By: Isaac Zote
RECAP: A tuk zing khawvar a Buangpuiin an awmna lai vel a han enchian nak chuan an riahna hmun vel chu a hrechiang thei ta a…A zan lamah khan khua a thim taw hem avang khan lo hmu chiang thei lo mai mai a lo ni a… Tukthuan hma taka an han ei zawh chuan an khaw lam pan a kal zai an rel leh ta a….
Zankhua a ruah a tlak reng avang chuan kal kawng vel te pawh chu a nal hle bakah a then lai te chu a tet deuh avangin kal fimkhur pawh a ngai hle reng a…Keivawmhranga chuan Buangpuii chu a hma lamah a kal tir a, a niin a hnung a dawl ve thung a..Chutia an kal dun zel lai chuan tlem a ko awih deuh hlek a an kal lai tak chuan kawng a lo nal bawk nen, Buangpuii chuan lei chu rap pialin thlang lamah chuan lum a rual ta thut mai le!!
Chutia Buangpuii kawng thlam lama a lum thut takah chuan a hnung a rawn kal ve zel Keivawmhranga chuan rang lutukin a zu umzui vat a…Buangpuii awmna a zu thlen thlak chuan Buangpuii chu an thlang khamah chuan a lo tla thla tep hi a lo ni reng mai a, a kut khinghnih chuan chulai a kham ko a awm thing zung lian tak ah chuan thei leh thei lovin a lo uai tang tawng tawng hi a lo ni a…Keivawmhranga’n Buangpuii awmna a zu thlen chuan Buangpuii hmel tha em em mai kar a beidawnna leh manganna inphum te chu a hmuh hmaih hauh lova; a lainat in duat tak a enkawl chu a chak in a thlahlel ngawih ngawih ani..
Bung - 56
Chutia thing zunga Buangpuii lo uai reng a zu nangchin chuan hmanhmawh takin Keivawmhranga chuan a kai chhuak vat a, an hah duh bawk aniang an pahnih chuan an han thu khawmuang dun leh te te a..A khat tawkin engmah sawi lo chuan an in melh leh ralh thin bawk a..
A chhak a kawng pangngai an han pawh chho leh chu Keivawmhranga chuan,” Nizan lam ruah a sur nasat avangin kawng te hi an nal ang reng viau ania..” a han ti dek dek chu Buangpuii chuan,” Ka hria alawm kei pawn ..ka duh vang reng a lum thla ka ni bik hlei nem..A hrim hrimah I chhan kha ka phut lo asin maw le, mahni pawhin ka rawn inhai chhuak ve thei tho asin” a tih ve tak kher ah chuan Keivawmhranga pawh chuan a ruk a nui sak chungin a hma ang bawk khan a hnungah chuan a zui ve leh ta a…
Keivawmhranga chuan a rilru te te chuan,” Buangpuii chu a hmeltha in a duhawm tehreng nen tha tak a min biak hi a nei ngai si lova…Kawng lehlamah chuan awm lo hulhual chu ani bik love..A insawi dan hmangin a Pa Chawnchhim khaw Pasaltha hlun te a nih hmel bawk si a, an khua ah pawh mi awm thei ber leh nei nung ber te zinga mi ani dawn a, a chapo pui pawh hi a awm lo hran lem love…keini ang hmeithai fapa tehlul min han biak that viauna chhan tur a awm hran lo bawk em atin ni…A hmelthat dan, a kimtlang leh sakruang engkim mai a mawi dan em em te lah hi duh ang thal a tet te atanga ei tur tha tha a chawm len ani tih lah a chiang reng mai si a..Keini ang tan ve zawng ani lam hawi a suangtuahna han len chhin ringawt pawh a ngam awm si loh..Chan tawk leh phak tawkah lungawi zai rel mai nang e..” beidawng ru tak leh mahni leh mahni inhnem chawp chungin a ti nauh nauh a…
Chutia Chawnchhim khaw lam pan a an kal dun zel lai chuan thawklehkhatah Buangpuii chuan a aw han thian karh,” I hah tawh em?” tiin a han zawt a..Keivawmhranga chuan,” Hah love…” tih chauhin a chhang a..Engemaw ngaihtuah ni awm tak a a ngaih deuh vang vang hnu chuan Keivawmhranga bawk chu rawn tawng chhuak lehin,” Buangpui, min U duh lo anih pawhin khawngaihin min mawl biak tawh lovin Hranga tih talin min ko ve tawh la..” tiin zaidam takin a han ngen a…
Buangpuii lah pui reuh chuan,” Ka U nachhan tur che a awm lo em mai..I hmel han en reng rengin I upa bik vak lovin kei aiin kum hnih thum vel bakin I upat bik a rinawm loh a..Hranga tiin ka ko ang che..” a tih ve hmiah takah chuan Keivawmhranga pawh chuan,” Anih I thu thu ni mai teh se…engtin mah ka ti lui lovang che..” nui hawk hawk chungin a ti ve ta a…
Keivawmhranga chuan a rilru tak chuan Buangpuii chu huaisen a ti em em mai a..Rampalailengah an pahnih chauhin an awm dun a, duh ni se zawng mipa zawk leh tharum ngah zawk anihna angin duh tawk a kut a thlak theih dawn tehlul nen hlau bik miah lova a rilru a awm a duh duh a sawichhuak ve pap pap ngam mai te chu thinrim a hnekin Keivawmhranga chuan a ngaisang ru in a lawm em em zawk mai a..A rilru chuan," Pasaltha thisen kai dik tak zawng hai rual lovin anih ngei dawn hi.." a ti leh sap thin a...
An kal zel hnu chuan Chawnchhim khua pawh hnaih thawkhat viau tawh in ral atang chuan Chawnchhim dawhlung te pawh chu a lang thei tan tawh a..Ngawi reng a an kal dun lai chuan Keivawmhranga chuan a rukin Buangpuii chu an mitmei zauh a, chutih lai tak chuan Buangpuii pawh chuan a ruk a Keivawmhranga lo en a tum ve lai tak a lo ni kher bawk nen, tum loh lutuk mai a an mitmei an han intawng thut vanga an lai leh zak lutuk chu an hawi sawn rang kher mai…Sawi tur hre lovin puitling pui ni tawh ve ve si chu naupang chhia ang maiin an han lai dun leh vel thin a…
Mak tak zawng chu ani !! A ruk a tuma hriat lova in melhna hun a tam tehreng nen, kan hmel duh te leh kan ngainat zawng te kan han mitmei lai tak te hian anni pawhin min lo en ve lai chiah te hi ani duh em em lehnghal a…Intiam rual emaw tih mai tur kan ni thin…Tawngka in sawichhuak kher lo mahse mitmeng leh chezia erawh kan inthup thei chuang der si lo..Thu leh hla tam tak te aiin kan mitmeng te hian thu tam tak an sawiin kan hmel duh leh kan ngainat zawngte kan huat lohzia an lo puangchhuak nawn awn awn reng fo ani bawk thin si…
Buangpuii pawh chuan a suangtuahna te chu ram tin hmun tinah len tir velin a ruk tak chuan hmeltha a tih leh a ngainat em em mai bula awm chu nuam a ti em em mai hi a ni reng si a…” Aww..Hranga hi chu mipa dang ka hmuh tawh te nen inanna pakhat mah an nei lo mai ka ti!! Engtin pawhin tawngkhum in chhang mah ila, zaidam tak leh aw nem takin min chhangin min be thei zel mai si a..A tawngka ah lah mahni aia chak lo zawk te hmuhsitna emaw diriamna a nei miah bawk si lova…Mahse anni Pasaltha te zawng keini tan han phu leh cho rual anni si lo…Khuanu pawh hian hringfa te hi thlei bik neiin min siam thin emaw tih mai a va han awl tak em!!...” a rilru in a ti ngawih ngawih mai a…
A suangtuahna chu tiam chin awm meuh lova len tir thui zelin nimin lama Sava mawi leh dangdai em em mai nupa, nidanga vawikhat mah a la hmuh ngai loh; in ngeih tak leh in hmangaih hmel em em a hram dun lauh lauh a, a thiang ten boruak ah an han inzui dun delh delh mai te khan awmzia engemaw thuk tak neiin mak tak mai a a tawn thar Val nen a an hma khaw hun tur lo hril lawk tu ani thei hial mai ang em tih te a ngaihtuah hial a.. Nge ni a a suangtuahna vakvai in a hrin chhuah duhaisam fahrah, awmze nei lo leh tangkaina nei lo mai mai zawk?
Dik chiah chuan Buangpuii hian a hmuh chiah atang leh misualho kut ata a chhanchhuah chiah atang tawh khan Keivawmhranga hi a rukin a lo ngaina tawh in hmeltha a lo ti em em hi a lo ni reng a…A hmelthat mai bakah a pian thiam zia te chu a thlir ning thei mawlh lo ani..A kawng fek rat mai te leh a hmai a ser te chu mipa dik tak anih zia puangchhuak tu niin a hria a; a pian a hnu lam ah ani aia mipa pianhmang mawi tih reng reng a la nei ngai hek lo..Mi tam takin Pasaltha dik tak an lo tih thin chu Hranga ngei hi anih chu ring nghet bur tawhin a thinlung phek ah tuma nuai reh theih tawh loh tur in a lo ziak ve tlat tawh mai si !! Mahse a tan a Khuanu duan anih a ring ngam lo mai nilovin a beisei ngam hauh si lo…Khuanu ngei pawh hi a lo nunrawng ta viau nge khuanu remruat dan hringfa te hian kan hrethiam lo thin zawk ni ang le?
Mahse Keivawmhranga leh Buangpuii te chuan an induh tawn in an inngaina tawn ani tih reng an hre hauh si lova…An rilru chhungril a thil awm inhrilh tawn ngam tur lahin huaisenna an nei thlawt bawk si lo !! Hmangaihna lamtluang hi zawng a lo hahthlakin a lo buaithlak teh meuh chu anih hi maw…!!
Bung - 57
Chawnchhim khaw Reng lal Zamthatvunga hi Hrangchal hnam ani a..A then chuan Lawipa tiin an ko thin bawk…Reng Lal ropui tak anih mai bakah a vanglai na na na chuan Pasaltha huaisen tak ani bawk a…Zote ho pasaltha hmingthang leh an Lalpa ni bawk Hrihlera nen inthurualin heng hunlaia Champhai leh a chheh vel a cheng thin anni aia tam zawk Dawn hnam ho chu beiin an tukdawl a…Tiau chhak lamah an um darh vek ta hial reng a…He ta tang hian Rengpa Zamthatvunga leh Hrihlera te chu thian tha tak an lo ni chho ta zel a, tun thleng hian Lawitlang ho leh Zote ho chu unau angin an lo in en hlen phah ta nghe nghe ani…
Chawnchhim dawhlung Keivawmhranga leh Buangpuii ten an han pelh fel hnu chuan khua an lut ta a…Khaw dai atanga in hmasa ber an han thlen chuan Buangpuii chuan,” Hei hi kan in anih hi..A chhak lamah khian mi awm thei leh hausa tak tak chhungkua te an cheng hlawm a…An zinga i duh ber khi mikhual a thleng tur che in han ngen ta la..Nangni ang pasaltha te chu an lo thleng chak em em ang che tih ka ringhlel mawlh love…” tiin rang takin an inah chuan Keivawmhranga chu a luh san ta a…
Keivawmhranga’n Buangpuii te in a han hmuh chuan a thil hmuh chu mak a ti em em mai a..Buangpuii te in chu tlu leng leng niin a bang te chu a kaw tek tuk mai a…An inchung te lah chu a awngrawpin an inchhung chu ruah a sur tam deuh hlek phei chuan hul leh ro tur lai a awm meuh lovang tih mai tur hi ani a…Khaw khat pasaltha in atan chuan a mak in Buangpuii a hma a a lo ngaihdan nen kha chuan a thil hmuh chu a inperhsan kher mai !!
Buangpuiin an in a a lut chiah chu a nu chuan lawm lutukin mittui tla pur chungin a lo kuah vawng vawng mai a…”Engatinge nimin khan ka sawi ang khan I rawn haw mai loh? I va han mawl em em ve maw le..I thi tawh emaw te ka lo ti hial asin..Kei hmeichhia mai lahin keimah chauh chuan zanah han zawn ngaihna che a awm bawk si lo..Reilote min awm bo san chhung ringawt pawh khan ka ngai hman lutuk che asin..” lawm lutuk avanga kuah ngawih ngawih leh hauh inkawp chuan a fanu zan khat khua a rawn haw lo chu a lo dawngsawng a…
Buangpuii pawh chuan thil awm dan zawng zawng leh a bo thu te pawh chu a hrilh ve ta a..Amaherawhchu, a nu rilru natna leh rilru hahna belhchhah tu mai anih ringin Misual pathumin an lo khuaikhem tum dan leh Keivawmhranga’n a chhan dan te, thlam a ruah a sur nasat tawh avanga thlam a an riah dun mai thu te erawh a hrilh lem lova..Eng thil pawi mah thleng lo mahse a nu ngaih chu a tha dawn lo tih hria in thil engkim chu a ngial a ngan in a hrilh duh vek lova, thlamah chuan amah chauh a riak angin dawt var a hrilh ta ringawt mai ani…
Chutia an nufa a an titi dun lai tak chuan pawn lam atanga mipa aw in,”MIkhual in thleng thei ang em?” rawn ti ri hi an hre ta tlat mai a..Tuahhniangi chuan Chawnchhim khua a an ni aia mi tha leh neinung zawk thlen in atan an tam tehlul nen chutia anni mi pachhe lutuk in kher a thlen a rawn dil chu mak a ti em em in khawi lam mikhual tak ni ang maw a rilru te te chuan a ti a…Buangpuii tan erawh chu aw chu a vawikhat hriatna chauh ani tawh lem lo thung…
Tuahhniangi chuan tha taka lut tur a a lo chhawn takah chuan Keivawmhranga pawh chu a rawn lut zui ve nghal mai a…Tuahhniangi’n an in a thlen dil tlangval hmeltha tak mai a han hmuh chuan,” E khai tlangval, keini te ang michhe lutuk in ah I rawn thleng duh anih ngai chuan rawn thleng ta poh che..Mikhual chu tumah kan chhungkua hian kan hnar ngai hauh lo ania…Amaherawhchu, min hmuh theih ang hian kan chhungkaw dinhmun tur awm pawh I hrethiam ve mai ka ringhlel lova..Buhchangrum leh chawhmeh tuihnai tak tak te emaw Sa te chu hlui tur che engmah kan nei lo ania..” inthlahrung tak chungin a han ti a..
Keivawmhranga’n a chhan ve hma hauh chuan Buangpuii chuan rawn tawng khalhin,” Kan in a thlen a tul lo..A hmel en reng rengin khawi khaw pasaltha awm thei tak emaw anih hmel si a..Keini ang inah te chuan a thleng rei duh tak tak teuh lovang..Sa leh chawhmeh tuihnai tak tak hmeh pui tur kan nei lo tih a hriatchhuah hunah a ning leh emaw ani ang a; midang inah a insawn leh tingtang si chuan kan zak lutuk in tu hmel mah kan hmu ngam tawh lovang…Retheih tawh nak alaiin mi te min hmuhsit leh diriamna belhchhah tu tur mai ani dawn si a..Mi hausa leh mi awm thei thlen in atan han zawng zawk rawh..” a lo ti phawng phawng mai a…
Keivawmhranga chuan Tuahhniangi lam en chung leh nui var var chung chuan,” E khai ka pi, keini ang khual pang zin ve mai mai leh khualchhia te zawng in sawi ang mi hausa leh neinung te chuan a thlen pawh min thleng duh ve tawp nang..A thu hrimah chawhmeh tuihnai tak tak ei lo pawhin a puar ve lutuk theih tho zu nia…Hei, nizan lamah ka zinna kawngah Sakhi tlu sual palh kawng sir a lo let reng ka chhar fuh palh hlauh mai a…Nizan ka riahna ah a sa ka rep nghal nghe nghe a…hei hi ka cham chhung chuan kan ring mai dawn a lawm, chawhmeh lamah zawng a thlaphan awm love..” a han tih chuan Tuahhniangi chuan lawm tak a chhangin,” E khai Vala…keini dai kil kara cheng ve mai inah I rawn thleng ve duh ringawt pawh kan tan chuan a lawmawm em em tawh asin..Chu a chhapah, keini ang hmeithai nufa mai mai, Sa te min la barh dawn zui anih hmel lehnghal a, kan nihlawh kher mai ; Kkhual tha I lo ni reng zu nia…” lawm avanga hnuk ulh lek lek chung chuan a ti ta a..
Bung - 58
Buangpuii tan chuan a nu berin Keivawmhranga chu lawm tak a mikhual atan a lo pawm tak si avang chuan sawi theih dang awm hek lo le, eng dang mah sawi tawh lem lovin a tho chhuak lawk a, a nu hnenah chuan tuikhur lam a insil fai tur a a kal tur thu a hrilh ta a…Buangpuii a kal liam hnu chuan Tuahhniangi chuan Keivawmhranga hnenah chuan,” Ka fanu awm dan kha khawngaihin I hrethiam hram dawn nia..A la naupangin a la a ve si a, a rilru a awm awm hi sawi chhuak ve phawng phawng thin mi a lo ni bawk nen…
…..Buangpuii hian mipa han kawm ve deuh emaw thian ang chi hi a nunah a tetlai atang tawhin tumah a la nei ngai lova…Mipa a hriat ve chhun te lah amah namen lova diriam leh hmusit tu te an nih thin avangin Mipa zawng zawng hi amah ti nawmnah a hmusit tu tur vek a ngaihna a nei hial thin…A naupan lai atanga a nulat hnu thleng pawhin mipa amah hmusit tak a chhawnchhaih tu bak a la tawng ngai lo…Dik tak chuan a hma chuan hetiang ang a rethei hi kan ni ngai bik lova..Tun hma chuan Buangpuii Pa hi Chawnchhim khaw pasaltha ani ve thin a..Chawnchhim khua ah pawh a neinung ve ber pawl kan ni ve thin a…
…..Mahse kan pa in fam min chan san tak hnu khan kan dinhmun hi tlachhe ta in hmeithai nufa te kan lo nih takah chuan nasa tak a mi te diriam leh endawng kan lo ni chho ta a; Buangpuii hian a rilru chhungril tak chuan hrehawm ti thin hle mahse tawngka a engmah sawi chhuak ngai hauh lovin chhel takin a tuar thin a, ka rilru a nat hi a hlauh thin em avangin mi te elsen leh tawngkhum dan te pawh hi a ruk in a pai dam hram hram thin tih pawh a ruk chuan ka hmuh hmaih hauh bik lo..” lungchhe takin a ti ta a…
Chutah zet chuan thil awm dan engkim chu Keivawmhranga chuan a hrethiam ta chiah a…A hma zawng a Buangpuii chu induh leh chapo emaw a lo tih thin na te pawh kha a hriat chian loh vang mai a lo ni tih a hrechhuak ta a..A pa Zukhrianga pasaltha nihna te pawh kha a chapo pui nilovin a chhuan em em vang zawk a lo ni a; a chunga Buangpuiin chetzia a lan tir dan te pawh kha a nun a mipa a hriat ve chhun ten an hmuhsit leh diriam thin em avangin mipa dang amah ti nawmnah thin tute ang bawkin a lo dawngsawng ve zawk mai a lo ni….
Tuahhniangi leh Keivawmhranga chuan eng eng emaw sawi dun in Buangpuii insil haw chu an lo nghak a..Mahse thil engemaw duhawm lem lo tak a thleng ta tlat mai le !! Buangpuii insil haw chu Chawnchhim tlangval, hun rei tak ata amah lo beisei tawh tu khawbawl upa min fapa ni bawk Ngunthila leh a thuihruai panga te chuan an in kawtah chuan an lo nangching tlat mai a..
Ngunthila chuan hnehsawh leh diriam tak chung chuan,” Buangpui, kan run in sangah khiangawi in lo lawi tawh mai rawh..I taksa mawina leh I par rimtui tak te hi duhtawk a chen a tlan hlan ka nghakhlel tawh tak zet ania… I tan chuan keini ang mualkil mitha fapa ngat pasal ah neih theih te chu pheichham man tluk zet ani si a..Hetianga pasal nei lova i awm reng chuan I nu tan pawh phurrit I ni rei lutuk dawn e…I nu lah hmeithai mai niin in dinhmun hian engtik ah mah hma a sawn dawn der mai si lova..Ngawi reng a min zui a ka thu thu a I awm mai hi I tan pawh a finthlak zawk ta ve ang…” nui deuh bai bai chung chuan a han ti kher a.. An inbiakna zawng zawng chu in chhunga awm Keivawmhranga leh Tuahhniangi te pawh chuan an hre phak ve vek bawk a…
Ngunthila thusawi a han hriat chiah chuan Buangpuii thin a khei ta zar mai le,” E e eee..U Thil, eng chu nilovin engmah neih chu nei hauh lem lo mah ila, nangni ang hnathawk peih hlei lo, nileng leng a lu a vawkhriak mawm tak a inthih a leng zuar zuar ringawt hi enga tan mah ka ti hlei nem che u…Tin, tun hnu ah min hring tu ka Chunnu duhtak hi vawikhat mah hmusitna tawngkam chhak chhuak tawh ngai suh u…Hmuhsit leh diriam tur in duh tlat anih chuan kei hi in duhtawk in min tawngkhum thin dawn nia” a han tih takah chuan Ngulthil thinrim lutuk chu vawilehkhatah a sen in a sen nghal awk awk mai a..
Buangpuii chhanna avanga Ngunthila thinrim lutuk chuan Buangpuii chu a thu thu a siam tum chuan a banah na takin a pawt ta vak mai a…Chuveleh Buangpuii pawh thinrimna in tlakbuak ve tawhin pasaltha thisen kai tih takah Ngunthila hmai ah chuan a beng ve ta siah mai le…Ngunthila chuan,” E e eee, ka tang lui e..te I ti vel ani maw !! That e te a ka ko lai che khan lo kal mai mai la I nuam sa zawk tur hi ania..” tih pahin a hmaiah chuan patling tha chuan an beng ta tehreng a le… Buangpuii hmui veilam sir atang chuan vawilehkhatah thisen rawn luang chhuak nghal zawih zawihin lei ah chuan a vir let nawk mai a…
Chutah chiah chuan in chhung atang chuan Tuahhniangi chu a fanu a theih ang ang a rawn puih tumin a rawn tlanchhuak nghal a…Mahse, Tuahhniangi rang tak a thlen khalh tu leh an inkar a rawn dawk chhuak zawk mi pakhat a awm ta tlat mai le !!…Keivawmhranga chuan,” Ka pi, khawngaihin hahdam tak khan lo awm rawh..Keiman kan ching fel zawk ang e…” a tih takah chuan Tuahhniangi pawh a inbengdai ve thei ta a…
Ngunthila’n Keivawmhranga thusawi a han hriat chuan nuih za em em chung in,” Engtin maw I sawi a nauva..? Kha I hmel ka la hmuh ngai loh danah mikhual mai I nih ka ring a..I nunna chan I duh loh chuan Buangpuii nen a kan inkarah hian rawn inrawlh ve tawh suh…Chuti lo zawng I lu bung kha in khaw lamah ka thawn haw ang….” a han tih takah chuan Keivawmhranga pawn muang ban chap a chhangin,” Vawi tam ka sawi nawn tawh lovang, in zavai hian dam tak a mahni in lum a in la lawi leh duh te anih ngai chuan Buangpuii kha tha takin chhuah rawh u…” a ti ta chher chher mai a…
Bung - 59
Chutah le…ni danga la thleng ngai reng reng lo mak tak mai Keivawmhranga chungah chuan a thleng ta tlat mai le !! Engtiklai mah a inrinloh lai nei ngai lo Pasaltha chungchuang pawh hmangaihna in a tihbuai tawh chuan an lo inthlah dul ve palh thei tlat mai..Hmangaihna hi zawng, a lo makin a zunzam a a phuar beh tlat tawh hringfate hi nidanga an awm dan leh an mize pangngai ang lo takin a chet tir tlat thin si chu anih hi maw…
Chutia Keivawmhranga’n Ngunthila mit tak a en chunga thil a sawi lai tak chuan a inrinloh lai takin Ngunthila thuihruaite zinga mi pakhat chuan a hnunglam atangin a tukhum ah chuan thingfak in na takin a rawn hlap chawrh mai a..Keivawmhranga pawh a tlu ve tawp mai le..Chutia a tlu chiah chu a thuhruai dang pakhat chuan Keivawmhranga dull eh hmai vel ah chuan duhtawkin a rawn chhir zawt zawt mai bawk a..Pasaltha Keivawmhranga ngei pawh a hmai hmun thenkhat atang te chuan thisen a chhuak ve ta tlat mai le…
Chutah zet chuan tu ma dan rual loh leh engti kawng zawng mah a thup bo theih loh Hmangaihna bawk chuan chulai hmun ah chuan ro a rawn rel leh ta tlat mai a… A duh vang reng leh a lo tum lawk ni hauh lo mahse, Hmangaihna chuan Buangpuii chu insum theih hauh lovin a nawr lui ta tlat mai si a…Keivawmhranga lei a tlu tawh hnu Ngunthila thuihruai pahnih ten an chhir rawn lai tak chu rang takin Buangpuii chuan a va pawm chawt mai a,” Ni lo, ni lo…Ani hian kan buaina ah hian engmah inhnamhnawihna a nei ve lo…Ani hi chu kutthlak ve tawh lul suh u khai..In duh tawkin ka chungah in duh ang ang chuan che zawk mai rawh u…” mittui tla zawih zawih chunga Keivawmhranga hmai thisen kai lai te duat tak mai a a kut a a han hrukfai sak chuan tu sawi leh tuma hrilh buai ngai hauh tawh lo chuan Keivawmhranga chuan Buangpuii mit ah chuan a tan a hmangaihna thup rual loh chu a hmu ta…
Keivawmhranga chuan khawngaih em em a amah rawn kuah tu nula hmeltha em em mai chu a mitah tak en in,” Buangpui, lungphang reng reng suh..Tun chin ah chuan tuman an ti na tawh ngai lovang che tih hi ka tiam e…” tiin a hmui sir a thisen luang te chu a kut in lainat leh duat em em mai hian a han hrukfai sak a…
Keivawmhranga’n chutia a han ti chu Buangpuii chuan mur chuai chuaiin a inhria a..A thusawi te chu a tiril leh a taksa pumpui te chu a fan chhuak vek hian a hre hial a..Chutiang thil chu a damchhungin vawi khat mah a la tawn ngai loh avangin engnge a awmzia tih pawh hrethiam lo chuan a awm dan chu mak a inti hial zawk a…A thinlung thianghlim tak te chu zawi zawiin Hmangaihna chuan a rawn fan chhuakin awmhmun a rawn khuar ani tih reng a la hrethiam pha si lo…
Chutia Buangpuiin Keivawmhranga a va kuah a hmuh chiah chuan a hma ai mah a thinrim zual sauh in Ngunthila chuan a rawn pan hnai a,” E e eee..kan mi tenawm nu chu le !!…mikhual tlangval thlavang ka hauh a, khawlai dungah ka kuah e te I ti vel ani mai..” tih pah chuan a chhip samah a rawn kek tho ta lawp mai a…Buangpuii na ti lutuk pawh chu a te tuar tuar mai a…..Chutah tak chu Pasaltha diktak chu thinrimna meipui chuan a rawn tuam ta a….
Rang taka inperh tho zawkin Ngunthila thuihruai pakhat, thingfak a amah vawthlu tu chu chiang em em mai hian khabe ruh bal hawk khawpin a kut tum chang leh lian tak mai chu an dawn tir ta tehreng a…Pakhat zawk lah a ha hmai ah tak chiang em em mai a hnekin a ha hmai pahnih chu a bal rual thawt mai bawk a…an te chel chul ta mai…
A hma a ngunthil a leh a thuihruai pathum dang te lam chu hawiin,” In duh thlang fel rawh u le..Thih nge dam in thlan dawn tih chu in kutah awm rawh se…” a ti ta hmak hmak mai a..Ngunthila te thian za ho chuan thil dang zawng aiin chu mikhual tlangval mitmeng mawlh chu ani rapthlak leh en hrehawm an tih chu ni..Thihna rim nam leh engmah pawisak tawh lohna mitmeng ani tih chu an hmuhhmaih ta hauh lo le… Chutah chiah chuan an cho loh val an tawng fu ta ani tih hria in dam a chhuak lo tur mual mual chu an awm ngei dawn ani tih an hrethiam ta…
Pasaltha dik tak te pawh hian vawi khat chet sual palh te hi chu an nei ve vek thin a, mahse mipui vantlang leh pasaltha anga inchhal satliah te lak a an danglamna leh chungnun zawk chu vawikhat an chetsual palh tawhna an ti nawn leh ngai tawh lo tlat hi ani !! Bumna ngaiah bum theih anni tawh ngai bawk hek lo !!
Mahse tlawmngai lak lawh tawh Ngunthila chuan rang takin Buangpuii chu thlah in thinrim tak chung chuan a hma a ding Keivawmhranga chu a va bawh phei rawk a, mahse chet sual leh inrin loh lai nei tum tawh lo Keivawmhranga chuan Ngunthila chu chiang em em hian a ri no chawk khawpin a hnar ruh a lo hnek tliah sak rawp mai a..A hnar atang chuan thisen chu a buak in a baw zawih zawih mai a…
La duhtawk mai lovin Keivawmhranga chuan na lutuk tak mai hian Ngunthila chawn chu theihpatawpin a han pet ta tehreng a, Ngunthila dinna ke chu chiang fahran a vawilehkhata phet nghalin lei charah chuan hmai sawh dawt khawpin a tlu chawrh mai a…Keivawmhranga chuan rang lutukin a dul nemah tak mai chuan an chhir zui zawt zawt mai a, Ngulthila thaw hlei thei tawh lo chu a ang hlawp hlawp tawh mai a…
Ngunthila thuihruai pathum te, chechang ngam tawh lo chuan thil thleng chu ngawi rengin an en tlawk tlawk ringawt mai a…Chutah chiah chuan thil engemaw hriatchhuah nei ni awm takin a thuihruaite zinga mi pakhat Phingsena chuan ,” A hmai a ser saw..A hmai a ser saw…” tiin hlauh hmel em em in a te chhuak ta chel chul mai a..Rang takin an hotupa tlu sawp nuaih tawh chu pan in a va tlan phei a..Keivawmhranga chuan amah bei turin a rawn tlan phei emaw tiin inring rengin a lo awm a; mahse amah beih tum nilovin an hotupa kaihthawh chu a tum zawk ani tih a han hmuh takah chuan kut a thlak chhunzum duh bik ta lem lova…
Bung – 60
Phingsena chu a thian dang te pawh chuan rang taka rawn puibawm ve nghal vatin an thian dang na tih lutuk vanga lei a let reng te pawh an kaihtho zung zung a, chulai hmun ata chu rang takin an inthiar fihlim ta zawk a…
Chuveleh chuan Tuahhniangi pawh chu hmanhmawh taka a fanu Buangpuii lam pan a rawn tlan pheiin a fanu chu a rawn kuah chawt mai a…Lungchhe tak a tap hawm hawm in a fanu hnenah chuan,” Aw..i Pa kha chu la dam ni se chuan aw…heti em em hian miten min diriam in min hmusit lo tur…Ka fanu ka va han lainat tak che em !!..” tiin a kuah ta vawng vawng mai a….Chutia a fanu a kuah lai mek chuan Keivawmhranga lam chu rawn hawi pheiin,” He tlangval hi mi naran mai chu ani hauh lo mai…A chet dan te lah kha Pasaltha dik tak zia rang a pu si a..Kan mikhual pa hi tu tak ni ang maw?...” a rilru te te chuan a ti nauh nauh a… An buaina chinfel anih tak ah chuan Keivawmhranga pawh chu a thlen in lam luh zai chu a rel veleh ta a, a hnung ah chuan Tuahhniangi te nufa chuan zawi muangin an rawn zui dun ve bawk a…
Ngunthila te thian za ho hmanhmawh tak a an inthiar fihlim hnu chuan Ngunthila chu thinrim takin a han ding deuh chawt a,” Mi dawihzep ho !! Eng vanga khatianga hmanhmawh bak leng a min tlanchhiat pui nge maw in nih le? In hotupa duh tawk a min khawih lai te khan eng vangin nge min rawn chhan loh? …Thuihruai nep leh dawihzep tak ka lo nei che u anih hi..” a ti ta phiarh phiarh mai a..
Phingsena chu rawn tawngchhuak ve nghalin ,”Kan inthiar fihlim vat kha kan ham a tha zawk anih kha…chuti ni lo se khalai hmun atang khan nung dam a chhuak lo mual mual chu kan zingah hian kan awm ngei ta ve ang…Kan mi beih pa hmai kha in lo hmu lo em ni? A mitmeng tihbaiawm tak leh rapthlak zet mai te kha?...A hmai a sapui hamna ni awm tak ser te kha in lo hmuhhmaih palh aniang e…Kan beih pa kha tudang nilovin “Sapui Chaih Pasaltha” ngei kha a ni e…Dam a kan chhuak thei kha vannei hle ah in ngai ta che u…” a tih takah chuan Ngunthila hmel chu a dan in a dang ta hlawp hlawp mai a…
Ngunthila chu aw khur lek lek a rawn tawngchhuak leh in,” Kha kha maw Sapui chaih Pasaltha chu ni ngai a? Sairal Buan Pasaltha an tih thih bawk kha maw? Engatinge a hma hma khan min hrilh vat loh ni ? Tlem a tlem ah luchhum banchhum in kan haw lo chauh zawk anih chu…A thinrim vawrtawp kan tawng baw lo hlauh chu kan vannei kher mai…Ti teh u, zanin chu zanriah hma tak a eiin Buanzawl ah kai vat ila, kan Val Upa Huangpawrha kan hrilh thuai dawn nia…” a ti ta a…
Buangpuiin tlai lama ei rawng a bawl lai chuan a nu Tuahhniangi pawn va chhuak chuan a hma a fanu rawn tibuai tu te zing a mi Phingsena, an kawmchhak te in a lut tur chiah chu a va hmu fuh hlauh mai a…
Tuahhniangi chu rang taka an kawmchhak te inah chuan han kal in Phingsena leng lai chu a au chhuak ta a…Phingsena a rawn chhuah chuan Tuahhniangi chuan a thil hriat duh chu lo zawt nghal thuaiin,” Sena, nichin a Ngunthila hova in rawn kal khan kan mikhualpa hi tunge anih hria ni awm tak hmel I pu tlat in ka hria a…Tunge anih chiah min han hrilh ta che..Nichin khan I hmel leh I mit a hlauhna rawn lang te kha ka hmuhhmaih hauh lo asin…Mi hlauhawm tak kan lo thleng reng em ni ka hre duh ania..” a han tih chuan mak ti em em maiin Phingsena chuan Tuahhniangi chu a en ringawt mai a…
A chhang dawn ta lo emaw Tuahhniangi’n a tih hnu chuan rawn chhang leh si in,” In mikhualpa hi tunge anih pawh in lo hre miah nang e?..Tunge anih hrechiang hlei lovin in lo pawng paw thlen ve ringawt ani maw chu?…In hre daih tawh ang chu ka lo ti asin….A chanchin mi tam tak in an sawi fo thin Khualkai pasaltha hmingthang Keivawmhranga, thenkhatin Rengpa Chawilung Chawi Pasaltha emaw Sapui Chaih Pasaltha an tih bawk ngei kha ani e…” a han tih chuan Tuahhniangi mak ti lutuk chu sawi tur ber pawh a hamhaih hial a… Chutiang Pasaltha ropui leh hmingthangin an ni dai kil kar a hmeithai in ve mai thlenna atan a rawn thlang mauh mai chu mak a tiin a hrethiam thei mawlh lo zawk ani…
Zanriah ei vat vatin hma takin Ngunthila leh a thuihruaite chuan an khaw Buanzawl an pan nghal nalh a..Chuta lo awm an khaw Val Upa Huangpawrha chu an thil tawn leh an chunga thil thleng te chu an hrilh zung zung a…Thil thlen dan chu a nihna dik tak ang a hrilh ta lo chuan thudik chanve leh dawt chawhpawlh hmangin Val Upa Huangpawrha thin khei tur zawng tak chuan an phuahchawp ta a…
Tin,chu mai chu duhtawk lovin Keivawmhranga’n Chawnchhim tlangvalte an zavai a a cho zia leh eng atanmah a ngaih loh zia a sawi dan te nen lam chuan dawt muhlum chu an phuah belh ta bawk a…Chu thu a han hriat zet chuan Val Upa Huangpawrha chu a thinrim ta em em mai a…Engtin emaw tak Keivawmhranga chu thungrulh dan tur a ngaihtuah ta a…
Val Upa Huangpawrha chuan Buanzawl a Chawnchhim tlangvalte chu ko khawmin,” Zanin hian Sairal Buan Pasaltha an tih chu kan khua ah a rawn lawi lut ve tlat mai a..Zanin pawh hian kan khaw Buanzawlah a rawn kai chho ve ngei turah ka ngai a…Kan khaw Buanzawl kai pha chin tlangvalte zinga chak ber ber tur a ka ngaih mi sawm li ka thlang chhuak ang a, a mal te te in Keivawmhranga chu inbei zel tur ani ang…Mi tam takin an beih hnu chuan Keivawmhranga meuh pawh chu a lo chau in a lo hah ve lo thei dawn lova…A chauh chhiat viau tawh hnu ah a tawp ber na atan kan khaw inbuan chak Bangnghawra nen an inbeih leh chuan Sapui Chaih pasaltha meuh pawh chu mualpho takin a chak lo ngei ang tih hi ka ring tlat ani..” tiin ruahmanna vervek tak mai chu a siam ta a..
Bung - 61
Val Upa Huangpawrha sawi leh rin ang ngei chuan zanriah a ei kham fel hnu chuan Keivawmhranga pawh chu Chawnchhim khaw buanzawlah chuan a kai ve ta a..Tin, amah ang bawk hian khaw dang dang atanga mikhual rawn zin pathum dang hemi zan hian Chawnchhim khaw buanzawl ah chuan an kai ve bawk ani…
Keivawmhranga rawn lawi lut a han hmu chiah chu Val Upa Huangpawrha chu rawn ding chhuak hluaiin,” Chawnchhim tlangvalte u, hei le zanin chu mikhual tlangval engemaw zah kan khaw Buanzawlah an rawn chuangkai ve ani a..Kan lo buan fiam ve mai mai dawn em ni ang? Khawnge, a tir ber atan a chak hmel ber leh pumrua lian tha ber helaia kan thianpa hi I buan hmasa ber ang u hmiang…” tih pah chuan rum deuh tak mai hian Keivawmhranga chu a han melh kak a…Keivawmhranga pawh chuan khaw dang buanzawl a thil thleng thin ang bawk anih ringin tha takin inbuan tur chuan a lo inring lawk ve mai bawk a…
A tir a a buan mi pathum te chu Keivawmhranga chuan a hneh tawk tawk chauh a…Pathum a hneh tawh hnu chuan Val Upa Huangpawrha lam chu va en in a duhtawk tir ve mai tawh a ring a..Mahse, Val Upa Huangpawrha chu a lo nui sawi bai ringawt mai a…Chawlh lawkna awm miah lo leh hahdamna hman awm lek lova Keivawmhranga buan tu tur tlangval dang a koh chhunzawm leh zat tak ah chuan Keivawmhranga pawh a bik hek lo le, tu ma sawi leh hrilh ngai hauh lovin Chawnchhim tlangvalte thil tum chu a hrethiam ta vek mai a…
Keivawmhranga chu nui sak chung chuan a rilru te te in,” Ka cho chhuah ni bik tlat hek si lo le, engpawh thleng se ka thiam loh ani tawh bik lovah ngai ang..” a ti rauh rauh a… A hma a an rawn din tir apiang mai chu chiang fe fe hian a lo phawiin a lo bin zat zat mai a…
Chu zan zet chu Chawnchhim khaw buanzawl chu a ri dur dur a, khawvar hnu thleng pawh chuan buanzawl chu a khat tawk a nghing leh lawih lawih thin in a rik hian a la ri hluah hluah mai si a….Rengpa Zamthatvunga zing tho hma in a run in ropui tak atanga thawm ring tak a han hriat chuan a mutna atang chuan chu thawm chu khawi atanga rawn kal nge tih hriat chian tumin mak ti takin a beng a chhi dauh dauh a…A hnu deuh chuan thawm chu an khaw Buanzawl atanga rawn chhuak ani tih a hriat chian hnu chuan hmanhmawh takin an khaw buanzawl lam chu a pan ve ta a…
An khaw buanzawl a va thlen phei nak chuan an khaw tlangval tam zawk te chu Buanzawl chhuatah chuan an lo let pheng phung mai a, a then lo vial ngawih ngawih tawk lah bo lo…An khaw tlangval te zingah chuan pathum chauh ding an awm tawh a; tin, an hma ah chuan vawikhat mah a la hmuh leh hriat ngai hauh loh mikhual tlangval ni awm tak chu nui sang chungin a lo ding bawk a..Thil awm dan zawt fiah zui lem lo chuan Rengpa Zamthatvunga chuan a mithmuh ngei a thil thleng chu a en ve ta chawt ringawt mai ani…
A hma a ding tlangval pathum te chu chiang zet mai hian mikhual tlangval chuan a vawrh zawk zawk mai a…Tumah dingchang an awm tak lovah chuan kil khat atang chuan Chawnchhim khaw inbuan chak Bangnghawra chu Keivawmhranga bei tur chuan a rawn dingchhuak ta hluai mai a…Mahse, Pasaltha dik tak tih thinrim lak lawh tawh zawng Sapui chhaih kawlh ang vel ani miau mai si a le…
Chawnchhim khaw inbuan chak a an sawi Bangnghawra chu a hma ami te ai mah a hneh chiang zawk emaw tih mai turin a vawikhatna ah chuan chiang zet mai hian Keivawmhranga chuan a bin thum dawp mai a..A vawihnihna ah ngat phei chuan a hma ami te ai zawng zawng a chiang zawk turin Bangnghawra chu Buanzawl bang den nan a han hmang ta tehreng a le… Chawnchhim tlangvalte chu an Val Upa ho ho chuan mak tih lutuk vangin an ka hau mai a…A mit ngei a a thil hmuh chu Rengpa Zamthatvunga pawh chuan mak a ti in chutiang em em a mi chak chu a damchhungin a la hmu ngai bik hauh lo mai le…
Bangnghawra na ti lutuk vial ngawih ngawih chu a thian ten an lo kai tho thuai a…Val Upa Huangpawrha chuan chu zan atang chiah chuan Keivawmhranga chak zia a hrethiam ve ta chiah a; a hma a ding mikhual tlangval chu Huangpawrha chuan hringfate tan beih ve chi ni lo hial ah a ngai a….Midang han beih tir leh tur awm tawh chuang hek lo le, Huangpawrha pawh a var vek tawh tih ah chuan,” A tawk tawh e, I duhtawk ang u khai…” a ti chuai raih mai a…Chu zan zet chu Keivawmhranga thinrimna hi Chawnchhim khua te hian an tawng baw ve chiang hle ani..
An inbuan lai lo thlir ve reng tu Rengpa Zamthatvunga chu rawn tawng chhuak phawngin,” Huangpawrh, kha mikhual tlangval kha tunge maw anih ngai le? Ka khaw tlangval chak ber ber thlankhawm te he ti tak mai a hnehsawh tak a tukdawl tu hi vawikhat mah ka la tawng ngai lo..” a han tih chuan rang takin Huangpawrha pawh chuan a chhang ve nghal mai bawk a,” Rengpa zahawm tak, he tlangval hi tu dang nilovin Khualkai pasaltha hmingthang, Sapui Chaih Pasaltha emaw Sairal Buan Pasaltha an tih mai thin Keivawmhranga ani ngai e..” a han tih chuan Rengpa Zamthatvunga hmel a mak tihna chu lawmna ah a rawn inthlak thleng a….
Rengpa Zamthatvunga bawk chu rawn tawng chhuak leh in,” A thu hrimin kha ti zah zah tlangval khan mi pakhat chauh lehnghal, an bei chiam ngai em ni? Ka khua a thil thleng atan pawh thil zatthlak tak ani asin..” ti a Val Upa Huangpawrha a zawh takah chuan Huangpawrha pawh chuan thil awm dan leh Ngunthila te thian za ho in a hnena an sawi dan zawng zawng chu Rengpa chu a hrilh fai ta vek a…
Bung - 62
Rengpa Zamthatvunga chuan tun hma atang tawh in Ngunthila mizia a hriat avang leh a Pa Mualkil mitha anih vang mai a chapo thin anih zia te a hriat chian taw hem avang chuan Ngunthila te thian za ho chu a han koh tir a…Rengpa chuan Ngunthila hnenah chuan,” Val Upa Huangpawrha’n thil thlen dan a sawi te chu a dik ngei em?” a han tih chuan zak lutuk avanga sawi tur engmah hre lovin a ngawi reng ringawt tawh mai a…
Ngunthila atangin chhanna a hmuh tak loh ah chuan Phingsena lam chu hawi leh in,”Phingsen, nangin thil awm dan engkim chu min hrilh fai vek rawh..Chuti lo zawng nakinah ka hrechhuak leh si anih chuan in zavaia tan hian a pawi viau ang..” a han tih takah chuan Rengpa thinurna meuh han tawnbuak chu a ngaih ngam tak ngang loh avangin engmah zep buai tawh lo chuan thil engkim thleng dan zawng zawng leh a tir a thiam lo hmasa an nih zawk zia te nen lam chuan Rengpa chu a hrilh fai ta vek mai a…Val Upa Huangpawrha pawh Phingsena thusawi avang chuan lawm lo hle in chutia dawt muhlum tawp an lo hrilh avang te chuan a thinrim hle mai a…
Rengpa thinur lutuk chu a sen hian a sen tawn tawn mai a,” Mi dawihzep zia dik takTlangval inni lawm ni? Mal leh malin in bei ngam hlawl lo ani maw? Hmeichhia em ni innih? Hmeithai te hi ka hmusit e in ti ve khanglang a; hmusit leh diriam lova chhawmdawl tur zawk in ni asin…Ka khua leh tui innih pawh hi vawiin ni hian in Rengpa hi ka zak takzet ani…” In phu tawk hremna chu ka pe ngei ang che u…” a han tih chuan Ngunthila te thian za ho chu an chung a thil lo thleng tur hlau lutuk chuan an khur tlawk tlawk tawh mai a; tumah Rengpa lak a tawng ngam an awm tawh lo…
Chutah chiah chuan an piah lawk a ding tlangval chu rawn tawng chhuakin,” Ni love Rengpa zahawm tak, khawngaihin a theih hram chuan ngaidam hram rawh…Inhuatna hrim hrim vang nilovin inhriatthiam loh palh vang zawk anih ka ring e..” a tih takah chuan mak ti takin Rengpa leh Ngunthila te thian za ho pawh chuan Keivawmhranga chu an en ringawt mai a…Rengpa chuan,” I chakzia leh I huaisenzia te chu mi ka atangin vawi duai lo kan lo hre tawh thin a..Vawiin ni ah erawh I chak zia mai bakah I ngilneih zia leh I zahngaihna pawh kan lo hre ve ta e..Pasaltha chungchuang ngei chu I ni e…” chhuang tih hriat tak hian a ti ta a…
Ngunthila leh a thuihruaite pawh chuan Keivawmhranga’n an chung a zahngaihna leh khawngaihna a lan tir chu mak anti in zahthlak pawh an ti lek lek zawk a… An hma a ding mikhual tlangval chu tharum leh huaisen ah mai pawh nilo mihring mihrinna hrim hrim ah pawh an tluk loh zia an hrechhuak ta hial ani…
He mi ni atang hian Chawnchhim khaw tlangvalte hian Keivawmhranga hi inbuan ah tuman an cho leh tawh ngai lova; hringfate cho chi leh hneh theih chi reng niin an ngai tawh mawlh hek lo…Tlaivar zak mai a Chawnchhim khaw pumpuiin tlangval pakhat chauh an buan rawn chung pawh a tuman an hneh theih loh atang chuan Keivawmhranga pawn a hming tam tak te zinga pakhat a neih belh leh ta a..”Khaw Pum Buan Pasaltha” tih a lo ni ve leh ta ani…
Rengpa Zamthatvunga hi amah pawh a vanglai a pasaltha hrat khawkheng tak a lo nih thin avangin Pasaltha huaisen te hi a chawisang thin hle a…Keivawmhranga tea ng Pasaltha huaisen,chak leh hmingthang a khua ngei a a rawn lawi lut hi vannei a inti in a lawm em em a; Keivawmhranga chu a in a thleng turin nasa takin a sawm ta a..Amaherawhchu, Keivawmhranga erawh chuan mawi hnai tak leh hawihhawm tak a hnarin Chawnchhim khua a cham a tum tawh loh thu leh a kal tumna ber chu an khaw thlang lawk, Hrihlera lalna Zote khua anih zawk thu in a chhang ta a…
Chawnchhim khaw buanzawl atanga a thlen in lama a lawi chuan Tuahhniangi te nufa nen chuan tukthuan ngawi rengin an kil ho malh malh a..Keivawmhranga’n tukthuan ei zawh a a tum ram pan a kal leh zel mai a rilruk thu Tuahhniangi a han hrilh lai te pawh chuan Buangpuii chuan engmah sawi hran lem lovin a ngawi reng a… A hmel ah hlimna emaw lungngaihna emaw hmuh tur engmah a awm hran lem lo…
Tukthuan an ei kham chuan Keivawmhranga pawh chuan a Chempui leh Fei ki bar te chu keng felin Zote khaw lam pan chuan chhuah mai zai a rel ta a…An kawt thleng chu Tuahhniangi te nufa chuan rawn thlah liam ve in an nufa chuan an in lamah an inzui ve leh ta a….
Tlangval chak leh a vanglai hun tak hmang ani bawk a, tharum a ngahin khaw kar kawnga a ke pen te hi a chak thawkhat thei hle kha ani ngai a..Mahse, chu mi ni zet chu zawng a kal hlei thei lo chu ani ber mai e..Chawnchhim khaw lam a na lutuk a hip bet let tlat tu awm ang mai hian chu khua chu kalsan harsa a ti ngawih ngawih a, han cham leh mai te pawh chu a chak rum rum hial a…Amaherawhchu, Keivawmhranga hi mipa dik tak ani miau si a…Vawikhat a thil tum tawh laklawh chu a thlakthleng tawh mai mai ngai lova; hmeichhe pakhat vangin a rilru siam fel tawh sa sawh sawn erawh a tum tawh hauh lo thung..Mipa chuan a tih tur chu a tih tur ani tlat si ani !!
CHawnchhim khaw dawhlung a thlen phei te chuan hnung lamah Buangpuii chuan a rawn um zui mial em tiin a han hawi let leh vel thin a…Mahse tumah reng hmuh tur an awm si lo…Beisei hauh loh tur thil a lo beisei thlawn mai mai a lo ni !! Ngunthila te thian za ho te nen a an insual lai a Buangpuii mit a reilote chhung mah ni se atan hmangaihna awm anga a hmuh te kha a hmuh sual palh emaw mit vai mai em ni ta ang le? Nge ni ang a Khuanu hian a hringnun ah fiamthu nuihzatthlak lem lo tak a thawh zawk??
Bung - 63
Buangpuii te in lamah ve thung chuan ngawi rengin Buangpuii chuan inchhung tih tur tul ang ang te a ti mawlh mawlh thung a…A nu chuan a fanu awm dan chu ngawi reng a thlir in engmah sawi lo mahse a fanu rilru puthmang chu a hmuh hmaih hauh bawk si lo…A fanu chu a thil tih laiah chuan a rilru engmah a awm lo tih leh a rilru chu hmun dang dai ah a awm tih a han hmuh chuan Tuahhniangi chu rawn tawng chhuakin,” Buangpui, Kha tlangval kha I duh leh ngainat zawng tak ani tiraw…A hringtunu che ka nia, I pian tirh ata tawh nangmah hrechiang em em tu che ka ni bawk a; ka lakah chuan engmah zep buai duh hran suh, zep in awmzia a nei chuang lo ania..” a han tih chuan Buangpuii chu zak lutuk avangin a hmai ngo tak te chu vawilehkhatah a sen in a sent awn tawn mai a…Engmah erawh sawichhuak ngam lovin a hma ang bawkin a ngawi reng tho a…
Tuahhniangi chu tih ngaihna tak pawh hre tawh lova beidawng ni awm tak a thaw chhuak halh chung chuan,” Chutianga I ngai viau anih te chuan Zote khaw pan a a zin chhuak tur kha kan khaw dai thleng tal va thlah liam ta mai la ti nia…Hetia lungleng tak a awm ringawt hian engnge sawtna a neih?...” nui sang chunga a han tih chuan zak chung chung leh sen tawn tawn chunga a nu lam rawn hawiin Buangpuii chuan,” Mahse ka nu, Hranga te chu Pasaltha hmingthang tak niin an khua ah pawh a nei nung leh hausa ber te zinga mi ani awm sia…Keini ang tehlul cho phak ani bawk si lo alawm…Hringfa te hian eng angin duh mah ila van a thla leh arsite khi chu kan khawih phak thei chuang ngai dawn lo tih chu ka hria asin..” mittui tla lek lek chuan a han ti a…
Chu thu a han hriat chuan Tuahhniangi nuih chu a za ta deuh a, rawn nui chhuak hawk pah in,” Buangpui, kan mikhualpa kha tunge anih I lo la hre hauh aniang maw? Kan mikhualpa kha tudang nilovin khualkai Pasaltha hmingthang Keivawmhranga ngei anih kha… Keivawmhranga hi mi awm thei leh neinung chhungkua atanga rawn chawrchhuak ani bik lo asin..A hrechiang tute sawi dan chuan keini ang tho a hmeithai chhungkua atanga rawn sei lian ani a, an nufa hi a hma chuan an khua ah chuan mite diriam leh hmuhsit em em anni zawk thin asin…I dinhmun dik tak hrechiang tu amah lo chu tlangval tumah an awm bik kher lovang…”a han tih chuan lawm avanga a biangah mittui tla zawih zawihin hmanhmawh takin Buangpuii chu pawn lamah a tlan chhuak ta rawk rawk mai a…
Keivawmhranga chuan Chawnchhim khaw dawhlungte pawh chu kal pel tawhin zawi muangin a thlang lam mualah chuan a chhuk thla zel a…A khat tawkin Buangpuii a rawn lan mial takin tiin hnunglam a hawi leh zeuh thin a, mahse awmzia reng a nei si lo…Khuanu pawh hi hetianga a chunga nunrawng leh tur ni tho si hi engvangin nge Buangpuii nen chuan a lo intawn tir kher ni ang le? Lo inhmu lovin lo intawng lo law law zawk se a hahdam thlak ni mai tur !! Khuanu remruat dan hi chu hriatthiam a va han har tehlul em tiin a ngaihtuah rauh rauh a….
Mahse, hringfa te hian thil engpawh hi thinlung leh tih tak zetin kan duh tak tak anih chuan he khawvel leh a chhunga awm zawng zawng te pawh hian chu kan thil duh chu kan hmuh leh neih theih nan an theihtawp min lo chhuah pui reng thin a lo ni si !! Mi pahnih induh leh inhmangaih na na na chu mak tak maiin engtin tin emaw hringfa te hriatthiam phak leh sawi fiah thiam rual loh hian kan hringnunah kan intawng leh nawlh mai si thin… Chu ngei chu a lo ni dan rual hmangaihna ti a a sakhming an lo vuah thin chu ni !! Hmangaihna ah chuan ramri kham chin a awm ve mawlh si lo….
Chu Hmangaihna thiltihtheihna ropui tak mai chu ani Ramhuai, Phung, Khuavang leh Lasi te thiltihtheihna ai pawh a a let sang tam tak a chak zawk chu ni !! Ramhuai te leh Lasi te tih thaih zawh loh leh thlem thluk zawh hauh loh pasaltha hrat khawkheng pawh Hmangaihna chuan a zunzam ah a phuar bet ve ta reng mai chu ani si a le !! Hmangaihna tawnah chuan hringfa tumah hi lo tal chhuak thei reng kan lo awm hauh si lo !!
Keivawmhranga, Zote khaw lam pan a zawi muanga a kal mek lai chuan hla tak atang hian..”Hranga…” ti a rawn au ri ang deuh hi a hre ta tlat mai a…Kal kawnga a kal lai chu a ding deuh chawt mai a…Uluk tak a a han ngaihthlak chuan eng ri mah a hriat leh si loh avang chuan a bengchhe ri mai ni ah ngaiin kal zai a rel leh ta a..Chutia a kal leh tur chiah chu a hma ang bawk leh a ai a chiang zawk mahin..”Hranga..khawngaihin min lo nghak hram teh..” tih ri a hriat leh takah chuan a bengchhe ri mai nilovin Buangpuii aw ngei mai ani tih a hrechiang ta a…A rawn kalna kawng lama rang tak a a han hawi let nak chuan a ngaih leh thlakhlelh em em Buangpuii ngei mai chu hmanhmawh leh hah lutuk avanga thaw hlawp hlawpin a dinna lamah chuan a rawn tlan a…
Buangpuiin Keivawmhranga dinna bul a rawn thleng phei tep tih ah chuan vawilehkhatah a ding chawt mai a, Keivawmhranga mitah tak mai chuan chiang taka a mitmeng nalh tak mai chuan en kalhin thawklehkhatah chuan a mit mawi tak atangte chuan mittui rawn far zawih zawihin a biang no nalh takah te chuan a luang ngiai ngiai a…
Chutah le..engmah keivawmhranga’n a sawi hma hauh chuan Buangpuii chu a lam pan chuan a rawn tlan thut a, zah pawh dawn zo tawh lovin Keivawmhranga tangah chuan a rawn bei ta thlawp mai a,” Hranga, min ngaidam ang che…tunge I nih leh eng ang mizia nge I neih tih pawh hriat hmasak tum hauh lovin ka rin dan leh ngaihdan hmang ringawtin ka rilru ah thuthlukna ka lo siam fel a…I lakah ka tawngkam te ka thlahdah in he piallei a tlangval ka tawn tawh zinga mi zahawm ber mai chu i phu ang zahna chhete mah ka lantir bawk si lo che a...Khawngaihin a theih hram chuan min ngaidam mawlh ang che.. Mahse, i tan hian tling lovin phu hlawl lo che mah ila, nang ka ngainatna che leh ka duhna che hi ka thup zo tawh hlawl lova, awm leh mawi pawh ka dawn zo ta ngang lo anih hi…” tiin a mittui chu a tla zawih zawih mai a…
Keivawmhranga chuan duat tak a Buangpuii bahsam mawi tak mai chu chul heuh heuh pahin leh a bianga mittui luang te chu hruk fai sak pahin,” Buangpui, hrehawm ti reng reng suh..Nang hian ka lakah ngaihdam dilna tur chhe te mah i nei hlei nem..Keimah hi asin i ngaihdam ngai zawk chu ni..Khang in khaw tlangval koham tak te lakah khan veng zo lo che in i kianga ka awm reng chung pawhin kut hial an thlak hman si che a.…Nang ang reng a ka lunglairuk luah zo tu leh ka nunphung ti danglam thei tu hmeichhia hi an la awm ngai hauh lo asin…. Vawiin ni atang hian tuman I rilru leh i taksa hi tuman an tih nat sak tawh ngai lovang che tih ka tiam a; vawiin ni hian tun ata leh kumtluang atan thihna in min thenhran hma loh zawng I ta chauh ka ni kumkhua tawh tih hi kei Keivawmhranga hian ka tiam a che..” tih pah chuan duat tak maiin Keivawmhranga chuan Buangpuii biang no leh mawi tak mai chu a hmuiin a zu fawh sak zauh mai a..
Chutah zet chuan Buangpuii chu mur chuai chuaiin a hmulthi zawng zawng te chu ding chhuak vekin a hre hial a...Hei piallei ah hian awm tawh lovin an sawi Pialral ah chuan kai ta hialin a inhria a…Hei ngei hi a lo ni maw Hmangaihna an lo tih fo thin chu !! A tak a tawng ve lo leh hre ve lo tan chuan hringfate tawng a han sawifiah thiam rual ani si lo…
A hma lawk Buangpuii lungngaihna te leh a tahna te chu chawp leh chilhin namen lova hlimna leh lawmna ah a rawn inthlak thleng nghal a..Theih chang se zawng Keivawmhranga tangah chuan kumkhua atan thlamuang taka bei hlen vawng vawng hial mai chu a chakin a thlahlel a..Mahse chu zawng thil theih ani si lo….
Buangpuii chu rawn hawichhuak leh in,” Vawiin ni atang chuan U Hrang tiin ka ko thin tawh ang che…” nui sak chungin zawi te in a ti ta sap a….
”Engtiklai pawhin I tan ka lo invawng thianghlimin ka lo nghak reng thin ang che…Min han hre ve reng thin dawn nia..” a tih zawh hnu chuan Buangpuii chu mi te hmuh hlau tih hriat tak leh rang takin an khaw lam pan chuan a tlan let leh ta a..
A chhak kawng lang thei chin atanga chuan a tawp nan ti ni awm takin Keivawmhranga chu a mitmeng duhawm tak te chuan thlahlel em em in a rawn thlir leh hram a..Keivawmhranga pawn ngai em em chunga lo thlir let ve in an in mangtha thei ta hram a, hreh tak chung leh Buangpuii ngai tak chung si chuan mipa in rei tak kal a lo tum tawhna Zote khaw lam chu a pan ta a....
Read Next Chapter>>>
Read Next Chapter>>>
Post a Comment