By: Isaac Zote
RECAP: Keivawmhranga’n nui ri a hriatna zawn kawng chhak lam a han hawi chhoh nak chuan iptepui nen a ding patling, tlem a upa lam deuh tawh; mahse putar tak ti a sawi tur la ni chiah si lo; dung tawi lam deuh; cher leh sa pan lam lek lek; hnar leh khabe zum tha tak; hmuihmul chhah lutuk lo leh khabe hmul sei lutuk lem lo nei hi nui hawk hawk chungin a rawn chhuak a… “ I mitah hlauhna chhe te mah hmuh tur a awm lo mai a!! Khualkai pasaltha ka ni ti a inchhal tam tak hlau leh khur chungin bak lengin an lo tlanchhe thin asin…Hlauhna an tih hi I pian pui ve lo nge ni a I thisen zamah te khan a luang ve lo zawk? Sapui Chaih Pasaltha Keivawmhranga ni awm reng i ni ngai e..” an tih takah chuan Keivawmhranga hmelah chuan mak tihna a rawn lang a..Mak ti tak chung chuan,” Engtinnge ka hming I hriat a?” an tih deuh phawng a… A hma a ding pa chu nui leh hawk hawk chung chuan,” Vala, keini ang chin hi chuan khawvel ah hian thil tam tak hi kan hre tawh asin..Chubakah Sapui hamna ser i bianga hmun thum a inrin thla te kha ka hmuhhmaih i ring em ni?” …….”Kei chuan tunge i nih ka hria che a, anih nang khan tunge ka nih I hre ve em?” tlem a el sen lek lek tawngkam hian la nui sang tho chung chuan a han ti ve a..
“ Nang pawn min hriat chuan kei pawn ka hre ve tho tur che ani dawn lawm ni?” Keivawmhranga chuan an ti let ve sak a…
Keivawmhranga chhan dan chuan a nuih a ti za vak tawh lo ani tih hriat tak chuan ,” I hriat chuan peh hel kual vel lo khan han sawi vat la ti nia..” thinrim awki lek lek hian a ti tawi deuh ta hmak mai a..
A hma a ding pa chu mihring anih ngai chuan eng ang mihring fakau nge maw anih ang le? Nge hringfa nilovin Huai leh Phung, Khuavang emaw Rammi fate ani hial zawk? Keivawmhranga tan mi hlauhawm emaw thil tha lo thlen tu ani thei mai ang em?? Kan la hre chho zel aniang chu...
Bung -41
Chutia a hma a ding pa chuan tunge a nih sawi vat tur a Keivawmhranga an tih let ve tak siah ah chuan Keivawmhranga pawh chu muangchang a rawn tawngchhuak leh in:
“ Eee… Hmar dawithiam hmingthang a sakhming an sawi bang loh Lalruanga ngei I nih ka ringhlel mawlh love…” Keivawmhranga’n a han tih tak ah chuan a hma a ding pa chuan Keivawmhranga chu mak ti lutuk a en ve tawh thungin “ Vala, eng ti ti a hre thei nge maw I nih ngai le? Vawikhat mah kan la intawn awm leh a hma a kan khua a I la rawn zin awm ka la hre bawk si lova..I kum lah chu a la naupan hmel phian bawk si..” a han ti a..
Chuveleh nui var var chung a chhangin,” Dawithiam ropui chu ni ve hauh lo mah ila keini ang chin hi chuan thil tam tak kan hre ve tawh tho asin..” fiamthu a a han tih chuan dawithiam Lalruanga chu a hma aia nasa zawk mah chuan a nui leh ta hawk hawk mai a…
“Vala, I huaisen hle mai !! Ka dawi an hlauh avang hian min fiam ngam tu chu sawi loh min be ngam tu takngial pawh kan khua ah ngei pawh hian an tam lo asin !! A then te phei chuan ka chenna in takngial pawh an kal pel ngam lo thin ania..Tunge ka nih a hma atanga I hre reng chung pawhin I mizia leh min biak danah lah danglamna engmah hmuh tur a awm hauh si lo..Nang zet hi an sawi pasaltha ngei chu I lo nih dawn hi !! ” a ti ve ta hlawl mai a..
Lalruanga bawk chuan rawn chhunzawm leh in,” A thu hrim ah nichin khan saw lai deuh ah khan engnge maw I zawn vak mai ni?..” a han tih chuan Keivawmhranga chuan thil awm dan engkim chu a hrilh ta a..Lalruanga chuan muk tak a ngaihtuah tih hriat tak a a khabe meuh han dawm vang vang hnu chuan thil eng nge maw tha tak mai ngaihtuah chhuak thut ni awm hrim a a hmel a phurna rawn lang in ,” Vawiin ni kan intawng hi khuanu remruat pawh ani ta ve ang ka ti !! Ti teh Keivawmhrang, inremsiamna I nei ang hmiang… I thi hna tih bo chu ka zawn hmuh sak che anih chuan ka mamawhna ah che min tanpui I intiam a ngem?” a rawn ti ta hluai mai a..
Keivawmhranga ve thung chuan, “ Eng thil ah nge keini ang tehlul hian nangni ang dawithiam chungchuang te chu kan tanpui ve theih ang che u?” hawihhawm tak a a han tih chuan Lalruanga chuan rawn chhang thuai in,” Ni lo, vawiin ni kan intawn dan atang hian nang chauh hian min tanpui thei ani tih hi ka ring nghet tlat ani..” a han ti te te a.
A iptepui atang chuan bur te ni awm tak rawn la chhuakin a chil lem khawlh pah chuan an chhunzawm leh a ,” Thil awmdan chu hetiang hi ani e…Hei hi ka dawibur te leh chhe zawk ani a. Ka dawibur tha zawk hi mihring te mai pawh nilovin Huai leh Lasi te pawh hian an hlauh ruk theih em avang hian engtin emaw tak a min lak sak a min neih sak dan tur kawng ringawt hi an dap chamchi thin a. Zan khat chu ka muthilh hlanin ka mumang lam a min bumin ka dawibur te ka venna dawi chu Khawpuitan Lasi ho hian min sut sakin ka dawibur tha mi chu min ruk bo sak daih mai a..
...A chhuh let tum a kal ka tum lah chuan an Lasi Lalnu Tantinchhingi chuan Khawpuitan tlang lawn chho thei lo turin dawi chak tak hmangin min dang tlat mai bawk si a. Ka aiawh a min kal sak a ka dawibur min han chhuh let tur chuan kan khaw Lalpa leh a khawnbawl te pawh vawi tam ka ngen tawh a; chutiang bawkin kan khaw pasaltha te leh khaw dang atanga rawn zin khualkai pasaltha huaisen inti tam tak te pawh ka ngenin min han lak sak thei anih ngat chuan thilpek tha tak tak te pawh ka tiam hlawm thin a, mahse Lasi ho dawi chu an hlauh em avangin tun thleng hian tumah Khawpuitan a ka aiawh a han chho ngam an lo awm lo chu anih hi maw...Ka dawibur tha mi min han lak let sak leh tur chuan nang ngei hi kal thei la ka lawm hle ang...” beidawng aw ti hriat tak mai hian a ti chuai raih a...
[ Khawpuitan tlang hi tuna Chawngtlai khaw chhak lawkah khian awm in tlang sang tak mai ani a. A san zawng hi official takin tehna a la awm lo ani mai thei a; amaherawhchu, record thenkhatah chuan 7003 feet tih te in a inziak thin a. Hei hi a dik tak tak anih ngai chuan Phawngpui tlang leh Lengteng tlang dawtah chuan Mizoram a tlang sang ber ani hial awm e. Tun hma chuan Lasi Lalnu Tantinchhingi rorelna hmun ni a ngaih ani thin a..Chawngtinleri tuallenna Tan tlang nen erawh hriat pawlh chi anni lo thung. Tlang hran daih ve ve anni..]
Keivawmhranga pawn uluk tak a dawn in ,” Miin ringzo takin an ro thil hlu ber te zinga mi ka kutah an thawn ve a, a bo hlen chuan a va han zahthlak dawn teh lul em!! Tin, ka thil tih bo chu han chawi dawn tehreng pawh ni ila, kei tehlul hian khawi ami mah thi hna emaw a hlutna tlukpui tur awm thil dang han pek let ve tur ka nei awzawng dawn si lo...” tiin a rilru te te a inngaihtuah hnu chuan thuthlukna siam fel tawh tih hriat tak a rawn thaw chhuak halhin
“I sawi ang chuan ni rawh se...” a ti ta a..
A thu hriat chu a awih chiah lo ani chek ang chu, Lalruanga bawk chuan.” I thusawi ah chuan i ding ngam tak tak meuh ang maw? Khualkai pasaltha tam tak te ang bawk khan hlau leh khur chungin i rawn tlanchhe ve mai ang e..” fiamthu ti tak deuhin a rawn ti leh kher a..Mahse, a hma a ding hi khualkai pasaltha dang pakhat ve mai ani lo tih hi a la hrechiang tawk lo tlat atin ni, a dem awm hran lem loh e..
Keivawmhranga pawn Lalruanga thil sawi chu a ning ve ta deuh aniang e, fiah tak leh hlauhna leh zamna chhete mah awm eih lo mitmeng tih hriat tak mai chuan Lalruanga chu melh kalh pah chuan:
“Keivawmhranga ka ni ngai e....Vawikhat ka rilru ka siam fel tawh chuan ka thlak thleng ngai lova; vawikhat thil ti tur a tawngka ka chhuah tawh chuan ka sawh sawn tawh ngai hek lo..” muang ban chap hian a han ti a...
Bung- 42
Chutah zet chuan Lalruanga pawh chuan a hma a pasaltha ding chu pasaltha dang ang mai mai ani lo tih chu a hrethiam ve tak tak ta chiah a, a fiamthu lo ani tih a mitmeng atanga a han hmuh chuan a mitmeng chu a hlauhawm lek lek zawkin a hre nghe nghe a.. Hmelma atana a duh loh tawp tur mihring niin a hre ta a..
Lalruanga pawh chuan engmah sawi tawh lo chuan a dawibur chu a han hawng a, a chhung ata chu meikhu var ni awm tak hi a rawn chhuak a, a hmui a chhem darh in dawi hla a han chham khum ta a...Dawibur atanga meikhu ni awm tak chu thlawk darh chum chumin tiauchhum ang mai ah hian an chang ta a...zawi zawiin an awmna mual leh a chheh vel ruam leh mual dangte pawh chu an fan chhuak ta hlawm a..
Hetih chhung zawng hian Lalruanga hi a maimitchhing reng a..Rei tawk fang a han maimitchhin hnu chuan rawn meng chhuak hlawl in ,” Vawiin chhun lama i chhun chaw fakna ah khan thi hna chu i thlauh anih saw...lo nghak rawh, amah in a rawn thlawk let e..” a ti ta hlawl mai a.. Keivawmhranga pawh chuan Lalruanga thusawi awmzia chu hre chiah lem lo mahse a lo nghak ve tawp mai a...
[ Zo hnahthlak hnam te, abikin tuna Mizoram a cheng hnam hrang hrangte zingah hian Dawi hla leh Thiam hla ah te hian Hmar tawng a tam ber ti ila kan sawi sual awm love...Lusei ho rawn thlang thlak hnu ah pawh hmanlai Bawlpu leh Sadawt te pawh kha eng hnam pawh ni se , an thiam hla te kha Hmar tawng a phuah anni tlangpui thin ani (Bawlpu leh sadawt te hi Hmar hnam an tam thin a; puithiam hnam deuh anga Hmar ho hi ngai leh sawi pawl pawh an awm ..Mahse an vai erawh chuan Hmar anni vek kher kan tihna lam erawh ani lo thung)]
Nakin lawkah chuan mihring ban phak tur awm vel a sangah chuan tiauchhum zingah chuan a thi hna tih bo ngei chu amah in boruak ah a rawn thlawk dalh dalh mai a..Keivawmhranga chuan mak ti lutuk in a damchhunga vawi khat mah a la hmuh ngai loh thil a hmu ani tih hriat tak mai hian a thlir dauh dauh mai a...Zawi zawi a rawn thlawk delh delhin Lalruanga leh Keivawmhranga dinna a rawn thlen meuh chuan boruakah chuan a ding ta chawt mai a. Chu chu Keivawmhranga chuan la in a ak tha leh ta a...
Tichuan, Lalruanga’n a sawmna ang chuan Khawzawl lam panin a inah Keivawmhranga chu a thleng nghal bawk a. A tuk zingah chuan an khaw Khawnbawl upa nupuiin thi hna a ken tir chu Khawzawl a a unaunu pasal nei a awm ta hnenah chuan hlan felin Khawzawl ah pawh chuan cham hman ta meuh lo chuan Khawpuitan tlang lam panin dawithiam Lalruanga nen chuan tukthuan ei khamah an thawkchhuak leh ta zawk a...Lalruanga chuan a thal hman thiam a keng a, Keivawmhranga erawh a chempui leh Fei ki bar nen ani thung...
Dawithiam Lalruanga hming hi Hmar hnam thenkhat chuan Ralngama ti pawhin an sawi thin bawk a...Hetih hunlai hian Khawzawl a a chen lai vel ani a..Mizoram hmar lam ram khua te leh a hnu zel a Manipur a hmar hnam ho chenna khaw thenkhat te a a pem thlak hma ani a. Manipur Hmar bial, Lungthulian khua leh a chheh vel ram a pem hnu pawh hian a kut hnu tam tak hmingthang deuh deuh a hnutchhiah nual a –Lalruanga chhum halna , Lalruanga lungkah, Lalruanga Leihlawn dawh leh a dang dang te hi a Manipur ram a a sulhnu te a ngaih leh sawi anni thin. Tin, Manipur a lui lian ber, Vai tawng a Barak lui an tih mai pawh hi ama hming chawiin tun thleng hian Zofate zingah chuan Tuiruang ti a hriat a la ni reng anih hi... ( a sawi uar deuh te phei chuan tun thlengin mak tak maiin Lalruanga chhum halna an tih zawnah hian vanah chhum a awm mang ngai lo, a bul vel a a awm teuh pawhin an tih tlat pek chu !! )
Khawpuitan tlang thlangah hian, tun a Chawngtlai khua a Lal Nikuala Zahau leh Pasaltha hmingthang Hranghleia Hmar te hova an chen hma daih in tun hma chuan a bul lawkah sawn Zote hnam peng pakhat Parte ho (a then chuan Parate an ti thin bawk) an lo cheng thin a...Champhai bul Zote khua atanga rawn thlangtla anni nghe nghe a...An khaw hming pawh an hnam hming chawiin Partlang an sa a...A mihring cheng te hi Lung Milem ker leh ziah thiam tak anni nghe nghe a..Tun thleng pawn Chawngtlai ramah an kut hnu heng Lung milem hi hmuh tur a la awm reng a...A hnu fe ah Hmar hnam nawlpui ho an thlang tlak hnu in Partlang atang hian pem darhin an khua hi an rauh san ve ta ani...
Partlang khua chu Khawpuitan tlang thlang lawk a awm anih avangin Keivawmhranga leh dawithiam Lalruanga te chuan pan hmasak tha in an hria a...Partlang hi Khawzawl chhim lam deuh a awm ani a, Khawzawl atanga a hlat lutuk lem loh avangin rei vak lo ah an thleng thuai nghe nghe a...Partlang an va thlen meuh chuan a khua chu a mawiin thingkung par mawi tak nei Chawngtlai chu hmun tin maiah a vul chuk mai a..
Keivawmhranga phei chu Partlangah chuan a vawikhat kalna anih bawk avangin hmuhnawm ti takin a a thlir leh vawng vawng thin a, a khaw hming chu Zote hnam peng hmingchawi a phuah mah ni se, chawngtlai par mawi tak vang ringawt pawh chuan inhmeh hliah hliah in a hre riau lehnghal a..Partlang khua ah hian Lalruanga’n chhungte a neih ve avangin chu mi te chu pan hmasak an rilruk ani...
Partlang khua an va luh chuan dawithiam hmingthang Lalruanga leh hmelhriat loh tlangval pakhat an khua a rawn inzui lut chu hmuhnawm ti takin mipuite chuan an lo thlir hlawm a...A then te phei chuan Lalruanga hi an hlauh leh tih ruk em avangin a mit ah pawh chiang takin an en tha ngam mang lova...A kalpui tlangval pawh chu vawikhat mah an la hmuh ngai loh mah ni se a hmai a ser mak danglam tak mai an han hmuh chuan an hmuh tawh hnu emaw a chanchin vawi tam an lo hriat tawh hnu ang tlat in an hria a; mahse tunge anih chiang tak a sawi fak thei erawh an awm lem lo thung..
Keivawmhranga chuan Partlang mipuite hmel ah chuan engemaw tak a beidawnna leh ngui riauna annei ni tlat a hriatna a nei a..Thil chinchang an han zawh fiah chuan an khua chu Sairal (Keipui lian tak, sai hial pawh seh thin a ngaih) in a lo tihbuai thin vang a lo ni a...Chu Sapui chu sapui naran ai pawh a lian fe zawkin an khaw bul a Sai Bualpui dil (tuna Chawngtlai khaw bul a awm) an tih mai, Sai ho inbualna thin a an sawi bulah chu sapui chuan tun hma in sai note lian ve tawh tak a seh tawh avanga Sairal tih hial a sakhming phuah ani a....
Chu Sairal chuan Partlang ranvulh te a la nasa tawhin a umzui tu mihring te hial pawh zah lova a lo khawih tawh avangin an tih zual a. Tin, sum riat zet a lian ang te pawhin thenkhatin an sawi a; a sawi uar deuh te phei chuan “Hringfate kah mi rual ani love, lungpui chunga a bawk lai kan hmuh tum pawhin a hnungzangah patling pali vel lai chu nuamsa takin kan thu hawl hawl thei ta ve ang”...an ti hial ani.
Bung- 43
Lalruanga leh Keivawmhranga te chu khawi ah mah peh hel khaw muang lem lovin Lalruanga chhungte neih ve In ah chuan an lut nghal ta chat a..Lalruanga’n thil awm dan a han sawi zung zung hnu chuan an thlen in tur te fapa tlangval tuaitir pahnih, Pualzapa leh Rianglenga te chu Keivawmhranga kaihza veng tur a kal ve turin a ti tlat a..Keivawmhranga chuan mahni a kal a duh zawk thu leh kaihza veng tu tur a mamawh loh thu sawi eng ang mahse Partlang ho chu kal kawng leh chulai ram vel hre chiang tu zawk annih bakah kawng lakah riahbuk sual a ngaih pawn chaw leh chaw hmeh vel lo siam tu tur atan pawn an that tur thu a sawi tak tlat avang chuan Keivawmhranga pawh chuan Lalruanga chu a hnial hneh ta bik lova...
Partlang khaw tlangval tuaitir pahnih pawh chuan an kalna tur leh an thil tih tur chu huphurh viau mahse Lalruanga thupek an hnial ngam bawk si lova; hreh tak leh peih lo tak chung chuan kal zai chu an rel ve ta tho a..Kawng lehlamah erawh an Pasaltha ngaihsan em em, a tak a nidang a an la hmuh ngai loh mah ni se a sakhming leh amah fakna thu an lo hriat chamchi, “Rengpa Chawilung Chawi Pasaltha” ngei mai an han kal pui tur chu a ruk tak chuan an phur in an inchhuang ru em em mai a...
Partlang an thlen hian khua a la tlai chhiat vak loh avangin a zan a khua a riak buai lova Khawpuitan tlang lam pan mai chu an rilruk zawk a, Khawpuitan lasi te tual lenna hmun ni awm a miin an sawi chu khaw en lai a an thlen phak a rinawm tawh loh avangin kawng lak a hmun remchang deuh ah riahbuk te sual mai thei turin an inpuahchah lawk bawk a...
Lalruanga chuan,” Fimkhur takin han kal ta la, kei erawh Khawpuitan lasi hovin an ram chin a lut thei lo tur a dawi hmang a min dan beh tlat avangin ka rawn kal ve thei dawn si lova...Ka dawibur tha mi nei tawh lo mah ila ka dawibur te zawk hmang hian Lasi ho i beihna tur hmanrua tha tak tak ka pe dawn che em ni?” a han ti a...
Keivawmhranga chuan rang tak a chhang letin ,” A ngai love, ka mamawh love..” a ti tlat a
Lalruanga bawk chuan,” Anih leh Lasi ho chuan an dawi hmangin an rawn bei dawn che ani si a...I lak a an dawi tal thawk thei lo turin ka siam dawn che em ni? Ka dawibur tha zawk nei tawh lo mah ila, he ka dawibur te zawk hmang hian Khawpuitan tlanga i cham chhung hun tur awm ang vel chu ka veng thei dawn tho che a...” a han ti leh a..
Keivawmhranga ve thung erawh chuan.” Ka chempui leh ka Fei ki bar hi ka ring tawk e...” tiin a chhang tawi fel tap thung mai si a...
Lalruanga chuan a hma a ding Keivawmhranga chu ngaisang tak a en pah chuan ,” Pasaltha dik tak zawng i ni ngei e..Ka chunga that i chhuah hi engtik ah mah ka theihnghilh leh tawh ngai lovang tih hi kei Lalruanga hian ka intiam e...Aw le, han kal ta la, hlawhtlinna chu han chang ngei ang che..” a ti ta a....Amaherawhchu, duh lo eng ang mahse, Lasi ho dawi laka a him theih nan Keivawmhranga chu Lalruanga chuan a dawi hmangin a rukin a hualhim ta tho a...
Kawpuitan tlang pan a khua an chhuahsan hnu chuan Keivawmhranga chuan thil engemaw hrechhuak thut ni awm tak hian a ding deuh thut mai a..A kalpui te hnenah chuan ,”Ngawi teh u, ka chempui leh ka fei te hi khua kan chhuahsan hma khan ka tat hriam theihnghilh tlat mai..” a rawn ti chhuak phawng mai a...An dinna bul a lung pakhat chu a chempui leh fei ki bar tah hriam nan chuan a hmang ta a....Heta tang hian Hmar ho zinga tawngkauchheh lar tak “ Tlangte ho chem a bil ngai lova,engtiklai pawn a hriam reng thin..” tih hi a lo chhuah phah ta a...
Tin, a tah hriamna lung pawh chu nakin zelah midang pawn rawn hmang ve zel thin in “Hmar Lungtat” tih hming a rawn put phah ta nghe nghe a..Tun thleng hian Chawngtlai khaw bulah hmuh tur a la awm reng ani..
Khawpuitan lam pan a tlangval pathum rawn kal leh anmahni zinga khaw dang mi ni awm tak, tlangval hmeltha leh huaisen hmel tak, mitmeng fiah kak mai leh a mitmeng a hlauhna emaw zamna engmah hmuh tur awm miah lovin kawr te leh thingtuluang te intha zo tak mai a a rawn zuan kan zak zak lai chu ralkhat atangin Lasi ho chuan an lo thlir ve reng a...Lasi lalnu Tantinchhingi chuan hmeltha leh huaisen hmel a tiin a lo ngaizawng nghal em em mai a..A hmai a tin hriam takin a hamna tih hriat tak mai a ser a neih te lah chu mipa dik tak anihna nemnghet tu niin a hria a, a thlir ning thei hlawl lo hi ani deuh ber mai ...
A ho te chu tlang dang leh mual dang a huaite chu anmahni lam pan a rawn kal Pasaltha ni awm tak hmel pu chungchang chu zawt fiah turin thupek a han pe thuai a..Rei vak lo hnu chuan Lasi pakhat chu rawn let lehin Vankal khaw Pasaltha hmingthang “Rengpa Chawilung chawi Pasaltha” emaw “Sapui Chaih Pasaltha” tih te a an hriat lar, Keivawmhranga anih thu a rawn hrilh a...Tantinchhingi chuan Keivawmhranga che tla vel chu hmuhnawm ti tak a lo thlir dauh dauh chuan “Pasaltha ni awm reng zawng ani e.. A pianzia leh chezia reng lung a dum zo em mai!!” a ti sap a...A rukin a hote pawh chu an Lalnu thusawi vang chuan an lo nui ve kar kar a..
Khua a thim ti tih tawh avang chuan kal zelin awmzia a nei tawh lova an hriat avangin riahbuk sual mai chu tha in an hre ta zawk a..Lalruanga’n chaw leh chawhmeh vel chhumsak tur a Partlang tlangval pahnih te chu a tirh ni mahse Keivawmhranga chuan Pualzâpa leh Rianglênga te chu che ve hman lek lovin a awl hlauh thung a.. Pualzâpa leh Rianglénga chuan chutianga Pasaltha hmingthang tak ni si a, induhna leh chapona awm miah lova an che bawrh bawrh mai leh che ve hman lek lova a awl hlauh mai te chu zahthlak an tiin entawn tlak an ti hle a..An rilru te te in “Hei zet hi a lo nih dawn hi Pasaltha dik tak chu..” tiin a hma aiin an ngaisang zual sauh a...
Bung-44
Zanriah te an han ei fel hnu chuan ramhnuaiah chuan tih tur vak awm hek lo le, mut zai an rel ti tih nghal mai a...Keivawmhranga chuan a tuk lam a a kalna tur ram chungchang ngaihtuah neuh neuh pah chuan reilote hnu chuan a lo muhil ve ta a...A zing lam mumangah chuan nula hmeltha em em mai hian a mal nalh tak chunga a lu lo nghatin a sam hi duat takin a lo chul sak hliau hliau mai a....Chutia a mumang a sam a chul sak mek lai chuan le vawilehkhatah Keivawmhranga chu a harh hlawl mai a, a mumang ah mai pawh nilovin nula hmeltha em em mai tu tih nge a hriat ngai si loh hian a tak takah chuan a lu chu a malpui chungah lo nghat in a mumang ang chiah khan riahbuk chhungah chuan a lo chul sak reng chu lo ni in....
Rang mangkheng hian a mutna ata Keivawmhranga chu a per tho nawlh mai a, a chempui leh a fei ki bar chu a chuh vat bawk a...A sam chul sak tu nula pawh chu riahbuk pawn lamah a nui hak hak chungin a tlanchhuak a, Keivawmhranga’n rang takin a um zui bawk a...An ri avang chuan Keivawmhranga thiante pahnih pawh chu tho phang tak chunga rawn tho chhuak ve in an hriamhrei te an chuh ve thuai a, riahbuk pawn a an han chhuah ve meuh chuan khua a lo var der tawh hi a lo ni...Keivawmhranga leh Lasi nula inhmachhawn reng lai chu khur ru der der chungin an thlir ve reng a...
Keivawmhranga chuan a hma a ding nula hmeltha lutuk, a hmelthat dan mihring ka ten an sawi fiah zo lo hial ang tih tur khawp a tha chungchuang, sam sei mawi tak leh biang no em em mai; ngo mai pawh nilova a sen a sen tat mai chu engemaw chen chu a thlir ngawih ngawih ringawt mai a...A rilru chuan hetiang em em hmeltha hi an lo awm ngai ani maw a ti ve hial a.. Mahse, a hma a ding nula hmelthat dan chu a tak tak ai mahin engemaw tak a lemna riau neiin a hre ta tlat mai a...
Hringfa te hi chu han hmeltha ve viau thin mah ila a hmutu a zir hi ani thin a, khaw khat nula hmeltha tak an sawi pawh thenkhat tan chuan eng teh ruai mah an lo ni leh thin lova..Amaherawhchu, Lasi ho zawng a hmu tu apiang te hian hmeltha an tih em em zel mai avang hian an hmel tak tak nilovin a hmutu duh zawng leh hmeltha tih zawng ang takin an hma ah an rawn inlar thin zawk ni te hial in Keivawmhranga chuan a ngai a..
Chutah a suangtuahna ram ata Keivawmhranga chu harh chhuak zawkin,” Tunge i nih?” an ti thawr mai a...Nula pawh chuan peh hel lova tha tak a chhangin,”Helai ram vel enkawltu Lalnu Tantinchhingi ka ni e...” nui sang chung leh hmel duhawm lutuk hian a han ti a...
Keivawmhranga bawk chuan ,”Eng vanga ka phalna la hmasa lova ka mut hlan a ka sam lo tuai ringawt nge maw i nih le?” a ti hmiah mai a..
Tantinchhingi chuan nui hawr hawr pahin,” Ti teh Keivawmhrang, Nang nen hian hlim takin hun leh ni te hmang dun thin ang hmiang...Tichuan ka duhsak che in sa tam tak ka pe thin dawn che ania...” a han ti a..
Keivawmhranga chuan chhangin,” Sa pek ka mamawh love..Ka duh chuan ka chempui leh ka Fei ki bar hmang hian ka tihlum ve thei bawk e..A thu hrim in, Hringfa te hi nangni te nen chuan kan awm dan leh nih phung a inang lo tlat a; leng dun chi kan ni lo...” a ti ta tlat mai a..
Chutia a han tih chuan Tantinchhingi chu thinrim in,” Kei leh ka Lasi te hian nang ang pasaltha hi tam tak kan lo zawl tawh thin a, sa te kan kah tir nasa thin asin...Zawl theih loh pasaltha kan nei ngai love...Nang ngei pawh hi a tir ah chuan han tang der ve nasa teh mah la khuarei ah chuan min hnar tak tak thei chuang lovang...Tin, helai a i rawn kal nachhan pawh hi kan hria in Lalruanga rawn tirh che ani tih pawh kan hre bawk a; i thil tumah i hlawhtling chuang hlei lawng e..” a ti deuh kher a..
Keivawmhranga hi tlangval zaidam leh hawihhawm tak mai ani a..Amaherawhchu a duh loh dan zawng a nawr luih tum vaih chuan luhlul leh ngeng tak mai, ring ti chhah lui tlat thin mihring ani tlat ani..Chapona awki lek lek a amah dawr tu lakah phei chuan chu ti hlauh chu ani..
Keivawmhranga chuan a hma a nula ding mitah tak chuan chiang leh fiah tak a en in,”Chutia nih chuan kei zawng Lasi zawl theih loh Pasaltha ka ni mai aniang chu !! Pasaltha dang ka ni lova, Keivawmhranga ka ni ngai e...” a ti ta hmiah mai a..
Keivawmhranga mit ah chuan tumruhna nasa tak a han hmuh chuan a rilru a sawh sawn sak theih tawh chuang loh tih hrethiam in thinrim tak chungin Tantinchhingi pawh chuan,” In awmna chin bak kha rawn pel tawh suh u..Chuti lo zawng in nunna hial tan pawh a pawi thei ania..” ti chung chuan Khawpuitan tlang chhip lamah a thlawh chhoh san ta a..
Tantinchhingi a thlawh liam hnu chuan Keivawmhranga chu hawi letin a thian pahnih te lam chu a va hawi phei a, engmah sawi lovin an dinna ngaiah chuan an lo ding khawng ringawt mai a..Keivawmhranga bawk chu rawn tawng chhuak leh in,” Thiante u, min kalpui avang hian in chungah ka lawm takzet ania..Amaherawhchu, in nunna hial tan pawh a pawi theih avangin he mi chin bak hi chu min kal pui tawh lovin let leh zawk mai rawh u..In Pa Lalruanga pawh nakinah ka rawn haw hunah keimah ngeiin ka hrilhfiah ang a, a hriatthiam ngei ka ring bawk e..Keimah ngei hian kan Lasi ho tuallenna te chu ka han luhchhuah ang e..” a ti ta a..
Chutia Keivawmhranga’n a sawi tak si ah chuan a thu chu awih a an khaw lam a haw mai chu an rel thlu ta a..Tukthuan hma tak a an ei zawh hnu chuan an khaw lam a kir in hahip in an thil hmuh leh tawn te chu an chhungte leh thian hnaivai thenkhat te an hrilh ta a...
Pasaltha dang te chu Lasi te an zawl thin ani ngai a; Keivawmhranga erawh Lasi te’n duh em em mahse an zawl theih tlat loh ani ve thung a..He mi ni atang hian Keivawmhranga chu ”Lasi Zawl Loh Pasaltha” emaw “Lasi Zawl Theih Loh Pasaltha” ti a hriat lar a lo ni ve leh ta a..Amah an koh thinna hming tam tak te zinga pakhat a lo ni ve ta ani..
Bung- 45
A thiante an khaw lam pan a an haw liam hnu chuan Keivawmhranga pawh chuan a ngai te bawkin Khawpuitan tlangchhip lam pan chuan chawl hlek lovin a kal char char ta mai a...Thui fe a kal hnu chuan Lasi ho pawh inbe rawn ve in an chenna hmun te a rawn thleng chho tak tak mai dawn in an hre ta a...A rawn thlen chhoh tak tak hma a kawng lak a lo dan chu an rel thlu ta ani..
Keivawmhranga hmun zawl deuh hlek pakhat a thleng tih ah chuan a hma ang bawkin Lasi lalnuTantinchhingi chu a rawn inlar leh a..Mahse tun tum chu amah chauh ni tawh lovin lasi nula dang hmeltha tak tak mai sawm rual zet anni tawh thung a...
Lasi lalnu Tantinchhingi bawk chu rawn tawng chhuak leh in,” Rengpa Chawilung Chawi Pasaltha, nangmah tih nat che hi kan thil duh ber ani hauh lo ania..Mahse i rawn kalna lama i let leh anih loh chuan i nunna hial in a tuar ngei ang tih ka tiam a che..” a rawn ti nawn leh a..
Keivawmhranga ve thung chuan,”A neitupa hriat loh leh phal loh a thil in ruk sak kha min pe let leh ula, in pawi ka khawih lovang..” a ti ve hmiah mai bawk si a..
A tu mah mah tawngka chuan an inhmin dawn lo ani tih a han chian takah chuan Tantinchhingi chuan a hote chu a rual a Keivawmhranga chu dawi turin thu a han pe ta a...Mahse an dawi te chuan Keivawmhranga chungah chuan mak tak maiin engmah awmzia a nei thei ta tlat lo mai a..A vun pawh a pilh eih bawk si lo....Mak ti tak chunga Lasi hovin an thlir dauh dauh lai chuan Tantinchhingi erawh chuan tuemaw dawithiam thiltithei takin dawi lakah a venghim tih a hre ta a...Thil awm dan chu tu hrilhfiah ngai lovin a hrethiam ta a..
Dawi hman in Keivawmhranga lakah awmzia a nei dawn lo tih a hriat chiah chuan Tantinchhingi chu “Tunah le...” tiin a te thawt a...A aw a chhuah rual chiah chuan Keivawmhranga ding lam hnim buk atang chuan Nghalchang lian tak mai, ngho var tha em em mai chuan Keivawmhranga lamah chuan amah phin hlum ngei tum ran chuan chak tak maiin a rawn tlan ta thut mai a le!!
Mahse engtiklai pawh a inreng reng a awm Pasaltha chuan Tantinchhingi nen a an inbiak lai daih atang tawh khan chu sanghal thing ro rah rik ri chu a lo hre daih tawh a, a mit sir in hnimbuk che vel pawh a lo thli thlai daih tawh a lo ni a...Chutia sanghal chak tak mai a rawn tlan chhuak thut chu a Fei ki bar hriam tak mai chuan thapui zawng zawng chhuah in a dinna a rawn thlen hma hauh chuan an khawh thut mai a le... Sanghal nghawng zawn takah thil tlang zawkin a piah a thingkung ah chuan a fei ki bar chu a bur zawk mai a...A sahuat tak mai ah a khawh fuh ani chek aniang chu, che leh tur reng a lo awm tawh lo..!!
Chutia an nghalchang duat lai leh an chhuan em em vawilehkhat a Keivawmhranga kutthlak tuar lova an thi ta mai chu ui em em in Lasi ho chu an zavai mai chuan a rualin an tap ta hawm hawm mai a...
Keivawmhranga chu rawn tawngchhuak leh in,” Lalruanga dawibur kha a neitu dik tak hnen a thlen leh hma chu in ram leh a chheh vel in hlim tak a in tualchaina thin hi ka dai dar vek ang a, in ramsa enkawl te hi ka that hlawm bawk ang a; in puk hmingthang “Tantinchhingi Khawpuitan puk” te leh “Lasi rorelna puk” in tih te pawh khi ka luhchhuak vek bawk dawn ani..” a ti ta siah siah mai a le..
[Heng puk hmingthang te hi Chawngtlai khaw chhak Khawpuitan ram ah hian an awm..]
Lasi ho chu ngun takin an inngaihtuah ta a...Keivawmhranga mitmeng ngaihno bei tawh lo zet leh tihbaiawm tak mai an han hmuh meuh chuan a thil sawi te chu a ti ngei dawn ani tih an hrechiang ta a..He pasaltha hi dan rual niin an ngai ta lova; a thil rawn kalchhan pawh thil pawi a thlen thui hma a pek let mai tha zawk a hria in Lasi Lalnu Tantinchhingi chuan Lalruanga dawibur tha mi chu Keivawmhranga kutah a hlan ta ani..
A la hma ang reng viau tho avang chuan khawi ah mah peh hel kawi lova a haw vang vang anih chuan thim hma in Partlang a thlen hman mai a in beisei avangin Lalruanga dawibur hawn chung chuan Keivawmhranga pawh chu a let leh ta vang vang a...Khawpuitan tlang a pel fel chiah tih ah chuan Lalruanga chuan mak tak maiin Keivawmhranga a rawn hlawhtling ani tih leh a dawibur tha mi chu a rawn hawn ngei ani tih chu a awm hmun atang chuan a hre thei ta tlat mai a...Lawm takin Keivawmhranga hmuak tur chuan a kal ta a...
Engemaw chen a kal hnu chuan Keivawmhranga lam pan a kal zel ai chuan hmun remchang khawi maw lai a lo thut thlan daih pah a lo nghah mai chu tha in a hre leh hnuhnawh ta zawk a..Rei vak lo a thut hahchawlh hnu chuan ral atang chuan a dawibur tha mi ngei keng a Keivawmhranga rawn kal chu a va hmu ta a..Chuveleh phur tak leh hlim taka Keivawmhranga awmna lama tlan phei thuaiin lawm takin a chibai ta lawp lawp mai a...
A dawibur tha mi chu a kut a han lek kangin duat takin a chul hiau hiau reng bawk a..Keivawmhranga thil a tih sak avanga a chunga a lawmzia leh engtik ah mah a theihnghilh tawh ngai loh tur thu chu a sawi bang mawlh hek lo...A dawibur chu hawngin a hma ang bawkin a chhung atang chuan meikhu ang tak hi a rawn zam chhuak a, chu chuan a thalngul chu a han zut te te a...Rei tak Lasi hovin an lo ruk bo sak tawh a dawibur tha mi a hmuh let leh lawm nan tiin an dinna bul a mi lung pakhat chu a thal mu chuan an kap pawp mai a..Lung chang tak ni awm a lang si chu vawilehkhatah a keh phawk mai a...
Chu thil chu Keivawmhranga’n an hmuh chuan mak a ti viau nghe nghe a..A rilru te te chuan mite sawi ang ngeiin a bul a ding Lalruanga chu dawithiam ropui leh thiltithei tak zawng a lo ni ngei dawn anih hi a ti ta a...Partlang lam pan chuan an pahnih chuan an inzui dun ta chhak chhak a...
He lung hi tun thleng hian Chawngtlai ramah hmuh theih in a la awm a..Hun lo kal zelah pawh ”Lalruanga Lung Kah Keh” tiin a sakhming an vuah hlen ta ani...
Bung- 46
Chutia Partlang lam an pan mek lai chuan Lalruanga chuan thil engemaw tak hrechhuak ni awm takin a ding chawt a, Keivawmhranga lam hawi chuan,” Ee tak ana...Ka dawibur tha mi ka hmuh let leh tak avanga ka lawm lutuk in eng dang mah ka lo ngaihtuah lo tawh lo pek a...He thil ropui tak min tih sak avang hian lawmman tha tak ka pe ang che ka ti asin maw le...Engnge i duh ang le? Tunah chuan ka dawibur tha mi ka nei leh ta bawk a, i duh duh min dil la, ka pe mawlh ang che...” a ti ta mai a..
Keivawmhranga erawh chuan,” Engmah ka duh hran love...Ka tanpui thei che hi ka lawm hle zawk ani..” a ti duh chauh a..
Lalruanga bawk chuan,” Ni lo, chuti mai tur chu ani lo..I phu hliah hliah zawk ani..Pasaltha te in niin hmelma te in ngah in inbeihna ah te i tel hnem awm si a..I hmelma te i duh duh mi dawi hlum theihna tur i duh em?” “Nge i duh duh hmeichhia ngaihzawn theih emaw zawl puan phah pui theihna tur i duh zawk? Nge ni a dar emaw ro hlu thil dang te?” a han ti leh ngat a..
Keivawmhranga bawk chuan,” Engmah ka mamawh love...Ka chempui leh ka Fei hi ka duh tawk e..’ a ti tlat mai si a..
Lalruanga chuan engmah sawi lem lo chuan ngaihsan hmel leh ropui ti takin a kal pui pa chu a thlir vawng vawng ringawt mai a...A dawibur tha mi chu la chhuak leh in,”Anih leh hei tal hi ka tih sak ang che..” tih leh Keivawmhranga in rin loh lai chu a dawibur chhung atanga meikhu ang deuh rawn chhuak chuan a theh ta thut mai a...Zawi te hian engemaw chhampual a chham nuah nuah bawk a...
“Ka dawibur tha mi min lak let sak avangin tunah chuan a hma aiin hmelma i ngah sawt ta si a...Keimah avanga i nunna i chan hi ka phal mawlh love..Ti kha chuan i damchhung atan dawi thil emaw huai,phung leh Khuavang thiltihtheihna leh hnathawh te reng rengin i lakah awmzia nei tawh ngai lo turin ka hualhim tawh che.. Heng ho hian mal leh mal inbeih in tuman an rawn hmachhawn dawn lo che a; nangmah an hlauh che avangin dawi hmangin tenawm vervek tak in an rawn beih tum thin dawn che avangin an dawi te lak a lo inven ve theihna i neih hi tlawm ah lak tur a awm lovin a zahthlak mawlh lo ania.. ” Lalruanga’n a han tih takah chuan a tih tur ang a tih zawh vek tawh bawk si avang chuan se bo hnu a se kawngkharin awmzia a nei tawh lo tih hria in Keivawmhranga pawh chuan a pawm ta ringawt mai a...
Tantinchhingi leh a lasi ho te chu Keivawmhranga’n chutia Lalruanga dawibur rei tak an lo kawl sak tawh a rawn chhuh sak mai chu an thinrim em em a..Huai leh phung te pawh nilova chutia hringfa pakhat ve maiin an thil neih a rawn chhuh sak mai chu tlawm pa ek sen ah la in engtin emaw zawng tak a Keivawmhranga chu thung rulh an chak em em mai a...
Partlang khua an luh meuh chuan unau hmel hai hun awm vel ani tawh a..An thlenna in a an han inzui lut chu nung dam a Keivawmhranga rawn let leh an han hmuh chuan Pualzapa leh Rianglenga te chuan lawm em em in an lo chibai dun a..An pa Lalruanga dawibur Keivawmhranga’n a rawn hawn te chu hmuh tir tur a ngen in hmuhnawm ti takin naupang chhia ang maiin an thlir dauh dauh a..Kut a khawih erawh Lalruanga chuan a phal hauh lo thung..
Zanriah an bar lai te pawh chuan Pualzapa leh Rianglenga te chu tlangval tuaitir tih takah an tawng duh in an haw hnu a thil thlen dan Keivawmhranga chu zawt in phur takin an rak chul tawh mai a...Chaw bar laklawh lai pawh ni mahse hemi zan meuh hi chuan an insum thei ngang lova...An titi tui vang leh tlangval tuaitir pahnihte aw ki a rin em avang chuan Partlang khaw hmawr lam atanga “Sa a tla e...” ti a au ri pawh chu an hre fuh ta lova...
Zanriah ei kham hnu chuan Keivawmhranga pawh Partlang khaw buanzawl lam pan tum in a in singsa ta a..He mi zan hian thla a eng em em mai lehnghal a...Lalruanga erawh in lamah a awm thung a...An thlenna in atanga a han chhuak chu Partlang khua chu a reh riau hian a hria a; mahse ngaihthat lohna em em nei hran chuang lem lo chuan Buanzawl chu a pan ta zel tho a..
Buanzawl a han thleng chho chu tlangval tumah an lo awm miah lo mai a, a rilru te te chuan,”Zan zan ah khaw nge maw an tlangval ho chu an zavai mai chuan an chhuah vek mai le?” a ti nauh nauh a..Buanzawl ah chuan lut in a thim lai deuh ah chuan amah chauh chuan a thu a, Partlang tlangval hochu buanzawl chhunga lo nghah mai chu a tum ta ringawt mai a...
A hnu deuh ah chuan tlangval te chu buanzawl lam pan in meichher nen an rawn let dul dul mai a..A hma berah chuan an khaw Val Upa Bengfianga leh tlangval pakhat chu buanzawl lam pan chuan an titi dun malh malh a..
Val Upa Bengfianga chuan tlangval pakhat hnenah chuan,”Kan thil hmuh kha chu a mak ngawt mai..Ni dangah khatiang thil reng reng kan khaw mi tuman an la hmuh ngai ka hre bawk si lova...Kha Sairal chunga nula chuang thusawi kha i hrechiang chiah maw?” a han ti phawng a..
Tlangval pakhat zawk chuan chhangin ,” Aw ka hrechiang ngei alawm pa Fiang, kha nula hmeltha tak mai khan ‘Rengpa Chawilung Chawi Pasaltha ngei lo chu...’ a ti tlat ani...Khatiang sapui chunga mihring ni awm tak chuang reng reng kan la hmuh ngai loh avangin thil tha lo zawk te a thleng palh ang e tiin kan kap ngam ta lo anih kha..” a ti ta a...
Val Upa Bengfianga bawk chuan,” Mahse Rengpa Chawilung Chawi pasaltha te chu Vankal khua a awm daih ani bawk si a...Tih ngaihna vak pawh a awm hmel ta meuh lo...Kan khawnbawl upa chuan a se pa tuai chu a chan ngei dawn a ang ta riau mai ka ti..” pawi tih hmel tak chuan a ti leh ringawt a..Tlangval dangte pawh chu buanzawl kawt rawn thleng phei in reilote an thu thlan dai ve ta a...
Bung- 47
An inbiakna a han hriat chiah chuan thim tham zinga tlangval pakhat ngawi reng a rawn thu chu a rawn ding chhuak hluai mai a..Buanzawl a mei an chhemin a en phak chin a rawn thlen phei chuan chu tlangval hmel pawh chu an hmu chiang ve thei ta a...A hmai a sapuiin a hamna ser mit tha pangngai tan a hmuh hmaih rual loh a han hmuh chiah chuan Val Upa Bengfianga chuan,”Keivawmhranga..” a rawn ti chhuak phawng mai a...Val Upa Bengfianga rual deuh thaw chuan tlangval dang pahnih pawh chuan,” Keivawmhranga ani ka ti..” an rawn ti rual thawt deuh thaw bawk a..Tlangval dangte erawh chuan a hmel hmu mahse a tir chuan tunge anih an hre hauh chuang lo thung...
Keivawmhranga chu zawi muang a rawn pen chhuakin,” Chu Sairal chu min seh hlum tur a Tantinchhingi’n a rawn tirh anih ngei dawn chu...Thiante u, khawngaihin in meichher ken lai zinga mi pakhat kha min lo hawh tir dawn em ni ang? Sa tlakna lam chu min kawhhmuh ula ka va kal ve ang e...” tih leh tlangval pakhat in a meichher a rawn pek lak sak a kal chu a rual ta mai a.. Partlang tlangval rual beidawng a rawn let te pawh chuan an Val Upa ho chuan Keivawmhranga hnungah chuan an zui dul dul bawk a..Chu zan zet chu thil mak leh ropui, zan danga an la hmuh ngai hauh lo an hmu dawn ni tlat in an inhre bawk a...
Keivawmhranga chu chak tak a kal in Partlang khaw dai atanga hla vak lova Sapui rum hum hum chu a va hre phak ta mai a..A sa seh chu hla pawh kal pui lovin amah a lo chang ani tih chu a hrethiam nghal a... Thawm awmna a va thleng phei chu a hma ah chuan nidanga khawi ah mah a tiat pui a la hmuh ngai loh, Sapui a zawng a lian em em mai, a sakhming Sairal tih hial an lo sak chu ka ang sen huam in a lo inhrosa kuk kuk mai a, a vir vut vut mai bawk a..A sa seh chu a piah deuh hnimbuk karah a dah tha thung a..Amaherawhchu, a hma a tlangvalten an sawi ang erawh chuan a chungah chuan tumah an thu tawh lo thung...
Sairal a va hmu chiah chu kutthlak hmasa tu zawk ngei nih tum chuan a chempui leh Fei ki bar nen chuan chak tak maiin sairal lam pan chuan Keivawmhranga chu a tlan phei nghal char char mai a...Amah zuitu Partlang tlangvalte pawh chu hmanhmawh takin an rawn thleng phei ve mek bawk a...Sapui pawh chu lo awp hniam suai suai in a hma a chak tak a rawn pan tu pasaltha chu lo zuan thluk tawp a tum a...Amaherawhchu, a hmachhawn chu Pasaltha naran mai anih loh avangin rang tak a lo insaseng hman in a chempui chuan chiang em em mai hian sapui nghawng ah tak mai chuan a sat ri ta chawk mai a..Mahse Keivawmhranga chuan a chempui chu a thlauh ve ta tlat mai le...Sapui na ti lutuk chu a huk dur dur mai a...
A vawi hnihna atan a rawn zuan leh a, Keivawmhranga pawh chu a inring hman lo thelh a; a fei a lo chhun chu a rem loh avang chuan a ken lai chu paih thla thuaiin Keivawmhranga chu lo zuang sawn zauh in a chempui a thlauh tawh si avang chuan sapui hliam hrawk ah tak mai chuan a ban dinglam chuan thaw hlei thei lovin a chakna zawng zawng sawm khawmin theih pa tawp chuan a kuah bet ve ta tlat mai a...Chu sairal lian lutuk nen chuan an inbuan ti tih chu ani ta der mai le!! Partlang tlangval dangte tan lah silai a han kahna chi zia zang ani tawh si lova, tih theih nei lo chuan Keivawmhranga te inchai lai chu an en thap ringawt mai a..
Keivawmhranga hian tharum zawng zawng sengin a hrawk ah tak mai a kuah bet bawk a, sapui pawh chuan a kuah bet tu pa chu a seh fu hlei thei bik lova..
Sairal talchhuah tum tang nasa lutuk chuan Keivawmhranga chu a tin hriam tak mai chuan a theihna lai lai ah chuan a ham thler ve neng nung mai a, thi pawh a chhuak nasa ve hle..Chutia nghet lutuk tak mai a a kuah beh reng hnu chuan a bul lawk a thingkung pakhat ding chu vawm nan chu sairal chu an hmang ta tehreng a le !! Chulai mual vel a awm zawng zawng hriat tur khawp chuan a huk ri hum hum mai a...Sairal insiamrem leh tur chiah chu keivawmhranga chuan rang tak a a Fei ki bar chu chhar vatin a hrawk ah tak mai a thil tlang pawk mai a..La thi chiang chiah lo mahse awmze nei a han che chang thei chi zia zang ani tawh lo!! Keivawmhranga chuan a chempui thlauh chu chhar in a hnuk a chhat fel ta a..Hreh tak chung siin a nunna a thlah a ngai ta ani...
Chutia sairal an thi ta mai chu a chhak thim tham zing atang chuan tute nge annih hmuh theih si lovin hmeichhe aw rawl tih hriat tak hi lungchhe takin an tap hawm hawm a.. Keivawmhranga pawh an inbeihna avang chuan a chau thawkhat ani tih hriat takin muangchangin tap ri rawn chhuahna lam ah a han inher a,” In Sairal enkawl lai hi ka thah duh reng vanga ti hlum ka ni lova..Mahse mihring ranvulh a seh nual chung pawh a in khuahkhirh duh loh vang leh nidangah mihring hial pawh a seh hlum tawh avangin a nunna hreh tak chungin ka la ta anih hi..” a ti ta a..
An inbei lai hmuhnawm ti tak a lo thlir chawt tu Partlang tlangvalte chuan Keivawmhranga chu ngaisang tih hriat tak mai hian an en tlawk tlawk ringawt mai a..A chak zia leh sairal keipui lian meuh pawh a buan dan chiang tak a mit ngei a hmu tu te chuan ," Rengpa Chawilung namen lova rit pawh kha lo chawi zo awm reng pawh ani e..." an ti hial a...
Hlang te siam thuai thuai in Sairal leh an khawlbawl upa se pa tuai zawnna tur te chu hmanhmawh takin an siam sawk sawk a...Keivawmhranga pawh chuan hliam a tawrh ve nual avangin zawn ve an han tum viau na a, mahse “ Ka tha e, ka na lutuk hran love..” a tih tak tlat avangin an zawn lui thei ta lova..An thlenna in chu ama ke ngeiin tlangval dangte rual chuan a thleng phei ve ta zawk ani..
He mi zan atang hian Keivawmhranga chuan hming thar a neih leh phah a..”Sairal Buan Pasaltha” mi thenkhat te chuan an tih phah leh ta ani...
A Sairal duat tak a enkawltu Khawpuitan Lasi lalnu Tantinchhingi erawh chuan a duatlai chu tihhlum sak mahse Keivawmhranga chu a ruk takin a hma ai mah in a ngaisang zawk a, a hma ai mahin a ngaizawng nasa zual sauh emaw tih mai tur ani hlauh thung si.......
Next Chapter: Bung 48-55
Next Chapter: Bung 48-55
Post a Comment