By: Isaac Zote
Bung- 38
Faihriam khua a ropui tak a hming a chher atang khan Keivawmhranga chu kha mi tum a chhiah chawi tur a kal ve khua te ah mai pawh nilovin chung hunlai a Hmar khaw tam zawk ah te chuan mi tam takin amah a takin la hmu kher lo mahse a hming erawh an hre bel ve hle tawh a.
Tin, Faihriam khua atanga an haw hnu a Vankal khua a Nghovara leh Kangbur ho a beih dan te chu mi tam tak titi ti tam tu leh sawi nuam tih zawng a lo ni ve bawk mai bakah an khua leh a chheh vel a mikhual zin vei vak rawn lawi lut te pawh chuan a chanchin chu khaw dang dang ah an pu darh ve ta zel a..
Tin, min tam tak a hming dik tak hre lo pawhin “ Rengpa Chawilung Chawi Pasaltha” emaw “Sapui Chaih Pasaltha” ti te in an lo hre ve bawk a. A then chuan heng an kohna te hi mi pakhat nilovin Pasaltha hran hran an kohna emaw an lo ti ve mek bawk..
Faihriam khua a sapui sum sarih nen a an inbeih a, sapuiin a hmai a tin hriam tak a a ham sakna pawh a dam felna a lo rei leh tawh a. Amaherawhchu, a ham thuk ve thawkhat viau avangin ser erawh kha sapui khan Keivawmhranga biang dinglam ah a hnutchhiah ve tho mai a. A biang dinglamah hian a chhuk zawngin sapui tin hriam tak pathum hamna chu hmun thum ah a in rin thla a.
Chu ser a bianga a neih tak avang chuan thenkhatin Keivawmhranga hi a hmelthat tur angin a hmeltha zo lo lek lek ani an tih laiin thenkhat erawh ve thung chuan engemaw zawng tak a mawi danglam tiin amah Keivawmhranga pasaltha hrat khawkheng anih na nen pawh a inhmeh riau in an lo hre ve mek bawk a. Midang ngaihdan chu eng pawh lo ni se, he a hmai a sapui hamna ser hmun thum a in rin thla hi hun lo la kal zel turah hai rual lova Keivawmhranga hmel chhinchhiahna pawimawh tak a rawn ni chho a..
A tak ngei a a hmel hmu tawh leh la hmu ngai miah lo khual khua te pawn “Keivawmhranga chuan a hmai a sapui hamna ser a nei” tih thu hi an sawi tlangpui thin a, khaw thenkhat hla deuh leh Vankal khaw bul lawk a awm khua a chengte zingah pawh chu thu hre ve kher kher lem lo te pawh an awm nual tho bawk. Keivawmhranga chanchin leh pianhmang te hi Chhura thawnthu sawi ang deuhin khaw hrang hrangah sawi dan inang lo deuh te a lo piang ta a.
Kan pi leh pute kha ziak a thil dah tha thin an nih lem loh bawk avang leh tawngka a thawnthu leh chanchin te inhlanchhawng an lo nih mai thin avangin a awm lo hran lem love. Upa in unau thawnthu sawi mah a inang lovin a dang thei an lo tih thin ang deuhin thenkhatin Keivawmhranga chanchin leh a chet tlat dan dik thawkhat tak a an sawi laiin thenkhat erawh dik tawk chiah lova sawi uar leh belh deuh hlak ching te pawh an lo awm ta zel a.
Khual thuthang a tam in khaw thenkhat ah lah Keivawmhranga hi pasaltha tihbaiawm leh hlauhawm tak anga lo chhuah ta mai lah bo lo; zan a naute tlei hlei thei lo tih thaih nan tak te lo hmang tawk an awm ve mek bawk a…
Keivawmhranga’n khaw chhak lam khua te a hrut hma chuan a thiante pahnih Hnamlena leh Chhunhreuva te chu sa pel a ramchhuak turin a sawm a. Hnamlena hi Pasaltha Sialkhama fapa ani bawk nen, a pa hian a fapa hman tur midang ta silai a hawh sak a. Hetih hunlai hi chuan ram a la tha in hawina lam apiang chu ngaw dur khup vek emaw tih mai tur hi a la ni a, sa pawh an la tam hle a..
An thian za ho pawh chu khua atanga thui tak kal ngai lem lova hlawhtling nghal in Hnamlena chuan sakhi lian tawk tak a kap thlu a; Keivawmhranga erawhin sazuk pa tuai a feiin a khawh hlum thung a.. Chhunhreuva erawh kut bengin a haw a ngai hlauh thung..
Khua atanga a hlat lutuk loh bawk avang chuan a nam chhiat lutuk hman loh ringin an sa te chu ramhnuai a rep buai lovin rang tak a khaw lam pan pui an tum ta zawk a.. Hnamlena leh Keivawmhranga te chuan an sa kah leh khawh hlum ve ve te chu khua ah an pu lut ta zawk a.. Khua an han thlen chuan Keivawmhranga te inah chuan an sa kah te chu an thian pathum chuan an chan sawk sawk nghal a.
Hnamlena’n sakhi a kah dar dinglam chu silai a hawhna pa hnena pek turin an dah hrang a; chutiang bawkin Lal leh Thirdeng sachhiah tur te pawh an siam fel zung zung a. A dang zawng erawh sa kutthlak hmasa tu chan bik tih pawh awm hranpa chuang lo chuan an thian za ho pathum chuan zat inang theuhin hlim takin insem hnu ah thenawm khawveng te sem tur an dah hrang leh a.
Sa an chan lai chuan Keivawmhranga chuan khaw chhak khua te hrut chhuak a, a thlahtu te lo chenna khua te han tlawh a han zawnchhuah a tum thu chu a thiante pahnih pawh chu a hrilh ve ta a…
Hnamlena leh Chhunhreuva chuan zui tum ve nasa viau mahse Keivawmhranga chuan eng chen nge a thang dawn tih pawh a hriat loh thu leh a awm loh chhungin Vankal khua in thil duhawm lo eng pawh tawk thei ani a, chu mi hunah chuan an khaw chhan tur a an pahnih chuan an awm a ngai ani tiin a hnial luih ve tlat thung a. Tin, eng tia rei nge a thang dawn tih a hriat loh avangin a thiante pahnih chu an hman remchan ang ang a a nu Lawikungi lo lama lo lawm zawk turin a ngen bawk a.
Bung -39
A thian pahnih te pawh chuan Keivawmhranga thusawi chuan dikna chin a neih tih an hriat bakah anni tan pawh lo lam a hna tul kalsan vek a engtia rei tur nge tih pawh hriat loh khaw dang daih a han thangbo chu rem chiahin an hre lo ve bawk a. Lungawi takin a zinna tur ah chuan zui ve loh mai zai chu rel in a awm loh chhungin a nu Lawikungi pawh an theih ang tawk a an lo tanpui thin tur thu leh engmah in lam rawn ngaihtuah miah lo turin an hrilh ta zawk a.
Chu thu a han hriat chuan Keivawmhranga pawh a lawm em em mai a, hetiang in nghahna ngam thian tha a nei hi vannei a intih zia te hrilhin thian tha te mah ni se lawmthu te sawi luam in an inthlah fel ta a…
Keivawmhranga pawn ram hla tak a a zinna tur atan chuan funpui er tlut tlut pahin a suangtuahna te chu khaw chhak ram hla takah te chuan a len vel a..Rei tak chhung eng ang sakhming te nge a thlahtu ten an put ve ang ti a a tetlai atanga a lo ngaihtuah ve chamchi thin te an hre ta mai te chu ngaihtuah nawn leh in mak an ti thar leh hnuhnawh vel a..
”Ka pa hming chu Saithlunga maw lo ni reng a? Ka pu hming lah Ngulkauva lo ni rengin…” te a rilru in a han ti leh rih thin a, a khat tawkin amah chauh chuan lawm avangin a nui leh vei suk thin a. Khawchhak lam ram te chu hrut chhuah a chak in a phur tak zet tawh ani…
Zan lam a buanzawlah chinchang hre tur zawk a a ngaih Hnamlena pa Pasaltha Sialkhama a zinna kawng a a zawh tur te a zawh fel hnu chuan Keivawmhranga chu a tuk zing hma taka in lam a lawiin hma takin tukthuan a bar a..Khawchhak lam ah a zin dawn ani tih lo hre ve tu an khaw Khawnbawl upa pakhat nupui chu a chhuah hma chuan hma tak a an in a rawn leng lut in Keivawmhranga’n khawchhak lam a a tlawh tur khua te zinga mi a khiang awi ta a unaunu ta tur thi hna chu Keivawmhranga hi a mi rin zawh zawng anih avangin a hnenah a rawn hnutchhiah ta a…
A nu Lawikungi chu a hma a a lo hrilh lawk tawh ang a khaw chhak lam zin tur a a chhuah tur thu chu hrilh nawn leh in a hriamhrei te leh kawng lak a a mamawh tur dangte nen chuan Vankal khua chu a chhuahsan ta a..
Vankal khaw thuthmun tlang a chhuahsan a chhak lama a piah tlang chu a chuang kai ta a..Chu tlang atang chuan reilote chawlh hahdam hlek pahin a kalsan tak an khua chu a han thlir let a.. Vankal khua hi khaw hmun rem leh nuam tak mai, a chhip atanga zawl thla riai riai ani a; kham mawi tak tak ten hual velin a kal khan hre lo khualkhaw mi tan phei chuan luh harsa tak ani a..
Keivawmhranga an khua ral atangin a han thlir chuan an khaw chhip lam chu chhum in a lo bawh chiai mai a..An khaw thleng leh a thuthmun tlang chu mawi a tiin khuanu in duh ang thal a duan ni awm a mawi ni mai hian a hria a, engtik ah emaw chuan haw leh ngei tur a intiam in khawchhak lam chu a pan ta zel a..
Keivawmhranga chuan nakin lawkah chuan lui a zu thleng thla a. Keivawmhranga zin tan hun hi Thlahmur (Hmar thla chhiar dan a July thla hi) niin ruahtui tam lai ani bawk a, chu lui pawh chu a lian ve thawkhat viau mai a. Tlem a a tet deuhna lai leh hleuh kai a awlsam deuhna tur te chu thlang fel thuaiin ral lehlam chu a kai ta ani.
Keivawmhranga’n a pan hmasak ber tum khua hi Vankal atanga khawchhak lam a awm, Vankal ang tho a Thiak hnam peng pakhat tho in a an sah chhuah leh an hnam hming chawi a khaw hming an phuah tak Khawzawl khua ani.
Tlangval chak tha leh vanglai hun hmang chho mek ani bawk a, kawng lakah rei taka chawl te a nih lem loh chuan khaw thim hma chuan a tum ram chu thleng chho ve mai turin a in beisei ani..Chhun chaw fak hun a lo thlen chuan hmun rem laiah chuan reilo te chawlin Khawzawl khua chu a pan ding leh ta vang vang a.. Lo sul haw hun awm velah chuan khua pawh a hnai thawkhat viau tawh ang chu maw ti a a ngaihtuah rauh rauh lai chuan thil pakhat hriatchhuah thut a nei ta..
Han indap vel eng ang mahse, an khaw Khawnbawl upa nupui in a unaunu ta tur thi hna a ken tir kha a hmu zo ta tlat lo mai a, a kalna hnu te chu han chhui kir leh in engemaw chen a han zawn tak ngial pawh chuan thil awm ngai lo zawn ang hauhin a khuangcher bo ta hmak mai si a..
“Khawnge ka thlauh ang aw..? A bo chuan a va han pawi dawn tehreng em!!” ti a inngaihtuah chung a nasa tak a zawn pawh chuan a hmuh zawh reng reng tak lovah chuan ..”Aaa…a nih nih ni tawh mai rawh se, reilote ah khua a thim dawn tawh tho tho si a, vawiin ah chuan ka zawng hmu tawh chuang awm love..Khaw thlen hnu ah tha thar in naktuk zing khaw eng ah ka zawng leh zawk mai n’ang e…” ti a thuthlukna siam fel in khaw lam pan zai chu a rel leh ta zawk a..Chutia khaw lam pan a thui pawh a pen hman lo tih ah chuan thil mak tak a rawn thleng ta thut mai le…!!
A hma a khaw thiang vuk ni si kha , a awmna mual chauh chu thawklehkhat ah chhum chhah tak mai hian ruahpui van awn a sur dawn emaw tih mai tur hian a rawn tuam mup mup mai a,kawl a phe zawr zawr in khawpui ring mangkheng in a ri dur dur mai a..Mahse, thli a thaw eih lovin ruah mal khat mah a far bawk si lo…Keivawmhranga erawh in engah mah ngai hran lovin a kal ngaiin a kal zel tho a…
Bung - 40
Nakin lawkah chuan a chung a chhum chhah tak chu vawilehkhat a la bo tu awm ang mai hian an rem leh ta duak mai a. Chutah le… khawi atanga rawn kal nge tih pawh hriat loh thlipui na lutuk chu a rawn tleh leh ta hum hum mai a..Kawng sir a thing leh mau dingte chu a chhem tlu fai vek dawn emaw tih mai tur hian an awn ang lawp lawp a; mahse Keivawmhranga chu hlauhna eih pawh nei lo ni awm tak hian a kal pangngaiin a kal ngat ngat tho mai le…
Thawklehkhatah thlipui chu reh leh duakin a hma lawk a a rik nasat tehreng nen tunah chuan mak tak maiin thereng leh rannung dang te hram ri tak ngial pawh hriat tur a lawi a awm tawh si lo… Chutah chiah mai chuan kawng chhak lam atang hian aw ri ni ngei a ngaih theih, an sawi awmzia erawh hriat theih si loh aw chi hrang hrang leh a then te chu rapthlak leh tihbaiawm tak tak a rawn in pawlh ta nuaih mai le…
A then te chu eng nge an sawi hriat theih si loh chuan aw thum takin an tawng bul bul a, a then erawh pitar nui thler uar uar ri leh naute tap ri te anni..Chung aw ri rapthlak tak tak te chu hre ve ni ngat se chuan, pasaltha inti tam tak te chu an thau ah man in thlan tui fim in bual huh vek khawpin an khur ru zawih zawih tawh ngei ang! Mahse pasaltha dang ani tlat si lo!! Keivawmhranga ani miau hek si le!!
A thil hriat te chu a theng thawngah engmah a thawk lo tih hriat tak hian Khaw lam pan a kal chu a thulh duh chuang der mai si loh takah chuan aw ri rapthlak tak tak te chu an beidawng ve ta ani chek ang chu, rei vak lo hnu chuan an reh ve leh mai bawk a…Mahse, aw ri rapthlak tak tak te chu chhak lam a sakei rum hum hum ri in a rawn thlak leh ta tlat mai le… Amaherawhchu,tun tum erawh a hma ang ani ta hauh lo tlat mai..
A hma kha chuan aw ri ringawt, a tak hmuh tur awm si lo kha anni a, tunah erawh kawngchhak lam atang chuan a nu Lawikungi’n a hming chawi a fapa hming a sak ngei Keivawm (Sakei dum) lian tha tak, mawi leh tihbaiawm em em mai chu muangchanga rawn chhuk thla in Keivawmhranga kalna tur kawng chu a amah hmachhawn zawngin a rawn dang ta tlat mai le…A mit tle ralh leh ngaihno bei lo zet mai chuan Keivawmhranga mit takah chuan rawn en in a ngur ta chher chher mai a, engti kawng zawng mah in Keivawmhranga chu kawng ken mai a tum hauh lo tih chu a chiang reng mai si..!!
Chutah zet chuan Keivawmhranga pawn a ning ve thawkhat ta aniang, muang ban chap leh hlauhna chhe te mah awm lo tih hriat tak aw ki hian, “ Ramhnuai pasaltha..Nang leh kei hian in hmelmakna chu kan nei hauh lo na a; mahse, chhe te mah in ka tawlh hnung bik hauh dawn lo tih hria ang che.. khatia kawng min kian lova ka kalna tur kawng dang zawng a I ding lui tlat dawn anih chuan kan inbeih mai chu a ngai ngei ang le…I duh thlang fel thuai rawh!! “..tiin a chempui leh fei ki bar hriam tak te chu, chu Keivawm mit ah tak en reng chung chuan a hum nghet sauh sauh a…
Chutia Keivawmhranga’n an sawi zawh chiah chuan kawng chhak lam a thingkung phen atang chu mi pakhat hi za mangkheng hian a rawn nui chhuak awr awr mai a…Nui ri a rawn rik rual chiah chuan Keivawmhranga hma a ding Keivawm pawh chu kawng thlang lamah muang changin a chhuk thla ve ta a…
Keivawmhranga’n nui ri a hriatna zawn kawng chhak lam a han hawi chhoh nak chuan iptepui nen a ding patling, tlem a upa lam deuh tawh; mahse putar tak ti a sawi tur la ni chiah si lo; dung tawi lam deuh; cher leh sa pan lam lek lek; hnar leh khabe zum tha tak; hmuihmul chhah lutuk lo leh khabe hmul sei lutuk lem lo nei hi nui hawk hawk chungin a rawn chhuak a… “ I mitah hlauhna chhe te mah hmuh tur a awm lo mai a!! Khualkai pasaltha ka ni ti a inchhal tam tak hlau leh khur chungin bak lengin an lo tlanchhe thin asin…Hlauhna an tih hi I pian pui ve lo nge ni a I thisen zamah te khan a luang ve lo zawk? Sapui Chaih Pasaltha Keivawmhranga ni awm reng i ni ngai e..” an tih takah chuan Keivawmhranga hmelah chuan mak tihna a rawn lang a..
Mak ti tak chung chuan,” Engtinnge ka hming I hriat a?” an tih deuh phawng a… A hma a ding pa chu nui leh hawk hawk chung chuan,” Vala, keini ang chin hi chuan khawvel ah hian thil tam tak hi kan hre tawh asin..Chubakah Sapui hamna ser i bianga hmun thum a inrin thla te kha ka hmuhhmaih i ring em ni?” …….”Kei chuan tunge i nih ka hria che a, anih nang khan tunge ka nih I hre ve em?” tlem a el sen lek lek tawngkam hian la nui sang tho chung chuan a han ti ve a..
“ Nang pawn min hriat chuan kei pawn ka hre ve tho tur che ani dawn lawm ni?” Keivawmhranga chuan an ti let ve sak a…
Keivawmhranga chhan dan chuan a nuih a ti za vak tawh lo ani tih hriat tak chuan ,” I hriat chuan peh hel kual vel lo khan han sawi vat la ti nia..” thinrim awki lek lek hian a ti tawi deuh ta hmak mai a..
A hma a ding pa chu mihring anih ngai chuan eng ang mihring fakau nge maw anih ang le? Nge hringfa nilovin Huai leh Phung, Khuavang emaw Rammi fate ani hial zawk? Keivawmhranga tan mi hlauhawm emaw thil tha lo thlen tu ani thei mai ang em?? Kan la hre chho zel aniang chu...
Next Chapter: Bung 41-47
Next Chapter: Bung 41-47
Post a Comment