By: Isaac Zote
RECAP: Sairal nen a an inbei lai hmuhnawm ti tak a lo thlir chawt tu Partlang tlangvalte chuan Keivawmhranga chu ngaisang tih hriat tak mai hian an en tlawk tlawk ringawt mai a..A chak zia leh sairal keipui lian meuh pawh a buan dan chiang tak a mit ngei a hmu tu te chuan ," Rengpa Chawilung namen lova rit pawh kha lo chawi zo awm reng pawh ani e..." an ti hial a...
Hlang te siam thuai thuai in Sairal leh an khawlbawl upa se pa tuai zawnna tur te chu hmanhmawh takin an siam sawk sawk a...Keivawmhranga pawh chuan hliam a tawrh ve nual avangin zawn ve an han tum viau na a, mahse “ Ka tha e, ka na lutuk hran love..” a tih tak tlat avangin an zawn lui thei ta lova..An thlenna in chu ama ke ngeiin tlangval dangte rual chuan a thleng phei ve ta zawk ani..
He mi zan atang hian Keivawmhranga chuan hming thar a neih leh phah a..”Sairal Buan Pasaltha” mi thenkhat te chuan an tih phah leh ta ani...
A Sairal duat tak a enkawltu Khawpuitan Lasi lalnu Tantinchhingi erawh chuan a duatlai chu tihhlum sak mahse Keivawmhranga chu a ruk takin a hma ai mah in a ngaisang zawk a, a hma ai mahin a ngaizawng nasa zual sauh emaw tih mai tur ani hlauh thung si...
Bung – 48
Sairal lian tak, sum riat dawn lai mai Keivawmhranga’n a chhun hlum tak chu ropui takin Partlang khua ah tlangval ho chuan an zawn lut a..Chu Sairal ropui zet mai an rawn zawn luh chu thlir turin a thei thei chu zan mah ni se an in theuh atang te chuan an rawn chhuak ve hlawm a..Tin, mipuite mai bakah Partlang Lalpa leh dawithiam Lalruanga te pawh chuan Keivawmhranga leh tlangvalho chu lo dawngsawng ve in Keivawmhranga thah tak sapui lian zet mai chu hmuhnawm ti takin an en dun a, a tin hriam tak te leh a ngho var leh sei tak te chu Lalpa chuan a thlir ulukin rapthlak leh tihbaiawm a ti takzet ani…
Sairal tia an ko tawh chin te hi chu Sapui theuh theuh ah pawh an danglam bikin an ropui bik em em mai a..Pasaltha inti tam tak pawhin silai pawhin an kap ngam lo hial thin reng a..Sapui naran aia an len zawk daih avangin an rapthlakin an tihbaiawm em em zawk ani…
Chutah Lalpa chu rawn tawng chhuak hluaiin,” Ni leh thla tam tak chhung ka khua leh tui te lo tibuai tawh tu he Sairal huaisar zet mai hi tu thah nge maw ni ngai le? Tunge thalfang thlah hmasa ber tu?” a han ti a…Val Upa Bengfianga chuan rawn chhang nghalin,” Lalpa, he Vankal khaw tlangval Rengpa Chawilung Chawi Pasaltha an tih mai Keivawmhranga’n amah chauh a fei ki bar hmang a chhun hlum ngei ani e…” a han ti a…
Lalpa chuan ngaisang leh zah tih hriat takin Keivawmhranga chu a han en a, a ban, a malpui leh ke vel thi hneng hnuang te chu a hmuh hmaih bik hauh lova,”Tlangval, zanin chu kan khaw Bawlpu pan in va in entir hmasa ta la..naktuk lamah he Sairal hi nangmah ngeiin ran lukim in awm ni khamin ropui takin I ai ngei tur ani..” a han ti a…Keivawmhranga chuan Lalpa chu zah tak a chhangin,” A ngai love Lalpa, chutiang a hliam na lutuk ka nei hran love…Tin, Keini ang tehlul tan chuan ran lukim a han ai ngaihna a awm ve loh avangin, min hrethiam mai a ngai dawn ani..Rem I tih chuan kan Lalpa ngei hian ropui takin min han ai sak zawk ta la kan tlaiin kan puar awm mang e ka ti..” a ti ta zawk a..
An Lalpa a rawn tawngchhuak leh dawn chiah tih ah chuan dawithiam Lalruanga a rawn inrawlh vat a,” Vawiin lamah he Pasaltha hian tuma la kal ngam ngai lohna ah min kal sakin thil ropui tak min tih sak a; Kan Lalpa hian rem a tih ngai chuan he sairal hi he Pasaltha pual hian keimah ngei hian ran lukimin ka lo ai sak ang e..” tiin Lalpa phalna chu a han ngen a..Lalpa pawh chuan lawm tak a lo remti in Lalruanga remruatna chu a pawm ta a…
A tuk a rawn nih chuan a insawi ang ngeiin Lalruanga chuan ran lukimin chu sapui chu a ai ta a…Mi chhe ber ber leh dai kil kara chengte pawn puar tak leh hlim takin an kil za a…Mahse mipui mak tih em em mai leh mitin rilru a zawhna awm, amah an zawh ngam si loh chu khawi ami nge a aihna tur ran lukim chu a hman tih chu ani..Khawzawl lam pan a a rawn kal khan a thal hman thiam leh iptepui bak rawn kengin an hmu si lova; a thlenna in te lah mi vantlang ai a mi tha chungchuang bik lah an ni bawk hek lovin khawi a mi mah chu sapui chu ran lukim a han aihna tur zia zang an nei dawn lo tih chu an hrechiang hle bawk si…
Mipuite chuan Lalruanga chu mak ti tak chungin a rukin an en leh zeuh zeuh thin a; a then te phei chuan an tih in an hlau hle nghe nghe a, a lawm loh zawnga an awm palh chuan a dawi palh mai an hlauh avangin a bul hnaiah pawh an awm ngam meuh lova..”Hei ngei hi a mi zaleng zawng te’n a chanchin an hril ban loh dawithiam hmingthang Lalruanga chu a lo nih ngei dawn hi !!” an ti ta a…
Sairal ropui taka an aih zo chuan Lalruanga leh Keivawmhranga te pahnih pawh chuan Partlang chhuah san zai chu an rel dun ta a..Lalruanga’n a kal zelna tur Keivawmhranga a han zawh chuan Keivawmhranga chuan khawchhak lam khua te hrut zel a tum thu leh an chhak a khaw awm, Hmar Lawitlang hnam peng pakhat Chhungte hnam ho khaw lo sah chhuah leh an hnam hming chawi a khaw hming sak Chhungte khua a kal hmasak a tum thu in a chhang a; Lalruanga te khua Khawzawl lut kual kawi tawh lova Chhungte lam pan mai chu a tum dan ani…
Amaherawhchu a dawibur tha mi a lak let sak avang chuan Lalruanga chuan chuti mai a han kal liam tir chu a phal ta tlat lova, khawzawl a rawn zui chho leh a, a thilpek te lah a lak sak duh si loh avangin hun engemaw chen tal a chung a that a chhuah let ve theih nan mikhual atan a sawm luih tak tlat bawk si avang chuan Keivawmhranga pawh tang zo ta lovin a sawmna chu lawm takin a pawm ta a..Tichuan, Chhungte khaw lam pan mai ta lovin an pahnih chuan Khawzawl lam an pan leh ta zawk ani..
Khawzawl an han thlen chhoh chuan an nula leh tlangvalte chu hmar lam pakhat “Tangkawng Vai Lak lam” an tih mai chuan Lal mualah an lo lam mup mup mai a..Khawzawl Lalpa hi zai leh lam bakah intihhlimna lam ngaina mi tak hi ani ve a…Nula leh tlangvalte pawh chuan nuam ti takin tudang ngai lo ten an vanglaini te chu chen theuhin hlim takin an lam hlawm a..Keivawmhranga pawh chuan lanu valrualte an han lam siau siau mai a hmuh chuan hmuhnawm leh nawm hmel a ti ve hle nghe nghe ani…
[Tangkawng Vai Lak Lam hi Hmar ho hian engtik hunlai atanga an lo lam tan nge tih a hriat theih mumal tawh lova..A rawn chhuah dan thawnthu a an sawi chu an pi leh pute hi hmanlai atang tawhin leido nei a khawsa reng mai anni a..An leido khua pakhat hi tlang sang tak mai leh kil tin mai a kham chawih vel a awm a, rei tak chhung an hual tawh nghe nghe a..Mahse an leido khua te chuan leihlawn sei tak hi an khua a lawn chhoh nan hian an hmang thin a..
Zanah chu leihlawn chu an phet ziah vang bakah an khaw lawn chhoh nan khan dang reng a awm loh avangin Hmar ho chuan an bei hlei thei lova..Mahse tum khat chu an awmna bulah chuan Tangkawng lian em em mai hi a rawn vak a..Engtin tin emaw chu tangkawng chu man in a nghawngah chuan hrui sei leh fei tak mai hi an thlung ta a..Chu tangkawng chu an Leido khaw hual veltu kham ah chuan lawnchhoh tir in Hmar pasalthate chu an uai chho ta a..An khua an han luh chuan an Leido te inrin loh lai tak chu han nangchingin tam tak an that a, ral lu pawh an hawn hnem hle ani awm e..An ral lu lak te chu ropui tak a aiin an lam pui mup mup ta mai a..Chuta tang chuan he lam hi an ching tan ta ani e an ti thin…
Han ngaihtuah mai pawhin he thawnthu ang diak diak hi a tak tak a thil thlen dan anih hmel lem loh tih chu a chiang thawkhat viau a..Amaherawhchu, thawnthu mai ni mahse chuvang ringawt erawh chuan Hmar ho thinlungah he lam hian hmun a chan nep phah chuang hauh lo thung ani…A hming han en mai pawh hian “Vai lak” tih a tel tlat avangin an leido khua te hi Zo hnahthlak hnam dangte chu an nih a rinawm chiah lova…An Zohnahthlak pui hnam dangte hi chu Mizo pi leh pute khan “Vai” tiin an ko ve ngai meuh lo a..Mahse an leido te hi eng hnam ber nge annih ang tih erawh hriat theih ani tawh lo..]
Bung - 49
Keivawmhranga’n Khawzawl a vawihnih nan a han thlen leh chuan a hma ang bawkin dawithiam Lalruanga inah a thleng leh a.. Khawzawl a a cham chhung hian an khaw Buanzawl ah te kai ve thin bawk mahse amah buan tu a hmu mumal ngai meuh lova..Hei hi a chhan chu tlangvalho zingah a nihna dik tak hre chiang tu an tam lam ai mahin Lalruanga mikhual anih avang leh Lalruanga ang bawk a dawi a thiam ve an rin ruk tlat avangin an rilru in an lo hlauh ruk hle vang zawk ani…
Tun hma chuan Dawithiam te hi an tih in an hlau thei em em mai a…An thin an tih rim palh vaih chuan an duh chuan an dawi hlum thei mai a an rin thin avangin a theih hram chuan dawithiam ni anga an hriat te hi chu pumpelh hram hram an tum thin a…Khaw khat pasaltha rothap leh inbuan chak te pawhin miin an thik a an dawi hlum mai te an hlauh thin avangin a dawihzep deuh te phei chuan an theihna te an thup hram hram thin a; mi te hmuh ah an pholang duh meuh thin lo ani…
Keivawmhranga khawzawl a awm lai chuan khualtha angin a thlen in pa Lalruanga chuan a thleng ani bawk a, a thlen chhung zawngin buhchang rum leh sa lamah an hnianghnar hle a, ran te talh sakin a zin leh zel na tur atan te pawh Lalruanga chuan Keivawmhranga chu sarep rei tak daih tur a pai sak bawk a..Tichuan kar khat dawn a cham hnu ah Chhungte khaw lam chu Keivawmhranga chuan a pan ta ani…
Partlang khua a thil thleng te leh Keivawmhranga thil tih chanchin te kha Partlang khua a mikhual rawn lawi lut te pawn hetih hunlai a chhak leh thlang, chhim leh hmar a an chenna khaw tinah an pu darh ve zel a..Keivawmhranga pawh a hma ai mahin a hmingthang ta hial reng a..Mahse, amah mit ngei a a tak a hmutu erawh an tam lem lo thung…
Tukthuan hma tak a a bar hnu leh Lalruanga nen a an inthlah fel hnu chuan a tum ram lam panin Keivawmhranga pawh chu a kal leh ta a…
Khua a chhuahsan fe hnu chuan phul hmun nuam ang reng tak mai hi a va thleng phei a, chulai hmunah chuan thingkung a khât mawi tawkin a awm thliah thliah bawk a…A kal chakin a kal hah deuh ta bawk a, reilote chawlh a rilruk a.. Chutia chawlh a han tum lai tak chuan a piah deuh lawk ah chuan engemaw thil ri rek hi a hre ta a..A ri atang chuan eng sa emaw ni ngei a a rin avangin fimkhur tak leh bengchhen hlau tak chungin zawi muangin chu ri rawn chhuahna lam pan chuan a veh ta thauh thauh mai le…
Chutia zawi muanga ke pen rin hlau tak chunga a fei ki bar leh chempui nen a piah lam a va veh dan dan chu thil hmuhnawm leh mawi lutuk a hmu ta tlat mai le !! A piah lawkah chuan Sazuk Pachal ki hreu nalh leh sei tha em em mai hi hnim zingah chuan a lo tla chu ni in…A pianhmang a mawi em avang chuan Keivawmhranga pawh reilote chhung chu a hamhaih hman hial a; mahse Pasaltha tih tak ah harh leh thuaiin a tih tur chu a hai lo kher mai…
A theih anga a ai a hnai zawk leh duh ang thal a a fei a khawh thei tur a insiamrem in zawite in leh mahni inthup thiam tak chung siin a chheh vel a hnim buk chhete awm karah chuan a veh phei dan dan a…Keivawmhranga pawh a thil rah te a hma ai mah a fimkhur lehzual tawhin thawk pawh a la tha ngam mang tawh lo hial a…Mahse a thil hmuh chuan engemaw tak dik lohna nei riau in a hre ta thut mai a !! A ngaih a ti tha lo lek lek zawk hial tlat !!
A hma a sazuk ki hreu nalh em em mai chu thlamuang tak leh engmah hlauh nei lo ni awm tak hian hnim a pet mawlh mawlh mai a…Tlangval emaw pasaltha inti tam tak chuan chu sazuk chet dan phung ah chuan danglamna engmah an hmu lem lo mai thei a; an thil tawn chu engmah ngaihthat lohna nei hauh lovin vannei chungchuang leh tawn sabawp man ah an inngai hlauh ngei ang…
Ani lah tak a, chutiang a thlamuang em em mai a sazuk pachal ram tla lai, duh duh a kah emaw fei a khawh hlum mai theih ang hial a lang han hmuh fuh hlauh mai chu a vanneih thlak tak zet reng bawk a; amaherawhchu, he khawvel ah hian eng thil mah hi awl ai tak a hmuh tur a awm lo tih hrechiang em em tu he hmeithai fapa hi chuan a kum phu lovin he khawvel inher kual dan hi a hre chiang tawh hle thung si…
Ramsa reng reng hi ramhnuaiah chuan an ti in an fimkhur thei em em a, an chaw ei lai tak emaw an tui in lai tak te hi sa dang an mahni seh thei tu te tan pawh an mahni beihna hun remchang a lo nih ve si avangin fimkhur lehzual a ngai thin a..An chaw ei lai te hian thin thi in an awm ngai meuh lova, a khat tawk a kil tin thlek kual velin thli thaw in an mahni rawn bei thei tu rim a rawn beng fuh palh mial em tih te an ngaichang reng thin a; chuvang chuan an mahni bei tum hringfate emaw sapui emaw te pawhin thli in an rim an sa pelh tur hawi zawng a a beng fuh loh dan tur an ngaihtuah hram hram thin in an inthup hram hram thin ani ngai a…
Amaherawhchu, he sazuk pachal erawh hi chuan a hnim peh lai vel pawh chuan khawi ah mah hawi chhuah emaw a bul vel thlek kual nei hran lovin a hnar lah a len bawk hek lova, chu tak chu Keivawmhranga ngaih ti tha lo tu chu ani…
Bung – 50
A ngaih a that chiah loh avang chuan Keivawmhranga chuan a bul a thing ro, a hma lawk a rah fuh palh a hlauh em em mai kha, chu ramhnuai reh tak mai ah chuan ri rawp khawpin an rap fuh lui ngat mai tehreng a…Mahse, chutah tak chuan thil mak tak a thleng ta tlat mai..Keivawmhranga’n thing ro a hma a sazuk pachal lah chu chet sawn eih tum lovin engmah hre lo ni awm tak chuan a thil tih pangngai chu a la tih chhunzawm mial mial tho mai si…
Chutah zet chuan Keivawmhranga pawh chuan a ning ve deuh ta ani chek ang chu, ram palailengah chuan ring takin a tawng chhuak ta a:
“Ka mamawh loh ramsa a pawng a puiin ka tihlum ngai lova; ka ta ni lo thil ka nei ngai hek lo… Rim taka ka thawhchhuah nilo ka eiin ka in ngai lova; ka phu loh thilpek ka dawng ngai hek lo bawk…Pasaltha dang ka ni lova, Saithlunga leh Lawikungi te fapa Keivawmhranga ka ni ngai e…”chulai mual a awm tu tan pawh chiang tak a hriat theih tur chuan rampalailengah chuan a ti ta liah liah mai a…
Chutia an tawng chhuah tak thut ah chuan a hma a sazuk pachal pawh chu rang lutukin a thlang a ram ngaw lam pan chuan vawilehkhatah a tlan liam ta thut mai a..A chhak tlang lamah erawh hmuh theih si lovin tap fep fep ri hriat theih ani thung a…
Chulai mual atanga Khawpuitan tlang lam pan a boruak a thlawk delh delh Tantinchhingi pawn luaithli nul chungin,” Tlang tin a leng Lasi lanu rualte chuan an zawllai pasaltha te nen tudang ngai lo ten âm takin an hun leh ni te hmangin an vanglaini te an chen thin ani ngai a; Kei erawh zawngin ka lungdumtu leh ka Sairal lian meuh buantu Pasaltha chu ka luah zo si lo…Vanduai tur reng a duan te pawh ka lo ni hial ta ve ang…” ti a inhnit karh karh chungin a thlawk liam ta a..
Keivawmhranga chu kal zelin nakin deuh ah chuan Khawzawl leh Chhungte khaw inkar a luang Tuipui lui chu a zu thleng thla ta a..Chu lui chu kan fel in Chhungte khaw lam a pan zel a..Hun engemaw chen a kal hnu chuan khawi khaw lo emaw ni awm tak tak te a va pawh phei tak hlawl ah chuan khua pawh chu a hla tawh tehchiam lo tih a hrethiam ta a…A hnu lawkah chuan khua a lut ta a..
Chhungte khua hi in khaw lian tak ni lem lovin in sawmli nufa vel bawr chauh anni a.. Tunah chuan mi te hriat tur khawp a hmingthang leh lar lo ni tawh mahse, Keivawmhranga hian a dinhmun engtik lai mah a a theihnghilh ngai loh avang leh a zinna khua ah te hian midang te tan a malsawmna nih a tum thin avangin mi hausa leh mi tha in ah te a thleng duh ngai miah lova; mi te thlen duh lohna leh mi hmuhsit, hmeithai emaw pachhe in ah te a thleng zawk zel thin…
Chhungte khua a thlen chuan kawng lakah hah viau mahse zan lamah erawh an khaw buanzawl a chuan kai zai a rel ta tho a..Buanzawl pan a Keivawmhranga a rawn kal lai chu Chhungte Val Upa Vunpira chuan a hmel leh a hmai a sapui hamna ser a hmuh rual chiah chuan an mikhual buanzawl rawn kai thar chu tunge anih a hre nghal a, chu zan zet chu zan dang aia zan danglam leh hlimawm ani dawn ngei e a rilru chhungril a ti rauh rauh in a phur ru em em a…
Chhungte khua hi khaw lian tak ani lo bawk a, an khua ah hian Pasaltha emaw mi chak hmingthang ang chi te hi mikhual an rawn zin mawh ang reng viau a…Chutiang anih lai a a rin loh tak mai a Keivawmhranga te ang Pasaltha chungchuang, Vankal khua ah mai pawh nilo an chheh vel tlang dung zawng zawng a hmingthang a rawn chuang kai mai chu mak a tiin a awih lo lek lek zawk hial a..A rawn kal tak si ah chuan chu hun tha chu bawhpelh a tum mawlh lo ani…
Amaherawhchu, an mikhual pa chu tunge anih a naute a hrilh vaih chuan engemaw hma hauhin an rilru a zam nghal palh ang tih a hlauh avangin engmah a sawi duh hran chuang lova..Keivawmhranga buanzawl a lut chiah tih chuan Val Upa Vunpira chu rawn ding chhuak hluaiin,” Khai le, hei zanin chu mikhual tlangval kan nei ani awm a, zan danga kan lo tih thin dan ang bawkin Chhungte tlangval te hian kan han buan fiam ve dawn em ni ang? Amaherawhchu, infiamna mai anih tih hre rengin thianghlim takin kan ti tur erawh ani ngai e..” a han ti a..
An Val upa chuan an tlangval zinga a chak deuh pathum leh an khaw buan chak Suangdelha te chu Keivawmhranga buan turin a han ti a…Chhungte tlangval ho chuan,” Kan mikhual pa chu a palian thawkhat hle mai, buan a nuam viau dawn e; hei Suangdelha pawh pumrua ah chuan a tiat tep alawm le!! “ phur takin an han ti a…Amaherawhchu, chhungte tlangvalte erawh chuan an mi buan tur chu tunge anih an hre hauh lo thung..
Bung - 51
A buan hmasak tlangval pathum te chu Keivawmhranga chuan a hneh tawk tawk a, a tawp ber a a beih Chhungte buan chak Suangdelha pawh chu an han inbeih fe hnu chuan harsa ti tak chungin vawi khat ve ve ke an inphawi sak tawn hnu ah an vawithum inbeihna ah chuan Keivawmhranga chuan a tumpuipa chu a phawi thei leh hram a..Hnehna a chan hnu leh Val Upa Vunpira’n ,”a tawk e ..” a tih hnu chuan Keivawmhranga chu bang kil thim lam chuhin a insaseng ta a…
An thil hmuh chu Chhungte tlangval ho chuan mak an ti ang reng hle mai a…Suangdelha hian an mithmuh ah an khua a rawn lawi lut mikhual tlangval tumah hneh loh a la neih ngai loh avang leh pumrua a Suangdelha aia te zawk ni siin chutia a hneh ta mai chu mak an ti a…
A hma a Keivawmhranga’n a buan tlangval pathum te zinga mi pakhat chu rawn tawngchhuakin,” Thianpa chu I hmel en ang aiin tharum I ngah daihin I chak hle mai a..A zawn in mi pathum min buan hnu ah kan khaw chhuanvawr Suangdelha I hneh leh thei mai si a… A hneh em chu hneh dawn lo mah la “Rengpa Chawilung Chawi Pasaltha” emaw “Sapui Chaih Pasaltha” an tih te pahnih hi a tu emaw zawk zawk buan ni ta la, reilote tal chu I chhaih buai theih ve tho ania ka rin ni…” a rawn ti chhuak phawng mai a..
Chutah midangin an chhan hma hauhin Suangdelha rawn tawngchhuak vat in,” Khawiah ani tehlul hian chung I sawi mi hrat khawkheng pahnihte chu va hneh thu awm suh!! Ani te hi chuan nichin lawk pawh khan engtin tin emaw in min hneh tawk emaw ani a, Rengpa chawilung chawi pasaltha emaw Sapui chaih pasaltha te chuan ani te hi zawng nilengin an bin hrep thei ta ve ang…I sawi mi chungchuang pahnih te kha chu kei Suangdelha hian kan khua ah mikhual anga an rawn la lawi luh ve ni te a la awm anih ngai chuan ka la hneh ngei ang..” fiamthu aw ki tih hriat tak leh a thusawi chu amah ngei pawhin a awih chiah lo tih hriat tak hian nui chungin a han ti a…
Tlangval pakhat, tlem a sa pan leh ria lam deuh rawn tawng chhuak leh in an zeldin titi chu a rawn chhunzawm ve leh a,” Kei chu in sawi mi pahnihte ai chuan Sairal Buan Pasaltha ngei mai chetla lai ani ka hmuh chak zawk chu ni..In sawi pahnihte mai mai kha chu Sairal Buan Pasaltha in duh tawkin a vawrh theih ka ringhlel hauh love..
…Kei chauh lo zawng Sairal Buan Pasaltha hneh thei tu hi he piallei ah hian tungchho a kal an awm hlei lawng e…” nui hawk hawk chung a a han tih takah chuan Val Upa Vunpira meuh pawh insum zo lovin a rawn nui chhuak ve hial a, Buanzawl a tlangval awm zawng zawng lah a thusawi awihawm loh lutuk avang chuan an nui dur dur a; Keivawmhranga pawh thim tham hnuaiah chuan a khi ve suk a…
Keivawmhranga bang kil thim lai a thu ngawi reng chu melh zeuh pah in Val Upa Vunpira chuan,” Duhtawk ru khai!! Kan mikhual duh tak kha in ti hrilhhai lutuk dah ang e…Kan khaw fiamthu san zia hi khaw dangte chuan min hriat pui ve kher lo ania..” nui sang pah a han tih takah chuan Chhungte khaw tlangvalte pawh chuan ngawih an chuh ve ta a…
Keivawmhranga chanchin leh khaw dang danga a thil tih te hi tawngka a sawichhawn annih thin avang hian sawi dan leh hriat dan hi a in ang lo nual a; a then lahin amah an ko na hming dang dang te chu mi pakhat vek koh na ani tih hre lovin mi hran hran emaw an lo ti bawk nen..Unau thawnthu sawi mah a inang lo anti ani ngai a, thil mak ani hran lem love!!
A tuk khua a lo var chuan Keivawmhranga chu Buanzawl ata a thlen in ah chuan lawi lut lehin tukthuan an bar zawh hnu chuan hma lutuk lem lovah Chhungte khaw chhak lam a awm Hmar Lawitlang hnam peng pakhat tho Chawnchhim hnam ho lo sah chhuah, Chawnchhim khua (Tuna Champhai khua kan tih tak hi) lam pan a chhuah leh mai zai a rel leh ta a..
Chawnchhim khua hi Chhungte atang hian a hlat lutuk loh avangin Keivawmhranga pawh hi a hmanhmawh em em hran lova…Chhungte khua chu chhuahsan in Chawnchhim lam chu a pan ta a..Mahse, kawng lakah ruah nasa takin a rawn sur thut avangin chawlh lailawk te ngaiin duh ang in hma a sawn hlei thei bik lova…
Keivawmhranga'n Chawnchhim khaw lam a pan zan chuan Val Upa Vunpira chuan Chhungte tlangvalte'n buanzawl an rawn kai kim thep thawp ta maw tih ah chuan nui chhuak hawk hawk pahin," Nizan a in buan kan mikhual pa kha tunge anih in hria em? Tudang nilovin a chanchin nizan a bang lova in sawi chamchi Keivawmhranga ngei anih kha..." a han tih takah chuan Chhungte tlangval ho mak ti lutuk chu an chek tlawk tlawk ringawt mai a.. A hma zan a Keivawmhranga chungchang an sawi lai te kha ngai rum rumin koh kir theih chang se an ti hial a..Mahse, koh kir theih rual lovin hun in a liam pui tawh miau si a le..
Hnehsawh takin Keivawmhranga khan an zavaia a bin hrep theih an rinhlelh loh tehlul nen an lak a hnehna a chan tawk tawk dan te kha inngaitlawm leh hawihhawm an tiin entawn tlak an ti em em a...Keivawmhranga chungchang an sawi te kha han ngaihtuah let thin in thil pawi lutuk tur sawi a, a thin an lo ti rim lo te kha vannei an inti hial zawk a..Mahse, an thil hriat hauh loh erawh chu Keivawmhranga hi chutiang mai mai a rilru te leh thinrim hma Pasaltha ani lo tih hi ani...
Bung- 52
Rengpa Zamthatvunga lalna, a hunlai na na na chuan khaw lian ve pangngai tak, in za sawmhnih vel bawr nufa Chawnchhim khua atang chuan Tuahhniangi leh a fanu mal neihchhun nula tuaitir Buangzingi te chu hma takah an lo lam pan in an chhuak a…An lo hi midang zawng te ta aia hla anih avangin duh thal a hna thawk thei tur chuan zing hma tak a chhuah a ngai thin a…Buangzingi Pa hi Chawnchhim khaw pasaltha Zukhrianga ani a, Hmar Chhungte hnam niin Buangzingi pian hnu deuh awrh tih ah hian Chhungte khua atangin Chawnchhim ah an pem chho a.. Rengpa Zamthatvunga hi helai bial vel zawng zawng a roreltu ani…
Rim tak a hna an nufa te chauh a an thawh dun bawrh bawrh lai chuan chhun chaw an han fak zo chu Tuahhniangi chuan in lama tih tur pawimawh tak a neih a hrechhuak thut mai a…A fanu Buangzingi hnenah chuan,” Buangpui, in lamah tih tur pawimawh tak ka nei tih ka hrechhuak thut mai a, kan hlo thlawh lah chu a laklawh si a; kan kal hah ve ting tang tawh si nen, tuna kan pahnih a kan haw dun mai zawngin a hnu zel a kan hmabak a tam lutuk dah ang e..Ti hian ka lo va haw mai ang a, nang chu a chak zawk leh tharum nei zawk I ni tawh bawk a, kan thlawh bak hi lo thlo chhunzawm zel la, losul haw hun awm velah midang feh haw zui tur rawn zawngin khaw lam pan in I rawn haw ve mai dawn nia…” a ti ta a..Buangpuii pawh chuan a nu remruatna chu a pawm ve mai bawk a…
Losul haw hun awm vel anih chuan Buangpuii pawh chuan chumi ni a an thlawh fai tur chin an nufa a an bituk lawk chu engemaw zah a zo fel tawh a..Hna a thawk zo a hlo thlawh chem nen a an thlam a thu thlandai pah a a nu sawi ang a an khaw lam pan a haw ve mai zai a rel lai tak chuan an thlam bul lawk a thingkungah chuan sava mawi em em mai, nidanga a la hmuh ngai miah loh, a sen leh pawl lam deuh hi rawn fu in a hram lauh lauh mai a…
A hnu lawkah chuan an thlam thlang a thingkung dangah a thlawk thla a..Buangpuii chuan mawi a tih em avang leh a pian a hnu lama chutiang sava chu a la hmuh ngai miah loh avangin chu sava en chiang chak chuan an thlam chu a hlo thlawh chem nen chuan chhuahsan in a um zui ta a…Sava chu an lo thlang lamah chuan thlawk thla zel in a hnu lawkah chuan chu sava chuan thingkung pakhat a lo fu, chu sava ang chiah, mahse a hma ami a aia tlem a lian zawk leh rawng tak leh mawi zawk chu a zu fin a…Chung sava te pahnih chu an han inhmu chu mahni tawk a hlim dun em em ni awm tak hian an inchhai in an inhram chhawk hlarh hlarh a…
Buangpuii chuan chung sava nupa chu an nalh dun a tiin an inkara hmangaihna leh induhtawnna awm te chu mawi leh awhawm a ti em em a…Thingkung dang dang a an thlawk kual zel chu umzui zelin ram ngaw pil ril lamah an thlawk lut tawh ani tih reng Buangpuii chuan hre chang tawh lovin a suangtuahna khawvel ah ringawt chuan a cheng tawh a..
Thui fe a umzui hnu a a hmuh phak lova chung sava nupa te chu an han thlawh bo meuh chuan Buangpuii chu a harh chhuak zawk mai a, a chheh vel an en chian nak chuan a dinna lai vel hmunhma, mual leh ruam te chu a hriat ngai leh nidanga a kal tawhna hnu reng an ni tawh tlat lo mai…An thlam awmna lam ni awm a a hriat hawi zawng a a han kal ngial pawhin a kalna kawng chu a dik lo tulh tulh emaw tih mai tur ani tawh bawk si a, a hriat loh kar in a bo chu a ni ta reng mai le !!
Lungngaihna leh manganna namen lovin Buangpuii chu a tlak buak ta a, sava mai mai um zui a an thlam a chhuahsan kha a inchhir ngawih ngawih a, a nu thu ang khan khawiah mah peh hel kual vel lovin an lo kawng a hriat chian ah khan haw vang vang mai se atan a that tehlul nen tih te a ngaihtuah chhuak a; mahse inchhir in sawtna reng a nei tawh lova, se bo hnu a se kawng khar in awmzia reng a nei mawlh tawh si lo !!
Chung turnipui chu thlang kawlrawn ah a liam tep tawh tih a han hmuh ngat phei chuan Buangpuii chu a hma ai a let tam takin a beidawngin a mangang lehzual a…Chu zan chu atan a dam khaw chhuak ngat anih ngai chuan zan zawng zawng a zan rei ber leh manganthlak ber ani ngei dawn tih chu a hmuh hmaih hauh lo ani…Buangpuii beidawnna belhchhah tu ni awm hrim in ruah lah chu a rawn la hmi seng seng zui a…A sur tam ang tih mawlh chu a hlauh ber te zinga mi ani bawk…Chutia kal ngaihna pawh hre tawh lova beidawng leh lungzing taka a indawm kun reng lai a piah lawkah chuan engemaw ri a hre ta tlat mai le!!
Chu ri chu Buangpuii tan beiseina kawl eng rawn her chhuak tu tur nge ni ang a thihna ko tlanga hnuk lut tu tur zawk tih chu hriat a ni hauh si lo…
Chu ri rawn chhuahna lam chu fimkhur leh dim takin Buangpuii chuan a pan hnai a…Hetia fimkhur tak a chet lak a ngaihna chhan chu, a piah a ri chu eng thil siam nge? mihring nge ni ang a ramsa? Engmah belh chian phawt loh chuan hriat theih ani hauh si lo..Tin, mihring pawh lo ni tehreng se, an khaw mi te nge ni ang a khaw dang mi daih? thian nge an nih ang ral? Buangpuii pawh chu a ngaihtuahna a buai takzet in a insual nasa takzet tawh a…
A hnu deuh ah chuan zawi zawi a a va pan hnaih chuan chu ri chu mihring atanga rawn chhuak ngei ani tih chiang takin a hre thei ta a..Fimkhur tak a hnim buk kar atanga a bih thlak chuan mipa pathum hi tlem a hmun zawl lai deuh ah hian an lo chawl hahdam hi a lo ni a, mahse Buangpuii chuan an hmel vawi khat mah a la hmuh ngai loh danah chuan khaw dang mi anni tih chu a hrethiam nghal mai a…Tin, an han inbiak vel chuan an tawng hman chu a hrethiam lo mai nilovin chutiang tawng chu nidangah pawh vawikhat mah a la hre ngai hauh lo..Khualpang zin mai mai nge annih ang a ral hlauhawm? En a thlir ringawt chuan Buangpuii tan hriat chian ngaihna a awm si lo..
Bung - 53
Buangpuii chu uluk takin a han inngaihtuah a..An khaw kawng ah amah in a let leh thei tawh lova, kawng bo anih tawh avangin chung mi pathum te chu a va pawh ngawt te anih loh chuan zan ah ramhnuai ah amah chauh a a riah a ngai awm si a, ramsa hlauhawm tak tak te bakah an khaw mite’n an chungchang an sawi chawk phung leh ramhuai te an awm ngeiin a ring si a…A tan chuan thih leh thih ti a chung mi pathum te chu va pawh a an tanpuina dil mai chu dik leh tha ber a a hriat tak avangin a rilru pawh a siam fel ta a…
Buangpuii chu a birukna hnim buk phen ata chu chhuakin a thiam ang tawkin chung tlangval pathumte hnenah chuan Chawnchhim khua leh tui anih thu te, a nu nen a lova feh dun annih thu leh a bo dan te thleng chuan thaw hlawp hlawp chungin a han hrilhfiah a..Mahse chung mi pathum te chuan Buangpuii thusawi chu bengkhawn emaw hrethiam awm pawhin an lang meuh lova, an rilru ah chuan thil dang daih a awm anih hmel zawk tlat…
Rampalaileng a hnimbuk kar atanga rawn chhuak hlawl nula hmeltha em em mai chung tlangval pathum ten an han hmu thut mai chu an hamhaih hial zawk a…An han thlek kual vel a, zuitu emaw kal pui pakhat mah a neih hmel bawk si lo..Reilote hnu chuan midang tumah an hmuh belh tak lovah chuan hmeichhe amah a tla fal emaw kawng bo ngei ani tih chu tu hrilhfiah buai ngai lovin an hrethiam ve ta a…A hmeltha in nula tuaitir a ni bawk a, a ti tuai a lo nalh bawk nen chung tlangval pathumte rilru ah chuan hurna sual tenawm tak mai a rawn lut ta tlat mai le…
An pathum chuan in melh tawn zawk zawkin an tawng chuan engemaw an han sawi zauh a, mitmeng tenawm tak nen chuan an hma a a hlo thlawh chem nen chauh a ding nula chu an melh ta a..An zinga an hotu ni awm ber a lang pakhat chuan vawilehkhatah Buangpuii chu an zuan thut mai a, mahse an mitmeng leh thil tum hai bik hauh tawh lo Buangpuii chuan a chem ken chuan a dar ah tak a lo sat ve siah mai a, a dar a sat thler ve duai mai le…
Mahse mipa na na na chu hmeichhe tha in hneh ngaihna a awm lova, chu a chhapah pathum an la ni zui bawk nen….Chutia an hotupa a sah rual chiah chuan pakhat dang chuan Buangpuii chu rawn zuan ve nghalin a chem ken pawh chu a paihthlak sak nghal a…An zavaia bawhrawn in Buangpuii chu an sual tan ti tih chu a ni ta der mai!!
Buangpuii chu beidawng leh mangang takin a aw rawl neih zawng zawng nen theihpatawp in rampalaileng ah chuan a au lawm lawm a..Mahse “min chhan ru..” ti a hlauthawng leh mangang a Buangpuii khek lawm lawm ri te chu chulai ram ngaw dur khup hnuaiah chuan tumah lo chhawn tu awm thei hian a rinawm mawlh si lo!! Chu nula zet chu a va han khawngaihthlak tehlul em!!
Nasa tak a tal in a theihpatawp in thih tha nen teh meuh Buangpuii pawh a tang bawk a, chung tlangval koham tak te pawh chuan an duh ang chu an ti thei mai bik lo tlat..Buangpuii tang nasa lutuk chu a chau tawh takzet a, a tawp nan bei nge sei run dung ti a an au leh chiah chuan chhak lam kopang sang vak lo atang chuan tuemaw hi rawn zuang thla in an hotupa ber chu a rawn pet thal chiang kher mai!!
Tlangval dang pahnih te pawh chuan an thil tih tum lai chu an tawp chawt in an tho zawk mai a, chuveleh chu hun remchang chu chuh in Buangpuii pawh chuan a puan bih tla lek lek chu a siamtha zung zung ve bawk a… Buangpuii leh tlangval pathum te chuan kawng chhak lam atanga rawn zuang thla pa lam chu an han hawi rual thawt a….
An hma ah chuan tlangval hmeltha leh palian pangngai tak, kawng fek rat leh pian nalh em em mai, a pianhmung, hmel hmang leh lan dan atang ringawt pawh chuan mi chak leh huaisen ani tih tu hrilh hriat ngai hauh lovin a hriat theih hliah hliah a…
An hma a ding pa chu rawn tawng chhuak in,” Kha nula tuaitir kha thlah rawh u…” tih chiah hi a sawi a..Mahse tlangval pathum te chuan a thusawi ai mah chu an hma a ding tlangval thihna rim nam mitmeng rapthlak leh tihbaiawm tak, engmah tih hreh leh pawisak nei tawh lo tih chiang em em mawlh mai zawk chu ani en hrehawm leh hlauhawm an tih zawk chu ni…
A khawih hmasa tu a ka tan chuan ka chan a tha zawk mahna ti ni awm fahran in vawilehkhatah tlangval pathum zinga an hotu chan chang ber chuan a hma a ding tlangval chu a chempui nen a va zuan thut mai a, mahse a hma a ding pa chuan a hriamhrei neih pawh hmang ve duh lovin chiang em em mai hian hnar ruh tliak rawp khawpin a kut tum ngei mai chuan a lo hnek chawrh mai a..A hnar ruh tliak ri chu a ri no chawk mai…Chuveleh tlangval dang pakhat chuan rang takin a va zuan zui ve nghal a, mahse inring reng a an hma a ding tlangval lo awm chuan chiang em em in a nak nem ah tak mai a lo tlawh vir nawk mai a, a nak ruh auh thawt in thaw hlei thei lovin a hnang awl awl mai le !!
Chutah chiah chuan chung tlangval pathum te chuan an cho loh tawp tur tlangval an tawng fuh ani tih an hrethiam ta chiah a…Tun thleng hian a hriamhrei neih te pawh a la hmang duh lo ani a, an beih zel chuan an zingah nunna hlauh mual mual awm in an haw a ngai dawn ani tih an hmuh hmaih hauh tawh loh avangin rang tak leh hlauthawng bakleng in chulai hmun chu an tlanchhiat san ta a….
Bung - 54
Mittui parawl tuau chung leh a kam sir atanga thisen luang zawih zawih chunga ding reng nula chu rawn pan hnaiin tlangval chuan,”Hlau suh nula, tu man an ti na tawh lo ang che…A hrim hrim in eng vang a tun ang hunah te nang mah chauh a hetiang rampalailenga awm reng reng nge I nih a? Tu nge I hming ni a, khawi khua a cheng nge I nih?” a han ti a..
Nula chuan,” Ka hming chu Buangzingi ani a, Buangpui tiin min ko thin…Chawnchhim khua ka ni ngai e”..tiin a bo dan zawng zawng chu a hrilh ta a… A sawi tur zawng zawng a sawi zo tawh emaw tih hnu chuan a tawp nan rawn thaw chhuak halh in,” Anih nang tunge I nih a, khaw khua a awm nge I nih ve?” inthlahrung takin a han ti ve a…
A hma a ding tlangval chuan a hmingpum a hrilh chuan a chanchin khawi atang emaw mi ka atangin a lo hre tawh palh ang a, a hlauh mai palh a hlauh avang chuan,” Hranga ka ni ngai e, Vankal khua atanga khawchhak lam khua te fang tum a rawn zin ka ni…” a ti ta a..
Keivawmhranga chuan nichin a mi pathum te nen an inbeih lai khan chu nula tuaitir chu a lo la en chiang miah lova… A han enchian nak chuan a hma a ding nula tuaitir chu a hmeichhe hmuh tawh zawng zawngah chuan la hmeltha ber mai awm in a hria a…
Buangpuii hi a naupang ang aiin a nu lian em em a, Keivawmhranga hi Mizo mipa ah chuan palian pawl tak ani na in Buangpuii hian a bek a thleng pha hial a…
Keivawmhranga chuan Buangpuii chu en loh han tum teh mahse a sakruang leh kimtlang mawi lutuk mai te; a chawnban leh fuke invuah dik lutuk mai te; a biang leh hmui sen no set mai te; a mit hnuai chiah leh a hmui hnuailam sir a awm khuavang chhinchhiah a inhmeh zia te; a bahsam sei leh mawi tak mai chhemdam thlifim in a rawn chhem pah a boruak a leng siau siau mai te; a ngo zia leh a tituai no lutuk mai te a thlir ning thei mawlh lo ani…Khuanu in chu nula chu midangte aia uluk bik leh hmanhmawhna nei miah lova duh ang thal a mawi tak a a duan bik ni thei hial in a ring a…
Keivawmhranga mit ah chuan chu nula zet chuan Lasi nula hmeltha leh pianthiam an sawi zawng zawngte pawh a khum chiang hle mai!! ..Chutia a suangtuahna te kawl tin hmun tin a a len tir vel lai chuan a tum loh deuh chuan Keivawmhranga chuan mit tla lo lek chuan a lo thlir dauh dauh mai a..
A thil tih chu Buangpuii pawh chuan a hmuh hmaih bik hauh lo ani teh chek aniang chu, thinrim tak chung chuan,” Vawikhat misual lak a min chhan vang mai khan I thu thu a min siam I lo tum palh ang e…Nangni ang duh duh a khawih theih ka ni lo ania…Khang misual ho kha rawn kal lo ni la chuan keimah ringawt pawh hian ka sat hlum vek thei ta ve ang…Chawnchhim khaw Pasaltha Zukhrianga fanu ka ni ngai e..” a ti ve ta siah siah mai a..
Keivawmhranga’n chu thu chu an hriat chuan a nuih te lam lam a ti za lek lek a..Mahse mahni inring tawk leh chapo ve tawk tak hmeichhia anih dawn hi tiin a rilru a siam fel ta zawk a..Keivawmhranga chu rawn tawngchhuak leh in,” Aw le, ka lo hre reng tawh dawn nia…Hei keipawh in khaw lam kal tum tho chu ka ni a…Mahse I insawi dan angin in khaw kawng chu I hre bik tawh lo anih hmel bawk si a…In khaw zawn ni a ka hriat lamah hian kan kal dun chhin phawt mai dawn em ni ang? Khawngaihin min ring hram teh khai…I lakah rilru tha lo engmah put ka nei hauh lo ania..Tin, engti kawng zawng mah in ka ti na hauh lo ang che tih ka tiam e…” a tih takah chuan Buangpuii pawn duhthlan tur dang neiin a inhre bik lova, Keivawmhranga chu a zui ve ta chawt mai a…
Chawnchhim khaw zawn lam ni a an hriat kawngah chuan an kal dun zel a, unau hmel hai hun awm vel anih chuan an kalna thlang a thingkung pakhat hnuaiah chuan engemaw ri an hre ta tlat mai a…Kut zaizirin Keivawmhranga chuan Buangpuii chu bengchheng miah lo turin a han ti a, zawi zawi a a va pan hnaih chuan an thlanga thingkung rah lo tlan malh malh sakhi pachal lian tha tawk tak mai hi a hmu ta a…
Keivawmhranga chuan a fei ki bar hman thiam chu lek chhuakin rang tak maiin a han khawh zawk mai a; Keivawmhranga kutthlak a na ngang bawk a, chu sakhi pawh chu tlan hman lo lekin a vir nawk mai a, a thisen nasa tak a chhuakin a tal vial nghal nawk nawk mai bawk a…Keivawmhranga chuan va pan hnaiin a chempui chuan a hnuk a chat fel ta a…
A chhak atang chuan Buangpuii chuan Keivawmhranga chetla vel chu a lo thlir ve reng a..A mi zui pa chu pasaltha huaisen tak chu anih ngei dawn hi a ti rilru a…mahse engmah erawh a sawi zui hran lem lova..Keivawmhranga pawh chuan chutia rei tak a zin tawh hnu leh chawhmeh tur mumal pawh a neih tawh meuh loh lai a sakhi pachal an khawh hlum chu vannei a inti hle bawk a..
Bung - 55
Keivawmhranga chuan a sakhi khawh hlum chu a darah pu in Buangpuii nen chuan an kal dun zel a…Ruah lah chu a hma ai mahin a sur hnem tawh lehnghal a…Mahse, vanduaina zawng zawng an ta ani bik lo tlat!! Chutia Chawnchhim khaw lam ni awm an ngaih an pan lai mek chuan an chhak lamah chuan tute emaw lo ni awm tak leh thlam ni awm tak hi an hmu a…Beiseina kawl a rawn eng ve tan ta!!
Thlam ni awm tak an han hmuh chuan Keivawmhranga chuan,”Ti teh Buangpui, hei ruah lah chu a sur tam ang reng phian tawh lehnghal a, heti ringawt chuan khua kan thleng zo chuang lovang..Khilai thlamah khian zanin chu riak mai ila, hei ka sakhi put lah chu a sa chan ka duh tho bawk nen..Nang pawh I hah ve viau tawh a rinawm bawk a, hahchawl ve tawh la a tha in ka ring e…Ka buhfai pai te hi chhum in sakhi sa nen hian kan hmeh ang a, ka theih ang ang in tun ang hunah chuan thing ro vang tawh viau mahse kan fawm khawm ang e, vanneih a siamin kan mamawh tur awm tawk te chu khawi emaw hmun hul leh ro tha deuh ah te hmuh fuh tur a la awm mahna…chuan, a bak zawng chu kan rep tawh mai dawn nia..” ti a remruatna mumal taka a han siam takah chuan Buangpuii pawh chuan a thusawi chu awm a ti ve ani chek ang chu, a hnial buai duh hran ta chuang lova…
Thlam an han thlen chhoh chuan Keivawmhranga chu tih tur tul tul te ti zung zungin a buai chhunzawm nghal char char mai a… A sakhi khawh hlum chu han chan fel zung zungin zanriah an ei kham chuan an rep ta bawk a…Ngaihzawng chu sawi loh, neih in an pui loh an pian a hnu lam a la kawm ngai meuh lo ve ve anni bawk a, han inbiak dan tur leh sawi tur chu an van dun hle a…Tih tur a lo awm lutuk lem lo bawk nen mut zai chu an rel ta mai a..
Buangpuii chu thlam chhuatah chuan a mu a, zan boruak chu a vawt ang reng viau tawh avangin mut lum harsa a ti ang reng hle a..Chu a chhapah a damchhunga vawikhat mah a la hmuh ngai loh mipa nen loh theih lohna avangin tu thlam nge tih pawh hriat loh ah riah run an rem dun chu ani mai bawk si a, lungmuang tak leh thin thi zan in a muhil thei mawlh lo chu ani…Chutah le…thil mak tak mai a thleng ta tlat mai!!
Chutia vawt tih avanga muhil tha hlei thei lo chu a piah a mu ve Keivawmhranga chuan zawi muangin thim tham hnuaiah chuan a rawn pan ta du du mai a…Buangpuii chawn leh malpui vel chu a rawn zut chho ta a…Buangpuii hlau lutuk chu a khur tlawk tlawk tawh mai a, thlan fim in a bual zawih zawih tawh mai…A rilru te te chuan tanpui dilin han au vak dawn pawh ni se, an riahna bul velah chuan a aw hre phak thei tu tur tumah an awm a ring bawk si lova…A sa himna tur leh a manganna lak ata chhanchhuak thei tu tur a a lo beisei ruk ve ngawih ngawihin chutia a chunga a che duh tlat mai chu beidawnna,hlauhna leh mak tihna in Buangpuii chu a khat a…
Han au chhuah vak a tum lai tak chuan Keivawmhranga chuan a ka chu a kut chuan rawn hup bet tlat maiin hnehsawh takin a duh tawk chuan a taksa chu a tuai let ta vel mai si a…Tharum a ngah si nen, Buangpuii tan chet ve ngaihna hlawl a awm si lo… Nasa takin a tal a, a theihpatawp a thapui tak meuh meuh nen tan a han khawh takah chuan Keivawmhranga’n a kutphah a a ka a hup sakna chu a tal chhuak thei ta hram a…Chutah theihpatawp in ring mangkheng chuan a han au chhuak ta vak mai a….
Chutah tak mai chuan Buangpuii chu a harh chhuak ta hlawl mai a…Khua a lo var tan dawn der tawh hi a lo ni a…Thlan fimin a taksa chu a namen lovin a lo bual huh vek tawh a…A mutna ata chu a va hawi phei a, thlam bang ngheng a ngawi renga, a kut dinglama a fei ki bar hum reng chunga thu chunga lo muhil Keivawmhranga chu a va hmu ta a…Buangpuii pawh chuan nui sak chungin ama lu chu na vak lovin a han beng ri karh a…”Kei lah pui reuh hi a….Tawnmang mawl mai lo ni rengin..Chutiang mipa chu anih hmel mawlh love..” ti a nui vur vur chung chuan reilote chhin leh hlek tum chuan a mu zal leh ta a…
A tuk zing khawvar a Buangpuiin an awmna lai vel a han enchian nak chuan an riahna hmun vel chu a hrechiang thei ta a…A zan lamah khan khua a thim tawh em avang khan lo hmu chiang thei lo mai mai a lo ni a… Tukthuan hma taka an han ei zawh chuan an khaw lam pan a kal zai an rel leh ta a….
Zankhua a ruah a tlak reng avang chuan kal kawng vel te pawh chu a nal hle bakah a then lai te chu a tet deuh avangin kal fimkhur pawh a ngai hle reng a…Keivawmhranga chuan Buangpuii chu a hma lamah a kal tir a, a niin a hnung a dawl ve thung a..Chutia an kal dun zel lai chuan tlem a ko awih deuh hlek a an kal lai tak chuan kawng a lo nal bawk nen, Buangpuii chuan lei chu rap pialin thlang lamah chuan lum a rual ta thut mai le!!
Chutia Buangpuii kawng thlam lama a lum thut takah chuan a hnung a rawn kal ve zel Keivawmhranga chuan rang lutukin a zu umzui vat a…Buangpuii awmna a zu thlen thlak chuan Buangpuii chu an thlang khamah chuan a lo tla thla tep hi a lo ni reng mai a, a kut khinghnih chuan chulai a kham ko a awm thing zung lian tak ah chuan thei leh thei lovin a lo uai tang tawng tawng hi a lo ni a…Keivawmhranga’n Buangpuii awmna a zu thlen chuan Buangpuii hmel tha em em mai kar a beidawnna leh manganna inphum te chu a hmuh hmaih hauh lova; a lainat in duat tak a enkawl chu a chak in a thlahlel ngawih ngawih zawk ani..
Post a Comment