a ter ve ta at mai a,” Hetiang ang mi tumah pawisawi lova tha tak a mi in a leng lai tihbuai ching leh engemaw buaina chhe te tawh vanga mahni Pa te hnen a zualko a pun du du hi mualkil mitha fapa pawh ni tlak ani nek love..” a ti ve ta hmiah mai a..
Chu thu Sumngena’n an hre chiah chu namen lovin a thinrim ta a, a hliam tuar na a tih em em lai a chutianga hnehsawh tak a tawngkhum an ni leh kher kher te chuan a thinrimna a ti sosang zual a; a lo kam nam ve tho bawk si nen insum zo lovin, Lal leh lal lo pawh thlu lovin vawilehkhat ah a thinbutut chu a chhuak ta thut mai a. A thil tih chuan nakin zelah eng nge sawhkhawk a neih dawn tih leh a pawi thui theih zia lam reng hre chang tawh lo chuan a chempui chu vawi leh khatah an chelek thut a, a nihna leh mizia dik tak chiang tak a phawrh lan sak tu Lalpa Hmangliana chu sah a tum ta thut mai a.
Chutia Sumngena thinbutut chhuakin khaw khat Lal ve meuh sah an tum thut mai chu Lal dangte mai bakah Lalpa Kawlhkhama leh Sumngena pa ngei pawh chu te chhuak thawt in dan hman tum in an thuthmun a ta an rawn tho chhuak hluai a; mahse tih na hman reng a awm tawh tlat lo, a thil tum hlen chhuak ngei tumin a chempui a chelek hman tlat tawh si..
Sumngena’n Lalpa Hmangliana nghawng fik hmawk tum a an sah dawn lai tak chuan inring ran a Lalpa Hmangliana hnung a ngawi reng a a fei ki bar hriam tak nen a lo thu Keivawmhranga chu rang taka rawn per chhuak zawkin Sumngena’n Lalpa Hmangliana a sah hma chiah chuan a fei hriam tak chuan a nghawngah tak mai a thil tlang ta zawk mai le!! Ka pawh chhawn lovin Kangbur Mualkil mitha fapa chu mitthi khua pan tur in chawp leh chilh a tirh liam ani ta a..
Chutah zet chuan Kangbur lam pawh thinrim taka rawn ding chhuakin Silai nei Nghovara leh Lalpa Kawlhkhama khawnbawl upa pathum te pawn Keivawmhranga chu an tin nghal a; chutiang bawkin Vankal lam pawn lehlam pang chu an tin ve nghal bawk a...Rengpa Tuchhinga run ropui chhung a boruak sosang lutuk in mung chu a alh chhuak lo chauh tawh a!
An silai an hmetpuak leh hman tep tih ah chuan Rengpa Tuchhinga chu thinrim tak a rawn dingchhuakin,” Kan zavai a kan hmuh theuh angin Kha tlangval khan khaw khat Lal meuh chem a sah a tum a, a lalpa ven nan Sapui chaih pasaltha hian a fei chuan loh theih loh in a chhun ta ani a..Buai zawmna zel tur a awm lova; Vankal leh Kangbur khaw lam te ve ve pawh in tual thu ti chhe lovin a hma ang chiah khan in awm leh tur ani a. Buanzawl lamah pawh in tlangvalte ve ve thinrim chu in Val upa ten an khap dai tur ani. Chu chu kei, in Rengpa Tuchhinga duh dan ani e..” a han tih tak ah chuan thinrim teuh ve ve chungin Lalte pahnih chuan ngawih an chuh ta a.
Rengpa chu rawn tawng chhuak leh in, “ Lal Hmangliana leh Kawlhkhama te kha, tumah vawiin ni a thil thleng hi ti punlun zawngin emaw a hnu zelah he thil thleng vang hian hmalakna emaw phuba lakna ang chi engmah in nei lovang tih min tiam ve ve rawh u..” a han tih takah chuan Lalpa Hmangliana chu inbeng daiin rilru leh tih takzet in Rengpa remruatna chu a pawm mai a, Lalpa Kawlhkhama erawh a lu bu ve nghut tho mahse a rilru erawh a dam thei mawlh lo thung..
Rengpa Tuchhinga chuan a in a tlangvalte leh Pasaltha awm te chu Buanzawl lam a chhuak turin a tih bakah Vankal tlangval Kangbur hovin an sah hliam tak kha an khaw Bawlpu enkawl zui tur a pan pui turin Faihriam Val Upa chu thu a han pe bawk a. Chutia an chhuah tak sang sang tih ah chuan Lalpa Kawlhkhama chuan kei pawh pawn lamah kan inthiar ve lawk ang e tih leh chhuah chu a rual ve ta nghal mai a.. Buanzawl lam pan a thinrim tak a kal phei nghauh nghauh a pasaltha Nghovara chu Rengpa in chhunga awm midang te hriat phak loh tur chuan an ko kir zauh a, a bekbawr ta sur sur mai a..
Faihriam khaw buanzawl an thlen hnu chuan Val Upa Kaibuaia chuan thil awm dan zawng zawng chu a rukin an khaw tlangvalte a han hrilh ru a, Keivawmhranga erawh thil eng mah thleng awm lo ni awm takin ngawi rengin kil khatah chuan a thu ve mai a. Kangbur Val Upa Ainguka pawn an Rengpa In a thil thleng duhawm lo tak leh Sumngena thih thu chu an khaw tlangvalte a ruk a hrilh ve in buanzawl boruak chu a rit khup mai a. Dik chiah chuan Rengpa Tuchhinga’n engmah tih zawm tawh lo turin thu pe lo se chu hemi zan la la hian khaw pahnih tlangvalte chu an in phek sah mai pawh a rinawm hial a.
A hnu lawk ah chuan naupang te pakhat hi buanzawl lamah a rawn kal nak nak a..Buanzawl a awm Pasaltha Rumvunga leh Ralhleia te chu rawn koh in,” Ka pu, in pahnih khan kan khaw kawtchhuah a dawhlung ah khuan mi pakhatin thil pawimawh deuh hrilh tur che u a neih avangin a nghak reng tawh che u ania; rawn ko tur che u in keimah hi min rawn tir ani e” a han tih chuan a ngaihna hre lo leh mak ti em em mai hian Pasaltha Rumvunga leh Ralhleia chu an in en ringawt mai a. An rilru in tu tak ni ang a, eng thu pawimawh tak sawi ang maw ti nauh nauh pah chuan ngawi rengin Faihriam khaw dawhlung lam pan chuan an in zui thla ta a..
Bung - 33
Faihriam khaw dawhlung an zu thlen nak chuan lo awm tur a an rin loh ber mai chu a lo ding ta tlat mai a. Chu chu tu dang nilovin thingluang zawh a inbeihna a an hneh loh Pasaltha Nghovara ani. Nghovara chuan Rumvunga leh Ralhleia te chu lo zui ru tu emaw an inbiakna lo hre pha awm an awm em tih an thlek tawn zawk zawk hnu chuan tumah a hmuh tak lovah chuan a lungawi ve ta in,” Hmanni a thingluang zawh a kan inbeih lai kha chu hriat reng lovah kan ti a niang chu ti raw thian te u..Kei pawhin ka theihnghilh daih tawh ania” nui sang chungin an ti hmasa te te a..
”Engmah zep bual kuai hran lem lovin a nih dan ang ang in kan sawi tlang rawt mai ang a..Zanin a thil thleng chungchang kha in lo hre ve ngei ang a. In hriat angin Keivawmhranga’n kan mualkil mitha Teknghawra fapa a thah sak avang khan kan mualkil mitha leh kan Lalpa an thinrim tak zet a.. Keivawmhranga lakah hian phuba lak ngei an duh a..Amaherawhchu, Rengpa Tuchhinga’n a khaw chhungah tumah kut inthlak a phal si loh avangin in khua rawn luh chilh hi kan tum ani...
….Nizan a sapui kan beih lai khan in mitmeng a huatna leh Keivawmhranga lak a in rilru puthmang kha ka lo hmu thiam in ka lo hrethiam vek a..Keini ai mahin nangni pahnih hian Keivawmhranga hi in haw zawk tih pawh ka hmuh hmaih hek lova.. Chuvang chuan a ruk a lam tang turin ka rawn sawm ta che u ani..” a han tih phawng takah chuan an rin loh lam daih thu in Rumvunga leh Ralhleia te chu a deng ani tih hriat tak mai hian an hrilh hai dunin sawi tur an hamhaih dun ang reng hle a..
Eng an sawi hma chuan Nghovara bawk chuan chhunzawm leh in,” Lang tak a mi hmuh a in khaw tan lo zawng a chet lak in khaw mipui leh in Lalpa lakah nangni tan a rem lo tih ka hriat avangin engmah ti turin kan phut hran lo che u a..Faihriam khua atang hian in khua hi patling tan zan thum riak vel ani tih ka hria a, a tuk a ni lina vel ah in thleng emaw ani ang a; in hnungah zel kan lo zui ve ang cheu a..in thlen zanah chiah in inbuatsaih hman hma hauh in kan rawn bei dawn che u ani..Keini erawh in kawng lakah kan hmanrua tur te kan lo inbuatsaih hman vek tawh ang a..
...Nangni pahnih erawh chuan chhuanlam siam in sa pel a ramchhuak tur angin insawi ula, in khua in chhuahsan fel hnu ah a bak zawng chu keini in kan ti tawh mai dawn ani. Tumah in kan inremsiamna hi an hre dawn lova..Tin, hlauhthawn tur engmah a awm hran lo bawk a, in khaw mipui chu sawi loh in Lalpa ngei pawh kut kan thlak dawn lova, Keivawmhranga lu erawh kan hawn thung ang..” thiam tak mai leh awih awm tak mai a a han tih tak ah chuan Rumvunga leh Ralhleia chu thuthlukna siam tumin an inbekbawr dun ta a..
Mihring hi thikna leh itsikna sual hian mak tak maiin mi a ti â hneh thei khawp a..Nghovara hi hmanni lawk a thingluang zawh a an inbeihpui a an hneh tak loh, an hneh loh hnu a diriam tak leh hnehsawh tak a tawngkhum tu anih reng an hre chang tawh lova; a ni Nghovara aia a let tam tak a Keivawmhranga an huat zawkna leh thikna chuan a ti chawmawlh zo tak zet tawh a; chu tak chu Nghovara hian hrechiangin vervek takin remchangah lak a tum ani reng lah tak a. Nghovara ve thung chu Vankal khua in an khualkai pasaltha pahnih, silai nei pha ngat Rumvunga leh Ralhleia an hloh chuan an tan beih an awlsam phah sawt dawn ani tih hrechiang em em in a rukin a nui leh ver ver thin thung a..
Rumvunga leh Ralhleia pawn thuthlukna siam harsa chu an ti ve viau a, mahse Keivawmhranga’n Faihriam khua a a hming a chher tawh zia te leh a hming than tawh zia te; anni pahnih aia a lar tawh zia leh an khaw tlangvalte ngei pawn an dah san zawk tawh zia te; Keivawmhranga a awm ve chhung chuan an Lalpa Hmangliana’n anni pahnih aia a rin tawh zawk leh a duhsak tawh zawk an hlauh avang te chuan anni pahnih in an dinhmun hlui an luah leh theihna tur awm chhun chu Keivawmhranga thih chauh hi ani tih ring nghet bur tawh in Nghovara chu inthurualpui an tum ta a..
Tin, Keivawmhranga hi anni pahnih hian that thei pawh lo ni tehreng se la, khaw khat a cheng ho anni ve si a; anni pahnih kut a a tual thih ai chuan ral in an thah kha a tha in nakin zelah an pahnih tan ngei pawh a hmingchhiat thlak loh zawk dawn ani tih thlengin an ngaihtuah pha a..
An ngaihtuahna hrethiam emaw tih mai turin Nghovara chu nui vur vur in,” Hlauthawng suh u thiante u, keimah ngei hian Keivawmhranga lu chu ka la dawn ani. Chu chu in pahnih tan pawh a tha zawk e..” a han tih takah chuan Vankal pasaltha pahnihte pawn an lu an lo bu ve nghut a..
Itsikna leh inhuatna sualin a bual â tlat tawh a, tih ngaihna reng a awm tawh lo!! Anmahni tang hma an hai lutuk luatah an khua chu dinhmun hlauhawm tak ah an hnuk lut ani tih reng heng Vankal Pasaltha pahnihte hian an hrethiam mawlh tawh bawk si lo!! Dik chiah chuan Kangbur Lalpa Kawlhkhama leh Pasaltha Nghovara te hian Keivawmhranga lu chauh lak an tum reng reng lova; Vankal khaw mipuite an duh duh that a, an theih theih sal ah man in an Lalpa Hmangliana ngei pawh sal a man a diriam tak a hnuaichhiah chu an chak ber ani a, an khua pawh hal darh vek chu an rilruk zawk ani reng si a. Mahse chutiang lam reng heng Vankal pasaltha pahnih lungmawl,itsikna leh huatna a khat te hian an hrethiam phak tawh bawk si lo..!!
Chutiang a inremna sa ui an tan hnu a hranpa ve ve in Rumvunga te pahnih leh Nghovara te chuan Buanzawl lam an pan leh ta a.. A tuk zingkarah chuan buanzawl a tlangval riak te an han thawh sang sang chuan an thlenna in theuh a an lawi luh leh hma chuan Nghovara chuan an Val Upa Aingûka chu an khaw tlangvalte a ruk a ko khawm tir in an thil tum chu a hrilh ruk tir ta vek a..
Ruahmanna siam fuh inti fahran in Nghovara chu a nui leh ang vur vur thin a, Keivawmhranga lu lak hlan mawlh mai chu mitthla in Pialral a a chhiahhlawh ni tur a siam mawlh chu a nghakhlel tak zet tawh ani...
A tuk tukthuan ei kham ah chuan a hma anga an lo tum lawk tawh ang ngeiin Vankal khaw valrual sawmhnih thuar tham leh an Lalpa Hmangliana chu an khaw lam pan a let leh turin an han insingsa a. Keivawmhranga chuan Faihriam khua an luh hnu a hmingthatna tam tak a lo chan tawh avangin amah ngaisang tu leh vai liam tu pawh a ngah hle nghe nghe a, Rengpa Tuchhinga ngei pawhin rawn thlahin a khua ah chuan engtiklai pawhin a duh duh hun a zalen tak a rawn lawi lut thin turin leh Faihriam khua tan khual tha anih reng tawh tur thu nen a thlah liam a..
Chutiang bawkin tlangval dangte pawh chu an thlen in theuh te nen chuan inthlah fel in Vankal khua ah te an rawn la zin ve ngai anih chuan inthlahrung miah lova rawn zawng chhuak a an in a rawn thleng ve ngei tur te in an inchah ve bawkin hreh tak leh inthlahlel tak chung chuan an in vai liam ta a...
Vankal khaw haw ni hian khaw dang engemaw zat pawhin an khaw lam a haw zai an rel ve ta tho a. Chung zingah chuan Kangbur khua pawh an tel ve a. Khaw thenkhat erawh ni hnih khat la cham bang a, a hnu a haw tum pawh an awm ve tho bawk..
Bung – 34
Kangbur khua chu Vankal khaw valrual ho chhuah fel hnu deuh chiah chuan an chhuak ve ta a.. A tir chuan an khaw lam hawi zawngin an kal phawt a, Faihriam khaw mi tumahin an hmu tawh lovang chu maw tih awm velah an kalkawng thlakin Vankal khaw kawng lam pawh tur chuan ramhnuai ah thawm dim thei ang ber chuan an lut ta a..An kal zel hnu chuan nakin deuh ah chuan Vankal khaw kal kawng chu an va pawh ta a; an hma a kal Vankal khaw valrualten an hnung an rawn zui ve ani tih an hriat loh nan fimkhur takin ri bengchheng siam lo thei ang ber in an kal zel a, zan a riahbuk an sual pawhin a fimkhur thei ang ber a che in mei pawh an chhi eng tha ngam meuh lo a..
Zan thum kawng lak a an riah hnu chuan Vankal khaw valrualte chuan rei tak an lo kalsan tawh leh an ngaih em em mai an khua an han lut leh thei ta mai chu an lawm em em mai a.. An khaw dawhlung an rawn thleng tih mipuiin an han hmuh chuan lawm takin an lo dawng sawng ve a..Lawikungi pawn amah chauh chuan a fapa chu a lo hmuak ve bawk a..A u Chawnghliri nen nilova amah chauh a a lo hmuak ta mai chu mak a ti ang reng viau a, a ngaih lam lam te chu a tha lo lek lek zawk hial a..
“Khawnge ka u Chawnghliri? Lo lamah a feh em ni? a han tih chuan a nu hmel atang chuan a feh lo ani tih chu a hrethiam thei mai a,,
“ Ih..eng lo ania..I awm loh lai khan kan vangkhua ah hian Ngur khua atangin tlem a phanchang lam tawh, Ngur pasaltha Nghalngira a rawn zin a..Ngur khua hi Ngurte hnam ho sah chhuah leh an hnam hming chawi a a khaw hming pawh hi phuah ani a. I thianpa Chhunghreuva te hi Ngurte hnam ve tho annih avangin an in ah sawn a thleng a...I u Chawnghliri a han hmuh khan a hmel duh zawng tak ani chek aniang chu zantin mai hi a rawn leng lut ta tlut tlut mai a..
…An khua a hlat tham avangin palai rawn intirh that leh a hau tak mai piah lamah amah a hmanhmawh bawk si avangin Chhunhreuva pa leh kan khua a Ngurte dang awm te palai a rawn hmangin chawpchilh takin inneih an rawt ta chuk chuk mai a..I u Chawnghliri lah in a lo hnial lutuk hran lem bawk lo bakah hmeichhe tan chuan tlai lua a awm thei tih hria in keini ang dai kil kar a hmeithai fanu te a lo duh ve te anih chuan chu aia vanneihna dang chu a awm leh tawh chuang lo’ng e tiin ka lo tir liam ta mai anih kha”..a han tih chuan Keivawmhranga chu a hmel ah lungawi hmel a pu nge pu lo tih pawh hriat theih lem loh chuan ngawi rengin a kal pangngaiin engmah sawi hran lem lo chuan a kal hnak hnak a..
Vankal khua an han thleng chu khua a nuam lovin ruah a tla deuh reng mai bawk a. Lalpa Hmangliana chuan a hma a lo intiam lawk tawh ang ngei chuan Keivawmhranga chu a vawk pa lian zet mai chu pek a tum ta a..Amaherawhchu Keivawmhranga chuan Lalpa vawkpa lian zawng ka phu mawlh love a tih tlat avang leh vawkpui zawk a dil tlat tak ah chuan hma a sial loh zia hmu a lawm em em in vawkpui pakhat leh a dil ni miah lo vawk pa tuai pakhat a pek belh bawk a. Tin, Vankal khua a an chhiah chawina atanga dam tak a an han haw leh thei lawm nan Lalpa chuan khaw chhe tak karah chuan a vawk pa lian chu a talh ta zawk a. Pasaltha Rumvunga leh Ralhleia te erawh sa pel tur in a ni la la chuan khua an chhuahsan ta thung a..
Keivawmhranga’n Rengpa Tuchhinga run in chhung a a nunna hial a chhan kha Lalpa Hmangliana hian theihnghilh lovin a hre reng a; chuvang chuan thil tihna engkim ah Lal duhsak a lo kai ve pha ta hial a..Tin, Lalpa Hmangliana’n vawkpui a pek atang hian Keivawmhranga te nufa pawh in he mi ni atang hian vawk vulh tur an lo neih ve phah ta ani...
Vankal valrual ten Faihriam khua an chhuahsan atanga a ni li na a Lalpa Hmangliana’n a vawkpa a talh tlai ah chuan unau hmelhai hun awm velah hian tlangval pahnih hi hmanhmawh tak a thaw hlawp hlawp chungin an khua ah an rawn tlan lut hlawl mai a. An hah leh an chauh hle danah chuan an rawn kalna a hla in hmanhmawh taka rawn kal anni tih chu sawi ngai lovin a chiang reng mai a..Vankal valrual Faihriam khua atanga rawn haw hlim hlawl te chuan chu mi te pahnih an han hmuh chuan an hmel chu an hmuh tawh hnu ang riau in an hre nghe nghe a..
Chung tlangval pahnih te chu khawi ah mah peh hel lovin Lalpa Hmangliana in lam chu hmanhmawh takin an pan ding ta char char mai a. Lalpa Hmangliana in an thlen hnu chuan hah lutuk avanga tawng pawh tawng tha thei mumal lo chuan,” Lalpa, Faihriam khaw tlangvalte kan ni a, in khaw lam pan a in haw tuk khan Kangbur tlangval tuaitir pakhat hian a hmui veng tha zo lovin a khabe a sep sual palh zauh mai a..A thlen in pa hnenah Kangbur lam pan lovin an khaw tlangvalte zawng zawng chu Vankal khaw run tur a an thawh chhuah tur thu leh khua in thlen zan ah la la in inbuatsaih fumfe theih hma ngei a rawn beih an tum che u thu a sawi zauh mai a..
…..An chhuah fel hnu chuan a thlen in pa chuan chu thu chu Rengpa hnen thlen tur nge thlen loh tur in ngaihtuah leh te te in behliang mun hun awm vel tih ah chuan kan Rengpa hriattir zai a rel ve ta chauh si a. Chu thu a hriat chiah chuan Rengpa chuan nangmahni hriattir tur che u in keini pahnih hi hmanhmawh tak a kal turin min rawn tir ta a, chuvang chuan thil pawi a thlen hma ngei a rawn thlen hman tum in hmanhmawh bak lengin kan rawn tlan ta ani. Tunah pawh hian Kangbur tlangvalte chu in khaw dai an rawn thlen tep tawh kan ringhlel mawlh love..” a han tih chuan Lalpa leh a khawnbawl upa te chu phawk tak in an in en hra hlawm ringawt mai a..
Lalpa Hmangliana chu rawn ding chhuakin," In ti lawmawm hle mai, kan chunga in zahngaihna leh in duhsakna te in lantir avangin khuanu in malsawmin hualhim zel che u rawh se. Tin, keimah ngei pawh hian in phu tawk lawmawm ka la pe ngei ang che u..Tunah chuan hahdam takin ti khan lo thu thlan dai tawh hrih ulangin, ka tlangaupa khan Val Upa Kaibuaia, Pasaltha Sialkhama leh Pasaltha tuaitir Keivawmhranga kha hmanhmawh takin han ko teh se..” a ti ta a...
Bung - 35
Val Upa leh Keivawmhranga ten Faihriam tlangval pahnih thu rawn ken an han hriat chuan hmanhmawh takin inbuatsaih dan leh Kangbur tlangval ho lo dawngsawn dan tur chu an ngaihtuah ta chuk chuk a. Vankal khaw pasaltha pahnih Rumvunga leh Ralhleia te an lo ramchhuah daih vang leh keivawmhranga chuan a huaisen zia leh a rothap zia Faihriam khua a a lan tir tawh bawk avang chuan a aia upa zawk midang pawh awm mahse Lalpa Hmangliana pawn amah ah rinna nghat ngam in Kangbur khaw tlangvalte lo beih let dan tur pawh amah a rel tir ta a..
Silai nei Rumvunga leh Ralhleia an lo ramchhuah daih takah chuan an khua ah chuan silai nei dang pali chiah an awm tawh a. Chungte chu Mualkil mitha pa leh khawlbawl upa dang pahnih te bakah Lalpa Hmangliana chauh anni. Lalpa Hmangliana chuan ral beihna a hmatawng a tang tur Keivawmhranga chu a silai ken tir a han tum a Keivawmhranga lah in a lo duh lo nasa mai si a,.Chubakah a chhe ber tawh thut palh pawh a inven nan Lalpa chuan a silai chu a ken ngei kha a that bawk si avangin Lalpa Hmangliana pawh chuan a hnial lui duh hran ta bik lova..
Vankal tlangvalte men lai chuan Kangbur tlangvalte hian rawn luh an tum dawn lo tih chu hria in tlangvalte mut reh thep thawp tawh hnu Zanlai ar khuan pelh ah bak an rawn beih duh an ring bik lova..Chu mi hma hun chhung reilote chu an hman thiam hle a ngai dawn ani tih hrethiam in Keivawmhranga chuan an khaw kawtchhuah pangngai lam lo zawk khan dang atanga chhuah puiin tlangval sawm vel bawr chauh chu a ruk thei ang berin mau sah puiin mau fei an siam ta teuh mai a..Ruah a sur deuh reng avang chuan kalkawng te chu a nal hle nghe nghe a. Tin, Kangbur tlangvalte hian a rukin an khaw chhungah enthla tu an rawn tirh ngei Keivawmhranga hian a rin bawk avangin engmah hre lawk lo ni awm takin Vankal khaw mipuite chu an nitin nun dan pangngai a nung theuh turin a han chah tir bawk a..
Keivawmhranga rin lawk ang ngei chuan Kangbur Pasaltha Nghovara chuan enthla tu a tir lut a; mipuite nunphungah engmah danglamna a awm lo tih leh tlangval tam zawk te pawh buanzawl ah kaiin lengi run sang te pawh zan dang ang bawkin an lawi ani tih an han hmuh chuan an thil hmuh te chu an pasaltha hnenah chuan hlim takin an thlen thuai a..
Kangbur tlangvalte hi sawmthum rual bawr vel anni a..Nghovara tih loh khawnbawl upa pathum dangin silai neiin an silai te chu an zinga Nghovara’n a rin zawh ber ber tlangval pathum te chu ken tir anni a. Lalpa Kawlhkhama erawh in inven nan ama silai a keng thung a..
Zanlai ar a khuan hun a pelh meuh chuan Vankal tlangvalte chu nghet tak a muhil tawh ah ngaiin Kangbur tlangvalte chu an lut ta tham tham mai a.. Pawl pathum ah an inthen a- Pakhat chu Lalpa Kawlhkhama pawl niin Vankal khaw kawtchhuah ah tlangval pahnih nen an lo awm a..Hetia Lalpa Kawlhkhama a kal ve kher nachhan hi chu Vankal Lalpa Hmangliana hi a hmuh lai ngei a phuar beh tir a sal atan a man a duh vang ani a...
Tin, Pasaltha Nghovara leh a pawl tlangval paruk vel chu Lalpa Hmangliana in lamah kal in a dang zawng chuan Vankal buanzawl lam an pan thung a.. Pawl thumna, tlangval sawmhnih bawr vel chuan ” Vankal tlangvalten thawh in hai ee..” ti a Vankal buanzawl ata rawn tho hmasa sa lo kah a an mau fei te a lo chhun thluk pawp pawp an tum lai tak chuan..an chhak kotlang lam atanga aw rawn chhuah in..”Vankal val rualten thawh kan hai ngai love.. “ tih ri an hre ta tlat mai le...
Chu ri an han hriat chiah chuan Pasaltha Nghovara au chhuak nghalin,” Che tawh suh u, chu ti lo zawng in Lalpa Hmangliana hi kan that dawn ania..” a han ti a..Mahse, hlauthawng awm a an khingpui te tumah in aw an rawn chhuah tak si lovah chuan Lalpa Hmangliana in chu an han luhchilh ta tehreng a.. a chhungah chuan tumah an awm lo tih an han hmuh takah chuan Vankal khua hian beih an tawh tur chu an lo in hre lawk ani tih Kangbur ho hian an hrethiam ta a!!
Ko chhak lam atang chuan,” In zavai khan hual beh in ni tawh e..” tiin Keivawmhranga chu a han au tuar mai a..Chutah zet chuan Nghovara pawhin an dinhmun a chhe zawk ani tih chu hrethiam in,” Aw rawn chhuahna lam khi kap rawh u..” an ti thawr mai a..Silai pathum nei an awm bawk a, Vankal tlangvalte aw rawn chhuahna lam chu an han rin kah pawp mai a, vanneih a siam in pakhat chu an kap let tawp mai a..
Dinhmun chhe zawkin thalfang an han thlah hmasak takah chuan Keivawmhranga pawh thinrim tawhin,” In thalfangte kha thlah ve ru le..” a han ti tuarh ruarh mai a.. Silai nei te chuan an silai te chu kap puakin tlangval dang mau fei hum te chuan thim tham zingah chuan an mau feite chu an han khawh fur fur mai a..A chung lam a tang anni bawk a, Kangbur tlangvalte pathum te chu an awm hmunah chuan an thi chiang kher mai...
Silai awm zawng a puah kim takah chuan a mu an thun leh hma in Vankal ho thinrim lutuk tawh chuan Lal mual a awm Kangbur tlangvalte chu an zu nang ching ta a. An hma berah chuan Keivawmhranga chak tak a tlan in a hma ni a ruahsur in chirhdiak a siam ah chuan a khup a tleng phei zar zar in a hma a kangbur tlangval pakhat awm chu a dul nemah tak mai chuan theihpatawpin a kut dinglama a chempui hum chuan an sat chawrh mai a; a sat zo chiah tih ah chuan a vei lama a ken a fei chuan amah rawn hnaih ber tu tlangval dang pakhat chu a awm zawn ah tak an chhun tlang zawk mai a...
Pasaltha Nghovara pawn amah rawn hnaih ber tu Vankal tlangval pakhat chu a ban uai thla hnawk khawpin duh tawkin a lo sat ve bawk a..
Chutah tak mai chuan Keivawmhranga chu a rawn au chhuak ta a..” Nghovar, ka chunga phuba lak tumin kan khua thleng thleng min rawn umzui ani lawm ni? Midangin nunna an chan a hliam an tawrh ve zel hi a ngai tawh lo e..Nang leh kei hi mal leh mal a inbeiin he kan khaw pahnih inhmuhthiam lohna hi a hmawr i bawk teh ang hmiang..” a ti ta charh charh mai a..
Bung - 36
Chutiang thu a han hriat takah chuan Nghovara pawh a tlawmngai hle tih hriat theihin,” E khai! Nauva! Khawmhma chem mai nen a inbeih leh a tak tak a chempui hriam tak nen a inbeih chu a in ang meuh lo ania..I ngam anih chuan Kei khualkai Pasaltha Nghovara, Lungchuang hnam, sa leh ral hma a zam ngai lo hi min han hmachhawn ta che!! ” tih pahin a chempui nen chuan Keivawmhranga malpui sah thler duai tum chuan a lamah chak takin a tlan phei ta a..Amaherawhchu, Keivawmhranga chu rang tak a insiamrem in chung lam a in tha zo tak a lo zuang thauh pahin chiang em em mai hian a dar a lo sah thler sak duai mai a...
Nghovara thinrim lutuk chuan a nghawng zawnah na takin an sat phei fua mai a; mahse tuan rang lutuk Keivawmhranga chuan chiang tak a lo bumin a ngal ah tak mai chuan duhthalin an sat chawrh mai a... Chempui hriam in ruh a tawng ri no chawk chu ngaihno a bei lem lo kher mai!! Nghovara na ti lutuk chu a per vawn vawn mai a...Che chang thei lovin a awm tawh ani tih a hriat chuan Keivawmhranga chu zawi muangin a hma a thingthi nuaih tawh Nghovara chu a pan phei ta chhak chhak a..
Nghovara chu thei leh thei lova rawn tawngchhuakin,” Keivawmhrang, I chempui kha a bil dah ang e, kha ka chempui hriam tha hian ka lu hi han la ta che..” a han ti hram a..Keivawmhranga chuan chhang ve nghal in,” Ka chempui in hriam loh lai a nei ngai love..” tih pah chuan Nghovara lu chu a la ta a…
keivawmhranga chuan,” Pasaltha huaisen leh rothap tak zawng i ni ngei e..Tunah chuan hahdam takin pianral pan tawh rawh khai” an ti deuh sap a... Chutia Nghovara ruang, lubung a let fel der tawh chu Vankal khaw tlangval pakhat thinrim lutuk chuan rawn pan hnai in deusawh tak a han chhir hrep a tum a. Chutah tak chuan Keivawmhranga chuan lo dang bet in,” Kan hmelma mah ni se Pasaltha huaisen tak anih hi.. Zahna lantir hi a phu tak meuh e..” a han tih tak ah chuan a thil tih tum chu a thulh leh ta a..
Chutia an pasaltha chhuan tawlawl ber Keivawmhranga kut a an thih takah chuan Kangbur tlangvalte chu an buai phi li ta mur mur mai a..An hnung lawk a an khaw Lalpa Kawlhkhama lah a kaihza vengtu tlangval pahnih te nen chuan an zam chhe kher mai!! Vankal Val Upa Kaibuaia chu au tuarh in,”Kangbur ho khan in hmanrua te leh in silai ken te kha dam khaw chhuah in duh chuan tunah la la hian rang takin paih thla vek rawh u..” vin takin a han ti a..
An dinhmun a chhe ta zawk ani tih a hriat chian hnu leh an khualkai pasaltha ber a thih tak si ah chuan nunna chan vek ai chuan tlawm mai loh chu tih theih nei tawh lova in hria in an ralthuam ken te chu an paih thla ta sap sap hlawm a…Kangbur Val Upa Ainguka’n,” Tlangvalte u..tumah tlawm suh u..thih thlengin bei zel rawh u..” a han tih ngial pawh chuan awmzia a nei hlei thei tawh meuh lova.. Kangbur tlangvalten Sapui Chaih Pasaltha che tla vel leh an khualkai pasaltha hmingthanga Nghovara lu a lak dan an han hmuh chuan an tiril a fan in an thau ah man tlat mai a; an khur chhe hman tlat tawh in a hma ang in an che chang tha ngam tlat tawh lo ani…
Val Upa Kaibuaia chuan an ralthuam paih thlak tak te chu Vankal tlangvalte chu a chhar khawm tir thuai a…Lalpa Kawlhkhama kaihza vengtu pahnih in an silai an paih thlak ve takah chuan an Lalpa pawh chuan a dinhmun chu hre thiam ve in,” Hmanglian, ka lu hi han la ta che..Duh thlang thei dinhmun ah ka ding tawh lo tih chu inhre mah ila Lal ngeiin ka lu hi an lak ka duh e..” a han ti chuai deuh raih a..
Val Upa Kaibuaia chu rawn tawngchhuak leh in,” An tlangvalte zawng zawng kha an kut te nghet takin phuar sak vek rawh u!” a han ti leh a…Chutah tak chuan Lalpa Hmangliana rawn tawngchhuakin,” A ngai love Pu Kaibuai..phuar sak an ngaih pawh ka ring love…” a han ti a..Lalpa Kawlhkhama lam chu en in ,” Kawlhkham, I lu lak sak che hi ka thil tum leh duh ani ngai love..Keimah ang tho a khaw khat Lal i ni ve a, Lal i nihna ang in zah takin ka dawngsawng ang che. Kan khaw pahnih tlangval te zingah thi leh hliam te nei ve ve thisen kan inchhuah ve ve a..Tawk tawh rawh se!! Inhmuhthiam lohna kan lo nei palh ang a ngaiin sal ah pawh man lovin in khaw lamah tha takin ka haw tir leh ang che..In silaite pawh a neitu theuhin inhawn leh ka phal sak bawk ang che u. Amaherawhchu, tun hnu ah erawh kan khaw lam leh ka khua leh tui te lam hawi zawngin kut thlak tumna thinlung nen i mit vawikhat mah rawn len leh tawh ngai suh ang che..Tin, Khawnbawl Upa Teknghawra pawhin a fapa Sumngena thihna vangin phuba rawn lak tum tawh hek suh ang che..Chuti lo zawng a leh pek ah chuan ka Sapui chaih pasaltha hi kei meuh pawhin ka dang bet reng thei tawh bik lovang” a ti ta siah siah mai a..
Thil tisual hmasa zawk anni reng chunga rilru chhia pu a Vankal khua a lut a an beih hnu ah pawh chutia Vankal Lalpa in a lo dawnsawn tak mai dan chu Kangbur ho chuan ropui leh mak an ti em em mai a..An phu loh zahngaihna namen lo dawng a inngaiin thinlung leh tih tak zet chuan an thil tih te chu an rilru in an in lamlet ve a..Lalpa Kawlhkhama pawn a lo chapo zia leh Lalpa Hmangliana dinhmun ah amah ngei hi ding ta se, Hmangliana chu a thah mai duh awm zia te ngaihtuah nauh nauh in Lalpa Hmangliana'n a chung a zahngaihna a lantir chu mak a ti tawp thei lova..
Khaw khat Lal ve ve mah ni se a khingpui pa chu a rilru chhungril takah chuan tluk lo a inti ta hle mai a..” In khaw lam hawiin tun hnu ah a tha lo zawngin kei leh ka khua leh tui te hian kan mit te kan rawn len tawh ngai lovang tih kei Kangbur Lal Kawlhkhama hian ka hming ngei chhalin ka intiam a. Tin, a theih chuan tun hnu ah chuan khaw in pawh leh thian tha tak kan nih zel tawh ka beisei bawk ..Lal ropui tak zawng I lo ni ngei mai tih zanin hian ka hre ta e !..” a ti ve ta hial a..
Tichuan Kangbur Lalpa leh a tlangvalte chu tha takin an silai te chu pe let in an haw tir ta a..An mitthi te pawh chu Kangbur khua a hlat tham deuh avangin an khua a luh pui leh kher tawh lova Vankal khaw tlangval thi te ang bawk a an phu ang ngei a zah tak a tuamhlawm leh anih dan tur ang tak a sawngbawl sak an intiam bawk a..
Kangbur leh Vankal hnam te hnam inhnaih tak mai, Hmar ah pawh Thiak hnam chi peng ve ve anni a; Upa te tawngkauchheh ang deuh in, a tir ah chuan han in nghirngho in thinrim in han inbei ve bawk mahse la, doralpui tak tak ang a in en reng chu a lo har in, a tawp ah chuan unau nge nge chu inngeih leh hun a lo awm leh thin te pawh ani ang e...
Bung - 37
Hun leh ni te a lo liam ve hret hret a. Lawikungi chuan a fapa in Faihriam khua a ropui tak a hming a han chher dan te a kal ve te ngei ka atang a hriat ve avang leh Kanbur hovin an rawn beih a an khaw chhanna a a thawhhlawk ber te zinga mi a ni tih a han hriat chuan a rilru chhungril tak chuan a chhuang ru ve em em mai a..Amaherawhchu eng ang a Pasaltha huaisen leh rothap, mi zawng zawngin “Sapui Chaih Pasaltha” tih hial in ko thin mahse chunnu anihna angin ani tan chuan a fapa mal neihchhun kha ani miau a, fimkhur hle tur in a chah lawm lawm thin a..
Vawikhat chu a fapa chu Faihriam khua a a chet tlat dan chungchang kim chang zawk a hrilh ve turin a ngen a. Amaherawhchu mahni chungchang sawi hi Keivawmhranga mizia anih tlat loh avangin a zawhna chu chhang ta lem lo chuan Faihriam khua a thil thleng chungchang a nu in a sawi chhuah tak avanga a rilru a rawn lang thut thil dang, tun hma atanga a zawh chak thin mahse a zawh hreh em em si chu a zawt let ta hlauh thung zawk a:
“Ka nu, he zawhna hi sawi hrehawm I tih ka rin thin avangin ka saisen tet a ta vawikhat mah ka la zawt ngai lo che a.. Mahse Faihriam khua ka han tum khan Rengpa Tuchhinga khan he zawhna hi kan Lalpa Hmangliana a zawh avang leh tunah chuan tlangval ka lo nih ve tak ah chuan he thu hi ka hriat ve a awm tawh tho a ka ngaih avangin ka zawt duh che ani.. He khawvelah hian Pa hi ka lo nei ve ngai anih chuan tunge ka Pa hming ni a, eng hnam nge ka nih a tu thlah nge ka nih min hrilh ta che..Nge ni a thenkhat ten hmusit leh diriam tak a min tawngkhum thin ang hian thlahtu mumal sawi tur ka nei ve lo zawk?…” an ti phawng mai a.
Lawikungi chu thaw chhuak halh in,” Ani taka sin bawih a..He thu hi vawikhat mah I U nen hian ka la hrilh ngai lo che u a..In puitlin hnu ah erawh he zawhna hi min la zawh hun a awm dawn tih chu ka hre lawk tho a..Chu hun chu a rawn thleng ta pawh a ni teh chek ang chu... Uluk takin i lo ngaithla dawn nia..Pa chu I nei ve tehmeuh mai, mahse i Pa erawh chuan I pian hma hauh in mual min liam san tawh a..” an ti te te a..
Hreh deuh chung a sawi tih hriat tak mai hian an chhunzawm leh a,” i hriat tawh angin kei hi Lawitlang zinga Hrangchal hnam ka ni a… i Pa hming chu Saithlunga ani a, Zote hnam ani e. Zote hnam kan nih avang hian tun a kan khua Thiak hnam peng ho sahchhuah ah hian chhung leh kua tur leh kan thlavang hauh tu tur baih vai reng chu kan ni a… I pa te hi khaw chhak lam, ka pasal neih hma a kan khua Chawnchhim bul a awm, Lal ropui leh pasaltha hrat khawkheng ni bawk, Lalpa Hrihlera lalna Zote khua a cheng thin ani a...
[ Chawnchhim hi tun a Champhai khua ni ta khi ani a, Champhai khaw hming hlui ani.. Lawitlang hnam peng Chawnchhim ho khaw sah chhuah ani.]
… I pa pa, I pu hi a vanglai na na na chuan pasaltha huaisen tak ani a, a hming chu Ngulkauva ani ; I pu Ngulkauva pa chu Tlangfilha ani thung ..I pu pa Tlangfilha hmingchawi hian Zote hnam zingah pawh Tlangte chi peng ti a hriat an ni a..Thlahtu inchhuanna tham I nei ve teh meuh mai..” a han tih takah chuan Keivawmhranga hmel pawh hlim tih hriat takin a rawn eng ve tan a..
Lawikungi chuan chhunzawm zelin,” I pa hi Zote khaw khawnbawl upa Hniakhrawla fapa Chhumbawha nen hian an inkawm thin a. I pa nen hian kan khua Chawnchhimah pawh ka nulat laiin min rim turin an rawn kal dun fo a..I pa nen a kan inneih tak zawk si vang ani chek ang chu, Inkawm thin e ti lo chuan kan inneih hnu chuan a rukin Chhumbawka hian I pa hi a thik in a haw ru ta em em mai a.
… Vawikhat I pa leh an thian thenkhat dang te nen an ramvak ho chu an pahnih chauh chuan sa khan pakhat an chang dun a..i Pa hi a ruk a a thik em avangin a silaiin a kap ta mai a..Amaherawhchu, thil awm dan ka hai mawlh loh avang chuan thinrim a kan Lalpa hnen ka thlen takah chuan a fin vervek chhuah in ‘Sa emaw ka ti a, ka kap palh ta mai alawm maw le..’ ti a a tan luih tlat tak avang leh a pa khawnbawl upa te anih bawk si avangin thiam a chang ta zawk hlauh mai a. Tin, i pa damlai pawh in i pa a huatzia lah thenawm khawveng te lak a a thup thiam em avangin tumah in ka thusawi lah an ring bawk si lova..
….Chutia Lal hma meuh a ka puhchhiat tak si ah chuan kei leh ka fate nunna hial tan pawh a hlauhawm thei ani tih hria in raipuar mah ni ila a zan a zan in I Pu Ngulkauva chuan khua chhuansan in Chhumbawha um phak lohna tur ram a pem mai turin i U Chawnghliri kum li mi lek nen chuan a zan la la chuan min ti ta chuk chuk mai si a..Thih leh dam inkar tak meuh meuh ah kawng lak a Luipui pahnih kan thiam ang tawk a mau pum te siam a thei leh thei lova inhleuh kai a tlang leh mual tam tak rawn kal pel in he Vankal khua hi kan rawn thleng thei ta hram ani..” mittui tla kiang kiang chung chuan Lawikungi chuan a ti ta a
Chu thu a han hriat chuan Keivawmhranga chu thil muk tak a ngaihtuah ni awm tak hian engemaw chen chu engmah sawi lovin an ngawi vang vang a..Bang kil a a chempui leh a fei hriam tak a dah chu vawi leh khat ah a la thut a, rilru siam fel ta ni awm tak a thawk han la deuh hawk pah chuan,” Kei Saithlunga fapa leh Ngulkauva tupa hian, khawchhak lam khua te chu ka hrut chhuak dawn e..! “ a rawn ti chhuak ta phawng mai a...
Next Chapter: Bung 38-40
Next Chapter: Bung 38-40
Post a Comment